Read new_tumbuka_bible 2 Samuele 8 Bible Online

2 Samuele 8 - new_tumbuka_bible bible

2 Samuele 8

¹Pamanyuma pa ichi, Davide wakarwaso nkhondo na ŵaFilisiti na kuŵathereska, ndipo wakapoka msumba wa Metagama kufuma mu mawoko gha ŵaFilisiti.

²Davide wakathereskaso ŵaMowabu, ndipo wakaŵalangula kuti ŵagone pasi mu mizere yitatu. Wose aŵa ŵakaŵa pa mizere yiŵiri wakaŵakoma ndipo wose awo ŵakaŵa pa mzere wa chitatu wakaŵareka ŵamoyo kwambula kuŵakoma. Ntheura ŵaMowabu ŵakazgoka ŵazga ŵa Davide na kwamba kupereka msonkho kwa Davide.

³Davide wakathereskaso Hadadezere, karonga wa charu cha Zoba, mwana wa Rehobu. Davide wakamuthereska para wakarutanga ku sirya kwa mronga wa Yufurate kuti wakakuzgireko muwuso wakhe.

⁴Davide wakamupoka Hadadezere ŵasilikari ŵakhe ŵakukwera mahachi ŵakukwana 1,700, ŵakwenda pasi ŵakukwana 20,000. Wakadumula misipa ya mahachi ghose agho ghakendeskanga magareta, kweni wakasidako mahachi ghanandiko ghakwendeska magareta 100.

⁵Para ŵaSiriya ŵa ku Damaseko ŵakiza kuti ŵamovwire Hadadezere, karonga wa ku Zoba, Davide wakakomapo ŵasilikari ŵa charu cha Siriya ŵakukwana 22,000.

⁶Ntheura Davide wakazenga mawumba gha ŵasilikari mu Aramu wa ku Damaseko ndipo ŵaAramu ŵakazgoka ŵazga ŵa Davide na kwamba kupereka msonkho kwa Davide. Ndipo kose uko Davide wakarutanga kuti wakarwe nkhondo, FUMU yikamupanga nkhongono kuti waŵathereskenge.

⁷Davide wakatora nguru za golide izo nduna za Hadadezere zikayeghanga ndipo wakiza nazo ku Yerusalemu.

⁸Davide wakatoraso mkuŵa unandi chomene kufuma ku misumba ya Beta na ku Berotayi uko Karonga Hadadezere nako wakawusangako.

⁹Toyi, karonga wa charu cha Hamati wakapulika kuti Davide wathereska ŵasilikari wose ŵa Hadadezere.

¹⁰Ntheura wakatuma mwana wakhe Yoramu kwa Karonga Davide kuti wakamutauzge na kumurumba chifukwa wakarwa nkhondo na Hadadezere na kumuthereska. Iyo wakachita ichi chifukwa Hadazere wakarwanga nkhondo kaŵirikaŵiri na iyo Toyi. Yoramu wakiza na vyawanangwa vya kupangika kufuma ku golide, siliva na mkuŵa.

¹¹Karonga Davide wakavipatuliskira kwa FUMU vinthu vyose ivi pamoza na siliva na golide uyo wakamupatula kale mweneuyo wakaskogha kufuma ku mafuko ghose agho wakaghathereska.

¹²Mafuko agho wakaghathereska kale ghakaŵa gha Edomu, Mowabu, Amoni, Filisiti na Amaleki. Ndipo vyose ivyo wakaskogha ku mafuko agha na ivyo wakaskogha kwa Karonga Hadadezere, mwana wa Rehobu wa charu cha Zoba wakavipatulira pamoza.

¹³Ndipo Davide wakajitorera lumbiri lukuru para wakati wawerako kuya kakoma ŵaEdomu,[7] ŵakukwana 18,000 mu Dambo la Muchere.

¹⁴Iyo wakazenga mawumba gha ŵasilikari mu charu chose cha Edomu ndipo ŵaEdomu wose ŵakazgoka ŵazga ŵa Davide. Kose uko iyo wakarutanga kuti wakarwe nkhondo, FUMU yikamupanga nkhongono kuti waŵathereskenge.

¹⁵Ntheura Davide wakawusa charu chose cha Israele ndipo wakeruzga ŵaIsraele wose mu urunji kwambula kutemwera.

¹⁶Yowabu, mwana wa Zeruya wakaŵa murongozgi wa ŵasilikari ndipo Yehoshafati mwana wa Ahiludi wakaŵa mulembi wa Midauko.

¹⁷Zadoki mwana wa Ahitubu na Ahimeleki mwana wa Abiyatara ŵakaŵa ŵasofi. Seraya wakaŵa mulembi.

¹⁸Benaya mwana wa Yehoyada wakaŵa murara pa ŵaKereti na ŵaPeleti, ŵavikiriri ŵa Davide ndipo ŵana ŵanarume ŵa Davide ŵakaŵa ŵarongozgi ŵa ufumu.