Read new_tumbuka_bible 2 Karonga 14 Bible Online

2 Karonga 14 - new_tumbuka_bible bible

2 Karonga 14

¹Amaziya mwana wa Yowashi, mwana wa Yowahazi, wakamba kuwusa charu cha Yuda mu chirimika cha chiŵiri cha kuwusa kwa Yehowashi, karonga wa Israele.

²Iyo wakaŵa na virimika 25 para wakambanga kuwusa ndipo wakaŵa karonga pa virimika 29 mu msumba wa Yerusalemu. Zina la nyina likaŵa Yehowadini wa ku Yerusalemu.

³Amaziya wakachita icho chikaŵa chiweme panthazi pa FUMU, nangauli kuti ukayana na uweme uwo wakachita Davide wiskekuru wakhe chara. Mu vinthu vinandi ivyo wakachita, vikayana waka na ivyo wakachita wiske Yowashi.

⁴Kweni malo gha pachanya ghakusoperako kuti ghakabwangandulika chara. Ŵanthu ŵakarutilira kuperekerako sembe na kocherako vyakununkhira ku malo gheneghara.

⁵Amaziya wakati wakapoka mazaza gha ufumu wakhe, wakakoma nduna izo zikakoma karonga ŵawiske.

⁶Kweni iyo kuti wakakoma ŵana ŵawo chara, kweni wakachita nga ndi umo kuli kulembekera mu Dango la mu Buku la Mozesi umo FUMU yikalangula kuti, “Ŵapapi ŵareke kukomeka chifukwa cha kwananga kwa ŵana ndipo ŵana nawo, ŵareke kukomeka chifukwa cha kwananga kwa ŵapapi ŵawo.”

⁷Karonga Amaziya ndiyo wakakoma ŵasilikari ŵa Edomu ŵakukwana 10,000 mu Dambo la Muchere. Wakapoka msumba wa Sela uwo pamanyuma wakawuthya zina lakuti, “Yokitele” ndiko kuti, “Kuthereskeka na Chiuta,” ndipo ukuchemeka na zina leneili mpaka muhanya uno.

⁸Zuŵa limoza Amaziya wakatuma nthumi kuruta kwa Karonga Yehowashi wa Israele mweneuyo wakaŵa mwana wa Yehowahazi ndipo muzukuru wa Yehu na mazgu ghakuti, “Zanga tiwonane pakurwa nkhondo.”

⁹Sono Yehowashi karonga wa Israele wakamuzgora Amaziya, karonga wa Yuda kuti, “Nyengo yimoza nthura ya mu nkhorongo ya Lebanoni yikatuma nthumi ku khuni la milanje mu nkhorongo yeneyira na mazgu ghakuti, ‘Pereka mwana wako mwanakazi kuti watorane na mwana wane mwanarume kuti waŵe muwoli wakhe.’ Pamanyuma chikoko cha mu nkhorongo yeneyira chikizira mu nthowa yeneyira na kukandira pasi nthura yira.

¹⁰Iwe ukachithereska nadi charu cha Edomu ndipo sono ukujikuzga. Ukhorwenge na uchindami uwo uli nawo ndipo ukhare waka pasi pa chikaya chako. Kasi nchifukwa uli ukusosomora suzgo kuti iwe na charu cha Yuda mumarire pamoza?”

¹¹Kweni Amaziya kuti wakapwererako za ichi chara. Ntheura Yehowashi karonga wa Israele wakaruta kuya karwa nkhondo na Amaziya, karonga wa Yuda ndipo ŵakarweranga ku Beti Shemeshi mu charu cha Yuda.

¹²Ndipo ŵasilikari ŵa Yuda ŵakathereskeka na ŵasilikari ŵa Israele. Penepapo ŵasilikari ŵa Yuda ŵakachimbira, kuruta ku vikaya vyawo.

¹³Karonga Yehowashi wakamukora Amaziya, karonga wa charu cha Yuda ndiposo mwana wa Yowashi, muzukuru wa Ahaziya pa Beti Shemeshi. Pamanyuma Yehowashi wakiza ku Yerusalemu na kubwangandulira pasi linga la msumba wa Yerusalemu pa mtunda wakukwana mamita 200 kufumira ku chipata cha Efurayimu mpaka ku chipata cha pangodya.

