Read new_tumbuka_bible 1 Karonga 6 Bible Online

1 Karonga 6 - new_tumbuka_bible bible

1 Karonga 6

¹Solomoni wakamba kuzenga Nyumba ya FUMU mu mwezi wa Zivu[1] uwo ukaŵa mwezi wa chiŵiri mu chirimika ndipo ichi chikaŵa chirimika cha chinayi cha kuwusa kwakhe mu Israele. Ichi chikaŵa chirimika cha 480 kufumira apo ŵaIsraele wakafumira mu Eguputo.

²Pakupima mukati, Nyumba ya FUMU iyo Solomoni wakazenga yikaŵa mamita 27 mu utali, mamita ghankhonde na ghanayi mu usani, ndipo mamita 13 pachanya masentimita 50 mu kukwera.

³Sono khonde la kuthyana na mung'ong'ona wa Nyumba ya Chiuta, ilo ŵanthu ŵakafikirangako na kurekako vyakuvwara vyawo, kuwaro likaŵa mamita ghankhonde na ghanayi mu usani, uko kukayana waka na usani wa nyumba, ndipo likaŵa mamita ghanayi pachanya masentimita 50 mu utali.

⁴Ndipo wakaŵika vidangazi mu Nyumba ya Chiuta ivyo mafuremu ghakhe ghakaŵa ghafinyi kuwaro kwa chiliŵa kweni mukati ghakaŵa ghasani.

⁵Sono kuwaro kwa chiliŵa cha Nyumba ya Chiuta iyi wakazengako vipinda ivyo wakavibamphika ku chiliŵa cha nyumba, vyeneivyo vikathyana na Malo Ghakupatulika Nkhanira.

⁶Vipinda vikadumulika mu vigaŵa vitatu. Mu chigaŵa cha nyumba ya pasi chomene usani wa vipinda ukaŵa mamita ghaŵiri pachanya masentimita 20. Chigaŵa cha pakatikati usani wakhe ukaŵa mamita ghaŵiri pachanya masentimita 50 ndipo usani wa chipinda cha pachanya chomene ukaŵa mamita ghatatu. Wakarekako kamwanya kuzingirizga nyumba yose mwakuti mathabwa agho ghakakhozganga vipinda vira ghareke kukhwaska viliŵa vya Nyumba ya Chiuta.

⁷Para ŵakazenganga Nyumba ya Chiuta yira, mawe ghaweme ghakanozgekerathu makora kufuma apo ŵakaghaganamphuranga na apo ŵakazengeranga mwakuti kureke kupulikikwa chiwawa cha nyondo panji cha mbavi nesi cha chisulo chakuŵajira.

⁸Muryango wa chipinda cha pasi chomene chikaŵa ku dera la ku mwera kwa Nyumba ya Chiuta. Ŵanthu ŵakakweranga pa makwerero kuya ku chipinda cha pakati ndiposo kufuma ku chipinda cha pakati kuya ku chipinda cha chitatu napo wakakweranga pa makwerero.

⁹Ntheura ndimo Karonga Solomoni wakazengera Nyumba ya Chiuta na kuyimarizga ndipo wakaŵikako michiko na kweghapo mathabwa gha milanje.

¹⁰Solomoni wakamarizgaso tuvipinda utu wakatubamphika kuzingirizga Nyumba ya Chiuta uto tukaŵa twakusungiramo katundu. Tuvipinda utu tukaŵa mamita ghaŵiri ndipo tuvipinda tura tukakorereka ku Nyumba ya Chiuta na mathabwa gha milanje.

¹¹Ndipo FUMU yikati kwa Solomoni,

¹²“Nyumba iyi yeneiyo ukuzenga usange uti upulikirenge vilayizgo na malangulo ghane ghose na kusunga marango ghane ghose na kughachita nditi ndikuchitirenge ivyo nkhapangana na Davide ŵawuso.

¹³Ndipo ine nditi ndikharenge pamoza na ŵanthu ŵane ŵaIsraele mukati mu Nyumba ya Chiuta iyi ndipo kuti nditi ndiŵareke ŵekha chara.”

¹⁴Ntheura ndimo Solomoni wakazengera nyumba na kuyimarizga.

¹⁵Viliŵa vya mukati vya Nyumba ya Chiuta yira Solomoni ŵakavibatika na mathabwa gha milanje kufuma pasi mpaka ku mtenje. Pasi pa nyumba yira wakaŵikapo mathabwa gha mulombwa.

¹⁶Wakagaŵa chipinda icho wakachichema kuti Malo Ghakupatulika Nkhanira cheneicho chikaŵa mamita ghankhonde na ghanayi mwakuyana kosekose. Chipinda chira chikawa kunyuma kwa Nyumba ya Chiuta ndipo wakachizenga na mathabwa gha milanje kufuma pasi kuya kafika ku mtenje.

¹⁷Chipinda chikuru chakukumaniranamo icho chikaŵa panthazi pa Malo Ghakupatulika Nkhanira chikaŵa mamita 18 mu utali.

