Read new_tumbuka_bible 1 Karonga 15 Bible Online

1 Karonga 15 - new_tumbuka_bible bible

1 Karonga 15

¹Mu chirimika cha 18 cha kuwusa kwa Karonga Yerobowamu mwana wa Nebati, Abiya wakamba kuwusa Yuda.

²Wakawusa mu Yerusalemu pa virimika vitatu. Zina la ŵanyina likaŵa Maaka, mwana wa Abisalomu.

³Sono Abiya wakachita zakwananga zose izo ŵawiske ŵakachitanga pambere iyo wandakharepo pa ufumu. Wakaŵikapo mtima wakhe wose pa FUMU, Chiuta wakhe chara nga ndi umo Davide ŵawiskekuru ŵakachitira.

⁴Ndipouli, chifukwa cha Davide, FUMU, Chiuta wakhe wakapereka mwana wakhe Abiya kuŵa nga ndi nyali kuti ndiyo wawusenge na kukhozga msumba wa Yerusalemu para iyo wafwa.

⁵FUMU yikachita ichi chifukwa Davide wakachitanga icho chikaŵa chakunyoroka panthazi pa FUMU. Ndipo kuti wakatondekapo chara kusunga dango lirilose la FUMU pa umoyo wakhe, kupatulako mrandu wa Uriya mu Hiti.

⁶Nkhondo iyo yikachitikanga kaŵirikaŵiri pakati pa Rehobowamu na Yerobowamu ndipo yikarutilira mpaka pa nyengo ya Abiya.

⁷Milimo yinyakhe ya Abiya na vyose ivyo wakachita vili kulembeka mu Buku la Midauko la ŵakaronga ŵa Yuda. Ndipo pakaŵanga nkhondo pakati pa Abiya na Yerobowamu.

⁸Sono Abiya wakafwa ndipo ŵakamusunga pamoza na ŵawiskekuru mu msumba wa Davide. Asa mwana wakhe ndiyo wakamba kuwusa mu malo ghakhe.

⁹Mu chirimika cha 20 cha kuwusa kwa Yerobowamu, karonga wa Israele, Asa wakamba kuwusa Yuda.

¹⁰Asa wakawusa virimika 41 mu Yerusalemu. Zina la Gogo wakhe mwanakazi wakaŵa Maaka mwana wa Abisalomu.

¹¹Asa wakachita icho chikaŵa chakunyoroka panthazi pa FUMU nga ndi umo wiskekuru wakhe Davide.

¹²Wakaŵachimbizgamo ŵanthu wose awo ŵakachitanga uzaghali mu zina la chisopo ndipo wakawuskamo vikozgo vyose ivyo ŵawiskekuru ŵakachita.

¹³Wakamuwuskaposo gogo wakhe mwanakazi, Maaka kuŵa nga ndi fumukazi, chifukwa wakapanga chikozgo cha ukazuzi cha chiutakazi Ashera. Asa wakachibwangandulira pasi chikozgo chira na kuchiteketa ndipo wakachiwocha pa moto pa chidika cha Kidironi.

¹⁴Kweni malo gha pachanya ghakusoperako kuti ghakabwangandulika chara. Ndipouli mtima wa Asa ukaŵa wakugomezgeka kwa FUMU pa umoyo wakhe wose.

¹⁵Iyo wakiza navyo mu Nyumba ya FUMU vyawanangwa ivyo ŵawiske Abiya ŵakavipatula pamoza na ivyo iyomwene wakavipatula. Vyawanangwa ivi vikaŵa siliva, golide na viteŵetero vinyakhe.

¹⁶Sono pakaŵanga nkhondo pakati pa Asa, karonga wa Yuda na Baasha, karonga wa Israele, nyengo yose yakuwusa kwawo.

¹⁷Baasha karonga wa Israele wakiza kuti warwe nkhondo na Yuda. Wakazenga msumba wa Rama kuŵa linga lakhe mwakuti wajandizge waliyose uyo wakakhumbanga kunjira panji kufuma kwa Asa, karonga wa Yuda.

¹⁸Penepapo Asa wakatora siliva yose na golide lose ivyo vikakharamo mu malo ghakusungiramo vyuma mu Nyumba ya FUMU na vya mu nyumba ya ufumu ndipo wakavipereka ku nduna yakhe kuti ŵakavipereke kwa Beni Hadadi mwana wa Tabirimoni, muzukuru wa Heziyoni karonga wa Siriya, mweneuyo wakakharanga mu msumba wa Damaseko.