¹⁴Ndipo wakatora ndarama zose za golide na za siliva ndiposo na viteŵetero vyose ivyo wakavisanga mu Nyumba ya FUMU na ivyo vikaŵa mu nyumba yakusungiramo vyuma mu nyumba ya ufumu. Wakakoraso uzga ŵanthu ŵanyakhe na kuruta nawo ku msumba wa Samariya.

¹⁵Sono milimo yinyakhe ya Yehowashi iyo wakachita na nkhongono zakhe ndiposo umo wakarwera nkhondo na Amaziya, karonga wa Yuda, vili kulembeka mu Buku la Midauko la ŵakaronga ŵa charu cha Israele.

¹⁶Ntheura Yehowashi wakafwa ndipo wakasungika mu msumba wa Samariya pamoza na ŵakaronga ŵa Israele. Ndipo mwana wakhe Yerobowamu wakamba kuwusa mu malo ghakhe.

¹⁷Amaziya mwana wa Yowashi, karonga wa Yuda, wakakhara virimika 15 wakati wafwa Yehowashi, mwana wa Yehowahazi, karonga wa Israele.

¹⁸Sono milimo yinyakhe ya Amaziya na ivyo wakachita vili kulembeka mu Buku la Midauko la ŵakaronga ŵa charu cha Yuda.

¹⁹Ŵanthu ŵanyakhe ŵa mu Yerusalemu ŵakamuchitira chiŵembu Amaziya ndipo iyo wakati wapulika, wakachimbilira ku msumba wa Lakishi. Kweni ŵarwani ŵakhe ŵakatuma ŵanthu kumurondezga ndipo ŵakamukomera kwenekura.

²⁰Thupi lakhe ŵakiza nalo ku Yerusalemu pakuliyegha pa hachi ndipo wakamusunga ku mararo gha ŵakaronga mu msumba wa Davide.

²¹Pamanyuma pa ichi ŵanthu wose ŵa charu cha Yuda wakatora Azariya uyo wakaŵa na virimika 16 ndipo ŵakamuŵika kuŵa karonga mu malo mwa wiske Amaziya.

²²Uziya ndiyo wakazengaso msumba wa Elati na kuwuwezgera ku charu cha Yuda wakati wafwa Amaziya na kusungika ku mararo gha ŵawiskewokuru.

²³Yerobowamu, mwana wa Yowashi wakamba kuwusa Israele mu chirimika cha 15 cha kuwusa kwa Amaziya, karonga wa Yuda. Yerobowamu wakawusa virimika 41 kufumira mu msumba wa Samariya.

²⁴Yerobowamu wakachita ivyo vikaŵa viheni panthazi pa FUMU, ndipo kuti wakawureka uheni uwo wakachitanga Yerobowamu mwana wa Nebati weneuwo wakanangiska nawo ŵaIsraele chara.

²⁵Yerobowamu ndiyo wakawezgeraso mphaka za charu cha Israele kufuma ku Lebo Hamati ku mpoto mpaka ku nyanja ya Araba cha ku mwera. Iyo wakachita ichi kwakuyana na mazgu agho FUMU, Chiuta wa Israele wakayowoyera mwa muteŵeti wakhe Yona, mwana wa nchimi Amitayi uyo wakakharanga ku Gati Hefere.

²⁶FUMU yikawona visuzgo vikuru ivyo ŵaIsraele ŵakaŵa navyo, manyi mwanangwa panji muzga, ndipo pakaŵavye na yumoza chara wakukharapo, ndipo pakaŵavye na yumoza kuti wovwire ŵaIsraele.

²⁷FUMU kuti yikayowoyapo chara kuti yiti yimalirengethu kwa muyirayira charu cha Israele. Mwa ntheura FUMU yikaŵathaska ŵaIsraele kwizira mwa Yerobowamu wa chiŵiri, mwana wa Yowashi.

²⁸Milimo yinyakhe ya Yerobowamu wa chiŵiri, ndiposo na nkhongono zakhe umo wakarwera nkhondo, umo wakapokera misumba ya Damaseko na Hamati kuŵa ya mu Israele kufuma mu Yuda, vili kulembeka mu Buku la Midauko la ŵakaronga ŵa charu cha Israele.

²⁹Yerobowamu wakafwa ndipo wakasungika pamoza na ŵawiskekuru, ŵakaronga ŵa Israele. Ndipo mwana wakhe Zakariya ndiyo wakamba kuwusa mu malo ghakhe.