Read new_tumbuka_bible 1 Karonga 14 Bible Online

1 Karonga 14 - new_tumbuka_bible bible

1 Karonga 14

¹Pa nyengo yeneyira, Abiya, mwana wa Karonga Yerobowamu wakarwara.

²Sono Yerobowamu wakati ku muwoli wakhe, “Iwe uwuke, urute ku msumba wa Shilo. Ujibise kuti na yumoza wangakumanyanga chara kuti ndiwe muwoli wane. Nchimi Ahiya yili kwenekura yeneiyo yikandiphalira kuti ndiŵenge karonga wakuwusa ŵaIsraele.

³Pakuruta uyegheko vingwa khumi na vingwa vipapati ndipo na uchi mu mphindi. Iyo wamkukuphalira icho chiwengeko ku mwana uyu.”

⁴Penepapo muwoli wa Yerobowamu wakachita vyose ivyo wakaphalirika na kuruta ku Shilo ndipo wakafika pa nyumba ya nchimi Ahiya. Pa nyengo iyi Ahiya wakalaŵiskanga makora chara chifukwa wakaŵa muchekuru chomene.

⁵Sono FUMU yikati kwa nchimi Ahiya, “Wona muwoli wa Yerobowamu wakwiza kuti wizakafumbe za mwana wakhe uyo wakurwara. Ntheura ndikuphalirenge ivyo wizamkumuyowoyera. Sono apo wakafika wakajizgora nga ndi mwanakazi munyakhe.”

⁶Para nchimi Ahiya wakapulika bundi la malundi ghakhe, apo wakanjiliranga pa muryango wakati, “Njira muwoli ŵa Yerobowamu. Wajibisirachi pakuchita nga ndiwe chara pakujizgora nga ndi mwanakazi munyakhe? Ine ndili na uthenga uzitu chomene kuti ndikuphalire.

⁷Ruta ukamuphalire Yerobowamu mufumu wako kuti: FUMU, Chiuta wa Israele wakuti, ‘Ine nkhakusora na kukukwezga kufuma mukati mu ŵanthu wose na kukwimika kuŵa murongozgi wakuwusa ŵanthu ŵane ŵaIsraele.

⁸Ine nkhagaŵa pakati ufumu wa mu mbumba ya Davide na kukupa iwe chigaŵa chimoza. Kweni iwe waŵa nga ndi muteŵeti wane Davide chara mweneuyo wakasungilira marango ghane ndipo wakandipulikiranga na mtima wakhe wose. Wakachitanga ivyo vikaŵa viweme pera panthazi pane.

⁹Kweni iwe wachita uheni kuruska wose awo ŵakaŵapo kale uchali undakhare pa chizumbe cha ufumu. Iwe wajipangira ŵachiuta ŵanyakhe, na vikozgo vyakusongonora. Ntheura wandavyira ku ukari ndipo wanditaya kunyuma zako.

¹⁰Pa chifukwa ichi, nditi nditorere uheni wose pa mbumba yako iwe Yerobowamu. Ndipo nditi ndikome mwana yose mwanarume wa mphapu yako, muzga panji mwanangwa mu charu chose cha Israele. Nditi ndiŵamare nkhanira ŵa mu mbumba yako nga ndi umo munthu uyo wakochera ulongwe, ŵasuke ŵamare wose petu.

¹¹Ndipo yose uyo ngwa mbumba ya Yerobowamu uyo wafwirenge mu msumba, ncheŵe ndizo ziti zimuryenge. Ndipo yose uyo wati wafwire kuwaro kwa msumba, viyuni vya mudera ndivyo viti vimuryenge.’ ” Pakuti ntheura ndimo yikuyowoyera FUMU.

¹²“Sono iwe werera ku nyumba yako. Para wamkukanda waka mu msumba, mwana wako wamkufwa.

¹³Ndipo Israele yose wati wamulire, na kumusunga mu dindi. Iyo ndiyo waŵenge yekha wa mbumba ya Yerobowamu, mweneuyo wati wasungike makora chifukwa ndiyo yekha pera mu mbumba ya Yerobowamu mweneuyo FUMU, Chiuta wa Israele wali kusangamo cha kumukondweska.

¹⁴Ndiposo FUMU iyoyene yiti yimikenge karonga kuti wawuse ŵaIsraele mweneuyo wati wamare mbumba ya Yerobowamu. Zuŵa ilo ivi vitichitikire ndi muhanya uno. Nadi ndi sonosono.

