Read new_tumbuka_bible 1 Karonga 1 Bible Online

1 Karonga 1 - new_tumbuka_bible bible

1 Karonga 1

¹Karonga Davide wakachekura chomene ndipo nanga ŵakamudikiskanga mabulangete kuti wakathukiranga chara.

²Ntheura nduna zakhe zikati kwa iyo, “Ise taghanaghana kuti timupenjerani mwali, imwe karonga sekuru withu. Iyo wamuteŵeteraninge na kumupwerererani ndipo wagonenge pafupi namwe mwakuti muthukirenge.”

³Penepapo ŵakapenjapenja mwali wakutowa mu charu chose cha Israele ndipo ŵakamusanga Abishagi muShunemu, na kwiza nayo kwa karonga.

⁴Mwali uyu wakaŵa wakutowa chomene. Iyo wakamba mlimo wakupwererera na kuteŵetera karonga, kweni karonga kuti wakamumanya chara.

⁵Sono Adoniya mwana wa Davide, uyo nyina wakaŵa Hagiti, wakamba kujitukumura pakuyowoya kuti, “Ine ndine ndiŵenge karonga.” Penepapo wakajisangira magareta na ŵasilikari ŵakukwera pa mahachi ndipo ŵanthu 50 kuti ŵachimbirenge panthazi pakhe.

⁶Nanga Adoniya wakachita ichi, ŵawiske kuti ŵakamuchenyapo panji kumufumbapo kuti kasi wachitirachi chinthu ichi nanga ndi zuŵa limoza chara. Adoniya wakaŵa munung'una wa Abisalomu iwo ŵakadikana ndipo Adoniya nayo wakaŵa wakutowa chomene.

⁷Iyo wakapangana na Yowabu mwana wa Zeruya ndipo na musofi Abiyatara. Iwo ŵakazomera kumurondezga Adoniya ndipo na kumovwira kuti waŵe karonga.

⁸Kweni musofi Zadoki, na Benaya mwana wa Yehoyada, na nchimi Natani, Shimeyi, Reyi ndiposo na ŵavikiriri ŵa Davide kuti ŵakazomerezgana na Adoniya chara.

⁹Zuŵa limoza Adoniya wakapereka sembe za mberere, za mbuzi, za ng'ombe ndiposo na za ŵana ŵa ng'ombe ŵakututuŵa ku Libwe la Njoka pafupi na Eni Rogele. Wakachemerako ŵana ŵanyakhe wose, ndiwo ŵana ŵa karonga, ndiposo na ŵarongozgi ŵa mu mbumba ya ufumu ŵa mu charu cha Yuda.

¹⁰Kweni wakaŵavye kuchemerako nchimi Natani, Benaya panji ŵavikiriri ŵara ŵa Davide nanga ndi mwana munyakhe Solomoni.

¹¹Penepapo Natani wakaruta kwa Batisheba nyina wa Solomoni na kumufumba kuti, “Kasi wapulika kuti Adoniya mwana wa Hagiti wajiŵika yekha kuŵa karonga apo Davide sekuru withu wakumanya chara?

¹²Sono reka ndikuphalire urongozgi wane umo ungaponoskera umoyo wako na umoyo wa mwana wako Solomoni.

¹³Iwe urute mwaluŵiro kwa Karonga Davide, ndipo ukati kwa iyo, ‘Imwe sekuru wane karonga, asi ndimwe mukarapa kwa ine muteŵeti-kazi winu kuti Solomoni mwana wane ndiyo wati waŵenge karonga pamanyuma pa ine. Iyo ndiyo wati wakharenge pa chizumbe chane? Sono kwaŵa uli kuti Adoniya ndiyo wimikika kuŵa karonga?’ ”

¹⁴Sono apo iwe uchali kwenekura kuyowoya na karonga ine nane nditi ndizenge kuti ndizakakhozgere mazgu ghako.

¹⁵Ndipo Batisheba wakanjira mu chipinda cha karonga mweneuyo nyengo iyi wakachekura chomene. Abishagi mu Shunemu ndiyo wakamuteŵeteranga karonga.

¹⁶Batisheba wakasindama na kulambira karonga. Ndipo karonga wakafumba kuti, “Kasi ukukhumba vichi?”

¹⁷Batisheba wakati kwa iyo, “Sekuru wane, imwe mwekha mukarapa kwa muteŵeti-kazi winu mu zina la FUMU, Chiuta winu kuti, ‘Solomoni mwana wako ndiyo wati waŵenge karonga pamanyuma pa ine. Iyo ndiyo wati wakharenge pa chizumbe chane?’

