Read new_tumbuka_bible 1 Karonga 12 Bible Online

1 Karonga 12 - new_tumbuka_bible bible

1 Karonga 12

¹Rehobowamu wakaruta ku msumba wa Shekemu pakuti kwenekura mafuko ghose gha ku mpoto ghakaruta kuti ghakamwimike iyo kuŵa karonga.

²Para Yerobowamu mwana wa Nebati mweneuyo wakaŵa kuti wachimbilira ku Eguputo chifukwa chakumopa Karonga Solomoni, wakati wapulika za makani agha, wakawerako ku Eguputo.

³Ŵanthu ŵa ku mafuko gha ku mpoto ŵakatuma ŵanthu kuti ŵakamucheme Yerobowamu. Ntheura Yerobowamu pamoza na wumba wose wa ŵaIsraele ukiza kwa Rehobowamu ndipo ŵakayowoya kwa iyo ŵakati,

⁴“Ŵawiskemwe ŵakatinyekezganga na goliwoli lizitu chomene. Ntheura sono mupepuskeko milimo yinonono na uzitu uwo ŵakaŵika pa ise, apo ndipo titi timuteŵeteraninge.”

⁵Rehobowamu wakazgora wakati, “Muwere danga mwakuti mundipe nyengo ya mazuŵa ghatatu mwakuti ndighanaghanepo pa ichi.” Ntheura ŵanthu ŵara ŵakawerera.

⁶Ntheura Karonga Rehobowamu wakadumbiskana na ŵararaŵarara awo ŵakateŵeteranga ŵawiske Solomoni apo wakaŵa wachali wamoyo. Ndipo wakaŵafumba wakati, “Kasi mungandipa urongozgi uli uwo ndingamanya kuŵazgora nawo ŵanthu aŵa?”

⁷Ŵararaŵarara ŵara ŵakamuzgora Rehobowamu ŵakati, “Usange mukuzomera muhanya uno kuŵateŵetera ŵanthu aŵa na kujizgora kuŵa muteŵeti wawo, ndipo na kuŵayowoyera mazgu ghaweme, iwo ŵati ŵamuteŵeteraninge kwa muyirayira.”

⁸Kweni urongozgi uwo ŵakamupa ŵararaŵarara ŵara wakawukana ndipo wakaŵafumba ŵawukirano awo ŵakakulira pamoza nayo ndipo ŵakamuteŵeteranga.

⁹Iyo wakaŵafumba wakati, “Kasi mungandipa urongozgi uli uwo ndingamanya kuŵazgolera nawo ŵanthu awo ŵakuyowoya kwa ine kuti, ‘Mupepuskeko uzitu uwo ŵawiskemwe ŵakaŵika pa ise?’ ”

¹⁰Ŵawukirano awo ŵakakulira pamoza nayo ŵakati kwa iyo, “Ŵanthu awo ŵakayowoya kwa imwe kuti, ‘Ŵawiskemwe ŵakatinyekezganga goliwoli lizitu chomene, kweni imwe mupepuskeko goliwoli lithu.’ Imwe mukaŵazgore kuti, ‘Kamunwe kane kachoko aka nkhakomi kuruska chiuno cha ŵadada.

¹¹Ŵadada ŵakamunyekezganinge goliwoli lizitu, kweni ine nditi ndisazgirengeko ku uzitu ura. Ŵadada ŵakamulanganinge na vikoti, kweni ine nditi ndimulanganinge na ŵakalizga!’ ”

¹²Ntheura Yerobowamu pamoza na ŵanthu wose ŵaIsraele ŵakiza kwa Rehobowamu pa zuŵa la chitatu nga ndi umo karonga wakayowoyera kuti, “Mukizeso kwa ine pa zuŵa la chitatu.”

¹³Karonga wakaŵazgora ŵanthu ŵara na ukari chomene pakuti wakakana urongozgi uwo ŵararaŵarara ŵara ŵakamupa.

¹⁴Karonga Rehobowamu wakaŵazgora kwa kuyana na urongozgi uwo ŵawukirano ŵanyakhe ŵara ŵakamupa ndipo wakati, “Ŵadada ŵakamunyekezganinge goliwoli lizitu, kweni ine nditi ndisazgirengeko. Ŵadada ŵakamulanganinge na vikoti, kweni ine nditi ndimulanganinge na ŵakalizga.”

¹⁵Ntheura karonga kuti wakaŵapulikira ŵararaŵarara ŵara chara, pakuti chinthu ichi chikafumira kwa FUMU mwakuti ghafiskike mazgu agho FUMU yikayowoya kwa Yerobowamu mwana wa Nebati mwa nchimi Ahiya wa ku Shilo.

¹⁶Para ŵaIsraele wose ŵa ku mpoto ŵakamanya kuti Karonga Rehobowamu wakana kuŵapulikira, wakamuzgora wakati, “Kasi tili na phande uli mwa Davide? Tilije nanga nchiharo mu mwana wa Yese. Imwe ŵaIsraele, rutaninge ku mahema ghinu. Iwe nawe Davide, sono ujiwonere wekha vya mu nyumba yako.” Penepapo ŵaIsraele wose ŵakawera ku vikaya vyawo.