¹⁵FUMU yiti yilange ŵaIsraele, ndipo wati wasunkhunyike nga thete la mu maji gha mronga, yiti yiŵazguremo mu charu ichi chiweme icho chikaperekeka ku ŵawiskewokuru, ndipo yiti yiŵambininiskire ku sirya kwa mronga wa Efurata, chifukwa ŵayikwiyiska FUMU pakujipangira vikozgo vya chiutakazi Ashera.

¹⁶FUMU yiti yiŵajowole ŵaIsraele chifukwa cha zakwananga za Yerobowamu izo wakachita na kunangiska nazo ŵaIsraele.”

¹⁷Ndipo muwoli wa Yerobowamu wakawuka na kuruta ndipo wakiza ku msumba wa Tiriza. Sono para wakakanda waka pa khonde la nyumba, penepapo mwana wakafwa.

¹⁸ŴaIsraele wose ŵakamusunga mu dindi ndipo ŵakamulira chomene kwakuyana na mazgu gha FUMU agho yikayowoyera mwa muteŵeti wakhe, nchimi Ahiya.

¹⁹Milimo yinyakhe ya Yerobowamu umo wakarwera zinkhondo na umo wakawusira, vili kulembeka mu Buku la Midauko la ŵakaronga ŵa Israele.

²⁰Yerobowamu wakawusa virimika 22 ndipo wakafwa. Sono mwana wakhe Nadabu ndiyo wakamba kuwusa mu malo mwakhe.

²¹Rehobowamu mwana wa Solomoni wakamba kuwusa Yuda apo wakaŵa na virimika 41. Ndipo wakawusa Yuda virimika 17 kufumira mu msumba wa Yerusalemu, msumba uwo FUMU yikasankha mukati mu mafuko ghose gha Israele kuti ŵanthu ŵasoperenge zina la FUMU. Ŵanyina ŵakaŵa ŵa Naama ŵa fuko la Amoni.

²²Sono ŵanthu ŵa Yuda ŵakachita uheni panthazi pa FUMU ndipo ŵakayavyira FUMU ku sanje chifukwa cha zakwananga zawo izo ŵakachita, kwakuruska izo ŵasekuru ŵawo ŵakachita.

²³Pakuti iwo nawo ŵakajizengera malo gha pachanya ghakusoperako. Ŵakimika mizati ya mawe na vikozgo vya Ashera pa mapiri ghatali ghose ndiposo na musi mwa makuni ghose gha minthavi yakutandazga.

²⁴Mu charu chira mukaŵaso ŵanarume awo ŵakachitanga uzaghali ŵanarume pera pa malo gha pachanya ghakusoperako mu zina la chisopo. Iwo ŵakachitanga maukazuzi ghose agho ghakachitikanga na ŵamitundu ŵeneawo FUMU yikaŵachimbizgamo apo ŵaIsraele ŵakafikanga.

²⁵Mu chirimika cha chinkhonde cha muwuso wa Rehobowamu, Shishaki karonga wa Eguputo wakiza na nkhondo mu Yerusalemu.

²⁶Karonga Shishaki wakatora vyuma ivyo vikaŵa mu Nyumba ya FUMU, ndipo na vya mu nyumba ya ufumu. Wakatora kalikose pamoza na nguru za golide izo Solomoni wakapanga.

²⁷Ntheura Karonga Rehobowamu wakapanga nguru zinyakhe za mkuŵa kuti wawezgerepo izo zikatoreka ndipo wakaziŵika mu mawoko gha murongozgi wa ŵalinda awo ŵakalindanga mu nyumba ya ufumu.

²⁸Nyengo yose apo karonga wakarutanga ku Nyumba ya FUMU, ŵavikiriri ŵakarutanga nayo pamoza uku ŵayegha nguru zira ndipo pamanyuma, ŵakaziwezgerangamoso mu nyumba yakuzisungiramo.

²⁹Milimo yinyakhe ya Karonga Rehobowamu na vyose ivyo wakachita vili kulembeka mu Buku la Midauko la ŵakaronga ŵa Yuda.

³⁰Sono pakaŵanga nkhondo kaŵirikaŵiri pakati pa Rehobowamu na Yerobowamu.

³¹Rehobowamu wakafwa ndipo wakasungika mu msumba wa Davide pamoza na ŵawiskekuru. Ŵanyina ŵakaŵa Naama, wa fuko la ŵaAmoni. Ndipo Abiya mwana wakhe ndiyo wakamba kuwusa mu malo ghakhe.