Read new_tumbuka_bible 1 Karonga 10 Bible Online

1 Karonga 10 - new_tumbuka_bible bible

1 Karonga 10

¹Para fumukazi ya ku Sheba yikapulika za lumbiri lwa Solomoni lwa kuthuwuska zina la FUMU, yikiza kuti yizakamuyezge pakumufumba mafumbo ghanonono.

²Fumukazi yira yikiza ku Yerusalemu na wumba ukuru wa ŵanthu na ngamila izo zikayegha vyakununkhira, golide munandi, ndiposo na mawe ghakuzirwa. Para yikafika kwa Solomoni, yikamuphalira vyose ivyo vikaŵa mu mtima wakhe.

³Karonga Solomoni wakazgora mafumbo ghakhe ghose, ndipo pakaŵavye na chimoza icho chikamutonda kuti wandulire fumukazi.

⁴Para fumukazi ya ku Sheba yikawona vinjeru vya Solomoni na nyumba ya ufumu iyo wakazenga,

⁵vyakurya ivyo vikaŵa pa thebulu lakhe, kakhaliro ka nduna zakhe, kimiliro ka awo ŵakamuteŵeteranga na vyakuvwara vyawo, ŵateŵeti ŵakhe ŵakuperekera vyakumwa ndiposo na sembe zakocha izo wakaperekanga ku Nyumba ya FUMU, yikathika lusoko.

⁶Fumukazi yira yikati kwa karonga, “Nvyaunenesko iyo nkhapulikanga mu charu chane vya milimo yinu na mahara ghinu.

⁷Kweni ine nkhavigomezga chara mpaka ndiza ndekha kuti ndiwone na maso ghane. Nanga ndi hafu wa ivi kuti ŵakandiphalirapo chara. Mahara ghinu na usambazi winu vikuruska vyose ivyo nkhapulikanga.

⁸Ŵakutumbikika mbanthu ŵinu na ŵateŵeti ŵinu awo nyengo zose ŵakwimilira panthazi pinu na kupulika vinjeru vyinu.

⁹Yirumbike FUMU, Chiuta winu, mweneuyo wakucha namwe ndipo wamuŵikani pa chizumbe kuwusa ŵaIsraele. Chifukwa chakuti FUMU yikuŵatemwa ŵaIsraele muyirayira, wamwimikani imwe kuŵa karonga wawo kuti muŵawusenge na kuŵeruzga mu urunji.”

¹⁰Penepapo fumukazi yira yikapereka kwa Karonga Solomoni makilogiramu 4,000 gha golide, vyakununkhira vinandi chomene, ndiposo na mawe ghakuzirwa. Kukaŵavye vyakununkhira vinyakhe vyakuyana na ivyo fumukazi ya ku Sheba yikapereka kwa iyo.

¹¹(Ndipo ngaraŵa zinandi za Karonga Huramu zikiza na golide kufumira ku charu cha Ofiri. Zikizaso na makuni gha muŵanga na mawe ghakuzirwa.

¹²Na makuni gha muŵanga, karonga wakapanga mizati ya Nyumba ya FUMU na nyumba ya ufumu. Wakapangaso mabango na viding'indi vya ŵimbi ŵa zisumu. Makuni gha muŵanga gha ntheura ghalive kwizamoso nanga nkhuwonekamoso mpaka na muhanya uno.)

¹³Karonga Solomoni wakayipa fumukazi ya ku Sheba vyawanangwa ivyo vikuperekeka kwakuyana na kaluso kawo ndiposo na vyose ivyo yikakhumba na ivyo yikaromba. Pamanyuma fumukazi yira yikawerera ku charu cha kwakhe pamoza na ŵateŵeti ŵakhe.

¹⁴Chirimika chilichose Karonga Solomoni wakapokeranga uzitu wa golide wakukwana makilogiramu 23,000.

¹⁵Golide munyakhe Solomoni wakapokeranga kufuma ku msonkho wa ŵamalonda ndiposo na ku ŵakaronga wose ŵa mu Arabiya na nduna za mu Israele.

