Read new_tumbuka_bible 2 Karonga 15 Bible Online

2 Karonga 15 - new_tumbuka_bible bible

2 Karonga 15

¹Azariya mwana wa Amaziya wakamba kuwusa charu cha Yuda mu chirimika cha 27 cha kuwusa kwa Yerobowamu, karonga wa Israele.

²Azariya wakaŵa na virimika 16 para wakambanga kuwusa ndipo wakaŵa karonga mu msumba wa Yerusalemu pa virimika 52. Zina la nyina ŵakhe likaŵa Yekoliya uyo kwawo kukaŵa ku Yerusalemu.

³Iyo wakachita ivyo vikaŵa viweme panthazi pa FUMU nga ndi ivyo wakachita Amaziya ŵawiske ŵakhe.

⁴Ndipouli, malo gha pachanya ghakusoperako kuti ghakabwangandulika chara. Ŵanthu ŵakarutilira kuperekerako sembe na kocherako vyakununkhira ku malo gheneghara.

⁵Ntheura FUMU yikamulanga Karonga Azariya na nthenda ya vyoni. Ndipo wakarwara na nthenda yeneiyi pa umoyo wakhe wose. Penepapo wakafumamo mu nyumba ya ufumu na kuya kakhara mu nyumba ya yekha ndipo ŵakamurekeska kuŵa na mazaza. Mwana wakhe Yotamu ndiyo wakaŵa na mazaza pa nyumba ya ufumu na kuwusa ŵanthu ŵa charu.

⁶Milimo yinyakhe ya Azariya na vyose ivyo wakachita, vili kulembeka mu Buku la Midauko la ŵakaronga ŵa charu cha Yuda.

⁷Azariya wakafwa ndipo wakasungika mu dindi pafupi na ŵawiskekuru mu msumba wa Davide. Ndipo mwana wakhe Yotamu ndiyo wakamba kuwusa mu malo ghakhe.

⁸Zakariya mwana wa Yerobowamu wakamba kuwusa Israele mu msumba wa Samariya mu chirimika cha 38 cha kuwusa kwa Azariya, karonga wa Yuda. Kweni wakawusa Israele pa myezi yinkhonde na umoza pera.

⁹Zakariya wakachita ivyo vikaŵa viheni panthazi pa FUMU nga ndi umo ŵawiskekuru ŵakhe ŵakachitira. Iyo kuti wakawureka uheni uwo wakachitanga Yerobowamu mwana wa Nebati chara weneuwo wakanangiska nawo ŵaIsraele.

¹⁰Sono Shalumu mwana wa Yabeshi wakamuchitira chiŵembu Zakariya ndipo wakamukomera mu msumba wa Ibileyamu uku ŵanthu ŵakuwona. Shalumu wakati wachita ichi, iyo ndiyo wakamba kuwusa.

¹¹Milimo yinyakhe ya Zakariya na ivyo wakachita, vili kulembeka mu Buku la Midauko la ŵakaronga ŵa charu cha Israele.

¹²Ichi chikachitika ntheura kuti mazgu agho FUMU yikayowoya mwa Yehu ghafiskike, agho ghakaŵa ghakuti, “Mwana wako wakharenge pa chizumbe cha ufumu wa Israele kuya kafika ku muwiro wa chinayi.”

¹³Shalumu, mwana wa Yabeshi wakamba kuwusa Israele mu chirimika cha 39 cha kuwusa kwa Uziya, karonga wa Yuda. Iyo wakawusa Israele mu msumba wa Samariya kwa mwezi umoza pera.

¹⁴Pamanyuma pa ichi Menahemu mwana wa Gadi wakiza ku msumba wa Samariya kufumira ku msumba wa Tiriza. Wakamuwukira Shalumu mwana wa Yabeshi na kumukoma, ndipo iyo ndiyo wakamba kuwusa mu malo ghakhe.

¹⁵Milimo yinyakhe iyo Shalumu wakachita, na chiŵembu icho wakachita, vili kulembeka mu Buku la Midauko la ŵakaronga ŵa charu cha Israele.

¹⁶Pa nyengo yeneyira Menahemu wakufuma ku msumba wa Tifisa wakiza kapankhura msumba wose wa Tapuwa na kukoma ŵanthu aŵa ŵakakharanga mu msumba ura pamoza na awo ŵakakharanga mu vyaru kuzingirizga msumba ura. Wakachita ntheura chifukwa ŵanthu ŵa msumba ura ŵakakana kumujulira vipata vyawo. Ŵakawupankhura msumba ndipo ŵanakazi wose awo ŵakaŵa na zinthumbo, ŵakaŵafulumura.

¹⁷Menahemu mwana wa Gadi wakamba kuwusa charu cha Israele mu chirimika cha 39 cha kuwusa kwa Azariya, karonga wa charu cha Yuda. Menahemu wakawusa charu cha Israele virimika khumi mu msumba wa Samariya.

¹⁸Menahemu wakachita uheni panthazi pa FUMU pa nyengo ya muwuso wakhe wose. Iyo kuti wakawureka uheni uwo wakachitanga Yerobowamu mwana wa Nebati chara, weneuwo wakanangiska nawo ŵaIsraele.