¹⁸Kweni wonani sono Adoniya ndiyo ndi karonga ndipo imwe karonga sekuru wane mukumanya chara.

¹⁹Iyo wapereka sembe zinandi za ng'ombe, za ŵana ŵa ng'ombe ŵakututuŵa, za mberere na za mbuzi ndipo wachemerako ŵana wose ŵa imwe karonga, Musofi Abiyatara ndiposo na Yowabu murongozgi wa ŵasilikari. Kweni muteŵeti winu Solomoni walije kumuchema.

²⁰Sono karonga sekuru wane maso gha ŵaIsraele wose ghali pa imwe kuti muŵaphalire munthu uyo wati waharenge chizumbe chinu pamanyuma pinu.

²¹Usange mwareka kuchita ichi, para karonga sekuru wane wagona pamoza na ŵasekuru, mwana wane Solomoni na ine tizamukupimika nga ndi para tili ŵachigaruka.”

²²Apo Batisheba wakaŵa wachali kuyowoya na karonga, nchimi Natani wakanjira.

²³Ndipo awo ŵakaŵa na karonga ŵakati, “Nchimi Natani nayo wali pano.” Penepapo Natani wakanjira ndipo wakasindamira pasi panthazi pa karonga.

²⁴Ndipo wakafumba wakati, “Kasi imwe karonga sekuru wane muli kuphara kuti Adoniya ndiyo wakharenge pa chizumbe chinu pamanyuma pinu.

²⁵Pakuti muhanya uno waruta kuya kapereka sembe zinandi za ng'ombe, za ŵana ŵa ng'ombe ŵakututuŵa, za mberere na za mbuzi. Wachema ŵana wose ŵa karonga, murongozgi wa ŵasilikari, na musofi Abiyatara. Ndipo sono ntheura, ŵakurya, na kumwa pamoza na iyo na kuyowoya kuti, ‘Uŵe na umoyo utali Karonga Adoniya!’

²⁶Kweni ine nda muteŵeti winu, pamoza na Zadoki musofi, Benaya mwana wa Yehoyada, ndipo na muteŵeti winu Solomoni walije kutichema.

²⁷Kasi ichi ndicho karonga sekuru wane wachita kwambula kuphalira ŵateŵeti ŵakhe kuti ŵamanye munthu uyo wati waharenge chizumbe pamanyuma pa karonga sekuru wane?”

²⁸Penepapo Karonga Davide wakati, “Muchemani Batisheba kuti wize.” Batisheba wakanjira na kwimilira panthazi pa karonga.

²⁹Ndipo karonga wakarapa wakati, “Nkhurapira mwa FUMU yamoyo yeneiyo yikandiwombola mu visuzgo vyane vyose

³⁰nga ndi umo nkharapira kwa iwe mu zina la FUMU, Chiuta wa Israele, kuti mwana wako Solomoni ndiyo wati waŵenge karonga pamanyuma pa ine na kuhara chizumbe mu malo mwa ine, muhanya uno ndicho ndichitenge nadi.”

³¹Penepapo Batisheba wakasindamira pasi na kumulambira karonga, ndipo wakati, “Karonga, sekuru wane Davide, waŵe na umoyo utali!”

³²Sono Karonga Davide wakati, “Muchemani musofi Zadoki, nchimi Natani na Benaya mwana wa Yehoyada.” Ŵanthu aŵa ŵakiza panthazi pa karonga.

³³Karonga wakati kwa iwo, “Torani ŵateŵeti ŵa ine sekuru winu ndipo mumukwezge mwana wane Solomoni pa mbunda yane na kuruta nayo ku Gihoni.

³⁴Sono kwenekura musofi Zadoki, na nchimi Natani wakamuphakazge mafuta kuŵa karonga wa Israele. Pamanyuma mukalizge mbata na kuyowoya kuti, ‘Muŵe na umoyo utali imwe Karonga Solomoni!’

³⁵Sono imwe mukamurondezgenge pamanyuma apo mukwiza kuno kuti wizakakhare pa chizumbe chane. Iyo ndiyo wati waŵenge karonga mu malo ghane. Pakuti ine ndamkusankha kuti waŵe karonga wakuwusa charu cha Israele na cha Yuda!”

³⁶Sono Benaya mwana wa Yehoyada wakati kwa karonga, “Ameni! Rekani icho karonga wayowoya chiŵenge icho FUMU Chiuta walangula.