¹⁸Mu mathabwa gha milanje agho ghakabatikika mukati mwa Nyumba mukazongekamo vithuzithuzi vya zimphindi na za maluŵa ghakuŵala. Mukati mose mukaŵa mathabwa kuti mawe ghareke kuwoneka.

¹⁹Malo ghakupatulika Nkhanira ghara agho ghakaŵa mukati mwa Nyumba yira ghakazengeka kuti ŵawikemo Bokosi la Phangano la FUMU.

²⁰Malo ghakupatulika ghakaŵa mamita 9 mu utali, mamita 9 mu usani, ndiposo mamita 9 mu kwima ndipo wakachiphaka na golide mwenecho. Jochero la mathabwa gha milanje nalo wakaliphaka na golide mwenecho.

²¹Mukati mose mwa Nyumba ya Chiuta yira Solomoni wakayiphaka na golide mwenecho ndipo panthazi pa Malo ghakupatulika Nkhanira chira wakaŵikapo maunyoro gha golide kufuma ku dera limoza kuya kafika ku dera linyakhe. Chipinda chira nacho wakachiphaka na golide

²²Ntheura mukati mwa nyumba yira mose wakayiphaka na golide ndipo jochero nalo ilo likaŵa mukati mwa Malo Ghakupatulika Nkhanira wakaliphaka na golide.

²³Solomoni wakapanga vikozgo vya ŵakerubi viŵiri kufuma ku makuni gha maolive ndipo wakaviŵika ku Malo Ghakupatulika Nkhanira ghara. Chikozgo chimoza chikaŵa mamita ghanayi na masentimita 50 mu kwima.

²⁴Utali wa phapindo limoza la mukerubi, ukaŵa mamita ghaŵiri na masentimita 20 ndipo phapindo linyakhe nalo likaŵa ntheura kufuma ku songo limoza la phapindo kuya kafika ku linyakhe kukaŵa mamita ghanayi na masentimita 50.

²⁵Chikozgo cha mukerubi chikaŵa mamita ghanayi na masentimita 50 ndipo kerubi munyakhe nayo wakaŵa ntheura pera.

²⁶Mukerubi yumoza mu wima wakaŵa mamita ghankhonde. Munyakhe nayo wakaŵa ntheura.

²⁷Solomoni wakaŵika ŵakerubi aŵa mu chipinda chakupatulika Nkhanira mu Nyumba ya Chiuta. Mapapindo gha chikozgo cha ŵakerubi ghakaŵa ghakutandauka. Phapindo la kerubi yumoza likakhwaska chiliŵa cha lwande limoza lwa nyumba ndiposo phapindo la kerubi munyakhe nalo likakhwaskaso chiliŵa cha lwande linyakheso. Mapapindo ghawo ghanyakhe ghakakhwaskana pakatikati pa nyumba.

²⁸Ndipo ŵakerubi aŵa wakaghaphaka na golide.

²⁹Viliŵa vyose kuzingirizga nyumba yira mukati na kuwaro wakazongamo vithuzithuzi vya ŵakerubi, vya makuni gha mikama na vya maluŵa ghakuŵala.

³⁰Pasi pa nyumba yira wakayiphaka na golide mu vipinda vyose vya mukati na kuwaro.

³¹Pa muryango wa Malo Ghakupatulika Nkhanira gha mukati Solomoni wakapangirapo vijaro vya makuni gha maolive. Mphanjizgo na mizati ya mu mphepete vikapanga kawonekero ka makona ghankhonde.

³²Pa vijaro viŵiri vya khuni la olive wakazongapo vithuzithuzi vya ŵakerubi vya makuni gha mikama na maluŵa ghakuŵala. Vyose ivi wakaviphaka na golide.

³³Pa muryango wakunjirira ku chipinda chikuru cha Nyumba ya Chiuta yira napo wakapangirapo mtenje wa makuni gha maolive ghakuŵa na makona ghanayi.

³⁴Ndipo wakapangaso vijaro viŵiri vya mathabwa gha mulombwa vigaŵa viŵiri vya chijaro chimoza vikapangika kuti vipetekekenge. Vigaŵa viŵiri vya chijaro chinyakhe navyo vikaŵa ntheura pera.

³⁵Pa vijaro ivi ŵakagobapo vithuzithuzi vya ŵakerubi, vya makuni gha mikama na vya maluŵa ghakuŵala. Vithuzithuzi vyakugoba vira ŵakaviphaka golide mose.

³⁶Solomoni wakapangaso luwugha mukati mwa Nyumba yira na mawe ghakuŵaja mizere yitatu, kupambaniskana na mzere umoza wa michiko ya milanje.

³⁷Lufura lwa Nyumba ya FUMU lukambika mu chirimika cha chinayi mu mwezi wa Zivu.

³⁸Ndipo mu chirimika cha 11 mwezi wa Bulu,[2] uwo ukaŵa mwezi wa chinkhonde na chitatu, Solomoni wakamarizga kuzenga Nyumba ya Chiuta mu vigaŵa vyakhe vyose kwakuyana na umo wakayinozgera. Nyumba ya Chiuta yira wakayizenga pa virimika vinkhonde na viŵiri.