¹⁶Karonga Solomoni wakafura nguru zikuru zakukwana 200 za golide. Mu nguru yiliyose mukanjiranga golide wakukwana makilogiramu ghankhonde na ghaŵiri.

¹⁷Karonga Solomoni wakafuraso nguru zichokozichoko zakukwana 300 za golide ndipo mu nguru yiliyose mukanjiranga golide wakukwana makilogiramu ghatatu. Solomoni wakaziŵika nguru zira mu chinyumba cha mu nkhorongo ya mu Lebanoni.

¹⁸Karonga wakapangaso chizumbe cha minyanga ya zovu ndipo wakachiphaka na golide mwenecho.

¹⁹Chizumbe chira chikaŵa na makwerero ghankhonde na limoza ndipo pachanya pa chizumbe chira apo wakeghamirangapo pakaŵa pa zingirizgika kumanyuma kwakhe. Chizumbe chikaŵaso na vyakweghamirapo uku na uku vyakuŵikapo mawoko ndiposo vithuzithuzi viŵiri vya nkharamu pa vya kweghamapo vira.

²⁰Pakaŵaso vithuzithuzi vya nkharamu 12 pa makwerero ghankhonde na limoza. Chithuzithuzi cha nkharamu yimoza chikaŵa ku umaliro wa khwerero lirilose. Kukaŵavye na ufumu uliwose uwo ukaŵa na chizumbe cha ufumu cha ntheura.

²¹Vyakumweramo vyose vya Karonga Solomoni vikaŵa vya golide pera, ndiposo viteŵetero vyose vya mu nyumba ya ufumu ya mu nkhorongo ya ku Lebanoni vikaŵa vya golide mwenecho. Mu nyengo ya Solomoni siliva kuti wakapimikanga nga kanthu kakuzirwa chara.

²²Pakuti karonga wakaŵa na ngaraŵa izo zikarutanga ku charu cha Tarishishi na ŵateŵeti ŵa Karonga Huramu kamoza mu virimika vitatu vilivyose. Ngaraŵa zira zikizanga na golide, siliva, minyanga ya zovu, ŵapusi na viyuni vya visukupiko vitali ivyo vikujitukumura.

²³Pa chifukwa icho Karonga Solomoni wakaruska ŵakaronga wose ŵa mu charu cha pasi mu usambazi na mu mahara.

²⁴Ndipo ŵanthu ŵanandi ŵa charu chose cha pasi ŵakizanga kwa Solomoni kwizakapulika mahara ghakhe agho Chiuta wakamupa.

²⁵Chirimika na chirimika waliyose uyo wakizanga kwa Solomoni wakamuyegheranga chawanangwa nga ndi viteŵetero vya siliva, golide, vyakuvwara, mahomwa gha nkhondo, vyakununkhira, mahachi na mbunda.

²⁶Ntheura Karonga Solomoni wakawunjika magareta na mahachi ghanandi. Iyo wakaŵa na magareta 1,400 na mahachi 12,000 ŵeneawo wakaŵaŵika ku misumba ya kusungiramo mahachi ndipo ŵanyakhe wakaŵasunga mu Yerusalemu pamoza na iyo.

²⁷Mu nyengo ya kuwusa kwa Karonga Solomoni, siliva wakaŵa munandi chomene mu Yerusalemu nga ndi mawe ndipo makuni gha milanje nagho ghakazara nga ndi makuni gha vikuyu mu vidika.

²⁸Mahachi gha Solomoni ghakachemeskekanga ku Eguputo ku mwera na ku Kuwe ku mpoto, ndipo ŵamalonda ndiwo ŵakizanga na mahachi na magareta agha.

²⁹Wakagulanga gareta limoza kufuma ku Eguputo pa mtengo wa ndarama za siliva 600, ndipo hachi pa mtengo wa ndarama za siliva 150. Ŵamalonda ŵara ŵakaguliskanga ku ŵakaronga wose ŵa ŵaHiti na ŵa ŵaSiriya.