Read new_tumbuka_bible 1 Karonga 17 Bible Online

1 Karonga 17 - new_tumbuka_bible bible

1 Karonga 17

¹Nchimi Eliya wakufumira ku Tishibe mu Gileyadi wakati kwa Karonga Ahabu, “Mu zina la FUMU Chiuta wa moyo wa Israele uyo ine nkhumuteŵetera, nkhukuphalira kuti kwamkuŵavye jumi panji vura mu virimika ivyo vikwiza mpaka ine ndizakayowoyeso kuti vura yirokwe.”

²Penepapo Fumu yikayowoya kwa Eliya yikati,

³“Uwukeko kuno urute ku cha kumafumiro gha dazi ukabisame ku mronga wa Keriti, ku mafumiro gha dazi kwa mronga wa Yorodani.

⁴Iwe wamkumwa maji kufuma mu kamronga kenekara ndipo ndalangula ŵachihoŵe kuti ndiwo ŵakupenge chakurya.”

⁵Ntheura Eliya wakaruta ndipo wakachita kwa kuyana na umo Fumu yikayowoyera. Wakaruta ndipo wakaya kakhara mu mphepete mwa kamronga ka Keriti ku mafumiro gha dazi kwa mronga wa Yorodani.

⁶Ndipo ŵachihoŵe wakamupanga chakurya na nyama ku mulenje na ku mise. Maji wakamwanga kufuma mu kamronga kenekara.

⁷Ndipo nyengo yikati ya jumphapo kamronga kara kakamuka chifukwa vura yikakalala mu charu.

⁸Penepapo FUMU yikati kwa Eliya,

⁹“Wuka, urute ku msumba wa Zarefati mu charu cha Sidoni kuti ukakhare kwenekura. Ine ndalangula chokoro cha kwenekura kuti chikupenge chakurya.”

¹⁰Sono Eliya wakawuka na kuruta ku Zarefati. Para wakafika pa chipata cha msumba, wakawona chokoro penepara chikuthenya nkhuni. Wakachichema na kuchiphalira kuti, “Undipeko maji kuti ndimwe.”

¹¹Ndipo chokoro chira chikarutanga kuti chikatore maji, Eliya wakatiso ku chokoro chira, “Ukandiyeghereko kachimenyu ka chingwa.”

¹²Chokoro chira chikati, “Nkhurapa nadi mwa FUMU Chiuta kuti, ‘Ine kuti ndaphika chakurya chilichose chara. Ndili na tuwufu tuchoko waka mu chiŵiya na tumafuta tuchoko waka mu supa. Sono nkhuthenya tunkhuni kuti ndirute ku nyumba yane, nkhaphike chakurya cha ine na mwana wane kuti tirye na kufwa.’ ”

¹³Eliya wakati ku chokoro chira, “Ungopanga chara, ruta ukachite nga ndi umo ndayowoyera. Kweni chakudanga ukandiphikire chingwa chipapati chichoko waka ndipo ukize nacho kwa ine. Pamanyuma ndipo ukaphike chakurya cha iwe na mwana wako.

¹⁴Pakuti ntheura ndimo FUMU, Chiuta wa Israele wakuti, ‘Ufu kuti uti umarengemo mu chiŵiya chara ndipo mafuta nagho mu supa kuti ghati ghamarengemo chara, mpaka pa zuŵa ilo FUMU yiti yirokweskenge vura pa charu.’ ”

¹⁵Chokoro chira chikaruta ndipo chikaya kachita nga ndi umo Eliya wakayowoyera. Ndipo wose ŵakarya kwa mazuŵa ghanandi.

¹⁶Pakuti ufu mu chiŵiya nanga ndi mafuta mu supa kuti vikamara chara kwakuyana na mazgu gha FUMU agho yikayowoya kwizira mwa Eliya.

¹⁷Zuŵa linyakhe mwana wa chokoro chira, mwenecho wa nyumba, wakarwara. Matenda ghakakulirangakuliranga mwakuti pamanyuma mwana yura wakafwa.

¹⁸Chokoro chikati kwa Eliya, “Iwe munthu wa Chiuta, kasi nakunangira vichi? Kasi wiza kuno kuti umukumbuske Chiuta zakwananga zane na kundikomera mwana wane?”

¹⁹Penepapo Eliya wakati, “Zanga nayo mwana wako.” Eliya wakamutora mwana yura kufuma mu chipakato cha ŵanyina ndipo wakamuyeghera ku chipinda cha pachanya uko iyo Eliya wakagonanga ndipo wakamugoneka mwana yura pa chitara chakhe.

²⁰Eliya wakaromba kwa FUMU wakati, “Mwe FUMU, Chiuta wane, kasi mwizirachi na visuzgo pa chokoro icho ine nkhupanjwamo mu nyumba yakhe na kumukomera mwana wakhe?”

²¹Penepapo wakafukatira pachanya pa mwana yura katatu ndipo wakaromba kwa FUMU wakati, “Mwe FUMU, Chiuta wane, wezgeranimoso umoyo wa mwana uyu.”

²²Ndipo FUMU yikamupulika Eliya ndipo mzimu wa mwana ukawereramoso ndipo wakaŵaso wa moyo.

²³Sono Eliya wakatora mwana kufuma mu chipinda umo wakagonanga na kukhira nayo ndipo wakaya kamupereka kwa ŵanyina. Sono Eliya wakati, “Wona mwana wako ngwamoyo.”

²⁴Ndipo mwanakazi wakati kwa Eliya, “Sono ndapanikizga kuti ndiwe munthu wa Chiuta ndipo mazgu gha FUMU agho mukuyowoya nga unenesko.”