¹⁹Tigilati Pilesera, karonga wa charu cha Asiriya wakiza na kurwa nkhondo na charu cha Israele. Menahemu wakapereka kwa Tigilati Pilesera makilogiramu 34,000 gha ndarama za siliva kuti wamovwire kukhozga ufumu wakhe.

²⁰Menahemu wakachita kusonkheska ndarama izi ndipo munthu waliyose uyo wakaŵa musambazi wakasonkhanga ndarama za siliva zakukwana 50 kuti wazipereke kwa karonga wa ku Asiriya. Ntheura karonga wa Asiriya wakati wapokera ndarama zira wakawerera kwawo, ndipo kuti wakakhara mu charu chira chara.

²¹Milimo yinyakhe ya Menahemu na vyose ivyo wakachita vili kulembeka mu Buku la Midauko la ŵakaronga ŵa charu cha Israele.

²²Menahemu wakafwa ndipo wakasungika. Ntheura mwana wakhe Pekahiya ndiyo wakamba kuwusa mu malo ghakhe.

²³Pekahiya mwana wa Menahemu wakamba kuwusa Israele mu Samariya mu chirimika cha 15 cha kuwusa kwa Azariya, karonga wa charu cha Yuda. Pekahiya wakawusa virimika viŵiri pera.

²⁴Pekahiya wakachita uheni panthazi pa FUMU. Iyo kuti wakawureka uheni uwo wakachitanga Yerobowamu mwana wa Nebati chara weneuwo wakanangiska nawo ŵaIsraele.

²⁵Murongozgi wakhe wa nkhondo zina lakhe Peka, mwana wa Remaliya, wakamuchitira chiŵembu. Iyo wakatora ŵanthu 50 ŵa ku Gileyadi ndipo ŵakamukoma Pekahiya. Wakamukomera mu msumba wa Samariya mu chipinda chakuphokweramo cha nyumba ya ufumu. Wakati wamukoma iyo wakawusa mu malo ghakhe.

²⁶Milimo yinyakhe ya Pekahiya na vyose ivyo wakachita vili kulembeka mu Buku la Midauko la ŵakaronga ŵa charu cha Israele.

²⁷Peka mwana wa Remaliya wakamba kuwusa charu cha Israele mu chirimika cha 52 cha kuwusa kwa Azariya, karonga charu cha Yuda. Iyo wakawusa virimika 20 mu msumba wa Samariya.

²⁸Peka wakachita uheni panthazi pa FUMU. Iyo kuti wakawureka uheni uwo wakachitanga Yerobowamu mwana wa Nebati chara weneuwo wakanangiska nawo ŵaIsraele.

²⁹Mu mazuŵa gha kuwusa kwa Peka, karonga wa charu cha Israele, Tigilati Pilesere, karonga wa charu cha Asiriya wakiza ndipo wakapoka misumba iyi: Iyoni, Abelu Beti Maaka, Yanowa, Kedeshi na Hazoro. Wakapokaso chigaŵa cha Gileyadi na cha Galileya ndiposo na charu chose cha Nafutali. Wakatora ŵaIsraele ŵanyakhe na kuruta nawo ku Asiriya kuŵa ŵazga.

³⁰Sono Hosheya mwana wa Ela wakamuchitira chiŵembu Peka mwana wa Remaliya ndipo wakamuwukira na kumukoma. Ntheura iyo ndiyo wakamba kuwusa charu cha Israele mu chirimika cha 20 cha kuwusa kwa Yotamu, mwana wa Uziya wa charu cha Yuda.

³¹Milimo yinyakhe ya Peka na vyose ivyo wakachita vili kulembeka mu Buku la Midauko la ŵakaronga ŵa charu cha Israele.

³²Yotamu mwana wa Uziya wakamba kuwusa charu cha Yuda mu chirimika cha chiŵiri cha kuwusa kwa Peka, mwana wa Remaliya karonga wa charu cha Israele.

³³Yotamu wakaŵa na virimika 25 para wakambanga kuwusa ndipo wakaŵa karonga mu Yerusalemu pa virimika 16. Zina la nyina likaŵa Yerusha mwana wa Zadoki.

³⁴Yotamu wakachita ivyo vikaŵa viweme panthazi pa FUMU nga ndi ivyo wakachita wiske Uziya.

³⁵Ndipouli, malo gha pachanya ghakusoperako kuti ghakabwangandulika chara. Ŵanthu ŵakarutilira kuperekerako sembe na kocherako vyakununkhira ku malo gheneghara. Yotamu ndiyo wakazenga chipata cha kunena cha Nyumba ya FUMU.

³⁶Milimo yinyakhe ya Yotamu, na vyose ivyo wakachita vili kulembeka mu Buku la Midauko la ŵakaronga ŵa charu cha Yuda.

³⁷Mu mazuŵa gha kuwusa kwa Yotamu FUMU yikamba kutuma Rezini, karonga wa charu cha Siriya, na Peka mwana wa Remaliya, karonga wa charu cha Israele kuti ŵakarwe nkhondo na charu cha Yuda.

³⁸Sono Yotamu wakafwa ndipo wakasungika mu dindi pamoza na ŵawiskekuru ŵakhe mu msumba wa Davide sekuru ŵakhe. Ndipo Ahazi mwana wakhe ndiyo wakamba kuwusa mu malo ghakhe.