Read new_tumbuka_bible 2 Karonga 10 Bible Online

2 Karonga 10 - new_tumbuka_bible bible

2 Karonga 10

¹Ahabu wakaŵa na ŵazukuru ŵakukwana 70 awo ŵakakharanga mu Samariya. Sono Yehu wakalemba makarata ndipo wakaghatuma ku Samariya yose ku ŵarongozgi ŵa msumba wa Yezireyele, ku ŵarara na kuŵasungiliri ŵa ŵazukuru ŵa Ahabu.

²Uthenga wa mu makarata ukaŵa wakuti, “Imwe mukusunga ŵazukuru ŵa sekuru winu, ndipo muli na magareta na mahachi, misumba yakukhozgeka na malinga, ndiposo na mahomwa wuwo,

³musorepo muzukuru yumoza wa sekuru winu uyo mukumuwona kuti ngwakwenerera kuruska ŵanyakhe ndipo mu mwimike kuŵa karonga pa chizumbe cha wiske. Ntheura munozgeke kurwa nkhondo kuti muvikirire nyumba ya sekuru winu.”

⁴Kweni ŵakaŵa na wofi ukuru chomene, ndipo ŵakayowoyeskana ŵakati, “Usange ŵakaronga ŵaŵiri ŵakatondeka kurwa nayo nkhondo, kasi ise tingalimbana nayo uli?”

⁵Ntheura uyo wakaŵa na murara wa nyumba ya ufumu, murara wa msumba, ŵararaŵarara, pamoza na ŵasungiliri ŵa ŵazukuru, ŵakatuma uthenga kwa Yehu wakuti, “Ise tili ŵateŵeti ŵinu ndipo tichitenge vyose ivyo mutiphalirenge kuti tichite. Ise timikenge karonga munyakhe chara pa ŵazukuru aŵa kuŵa karonga. Imwe chitani chose icho nchiweme.”

⁶Yehu wakaŵalembera karata wa chiŵiri wakati, “Usange muli pamoza na ine ndipo usange muli ŵakunozgeka kundipulikira, ipo dumulani mitu ya ŵana ŵa sekuru winu, ndipo mwize nayo kwa ine ku Yezireyele na machero pa nyengo yakuŵa nga ndi yeneiyi.” Ŵazukuru 70 ŵa karonga ŵara ŵakasungilirikanga na ŵanthu ŵakuzirwa ŵa mu msumba.

⁷Ndipo karata uyu wakati waŵafika, ŵanthu ŵakuzirwa ŵa mu msumba ura ŵakatora ŵazukuru ŵa karonga ŵara 70 na kuŵakoma wose, ndipo wakaŵika mitu yawo mu vidunga na kuvituma kwa Yehu ku Yezireyele.

⁸Sono thenga likiza kwa Yehu ndipo likati kwa iyo, “Wiza nayo mitu ya ŵazukuru ŵa karonga yura. Sono Yehu wakati, ‘Muyiwunjike mitu iyo paŵiri pa chipata ndipo yikhare penepara mpaka na mulenje.’ ”

⁹Apo kukati kwacha Yehu wakafumira kuwaro, ndipo wakayowoya ku ŵanthu wose ŵakati, “Imwe mwa ŵanthu mulije mrandu. Ine ndine nkhawukira sekuru wane na kumukoma, kweni kasi ndi njani uyo wakoma ŵanthu wose aŵa?

¹⁰Manyani sono kuti mazgu agho FUMU yikayowoya kukhwaskana na mbumba ya Ahabu, paŵavyenge na lizgu na limoza lamkuwa waka. Pakuti FUMU yachita icho yikayowoyera mwa muteŵeti wakhe Eliya.”

¹¹Ntheura Yehu wakakoma ŵabali wose awo ŵakakharako ŵa mbumba ya Ahabu mu msumba wa Yezireyele. Wakakoma wose awo ŵakaŵa ŵazukuru mu ufumu wakhe, ŵabwezi ŵakhe wose, ŵasofi ŵakhe wose ndipo kuti wakasidako nanga njumoza wa moyo chara.

