Read new_tumbuka_bible 1 Karonga 21 Bible Online

1 Karonga 21 - new_tumbuka_bible bible

1 Karonga 21

¹Pakaŵa munthu yunji muYezireyele zina lakhe Naboti. Iyo wakaŵa na munda wa mpheska ku Yezireyele uwo ukaŵa pafupi na nyumba ya ufumu ya Karonga Ahabu mu msumba wa Samariya.

²Zuŵa limoza Ahabu wakati kwa Naboti, “Undipe munda wako wa mpheska mwakuti ndilimengemo mphangwe chifukwa uli pafupi na nyumba yane. Ndipo ine ndikupenge munda uweme chomene wa mpheska. Panyakhe para chingakuŵira chiweme ndingakupa ndarama umo ungaŵira mtengo wakhe.”

³Naboti wakazgora Ahabu wakati, “FUMU yikumanya kuti munda uwo nchiharo ku ŵasekuru ŵane. Ntheura nchakwenerera chara kuti ndipereke.”

⁴Ntheura Ahabu wakanjira mu nyumba yakhe wa chitima na wakukwenyerera chomene chifukwa Naboti wa ku Yezireyele wakati, “Ndingakupa chara chiharo cha ŵasekuru ŵane.” Ntheura Ahabu wakagona pa chitara chakhe na kulaŵiska ku chimati ndipo wakakana na kurya wuwo.

⁵Muwoli wakhe Yezebele wakiza kwa iyo ndipo wakamufumba wakati, “Kasi nchifukwa uli waŵa wakukwenyerera kuti mpaka ureke kurya na chakurya wuwo?”

⁶Ahabu wakamuzgora wakati, “Ine ndanguyowoya na Naboti muYezireyele kuti ndiguliske munda wakhe wa mpheska panyakhe para chingakuŵira chiweme ndikupe munda unyakhe mu malo mwakhe. Kweni iyo wanguzgora kuti munda wane wa mpheska kuti ndingapereka chara.”

⁷Yezebele muwoli wakhe wakati kwa iyo, “Asi iwe ndiwe karonga wa Israele? Wuka urye chakurya. Kondwanga waka. Ine nditi ndikupokere munda wa mpheska wa Naboti muYezireyele.”

⁸Ntheura Yezebele wakalemba makarata mu zina la Ahabu na kudindapo chidindo cha Ahabu ndipo wakatuma makarata ku ŵararaŵarara na ŵarongozgi awo ŵakakharanga na Naboti mu msumba wakhe.

⁹Mazgu gha mu makarata ghakaŵa ntheura, “Pharazgani kuti ŵanthu ŵaziŵizge kurya kwa zuŵa limoza ndipo Naboti mumuŵike pa malo ghakuzirwa.

¹⁰Musange ŵanthu ŵaŵiri ŵa nkharo yiheni kuti waŵe panthazi pakhe kuti ndiwo ŵamupachenge pakuyowoya kuti, ‘Iwe uli kutemba Chiuta ndiposo na karonga. Pamanyuma mukamufumiskire kuwaro kuya kamudina na mawe mpaka wafwe.’ ”

¹¹Ntheura ŵararaŵarara na ŵarongozgi awo ŵakakharanga mu msumba wa Naboti ŵakachita nga ndi umo Yezebele wakalangulira mu karata iyo wakaŵalembera.

¹²Ŵakapharazga kuti kuŵe kuziŵizga kurya kwa zuŵa limoza ndipo Naboti ŵakamuŵika pa malo ghakuzirwa mukati mu ŵanthu.

¹³Ndipo ŵanthu ŵaŵiri ŵa nkharo yiheni ŵakanjira na kwimilira panthazi pa Naboti. Ndipo ŵanthu ŵara ŵakamba kumupacha Naboti pakuyowoya kuti, “Naboti ŵakatemba Chiuta ndiposo na karonga.” Ntheura ŵakamutorera kuwaro kwa msumba na kumudina na mawe mpaka wakafwa.

