Read new_tumbuka_bible 1 Karonga 9 Bible Online

1 Karonga 9 - new_tumbuka_bible bible

1 Karonga 9

¹Solomoni wakati wamara kuzenga Nyumba ya FUMU na nyumba yakhe ya ufumu na vinyakhe vyose ivyo wakakhumba kuzenga,

²FUMU yikawonekera kachiŵiri kwa Solomoni nga ndi umo yikawonekera kwa iyo ku msumba wa Gibeyoni.

³FUMU yikati kwa Solomoni, “Ndapulika kuromba na kuŵeyerera kwako uko wayowoya panthazi pa ine. Nyumba iyo wandizengera ndayipatula ndipo mwenemumo ndimo ŵanthu ŵati ŵasoperenge zina lane kwa muyirayira. Nditi ndiyilaŵiskenge na kuŵika mtima wane pa iyo nyengo yose.

⁴Ndipo iwe usange uti wendenge mwakugomezgeka na wakuneneska mu mtima panthazi pa ine nga ndi umo wakachitira Davide ŵawuso pakuchita vyose ivyo nkhukulangula, kusungilira marango ghane na vilayizgo vyane,

⁵apo ndipo nditi ndikhozge chizumbe cha ufumu wako pa ŵaIsraele kwa muyirayira, nga ndi umo nkhapanganirana na Davide ŵawuso, apo nkhati kwa iyo kuti wamkusoŵa munthu wakukhara pa chizumbe cha ufumu wa ŵaIsraele chara.

⁶Kweni usange iwe panji ŵana ŵako mwareka kupulikira ine mwazgokera kunyakhe pakureka kusungilira marango na vilayizgo ivyo ndili kwimika ndipo mukughareka kuti muteŵetere ŵachiuta ŵanyakhe na kuŵasopa.

⁷Penepapo ine nditi ndiŵawuskemo ŵaIsraele mu charu icho nkhaŵapa. Ndipo nyumba iyi yeneiyo ndayipatula kuŵa yakuchindikira zina lane nditi ndiyikane. Ndipo ŵaIsraele ŵamkuzgoka chinthu chakuyowoyerapo chinthanguni na chimuhoyere ku ŵamitundu wose.

⁸Ndipo nyumba iyi yizamkuzgoka kuŵa mulu wa mahami. Ŵanthu wose awo ŵizamkujumphapo ŵizamkuzizwa na kuzukuma. Ŵizamkuyowoya kuti, ‘Kasi nchifukwa uli FUMU yachita chinthu cha ntheura ku charu ichi na ku nyumba iyi?’

⁹Ntheura ŵamkuzgora kuti, ‘Chifukwa nchakuti ŵayireka FUMU, Chiuta wawo mweneuyo wakafumya ŵawiskewokuru mu charu cha Eguputo ndipo ŵakaskepererana na ŵachiuta ŵanyakhe ndipo ŵakaŵasopa na kuŵateŵetera. Ndicho chifukwa FUMU yakhizgira pa iwo uheni wose uwu.’ ”

¹⁰Solomoni wakatora virimika 20 kuti wazenge nyumba ziŵiri, Nyumba ya FUMU na nyumba ya ufumu.

¹¹Pakuzenga nyumba izi Huramu, uyo wakaŵa karonga wa charu cha Ture, wakaperekanga mathabwa gha milanje na gha mulombwa ndiposo na golide kwa Solomoni kwakuyana na umo Solomoni wakakhumbiranga. Sono Solomoni nayo wakapereka kwa Huramu misumba 20 ya chigaŵa cha Galileya.

¹²Kweni para Karonga Huramu wakiza ku Galileya kufuma ku Ture kuti wizakawone misumba iyo Solomoni wakamupa, kuti wakakondwa nayo misumba yira chara.

¹³Penepapo Huramu wakafumba Solomoni wakati, “Wa munyane, kasi ndi misumba ya mtundu uli iyo wandipa?” Ntheura misumba yira wakayithya kuti Kabulu[3] ndipo yichali kuchemeka ntheura mpaka na sono wuwo.

¹⁴Pa nyengo iyi Huramu wakaŵa watuma kwa Karonga Solomoni makilogiramu gha golide ghakujumpha 4,000.

