Read new_tumbuka_bible 1 Karonga 19 Bible Online

1 Karonga 19 - new_tumbuka_bible bible

1 Karonga 19

¹Ahabu wakamuphalira muwoli wakhe Yezebele vyose ivyo Eliya wakachita na umo wakakomera nchimi zose za Baala.

²Ntheura Yezebele wakatuma nthumi kuruta kwa Eliya na uthenga wakuti, “Usange na machero pa nyengo yakuŵa nga ndi yeneiyi nkhutondeka kukukoma iwe nga ndi umo wakomera nchimi zane, nadi nkhurapa kuti ŵachiuta ŵane ŵandilange kwakuruska.”

³Ntheura Eliya wakopa ndipo wakanyamuka na kuchimbira kuponoska umoyo wakhe. Ndipo wakaya kafika ku Beyeresheba, mu chigaŵa cha Yuda na kumureka muteŵeti wakhe kwenekura.

⁴Iyo wakati wendapo ulendo wa zuŵa limoza kuya ku mapopa, wakaya kafika musi mwa khuni la cheyo ndipo wakaromba kuti mphanji wafwa. Pakuromba wakati, “Mwe FUMU, ndasuzgika ndipera. Mundikome waka chifukwa ine ndili muweme kuruska ŵasekuru chara.”

⁵Ndipo wakagona pasi mwa khuni la cheyo lira na kugona tulo. Penepapo mungelo wakamuwuska na kuti kwa iyo, “Wuka kuti urye chakurya!”

⁶Eliya wakawuka wakawona chingwa chipapati chakocha pa makara gha moto pamoza na mphindi ya maji ku mutu wakhe wakatora wakarya na kumwa ndipo wakagonaso pasi.

⁷Mungelo wa FUMU wakizaso kachiŵiri, ndipo wakamukhwaska na kuti kwa iyo, “Wuka kuti urye chakurya pakuti ulendo uchali utali chomene kwa iwe.”

⁸Penepapo wakawuka, wakarya chakurya na kumwa wakati warya na kumwa wakaŵa na nkhongono zakwendera ndipo wakenda mazuŵa 40 na mausiku 40 mpaka wakaya kafika ku Sinayi, Phiri la Chiuta.

⁹Wakati wafika kwenekura wakaya kanjira mu mphanji na kugona mwenemura FUMU yikayowoya kwa iyo yikati, “Eliya, kasi kuno ukuchitachi?”

¹⁰Eliya wakazgora wakati, “Ine ndanguŵa na phamphu chomene pa vya FUMU, Chiuta Mwenenkhongono zose. ŴaIsraele ŵareka kusunga mapangano ghinu imwe FUMU, ŵabwangandulira pasi majochero ghinu ndipo ŵakoma nchimi zinu na lupanga. Ine pera ndine ndakharako ndipo ŵakukhumba kukoma na ine wuwo.”

¹¹FUMU yikati kwa iyo, “Fumira kuwaro ndipo ukime pa phiri panthazi pa FUMU pakuti FUMU yiti yijumphe pafupi na iwe.” Penepapo chimphepo chikuru chikiza ndipo chikagumura mapiri na kuswa mawe ghachokoghachoko panthazi pa FUMU kweni FUMU kuti yikaŵa mu chimphepo chira chara. Pamanyuma pa chimphepo chira kukiza chindindindi kweni FUMU kuti yikaŵa mu chindindindi chira chara.

¹²Pamanyuma pa chindindindi, kukiza moto, kweni FUMU kuti yikaŵa mu moto ura chara. Ndipo pamanyuma pa moto, kukiza lizgu lakuphwepwerezga.[4]

¹³Sono Eliya wakati wapulika, wakajidikiska malaya ghakhe ku maso ndipo wakaruta na kuya kimilira pa muryango wa mphanji. Ndipo wakapulika mazgu ghakuti kwa iyo, “Eliya kasi kuno ukuchitachi?”

¹⁴Eliya wakazgora wakati, “Ine ndanguŵa na phamphu chomene pa vya FUMU, Chiuta Mwenenkhongono zose. ŴaIsraele ŵareka kusunga mapangano ghinu, imwe FUMU. Ŵabwangandulira pasi majochero ghinu ndipo ŵakoma nchimi zinu. Ine pera ndine ndakharako ndipo ŵakukhumba kukoma na ine wuwo.”

¹⁵FUMU yikati kwa iyo, “Werera wendere nthowa yakuya ku mapopa gha ku Damaseko. Ndipo para wafika mu Damaseko ukamuphakazge Hazayele kuti waŵe karonga wa Siriya.

¹⁶Ndiposo ukaphakazge Yehu mwana wa Nimishi kuti waŵe karonga wa Israele, ndipo ukamuphakazge Elisha mwana wa Shafati wa ku Abelu Mehola kuŵa nchimi mu malo ghako.

¹⁷Ndipo yose uyo wati wapone ku kukomeka na Hazayele wati wakomekenge na Yehu. Ndipo yose uyo wati waponenge kukukomeka na Yehu wati wakomekenge na Elisha.

¹⁸Ndipouli ndili na ŵanthu 7,000 mu Israele ŵeneawo ŵalije kumulambira chiuta Baala nesi kupereka nchindi kwa iyo.”

¹⁹Ntheura wakawuka na kuruta ndipo kwenekura wakaya kamusanga Elisha mwana wa Shafati wakulima na nkhaŵi za magoli 12. Iyomwene wakalimanga na nkhaŵi za magoli 12. Eliya wakiza kwa iyo ndipo wakamuvwarika malaya ghakhe.

²⁰Penepapo Elisha wakazireka nkhaŵi zira na kuchimbilira kwa Eliya ndipo wakati, “Rekani danga kuti nkhalayire ŵadada na ŵamama pamanyuma ndipo nkhize kuti ndimurondezgani.” Ndipo Eliya wakati kwa iyo, “Rutanga, kweni ukumbuke icho ndachita kwa iwe.”

²¹Ndipo wakawerera uko kukaŵa nkhaŵi zakulima kura ndipo wakatorapo nkhaŵi ziŵiri zagori limoza na kuzikoma. Gori lira wakaliwocha kuti waphikepo nyama yira ya nkhaŵi ndipo pamanyuma wakaŵapa ŵanthu kuti ŵarye. Pamanyuma wakawuka na kumurondezga Eliya ndipo wakamba kumuteŵetera.