Read new_tumbuka_bible 1 Karonga 20 Bible Online

1 Karonga 20 - new_tumbuka_bible bible

1 Karonga 20

¹Beni Hadadi, Karonga wa Siriya wakawunganya ŵasilikari ŵakhe wose. Iyo wakapulikana na ŵakaronga 32 ŵeneawo ŵakaŵa na mahachi ndiposo na magareta. Beni Hadadi pamoza na ŵakaronga ŵara ŵakaruta kuti ŵakarwe nkhondo na msumba wa Samariya pakuwuzingirizga.

²Sono Beni Hadadi wakatuma nthumi kuruta kwa Karonga Ahabu mu msumba ura na mazgu ghakuti,

³“Nthumi izo uzipe ndarama zako za siliva na za golide. Uzipe ŵawoli ŵako ŵakutowa ndiposo na ŵana ŵako ŵankhongono kuti ŵaŵe ŵane.”

⁴Karonga Ahabu wa Israele wakazgora wakati, “Imwe sekuru wane karonga, nga ndi umo mwayowoyera ine pamoza na vyose ivyo ndili navyo nvyinu.”

⁵Nthumi zira zikizaso na mazgu ghakuti, “Beni Hadadi wakuti, ‘Ine nkhatuma nthumi kuti undipe ndarama zako za siliva na za golide. Undipe ŵawoli ŵako ndiposo na ŵana ŵako.

⁶Ndipouli na machero pa nyengo yakuŵa nga ndi yeneiyi ndamkutuma nduna zane. Iwo ŵizamkupenjapenja mu nyumba yako ya ufumu na nyumba za nduna zako. Ŵizamkutora chilichose icho chizamkuŵa chiweme kwa iwo na kwiza nacho kwa ine.’ ”

⁷Sono Karonga Ahabu wakachema ŵarara wose ŵa Israele ndipo wakati kwa iwo, “Mukuwona sono umo munthu uyu wakukhumbira kutiŵikira mu masuzgo. Pakudanga iyo wakatuma nthumi zakhe kuti wakukhumba ŵawoli ŵane na ŵana ŵane ndiposo na ndarama zane za siliva na golide ndipo kuti nkhamukanira chara.”

⁸Penepapo ŵararaŵarara ŵara pamoza na ŵanthu wose ŵara ŵakazgora ŵakati, “Mungapulikiranga munthu uyu chara na kuzomerezga ivyo wakukhumba.”

⁹Ntheura Ahabu wakazizgora ntheura nthumi za Beni Hadadi zira, “Mukamuphalire karonga sekuru wane kuti ivyo mukakhumba pakudanga kufuma kwa Ahabu muteŵeti winu wachitenge. Kweni ivyo mukukhumba vya chiŵiri ivi kuti wachitenge chara.” Ntheura nthumi zikaruta ndipo zikaya kamuphalira Beni Hadadi zgoro la Ahabu.

¹⁰Sono Beni Hadadi wakatumaso nthumi kwa Ahabu na mazgu ghakuti, “Nadi nkhurapa ine kuti ŵachiuta ŵandilange kwakuruska usange ŵasilikari ŵane ŵareke kubwangandula msumba wa Samariya na kuwureka fuvu pera.”

¹¹Karonga wa Israele wakazgora wakati, “Mukamuphalire Beni Hadadi kuti, ‘Munthu uyo wakwenera kujikuzga ndi uyo wakatonda ku nkhondo kuti ndi uyo wakuvwalira waka vya nkhondo chara.’ ”

¹²Beni Hadadi wakapulika mazgu agha para iyo pamoza na ŵakaronga ŵanyakhe ŵara ŵakamwanga mu mahema, ndipo wakalangula ŵasilikari ŵakhe wakati, “Nozgekani kuya karwa nkhondo.” Ntheura ŵakanozgekera kuya karwa nkhondo mu msumba.

¹³Nyengo yeneiyo nchimi yinyakhe yikiza kwa Ahabu karonga wa Israele ndipo yikamuphalira yikati, “FUMU yikuti, ‘Kasi ukuwuwona wumba wose uwu wa ŵasilikari muhanya uno nditi ndikupenge wumba wose uwu mu mawoko ghako kuti uwuthereske. Ntheura uti umanye kuti ine ndine FUMU.’ ”

¹⁴Ahabu wakafumbaso wakati, “Kasi ndi njani uyo wati warongozgenge nkhondo?” Nchimi yikazgora yikati, “FUMU yikuti, ‘Awo ŵarongozgenge nkhondo iyi ndi ŵasilikari ŵachiwukirano awo ŵali pasi pa ŵarongozgi ŵa mu vigaŵa.’ ” Ahabu wakafumbaso wakati, “Kasi ndi njani uyo wati wambe nkhondo iyi?” Nchimi yikazgora yikati “Uyo wambenge nkhondo iyi ndiwe.”