¹²Penepapo Yehu ŵakawuka kufuma ku Yezireyele na kuruta ku Samariya. Mu nthowa apo wakafika pa malo gha Msasa wa Ŵaliska,

¹³Yehu wakakumana na ŵabali ŵa Ahaziya karonga wa charu cha Yuda, ndipo wakaŵafumba wakati, “Kasi imwe ndimwe ŵa njani?” Iwo ŵakazgora ŵakati, “Ise ndise ŵabali ŵa Karonga Ahaziya, ndipo tikuya ku Yezireyele kuti tikachezge na ŵana ŵa nyumba ya ufumu na ŵana ŵa fumukazi Yezebele.”

¹⁴Yehu wakalangula ŵanthu ŵakhe wakati, “Ŵatorani ŵamoyo.” Ndipo ŵakaŵatora ŵamoyo na kuŵakomera pa chisimi cha Msasa wa Ŵaliska. Wose awo ŵakakomeka ŵakaŵa 42 ndipo ŵakasidapo nanga njumoza chara.

¹⁵Yehu wakafumako ku malo ghara kurutilira ulendo wakhe, ndipo uku ŵakwenda ŵakawona Yehonadabu mwana wa Rekabu uyo wakizanga kuti wakumane nayo. Yehu wakamutauzga ndipo wakati kwa iyo, “Kasi ukundigomezga nga ndi umo ine nkhukugomezgera iwe?” Ndipo Yehonadabu wakati, “Nadi nkhumugomezgani.” Ntheura Yehu wakati, “Usange ndi ntheura tikorane chasa.” Ntheura ŵakakorana chasa ndipo Yehu wakamukwezga mu gareta lakhe.

¹⁶Ndipo Yehu wakati kwa iyo, “Tiye tirute pamoza na ine kuti ukawone umo ine nkhujiperekera kwa FUMU.” Ntheura wakaruta nayo mu gareta lakhe.

¹⁷Yehu wakati wafika ku Samariya, wakakoma wose ŵa mbumba ya Ahabu awo ŵakakharako mu Samariya, wakasuka wakaŵamara wose petu nga ndi umo FUMU yikayowoyera kwa Eliya.

¹⁸Pamanyuma Yehu wakachemera pamoza ŵanthu wose ŵa msumba wa Samariya ndipo wakati kwa iwo, “Ahabu wakateŵetera Baala pachoko waka. Kweni ine Yehu nkhukhumba kumuteŵetera chomene.

¹⁹Ntheura sono mundichemere nchimi zose za Baala, na wose awo ŵakumuteŵetera ndiposo na ŵasofi ŵakhe wose. Paŵavye na yumoza wakukhara pakuti nkhukhumba kupereka sembe yikuru kwa Baala. Yose uyo wamkureka kwizako wati wakomekenge.” Yehu wakachita ichi na mtima wakupusika, kweni wakakhumbanga kuti wakome wose awo ŵakasopanga Baala.

²⁰Ndipo Yehu wakalangula, “Pharazgani kuti kuli ungano wakuchindikira chiuta Baala.” Ntheura munthu yose wakapharazga za ungano ura.

²¹Yehu wakatuma uthenga mu charu chose cha Israele, ndipo wose awo ŵakateŵeteranga Baala ŵakiza. Pakaŵavye munthu na yumoza uyo wakareka kwiza. Pamanyuma wose ŵakanjira mu nyumba yakusoperamo Baala ndipo yikazurirathu mwakuti pakaŵavye na malo ghachoko wuwo.

²²Sono Yehu wakati kwa uyo wakasungiliranga chipinda umo ŵakaŵikanga minjilira, “Tora munjilira ndipo upereke ku awo ŵakateŵetera Baala.” Munthu yura wakaŵatorera minjilira yira na kuŵapa.