¹⁹Wakaŵatuma na mazgu ghakuti, “Tiŵe pa ubwezi pakati pa iwe na ine nga ndi umo ŵakachitira ŵadada na ŵawuso. Wona ndakutumira chawanangwa cha siliva na golide. Sono iwe umarizge ubwezi pakati pa iwe na Baasha, karonga wa charu cha Israele kuti wawuskeko ŵasilikari ŵakhe mu charu chane.”

²⁰Beni Hadadi wakamupulikira Asa, ndipo wakatuma ŵarongozgi ŵa ŵasilikari ŵakhe kuti ŵakarwe nkhondo na misumba ya Israele. Pa nkhondo iyi wakathereska misumba iyi: Iyoni, Dani, Abelu Beti Maaka, Kineroti yose, pamoza na charu chose cha Nafutali.

²¹Para Baasha wakapulika ichi, wakareka kuzenga linga la msumba wa Rama, ndipo wakafumako, wakaruta kuya kakhara ku msumba wa Tiriza.

²²Penepapo Karonga Asa wakachema ŵanthu wose ŵa charu cha Yuda kwambula na yumoza wakukharako ndipo wakaŵatuma kuti ŵarute ku msumba wa Rama kuya kayegha mawe ghose na mathabwa agho Baasha wakazengeranga linga la msumba wa Rama. Ndipo na vyeneivi Asa wakazengera malinga mu misumba ya Geba na Mizipa mu charu cha Benjamini.

²³Milimo yinyakhe yose ya Asa, nkhongono zakhe zose, vyose ivyo wakachita ndiposo na misumba iyo wakazenga, vili kulembeka mu Buku la Midauko la ŵakaronga ŵa charu cha Yuda. Kweni mu nyengo ya uchekuru wakhe wakasuzgikanga na nthenda ya malundi.

²⁴Pa umaliro Asa wakafwa, ndipo wakasungika pamoza na ŵawiskekuru ŵakhe mu msumba wa Davide. Sono mwana wakhe Yehoshafati ndiyo wakamba kuwusa mu malo ghakhe.

²⁵Mu chirimika cha chiŵiri cha kuwusa kwa Karonga Asa wa Yuda, Nadabu mwana wa Yerobowamu wakamba kuwusa Israele.

²⁶Nadabu wakachita uheni panthazi pa FUMU. Nayo wakarondezga nthowa ziheni za wiske ndipo na kwananga kwakhe wakanangiska na ŵaIsraele wuwo.

²⁷Baasha mwana wa Ahiya wa mu nyumba ya Isakara wakamuchitira chiŵembu Nadabu. Wakamukoma Nadabu yura mu msumba wa Gibetoni uwo ukaŵa wa ŵaFilisiti, apo Nadabu na ŵaIsraele wose ŵakazingirizga msumba wa Gibetoni.

²⁸Ntheura Baasha wakamukoma Nadabu mu chirimika cha chitatu cha kuwusa kwa Asa, karonga wa charu cha Yuda. Ndipo Baasha wakamba kuwusa mu malo gha Nadabu.

²⁹Karonga Baasha wakati wamba kuwusa, wakakoma wose ŵa mu mbumba ya Yerobowamu kwambula kurekapo na yumoza chara, mpaka wakaŵasisita wose petu. Ichi chikachitika kwa kuyana na mazgu gha FUMU agho yikayowoyera mu muteŵeti wakhe Ahiya wa ku msumba wa Shilo.

³⁰Ivi vikachitika chifukwa cha zakwananga izo Yerobowamu wakanangiska nazo ŵaIsraele ndiposo na chifukwa cha kwavyira ku ukari FUMU chiuta wa Israele.

³¹Sono milimo yinyakhe ya Nadabu na vyose ivyo wakachita, vili kulembeka mu Buku la Midauko la ŵakaronga ŵa Israele.

³²Ndipo nkhondo pakati pa Asa, karonga wa Yuda na Baasha karonga wa Israele yikachitikanga nyengo yose ya muwuso wawo.

³³Mu chirimika cha chitatu cha kuwusa kwa Asa, karonga wa Yuda, Baasha mwana wa Ahiya wakamba kuwusa charu cha Israele chose mu msumba wa Tiriza ndipo wakawusa virimika 24.

³⁴Baasha wakachita uheni panthazi pa FUMU pakwenda mu nthowa ziheni za Yerobowamu, na mu kwananga kwakhe uko kukanangiska nako ŵaIsraele.