¹⁷Kweni ŵaIsraele awo ŵakakharanga mu misumba ya mu charu cha Yuda, Rehobowamu ndiyo wakaŵawusanga.

¹⁸Para Karonga Rehobowamu wakatuma Adoramu, mweneuyo wakaŵa murara pa nchito ya kuchichizga kuti warute ku ŵaIsraele, ŵaIsraele wose ŵakamudinya na mawe ndipo wakafwa. Ndipouli Karonga Rehobowamu nkhongono zikawereramo ndipo luŵiro wakakwera gareta lakhe na kuchimbilira ku Yerusalemu.

¹⁹Ntheura ŵaIsraele mbakugarukira mbumba ya Davide mpaka sono.

²⁰Para ŵaIsraele wose ŵakati ŵapulika kuti Yerobowamu wali kuwerako kufuma ku Eguputo, ŵakamutumira uthenga wakumuchemera uko ŵakawungana. Kwenekuko ŵakamwimika kuŵa karonga wakuwusa ŵaIsraele wose. Kukaŵavye muIsraele na yumoza wa ku chigaŵa cha ku mpoto uyo wakarondezga ufumu wa Davide kweni ŵa fuko la Yuda pera.

²¹Para Rehobowamu wakafika ku Yerusalemu, wakawunganya vigwe vya ŵasilikari 180,000 vya fuko la Yuda na la Benjamini kuti vikarwe nkhondo na ŵaIsraele ŵa mu chigaŵa cha ku mpoto awo ŵakamugarukira mwakuti viwerezgereso ufumu kwa Rehobowamu mwana wa Solomoni.

²²Kweni mazgu gha Chiuta ghakiza kwa nchimi Shemaya ghakati,

²³“Umuphalire Rehobowamu mwana wa Solomoni, karonga wa charu cha Yuda, ŵaYuda wose ndiposo na ŵa fuko la Benjamini kuti,

²⁴‘FUMU yikuti mureke kuruta kuya karwa nkhondo na ŵaIsraele, ŵabali ŵinu. Munthu yose wawerere ku chikaya chakhe pakuti chinthu ichi chafumira kwa ine.’ ” Ntheura ŵakapulikira mazgu gha FUMU na kuwerera ku vikaya vyawo kwakuyana na languro la FUMU.

²⁵Yerobowamu wakazengaso msumba Shekemu mu mapiri cha Efurayimu ndipo wakakhara mwenemumo. Kufuma kura wakaya kazengaso msumba wa Penuyele.

²⁶Nyengo yinyakhe Yerobowamu wakaghanaghana mu mtima wakhe kuti, “Ufumu wane uwu nyengo yinyakhe panyakhe uti uwererenge ku mbumba ya Davide.

²⁷Usange ŵanthu aŵa ŵati ŵarutilire kuya kapereka sembe zawo mu Nyumba ya FUMU ku Yerusalemu, mitima yawo yiti yiwerere kwa sekuru wawo Rehobowamu, karonga wa charu cha Yuda. Pamanyuma ŵati ŵandikome na kuwerera kwa iyo.”

²⁸Karonga Yerobowamu wakati wafumba urongozgi, wakapanga vikozgo vya ŵana ŵa ng'ombe viŵiri vya golide ndipo wakati ku ŵanthu, “Imwe mwa ŵaIsraele mwenda chomene ku Yerusalemu kuya kasopa. Sono aŵa ŵachiuta winu awo ŵakamufumiskani mu charu cha Eguputo.”

²⁹Ndipo chikozgo chimoza wakachiŵika mu Betele ndipo chinyakhe ku Dani.

³⁰Ndipo uku kukaŵa kwananga uko ŵaIsraele ŵakachita. Ŵanthu ŵakarutanga kuya kasopa vikozgo ivi ku Betele na ku Dani.

³¹Yerobowamu wakazengaso nyumba pa malo gha pachanya ghakusoperako ndipo wakimika ŵasofi kufuma mu ŵanthu wose awo kuti ŵakaŵa ŵaLevi chara.

³²Ndipo Yerobowamu wakimika zuŵa la chiphikiro kuŵa pa zuŵa la 15 la mwezi wa chinkhonde na chitatu la kuyana waka nga ndi zuŵa la chikondwerero icho chikachitikanga ku charu cha Yuda. Pa jochero la ku Betele wakaperekanga sembe ku vikozgo vya ŵana ŵa ng'ombe ivyo wakapanga, ndipo kwenekura wakaŵikako ŵasofi kuti ŵateŵeterenge mu malo gha pachanya ghakusoperako agho wakazenga.

³³Pa zuŵa la 15 la mwezi wa chinkhonde na chitatu, zuŵa ilo wakalisankha iyo yekha Yerobowamu wakaperekanga sembe pa jochero ilo wakazenga ku Betele. Mwa ntheura wakimika chiphikiro kuti ŵaIsraele ŵaŵenge nacho chiphikiro ndipo iyo wakarutanga ku jochero lira kukapereka vyakununkhira.