Read new_tumbuka_bible 2 Karonga 12 Bible Online

2 Karonga 12 - new_tumbuka_bible bible

2 Karonga 12

¹Mu chirimika cha chinkhonde na chiŵiri cha kuwusa kwa Yehu, karonga wa Israele, Yehowashi wakamba kuwusa ndipo wakaŵa karonga wa Yuda mu msumba wa Yerusalemu pa virimika 40. Zina la nyina likaŵa Zibiya wakufumira ku msumba wa Beyeresheba.

²Yehowashi wakachita ivyo vikaŵa viweme panthazi pa FUMU mazuŵa ghose gha musofi Yehoyada chifukwa iyo ndiyo wakamurongozganga.

³Ndipouli malo gha pachanya ghakusoperako kuti ghakabwangandulika chara. Ŵanthu ŵakarutilira kuperekerako sembe ku vikozgo na kocherako vyakununkhira ku malo gheneghara.

⁴Zuŵa limoza Karonga Yehowashi wakati ku ŵasofi, “Torerani ndarama zose vinthu vyakupatulika ivyo ŵanthu ŵakupereka pa visopo mu Nyumba ya FUMU, ndarama izo munthu waliyose wali kupimikira kupereka ndiposo na ndarama izo ŵanthu ŵakupereka mu wanangwa mu Nyumba ya FUMU.

⁵Musofi waliyose watore ndarama izo kufumira ku awo ŵakusunga ndarama. Ndarama zeneizi ŵanozgere Nyumba ya Chiuta mose umo mukukhumbikwa kunozgeka.”

⁶Kweni mpaka mu chirimika cha 23 cha muwuso wa Karonga Yehowashi, ŵasofi kuti ŵakanozgapo palipose chara apo pakakhumbikwa kunozgeka.

⁷Penepapo Karonga Yehowashi wakachema musofi Yehoyada na ŵasofi ŵanyakhe ndipo wakaŵafumba wakati, “Kasi nchifukwa uli mukureka kuyinozga Nyumba ya Chiuta apo pakukhumbikwa kunozgeka? Ntheura kufuma sono mureke kutoraso ndarama izo kufumira kwa awo ŵakusunga ndarama. Ndarama izo mwatorerapo, muzipereke kuti ŵanozgere nyumba umo mukukhumbikwa kunozgeka.”

⁸Ntheura ŵasofi ŵakazomerezga kuti ŵati ŵareke kutora ndarama zinyakhe kufuma ku ŵanthu ndipo kuti iwo ŵareke kuŵa na nchito ya kunozga Nyumba ya Chiuta.

⁹Ntheura musofi Yehoyada wakatora bokosi ndipo wakadolora chidorozi pa chibenekerero chakhe ndipo wakaliŵika pafupi na jochero, ku dera la pakunjilira mu Nyumba ya FUMU. Sono ŵasofi awo ŵakalindanga pa khonde la nyumba ŵakaŵikamo ndarama zose izo ŵanthu ŵakizanga nazo ku Nyumba ya Chiuta.

¹⁰Sono para ŵakawona kuti muli ndarama zinandi mu bokosi, mulembi wa karonga na musofi mukuru ŵakizanga na kupenda ndarama zira ndipo ŵakaziŵikanga mu mathumba ndarama zose izo zikasangika mu Nyumba ya FUMU.

¹¹Ndipo para ŵazipenda ndarama zira, ŵakaziperekanga ku awo ŵakendeskanga mlimo wakunozga Nyumba ya FUMU. Na ndarama zeneizi wakalipiranga ŵakupara mathabwa na awo ŵakazenganga Nyumba ya FUMU.

¹²Ŵakalipirangaso nazo nkhwantha pakuzengera mawe ndiposo na ŵakudumula mawe. Zinyakhe ŵakaguliranga mathabwa na mawe ghakuswa ghakunozgera Nyumba ya FUMU mu malo mwakwanangika. Na ndarama zakukharapo ŵakaguliranga chilichose icho chikakhumbikwanga pakunozga Nyumba ya FUMU.

¹³Ndarama izo ŵanthu ŵakaperekanga, kuti ŵanozgere Nyumba ya FUMU, kuti wakaziguliranga mbale za siliva chara nga ndi zimbano, ŵabakule, zimbata nesi chiteŵetero chilichose cha golide panji cha siliva.

¹⁴Ndarama zose zikaperekeka ku ŵateŵeti awo ŵakanozganga Nyumba ya FUMU.

¹⁵Ŵanthu awo wakaŵapa ndarama kuti ŵalipire awo ŵakanozganga Nyumba ya Chiuta, kuti ŵakafumbangaso kuti ŵandure umo zateŵetera mlimo wakhe chara chifukwa ŵanthu aŵa ŵakaŵa ŵakugomezgeka chomene.

¹⁶Ndarama izo zikaperekekanga pa sembe yakuphepiskira majuvyo na sembe ya kwananga kuti ŵakizanga nazo ku Nyumba ya FUMU chara. Ndarama izi zikaŵanga za ŵasofi.

¹⁷Pa nyengo yeneyira Hazayele, karonga wa Siriya wakaruta kuya karwa nkhondo na msumba wa Gati na kuwupoka. Pamanyuma wakaghanaghana kuti wakarwe nkhondo na msumba wa Yerusalemu.

¹⁸Kweni Yehowashi, karonga wa Yuda wakatora vyose vyakupatulika ivyo ŵawiskekuru, Yehoshafati, Yehoramu na Ahaziya ŵakaronga ŵa Yuda ŵakavipatula pamoza na vinthu ivyo iyomwene wakavipatula. Wakatoraso golide yose uyo wakasangika mu chakusungiramo vyuma mu Nyumba ya FUMU na ya ufumu. Vyose ivi wakavituma kwa Hazayele karonga wa charu cha Siriya. Hazayele wakati wavipoka vyose ivi wakafumamo mu msumba wa Yerusalemu.

¹⁹Milimo yinyakhe ya Karonga Yowashi na vyose ivyo wakachita vili kulembeka mu Buku la Midauko la ŵakaronga ŵa charu cha Yuda.

²⁰Nduna zakhe zikamuchitira chiŵembu ndipo zikamukoma Yowashi mu nyumba yakuchemeka Milo iyo yili pa nthowa ya kuya ku Sila.

²¹Nduna izo zikamukoma Yowashi zikaŵa Yozabadi mwana wa Shimeyati na Yehozabadi mwana wa Shomere. Yowashi wakafwa ndipo wakasungika mu dindi pamoza na ŵawiskekuru mu msumba wa Davide. Amaziya mwana wakhe ndiyo wakamba kuwusa mu malo ghakhe.