Read new_tumbuka_bible 2 Karonga 11 Bible Online

2 Karonga 11 - new_tumbuka_bible bible

2 Karonga 11

¹Para Ataliya nyina wa Ahaziya wakapulika kuti mwana wakhe wafwa, wakalangula kuti wose ŵa mbumba ya ufumu mu charu cha Yuda wakomeke.

²Ahaziya wakaŵa na mudumbu wakhe zina lakhe Yehosheba, mwana mwanakazi wa Karonga Yoramu, uyo wakatengwa kwa musofi Yehoyada. Yehosheba wakamuthaska Yowashi, yumoza wa ŵana ŵa Ahaziya kuti wareke kukomeka na Ataliya. Iyo wakamutora mwana yura mwakumwiba kufuma mu ŵana ŵanyakhe ŵanarume awo ŵakati ŵakomeke ndipo wakaruta nayo ku chipinda cha kugonamo mu Nyumba ya Chiuta na kumubisa ndipo wakamureka mwenemumo pamoza na mulezi wakumupwererera. Ntheura wakamubisa kwa Ataliya kuti wareke kukomeka.

³Yowashi wakakhara na mlezi wakhe na kubisika mu nyumba ya FUMU virimika vinkhonde na chimoza, apo Fumukazi Ataliya wakawusanga charu.

⁴Kweni mu chirimika cha chinkhonde na chiŵiri, musofi Yehoyada wakatuma uthenga kuti ŵakacheme ŵarongozgi ŵa ŵasilikari awo ŵakarongozganga ŵasilikari 100 ŵeneawo ŵakavikiriranga nyumba ya ufumu. Ŵarongozgi aŵa ŵakiza nawo kwa musofi Yehoyada ku Nyumba ya FUMU. Penepapo wakapangana nawo kuŵarapiska. Pamanyuma wakaŵarongora Yowashi mwana wa karonga yura.

⁵Ndipo wakaŵalangula kuti, “Ichi ndicho mukwenera kuchitanga: Mwaŵeneimwe muli mu gulu la kwamba, ndipo mukwiza ku Nyumba ya Chiuta, kwiza kateŵetera sabata yino, mugaŵane patatu. Gulu lakwamba livikirirenge ku nyumba ya ufumu,

⁶gulu linyakhe la chiŵiri livikirirenge ku chipata cha Suru, ndipo gulu linyakhe lachitatu livikirirenge pa chipata icho chili kumanyuma kwa ŵavikiriri awo ŵakusinthana pakuvikirira Nyumba ya Chiuta.

⁷Sono magulu ghanyakhe ghaŵiri gha awo ŵakupumuzgika kuteŵeta pa Sabata nawo ŵakwenera kwiza kuti wavikirirenge Nyumba ya FUMU kuti ŵavikirirenge Karonga Yowashi.

⁸Mukwenera kuvikirira Karonga Yowashi pakumuzingirizga ndipo musilikari yose wakorerenge mahomwa mu mawoko ghakhe. Munthu yose uyo wasendererenge kufupi na karonga wakwenera kukomeka. Mukharenge pafupi na karonga kulikose uko wakuruta.”

⁹Ŵarongozgi ŵara ŵakachita vyose ivyo Musofi Yehoyada wakaŵalangula. Murongozgi waliyose wakiza na ŵanthu ŵakhe awo ŵakenera kuteŵeta pa zuŵa la Sabata kwamba awo ŵakambanga mlimo wawo na awo ŵakapumulanga. Ntheura wose ŵakiza kwa Musofi Yehoyayida.

¹⁰Penepapo musofi Yehoyada wakaŵapa ŵarongozgi ŵara mikondo na nguru izo zikaŵa za Davide zeneizo zikaŵa mu Nyumba ya FUMU.

¹¹Ndipo wakaŵandandika ŵasilikari ŵara kuti ŵavikirirenge karonga uku waliyose wakorera homwa ku woko lakhe. Ŵakimilira kufuma ku dera la ku mwera kwa Nyumba ya Chiuta mpaka ku mpoto kwa nyumba kuzingirira karonga uyo wakaŵa pafupi na jochero na Nyumba ya Chiuta.

¹²Penepapo musofi Yehoyada wakamufumya Yowashi mwana wa karonga na kumuvwarika mphumphu ya ufumu ku mutu wakhe. Wakamupa Buku la Marango gha kwendeskera ufumu ndipo wakamwimika kuti waŵe karonga. Wakamuphakazga mafuta kuti wambe kuwusa. Ŵanthu ŵakamukuŵira mawoko ndipo ŵakachemerezga ŵakati, “Muŵe na umoyo utali imwe karonga.”

¹³Para Fumukazi Ataliya yikati yapulika chiwawa cha ŵasilikari na cha ŵanthu, wakaruta ku ŵanthu ku Nyumba ya FUMU.

¹⁴Ndipo wakati walaŵiska, wakawona karonga wakwimilira pafupi na mzati, nga ndi umo kakaŵira kaluso kawo. Nduna na awo ŵakulizga mbata ŵali pafupi na karonga. Ŵanthu wose ŵakasekereranga na kulizga mbata mwakukondwa. Penepapo Ataliya wakaparura malaya ghakhe, ndipo wakachemerezga wakati, “Wakundigarukira! Wakundigarukira!”

¹⁵Penepapo musofi Yehoyada wakalangula ŵarongozgi ŵa ŵasilikari ŵara wakati, “Mufumiskani mwanakazi uyo mukati mu mizere iyo mwandanda. Munthu yose uyo wakusenderera kufupi kuti wamuthaske mumukome na lupanga.” Wakayowoya ichi chifukwa musofi wakayowoya kuti, “Mureke kumukomera pa Nyumba ya FUMU chara.”

¹⁶Ntheura ŵakamukora Ataliya yura ndipo ŵakenda nayo pakati pa muryango apo mahachi ghakanjira ku nyumba ya ufumu. Penepapa ndipo ŵakamukomera.

¹⁷Penepapo musofi Yehoyada wakachita phangano pakati pa FUMU na karonga ndiposo na ŵanthu kuti ŵati ŵaŵenge ŵanthu ŵa FUMU. Ŵanthu nawo ŵakachita phangano na karonga kuti ŵati ŵaŵe ŵakugomezgeka ku yumoza na munyakhe.

¹⁸Ntheura ŵanthu wose ŵa mu charu ŵakaruta ku nyumba ya Baala na kuyibwangandulira pasi. Majochero na vikozgo vyakhe ŵakaviteketa tuchokotuchoko ndipo Matani musofi wa Baala wakamukomera panthazi pa majochero. Ndipo musofi Yehoyada yura wakaŵikapo ŵalinda kuti ŵakavikirirenge Nyumba ya FUMU.

¹⁹Pamanyuma Yehoyada wakaŵandandika mu mizere ŵarongozgi ŵa ŵasilikari 100 ŵara, ŵasilikari ŵakuvikirira karonga, ŵasilikari ŵakuvikirira nyumba ya ufumu ndiposo na ŵanthu wose ŵa mu charu. Wose pamoza ŵakamuperekezga karonga kufuma ku Nyumba ya FUMU pakwiza pa chipata icho ŵakunjirira ŵasilikari ŵakuvikirira karonga. Penepapo Karonga Yowashi wakakhara pa chizumbe chakhe.

²⁰Ntheura ŵanthu wose ŵa mu charu ŵakasekerera, ndipo mu msumba mukaŵa bata chifukwa Ataliya wakakomekera pa nyumba ya ufumu.

²¹Yehowashi wakaŵa na virimika vinkhonde na viŵiri para wakambanga kuwusa charu cha Yuda.