¹⁵Penepapo Ahabu wakachema ŵarongozgi ŵa chiwukirano ŵa ŵasilikari mu vigaŵa ŵakukwana 232. Pamanyuma wakawunganya ŵanyakhe ŵa charu cha Israele ŵakukwana 7,000.

¹⁶Ndipo ŵakamba ulendo wawo pa 12 koloko na muhanya apo Beni Hadadi wakamwanga na kuloŵera mu mahema, iyomwene pamoza na ŵakaronga ŵa ŵara 32, ŵeneawo ŵakovwirananga nayo.

¹⁷Ŵasilikari ŵa chiwukirano awo ŵakawa pasi pa ŵarongozgi ŵa mu vigaŵa ndiwo ŵakadangira. Ndipo Beni Hadadi wakatuma mphachi kuti wakawoneko. Ndipo mphachi zira zikati zawerako zikaphara kuti, “Ŵasilikari ŵakwiza kuno kufuma ku msumba wa Samariya.”

¹⁸Ndipo iyo wakati, “Usange wakwizira mutende muŵatore mwize nawo ŵamoyo. Ndipo usange wizira nkhondo napo muŵatore mwize nawo ŵamoyo.”

¹⁹Ŵasilikari ŵa chiwukirano awo ŵakaŵa pasi pa urongozgi wa mu vigaŵa wakizanga kufuma mu msumba ndipo ŵasilikari ŵanyakhe wakaŵarondezganga kumanyuma.

²⁰Ndipo musilikari yose wa chiwukirano wakakoma musilikari wakhe. Ŵasilikari ŵa Siriya ŵakachimbira ndipo ŵasilikari ŵa Israele ŵakachimbilira. Kweni Beni Hadadi, karonga wa Siriya wakachimbira uku ŵakwera pa hachi pamoza na ŵasilikari ŵakhe ŵakukwera pa hachi.

²¹Kweni Karonga Ahabu wa Israele pamoza na ŵasilikari ŵakhe ŵakaruta ku nkhondo ndipo wakapoka mahachi na magareta ghara na kukoma ŵaSiriya ŵanandinandi.

²²Pamanyuma nchimi yikizaso kwa Ahabu karonga wa Israele ndipo wakati kwa iyo, “Usazgireko mpingo wa ŵasilikari ŵako na kughanaghana icho ungachita pakuti chirimika icho chikwiza karonga wa Siriya wati wakwizirenge na nkhondo mu nyengo ya nyambwani.”

²³Nduna za Beni Hadadi, karonga wa Siriya zikati kwa iyo, “Ŵachiuta ŵa ŵaIsraele ndi ŵachiuta awo ŵakukhara mu mapiri. Ichi ndicho chifukwa ŵakatitondera. Kweni usange tingarwa nawo mu chidika, titi tiŵatondenge.

²⁴Sono muchite ichi: Muŵawuskemo ŵakaronga aŵa 32 ndipo mu malo mwakhe muŵikemo awo ŵakumanya vya nkhondo.

²⁵Muŵe na mpingo wa ŵasilikari wakuŵa nga ndi ura wa pakudanga uwo ukamalira ku nkhondo. Unandi wa mahachi na magareta uyane waka. Ntheura tikarwe nawo ŵaIsraele mu chidika. Mwa ntheura tamkuŵatonda nadi.” Beni Hadadi wakapulikira urongozgi wawo ndipo wakachita ntheura.

²⁶Mu nyengo ya nyambwani Beni Hadadi wakawunganya ŵasilikari ŵakhe ŵa ŵaSiriya ndipo wakaruta ku msumba wa Afeki kuti wakarwe nkhondo na ŵaIsraele.

²⁷ŴaIsraele nawo ŵakawungana ndipo ŵakapokera vyakurya na mahomwa ndipo ŵakaruta kuya karwa nkhondo na ŵaSiriya. ŴaIsraele ŵakazenga misasa panthazi pa ŵaSiriya ndipo wakawoneka nga ndi nthumiskambo tuŵiri twa mbuzi. Ŵasilikari ŵaSiriya ŵakaŵa posepose mu charu chira.

²⁸Nchimi ya Chiuta yikiza kwa karonga wa Israele ndipo yikati, “FUMU yikuti chifukwa chakuti ŵaSiriya ŵakughanaghana kuti FUMU ndi Chiuta wa mu mapiri kuti ndi chiuta wa mu madambo chara. Pa chifukwa ichi nditi ndipereke mawumba ghose gha ŵasilikari aŵa mu mawoko ghako kuti uŵathereske. Ntheura iwe uti umanye kuti ine ndine FUMU.”