²³Sono Yehu na Yehonadabu mwana wa Rekabu ŵakanjira mu nyumba ya kusoperamo chiuta Baala. Ndipo ŵakaŵaphalira ŵateŵeti ŵa Baala ŵara kuti, “Penjeskani makora ndipo muwone kuti muno mulije na yumoza uyo wakuteŵetera FUMU pakati pinu, kweni awo ŵakuteŵetera Baala pera.”

²⁴Ntheura ŵakamba kupereka sembe zakukoma na sembe na za sembe zakukoma. Kweni Yehu wakaŵika ŵanthu 80 kuwaro, ndipo wakaŵalangula kuti munthu yose uyo wati wazomerezgenge yumoza wa ŵanthu awo ndaŵaŵika mu mawoko ghinu kuŵakoma kuti wachimbire, iyo ndiyo wati wakomekenge mu malo mwa uyo wachimbira.

²⁵Sono Yehu wakati wamare kupereka sembe zakocha, wakaŵaphalira ŵasilikari ŵakhe na ŵarongozgi ŵawo ŵa nkhondo kuti, “Sono njirani muŵakome, mungarekangapo na yumoza kuti wachimbire chara.” Ntheura ŵakanjira na kuŵakoma na malupanga ndipo ŵakaguzira vitanda vyawo kuwaro. Ndipo wakaya kanjira mu chipinda cha mukati mu nyumba yakusoperamo chiuta Baala.

²⁶Mwenemumo ŵakaya kafumiskamo mzati uwo ukaŵa mu nyumba ya chiuta Baala na kuwuwocha.

²⁷Ntheura wakabwangandula mzati wa chiuta Baala na nyumba yakhe yakusoperamo ndipo wakayizgora kuŵa chizara mpaka muhanya uno.

²⁸Ntheura ndimo Yehu wakamalira chisopo cha Baala mu charu cha Israele.

²⁹Nangauli Yehu wakachita vyose viweme ivi, kweni kuti wakapatukako ku uheni wa Karonga Yerobowamu mwana wa Nebati chara. Yerobowamu wakanangiska ŵaIsraele pakuŵachichizga kuti ŵasopenge vikozgo vya golide vya ŵana ŵa ng'ombe ivyo ŵakaŵika ku Betele na ku Dani.

³⁰Sono FUMU yikati kwa Yehu, “Chifukwa chakuti wachita icho nchakundikondweska, pakumara mbumba ya Ahabu nga ndi umo nkhakhumbiranga, ŵana ŵako ŵati ŵakharenge pa chizumbe cha ufumu wa Israele kuya kafika ku muwiro wa chinayi.”

³¹Nanga vikaŵa ntheura kweni Yehu kuti wakapulikira marango gha FUMU, Chiuta wa Israele na mtima wakhe wose chara. Iyo kuti wakapatukako ku uheni wa karonga wa Yerobowamu chara weneuwo wakanangiska nawo ŵaIsraele.

³²Pa nyengo yeneyira FUMU yikamba kuchepeska vigaŵa vya charu cha Israele. Karonga Hazayele wa charu cha Siriya wakathereska charu chose cha Israele,

³³kufumira ku Yorodani cha ku mafumiro gha dazi, kuya kafika ku msumba wa Aroyere pafupi na chinkhwawu cha Arinoni. Charu chose ichi chikaŵa chimoza na Gileyadi ndiposo na Bashani uko ŵazukuru ŵa Gadi, Rubeni na Manase ŵakakharanga.

³⁴Sono milimo yinyakhe ya Yehu na vyose ivyo wakachita na nkhongono zakhe zose, vili kulembeka mu Buku la Midauko la ŵakaronga ŵa charu cha Israele.

³⁵Pamanyuma Yehu wakafwa ndipo ŵakamusunga pamoza na ŵawiskekuru ŵakhe mu Samariya. Ndipo mwana wakhe Yehowahazi ndiyo wakamba kuwusa Israele mu malo mwa ŵawiske.

³⁶Yehu wakawusa Israele mu msumba wa Samariya virimika 28.