³⁷Nga ndi umo FUMU yanguŵira na sekuru wane karonga ntheura ndimo yiŵireso na Solomoni ndipo yikuzgireko ufumu wakhe kuruska ufumu wa sekuru Karonga Davide.”

³⁸Penepapo musofi Zadoki, nchimi Natani, na Benaya mwana wa Yehoyada, ŵaKereti na ŵaPeleti, ŵakaruta ndipo ŵakamukwezga Solomoni pa mbunda ya Karonga Davide na kwiza nayo ku Gihoni.

³⁹Kwenekura musofi Zadoki wakatora lusengwe lwa mafuta kufuma mu hema, ndipo wakamuphakazga Solomoni kuŵa karonga. Pamanyuma wakalizga mbata ndipo ŵanthu wose ŵakati, “Muŵe na umoyo utali imwe Karonga Solomoni!”

⁴⁰Ndipo ŵanthu wose ŵakaruta kumurondezga munyuma uku ŵakulizga ŵafyoliro, na kusekerera na chimwemwe chikuru chomene kufika pakuti charu chikandindima.

⁴¹Sono Adoniya na ŵanthu wose awo wakaŵachema ŵakapulika kamphomezi aka pa nyengo iyo ŵakamarizgiranga chakurya cha chikondwerero chawo. Ndipo Yowabu wakati wapulika kulira kwa mbata wakati, “Kasi kupoma uko kukupulikikwa kufuma ku msumba nkhwa vichi?”

⁴²Uku wachali kuyowoya Yonatani mwana wa musofi Abiyatara wakafika. Ndipo Adoniya wakati, “Njira, pakuti ndiwe munthu wakwenerera ndipo wiza na uthenga uweme.”

⁴³Yonatani wakamuzgora Adoniya wakati, “Yayi nadi, ndiza na uthenga uweme chara pakuti karonga sekuru withu Davide wamwimika Solomoni kuŵa karonga.”

⁴⁴Ndipo karonga watuma musofi Zadoki, nchimi Natani, Benaya mwana wa Yehoyada, ŵaKereti ndipo na ŵaPeleti pamoza na iyo, ndipo ŵanthu aŵa ŵamukwezga Solomoni pa mbunda ya karonga.

⁴⁵Sono musofi Zadoki na nchimi Natani ŵamuphakazga mafuta kuŵa karonga pa Gihoni. Kufuma kwenekura ŵakwenda uku ŵakusekerera ndipo ŵanthu ŵa mu msumba nawo ŵapokerera. Sono mphomezi iyo mukuyipulika njeneyiyi.

⁴⁶Solomoni sono ndiyo wakhara pa chizumbe.

⁴⁷Ndiposo nduna za karonga zangwiza kuti zirumbe sekuru withu Karonga Davide pakuyowoya kuti Chiuta winu wathuwuske zina la Solomoni kuruska zina linu na kukuzga chizumbe chakhe kuruska chinu. Karonga Davide nayo wangusindama pa chitara chakhe na kuromba.

⁴⁸Iyo wakayowoya kuti, “Warumbike FUMU, Chiuta wa Israele, mweneuyo wazomerezga maso ghane kuwona yumoza wa mphapu yane kuhara chizumbe cha ufumu wane muhanya uno.”

⁴⁹Ŵanthu wose awo ŵakachemeka na Adoniya, ŵakati ŵapulika ichi ŵakopa chomene ŵakawuka na kuchimbira.

⁵⁰Ndipo Adoniya nayo wakamba kopa Solomoni. Ntheura wakaruta ku Nyumba ya Chiuta kuti wakakore masengwe gha jochero.

⁵¹Sono Solomoni wakaphalirika kuti, “Adoniya wakumopani imwe Karonga Solomoni ndipo waruta ku Nyumba ya Chiuta uko wakorera masengwe gha jochero, na kuti, ‘Karonga Solomoni warape kuti wandikomenge na lupanga chara ine na muteŵeti wakhe.’ ”

⁵²Sono Solomoni wakati, “Usange iyo wangajirongora kuŵa munthu wamagomezgeko na nchindi, nanga ndi sisi lakhe limoza pera liti liwenge pasi chara. Kweni usange uheni uti usangike mwa iyo, wati wafwenge nadi.”

⁵³Ntheura Karonga Solomoni wakatuma ŵanthu kuti ŵakamutore Adoniya, ndipo wakamufumyapo pa jochero. Ndipo wakiza na kupereka nchindi kwa Karonga Solomoni. Penepapo Solomoni wakati kwa iyo, “Ruta ku nyumba yako.”