¹⁵Milimo yinyakhe iyo Karonga Solomoni wakachita ndi iyi: Iyo wakalangula kuti ŵanthu ŵachitenge mlimo wakuchichizga pakuzenga Nyumba ya FUMU. Nyumba yakhe ya ufumu, linga ilo likachemekanga kuti Milo na linga la msumba wa Yerusalemu, msumba wa Hazoro, Megido na wa Gezere.

¹⁶Kale chomene, msumba wa Gezere ukapokeka na Faro, karonga wa charu cha Eguputo pakurwa nawo nkhondo na kuwuwocha na moto, ndipo wakakoma ŵaKanani awo ŵakakharanga mu msumba uwu. Pamanyuma ŵakawupereka msumba uwu kwa mwana wakhe msungwana muwoli wa Solomoni kuŵa chawanangwa cha pa nthengwa.

¹⁷Sono Solomoni wakawuzengaso msumba wa Gezere. Wakazengaso misumba yinyakhe iyi: Beti Horoni wa kusika,

¹⁸Baalati, na Tamara mu mapopa mu charu cha Yuda.

¹⁹Wakazengaso misumba yakhe yose iyo wakasungirangamo vyakurya, ndiposo na misumba umo wakasungirangamo magareta gha nkhondo, misumba ya ŵanthu ŵakhe ŵakugara pa mahachi. Solomoni wakazenga chilichose icho wakakhumba kuzenga mu Yerusalemu, na mu charu cha Lebanoni ndiposo na mu charu chose icho wakawusanga.

²⁰Pakaŵa ŵanthu ŵa mitundu yinyakhe awo ŵakakharanga mu charu cha Yuda ŵeneawo ŵaIsraele ŵakaŵafumya mu charu chira chara. Iwo ŵakaŵa ŵaAmori, ŵaHiti, ŵaPerezi, ŵaHivi, ndipo na ŵaYebusi.

²¹Ŵeneaŵa ŵakaŵa ŵa mphapu ya ŵamitundu awo ŵakakharanga mu charu chira ŵeneawo ŵaIsraele ŵakatondeka kuŵamara petu. Aŵa ndiwo Solomoni wakaŵagwiriskanga nchito mwakuchichizga ndipo ŵakugwira nchito iyi nga ndi ŵazga mpaka na sono.

²²Kweni Solomoni kuti wakaŵazgorapo ŵaIsraele kuŵa ŵazga chara. Iwo ŵakaŵa ŵasilikari, ŵakaŵa nduna zakhe, ŵarongozgi ŵa nkhondo, ŵakurongozga ŵasilikari, ŵarongozgi ŵakwendeska magareta ndipo na ŵanthu ŵakhe ŵakukwera pa mahachi.

²³Ŵanthu aŵa ndiwo ŵakaŵa ŵarongozgi ŵararaŵarara awo ŵakalaŵiriranga milimo ya Solomoni. Wose pamoza ŵakaŵa 550 ndipo ŵakaŵa na mazaza pa ŵanthu awo ŵakachitanga mlimo.

²⁴Pa nyengo iyo mwana mwanakazi wa Faro, karonga wa ku Eguputo wakafumako ku msumba wa Davide kwiza ku nyumba iyo Solomoni wakamuzengera. Pamanyuma Solomoni wakazenga linga la Milo.

²⁵Solomoni wakaperekanga sembe zakocha na sembe za wenenawene pa jochero ilo wakazengera FUMU katatu pa chirimika. Para wakaperekanga sembe zakocha na za wenenawene wakawochangaso vyakununkhira panthazi pa FUMU. Ntheura ndimo wakafiskiranga milimo wa pa Nyumba ya Chiuta yira.

²⁶Karonga Solomoni wakapanga ngaraŵa zinandi chomene pa dowoko la Eziyoni Gebere pafupi na msumba wa Eloti mu mphepete mwa Nyanja ya Matete mu charu cha Edomu.

²⁷Sono Karonga Huramu wakatuma ngaraŵa zakhe pamoza na ŵanthu ŵakhe ŵakumanya vyose vya mu nyanja kuti ŵakateŵetenge pamoza na ŵanthu ŵa Solomoni.

²⁸Ŵendeski ŵa ngaraŵa ŵara ŵakaruta ku charu cha Ofiri ndipo ŵakaya katorako golide wakukwana makilogiramu 14,000 ndipo ŵakiza nayo kwa Karonga Solomoni.