Read new_tumbuka_bible 2 Karonga 13 Bible Online

2 Karonga 13 - new_tumbuka_bible bible

2 Karonga 13

¹Yehowahazi mwana wa Yehu wakamba kuwusa charu cha Israele mu Samariya mu chirimika cha 23 cha muwuso wa Karonga Yowashi mwana wa Ahaziya mu charu cha Yuda. Yehowahazi wakawusa virimika 17.

²Yehowahazi wakachita uheni panthazi pa FUMU. Iyo wakachita uheni uwo wakachitanga Yerobowamu mwana wa Nebati mweneuyo wakanangiska nawo ŵaIsraele ndipo wakakhumba chara kuti wawureke.

³Chifukwa cha cheneichi, FUMU yikaŵakwiyira chomene ŵaIsraele ndipo kaŵirikaŵiri yikaŵapereka mu mawoko gha Hazayele na mwana wakhe Beni Hadadi ŵakaronga ŵaSiriya kuti ŵa ŵathereskenge.

⁴Penepapo Yehowahazi wakawerera kwa FUMU ndipo iyo yikaŵapulika chifukwa yikawona kuti ŵaIsraele ŵakasuzgika chomene na karonga wa Siriya.

⁵FUMU yikaŵatumira muthaski ŵaIsraele kuti waŵathaske ku ŵaSiriya. Ntheura ŵaIsraele ŵakakharaso mu vikaya vyawo mu mutende nga mpha kudanga.

⁶Ndipouli kuti wakareka kuchita uheni uwo mbumba ya Yerobowamu yikanangiska nawo ŵaIsraele chara. Iwo ŵakarutilira kuchita uheni chomenechomene pakuŵa na chisopo kwa chiuta ngoza Ashera mweneuyo wakaŵa mu msumba wa Samariya.

⁷Karonga Hazayele wa Siriya wakaŵamara chomene ŵasilikari ŵa Israele, mwakuti Karonga Yehowahazi wakaŵa na ŵasilikari 50 ŵakukwera mahachi, magareta ghakaŵa khumi ndipo na ŵasilikari 10,000 ŵakwenda pasi pakuti ŵakaŵamara petu na kuŵazgora nga ndi fuvu lakuthibuka na malundi.

⁸Milimo yinyakhe ya Yehowahazi na vyose ivyo wakachita na nkhongono zakhe vili kulembeka mu Buku la Midauko la ŵakaronga ŵa charu cha Israele.

⁹Penepapo Yehowahazi wakafwa ndipo wakasungika pamoza ŵawiskekuru mu msumba wa Samariya. Yowashi uyo wakaŵa mwana wakhe ndiyo wakamba kuwusa mu malo mwa ŵawiske.

¹⁰Yehowashi mwana wa Yehowahazi wakamba kuwusa charu cha Israele mu chirimika cha 37 cha kuwusa kwa Yowashi, karonga wa Yuda. Ndipo wakawusa virimika 16 mu msumba wa Samariya.

¹¹Yehowashi wakachita uheni panthazi pa FUMU. Iyo wakachita uheni uwo wakachitanga Yerobowamu mwana wa Nebati, weneuwo wakanangiska nawo ŵaIsraele ndipo wakarutilira kuwuchita uheni weneuwu.

¹²Sono milimo yinyakhe ya Yowashi na vyose ivyo wakachita ndiposo na nkhongono zakhe izo wakarongora pakurwa nkhondo na Amaziya, karonga wa Yuda, vili kulembeka mu Buku la Midauko la ŵakaronga ŵa charu cha Israele.

¹³Yowashi wakafwa ndipo wakasungika mu dindi mu msumba wa Samariya pamoza na ŵakaronga ŵa Israele. Mwana wakhe Yerobowamu ndiyo wakakhara pa chizumbe na kwamba kuwusa.

¹⁴Sono Elisha wakati warwara na matenda agho ghakamutoreranga ku nyifwa, Yowashi karonga wa Israele wakaruta kuti wakamuwone ndipo wakati wafika, wakalira chomene wakati “Ŵadada! Ŵadada! Ndimwe mwanguŵa magareta na mahachi gha Israele!”

¹⁵Ndipo Elisha wakati kwa iyo, “Tora uta na mivwi.” Ntheura Yehowashi wakatora uta na mivwi.

¹⁶Penepapo Elisha wakati kwa karonga wa Israele, “Kweŵa uta.” Yehowashi wakakweŵa uta ura ndipo Elisha wakaŵikapo mawoko ghakhe pa mawoko gha karonga.

¹⁷Ndipo Elisha wakati, “Jura chidangazi cha kumafumiro gha dazi.” Ndipo iyo wakajula. Penepapo Elisha wakati, “Ponya mivwi!” Ndipo wakaponya. Sono wakati waka ponye, penepapo Elisha wakati kwa Karonga Yehowashi, “Ndiwe muvwi wa FUMU, ndipo ndimo uthereskerenge ŵaSiriya. Uti urwenge na ŵaSiriya mu Afeki mpaka uŵamare petu.”

¹⁸Elisha wakati, “Tora mivwi.” Ndipo karonga yura wakatora mivwi yira. Elisha wakamuphalira karonga wa Israele kuti, “Lasa nayo pasi mivwi iyo.” Ntheura wakalasa pasi katatu na kureka.

¹⁹Munthu wa Chiuta wakamukwiyira karonga ndipo wakati kwa iyo, “Iwe mphanyi wangulasa kankhonde panji kankhonde na kamoza. Uchitenge ntheura wati uthereskenge charu cha Siriya na kuŵamalirathu petu. Kweni sono uti uthereskenge charu cha Siriya katatu pera.”

²⁰Sono Elisha wakafwa ndipo wakasungika. Kweni vitha vya nkhondo vya Mowabu vikatemwanga kuskogha Israele mu nyengo za nyambwani chirimika na chirimika.

²¹Zuŵa limoza, ŵanthu ŵakarutanga kuya kasunga munthu wakufwa. Para wakati ŵawona wumba wa ŵaskoghi ŵa ŵaMowabu, ŵakataya chitanda cha munthu yura mu dindi la Elisha. Para chitanda chira chikakhwaska waka viwangwa vya Elisha, munthu wakufwa yura wakawuka na kwimilira.

²²Karonga Hazayele wa Siriya wakaŵasuzganga chomene ŵaIsraele pa nyengo yose ya muwuso wa Yehowahazi,

²³kweni FUMU yikatemwa ŵaIsraele na kuŵa nawo na chiwuravi, yikaŵikapo mtima pa iwo chifukwa cha phangano ili yikapangana na Abrahamu, Yisake na Yakhobe mpaka sono FUMU kuti yikukhumba chara kuŵamara petu ŵanthu ŵakhe.

²⁴Sono Hazayele karonga wa Siriya wakati wafwa, mwana wakhe Beni Hadadi ndiyo wakamba kuwusa mu malo mwakhe.

²⁵Sono Yowashi mwana wa Yehowahazi wakapokaso misumba iyo Beni Hadadi, mwana wa Hazayele, wakapoka kwa wiske Yehowahazi. Yowashi wakamuthereska Beni Hadadi kwakuyana na katatu na kupokaso misumba ya Israele.