¹⁴Penepapo ŵakatuma mazgu kwa Yezebele kuti, “Naboti wadinyika na mawe ndipo wafwa.”

¹⁵Yezebele wakati wapulika waka kuti Naboti ŵamudinya na mawe ndipo wafwa, penepapo wakati kwa Ahabu, “Naboti mu Yezireyele yura uyo wakakukanira kuti wakuguliske munda wakhe wa mpheska wafwa kuti ngwamoyo chara.”

¹⁶Para Ahabu wakapulika kuti Naboti wafwa wakawuka na kuruta kuya katora munda wa mpheska uwo ukaŵa wa Naboti muYezireyele.

¹⁷Penepapo FUMU yikayowoya kwa nchimi Eliya wa ku Tishibe yikati,

¹⁸“Wuka, urute ukakumane na Ahabu karonga wa Israele mweneuyo wakukhara mu msumba wa Samariya. Iyo sono wali mu munda wa mpheska wa Naboti ndipo wali kwenekura kuti watore munda wa mpheska uwu kuti uŵe wakhe.

¹⁹Sono iwe ukamuphalire kuti, ‘FUMU yikuti kwa iwe, kasi munthu wamukoma na kupokaso munda wakhe? Ukamuphalireso kuti sono FUMU yikuti pa malo apo ncheŵe zikamyangirangapo ndopa za Naboti, ndiposo zizamkumyangiraso ndopa zako.’ ”

²⁰Sono Ahabu wakati kwa Eliya, “Kasi wandisangaso iwe murwani wane?” Eliya wakazgora wakati, “Nadi ndakusanga chifukwa wajipereka wekha kuti uchitenge uheni panthazi pa FUMU.”

²¹FUMU yikuti, “Nditi ndikwizire na visuzgo. Nditi ndikumarizge nkhanira. Nditi ndikome mwana mwanarume yose wa mbumba ya Ahabu, muzga panji mwanangwa mu Israele.”

²²Mbumba yako nditi ndiyizgore kuŵa nga ndi ya Yerobowamu, mwana wa Nebati, ndiposo nga ndi mbumba ya Baasha mwana wa Ahiya, pakuti wandavyira ku ukari ndipo na uheni uwo wanangiska nawo ŵaIsraele.

²³Sono pa Yezebele FUMU yikuti, “Ncheŵe zamkuryera Yezebele mukati mwa msumba wa Yezireyele.”

²⁴Yose uyo ngwa mu nyumba ya Ahabu, para wafwira mukati mu msumba ncheŵe zizamkumurya ndiposo yose uyo ngwakhe para wafwira kuwaro kwa msumba viyuni vya mudera ndivyo vizamkumurya.

²⁵(Panthazi pa FUMU pakaŵavye nanga njumoza uyo wangajipereka kukuchita uheni nga ndi Ahabu uyo wakakhuŵirizgikanga na muwoli wakhe Yezebele.

²⁶Iyo wakachita vya ukazuzi chomene pakusopa vikozgo nga ndi umo ŵakachitira ŵaAmori awo FUMU yikaŵachimbizgamo kuti ŵaIsraele ŵakharemo.)

²⁷Para Ahabu wakapulika mazgu agha, wakaparura vyakuvwara vyakhe, wakavwara vigudulu. Wakaziŵizga kurya na kugona na vigudulu vyakhe ndipo wakendanga mwakujipepura.

²⁸Penepapo FUMU yikati kwa nchimi Eliya wa ku Tishibe,

²⁹“Asi wawona umo Ahabu wajiyuyulira panthazi pane? Chifukwa chakuti wajiyuyura panthazi pane, kuti nditi ndimulange na visuzgo vyose vira chara mu umoyo wakhe. Kweni ndizamkulanga mbumba yakhe mu nyengo ya mwana wakhe.”