²⁹Ndipo kwa mazuŵa ghankhonde na ghaŵiri, ŵasilikari ŵa Siriya na ŵaIsraele ŵakaŵa mu misasa yawo yakuthyana waka. Ndipo pa zuŵa la chinkhonde na chiŵiri nkhondo yikambako. Ndipo ŵaIsraele ŵakakoma ŵasilikari ŵaSiriya ŵakukwana 100,000 zuŵa limoza ŵasilikari ŵakwenda pasi pera.

³⁰Ndipo awo ŵakakharapo ŵakukwana 27,000 ŵakachimbilira ku msumba wa Afeki kwenekuko chiliŵa chikaŵawira. Beni Hadadi nayo wakachimbilira mu msumba ndipo wakaya kanjira mu kachipinda ka mukati mwa nyumba.

³¹Ndipo nduna za Beni Hadadi zikiza ndipo zikati kwa iyo, “Wonani karonga, ise tapulika kuti ŵakaronga ŵa charu cha Israele mbalusungu. Tiyeni tivware vigudulu mu viwuno na kukaka vingwe ku mitu yithu ndipo tirute ku ŵakaronga ŵaIsraele. Panyakhe wangakamukomani chara.”

³²Ntheura ŵakavwara vigudulu mu viwuno vyawo na kujikaka vingwe ku mitu yawo kurongora chitima ndipo ŵakaruta kwa karonga wa Israele na kuti, “Muteŵeti winu Beni Hadadi wakuti, ‘Nkhuromba mundireke kuti ndiwe wa moyo.’ ” Ndipo Ahabu wakati, “Kasi wachali wa moyo? Beni Hadadi ndi mubali wane.”

³³Ŵasilikari ŵa Beni Hadadi wakaroska kuti ichi chikaŵa chirongorero cha mwaŵi. Kwambula kuchedwa wakakora mazgu gha Ahabu ndipo wakati, “Nadi Beni Hadadi ndi mubali winu.” Penepapo Ahabu wakati, “Rutani mukamucheme, mukize nayo.” Beni Hadadi wakati wafika Ahabu wakamuchemera mu gareta lakhe.

³⁴Sono Beni Hadadi wakati kwa Ahabu, “Misumba iyo ŵadada ŵakapoka ku ŵawuso nditi ndiwezgere kwa iwe. Ndipo mu msumba wa Damaseko ungamanya kunozga malo ghako ghakuguliskiramo vinthu nga ndi umo ŵakachitira ŵadada mu Samariya.” Ntheura Ahabu wakachita phangano na Beni Hadadi ndipo wakamureka kuti warutenge.

³⁵Zuŵa limoza, yumoza wa ŵasambiri ŵa nchimi wakalangulika na FUMU kuti wamuphalire munyakhe kuti, “Nkhuromba kuti unditimbe.” Kweni munyakhe yura wakakana kumutimba.

³⁶Ntheura musambiri wa nchimi yura wakati, “Pakuti wareka kupulikira mazgu gha FUMU sono para tapatukana waka, nkharamu yamkukurotokera.” Ndipo nadi ŵakati ŵapatukana waka nkharamu yikakumana nayo, yikamurotokera na kumukoma.

³⁷Musambiri wa nchimi yura wakasanga munthu munyakhe ndipo wakati kwa iyo, “Nkhuromba kuti unditimbe.” Ndipo munthu yura wakamutimba na kumupweteka chomene.

³⁸Penepapo nchimi yira yikaruta na kuya kamulindizga karonga pa nthowa na kujizgora nga ndi munthu munyakhe pakujikaka na salu ku mutu wakhe.

³⁹Para karonga wakajumphanga, nchimi yira yikachemerezga kwa karonga yikati, “Nda muteŵeti winu nkhanjira mukati mwa nkhondo ndipo musilikari yunji wakiza na munthu uyo wakakoreka pa nkhondo ndipo wakati, ‘Umusungilire munthu uyu. Usange munthu uyo wasoŵa iwe ndiwe uti ukomekenge panji kuti ulipirenge ndarama za siliva zakukwana 3,000.’

⁴⁰Apo ine ndangutangwanika na tunthu tunandi, munthu yura wanguchimbira.” Karonga Ahabu wakazgora wakati, “Iwe ukwenera kufwa nadi. Mrandu wako wajidumulira wekha.”

⁴¹Ntheura maluŵiro nchimi yira yikawuskapo salu izo yikajikaka nazo ndipo Karonga Ahabu wakamanya kuti njumoza wa nchimi.

⁴²Nchimi yira yikati kwa Ahabu, “FUMU yikuti, ‘Chifukwa chakuti wamureka munthu uyo ndakhumbanga kuti wafwe kuti waŵe wamoyo ntheura iwe ndiwe uti ukomekenge mu malo mwa iyo. Ŵanthu ŵako ndiwo ŵati ŵakomekenge mu malo mwa ŵanthu ŵakhe.’ ”

⁴³Penepapo Ahabu, karonga wa Israele wakawerera ku msumba wa Samariya uku ngwa chitima na wakukwenyerera chomene.