Read new_tumbuka_bible 2 Karonga 16 Bible Online

2 Karonga 16 - new_tumbuka_bible bible

2 Karonga 16

¹Ahazi mwana wa Yotamu wakamba kuwusa charu cha Yuda mu chirimika cha 17 cha kuwusa kwa Peka, mwana wa Remaliya, karonga wa Israele.

²Ahazi wakaŵa na virimika 20 para wakambanga kuwusa ndipo wakaŵa karonga mu Yerusalemu pa virimika 16. Ahazi kuti wakachita viweme chara panthazi pa FUMU, Chiuta wakhe, nga ndi umo wakachitira Davide wiskekuru wakhe.

³Iyo wakachita viheni nga ndi ivyo ŵakachitanga ŵakaronga ŵa charu cha Israele. Wakapereka mwana wakhe mwanarume kuŵa sembe yakocha pa moto kurondezga machitiro gha ukazuzi gha ŵamitundu ŵeneawo FUMU yikaŵachimbizga para ŵaIsraele ŵakafikanga mu charu.

⁴Ahazi wakapereka sembe na kocha vyakununkhira ku malo gha pachanya ghakusoperako, pa mapiri ndiposo na musi mwa makuni ghose gha minthavi ghakuntandazga.

⁵Penepapo Rezini karonga wa charu cha Siriya na Peka karonga wa charu cha Israele ŵakiza kuti ŵarwe nkhondo na Ahazi ndipo ŵakazingirizga msumba wa Yerusalemu, kweni wakatondeka kumuthereska Ahazi.

⁶Pa nyengo yeneiyi Karonga Rezini wa charu cha Aramu wakapokaso msumba wa Elati na kuŵachimbizgamo ŵaYuda ndipo wakawezgeramoso ŵaEdomu ŵeneawo ŵakukhara mwenemumo.

⁷Penepapo Ahazi wakatuma nthumi kwa Tigilati Pilesere, karonga wa charu cha Asiriya na mazgu ghakuti, “Ine ndine muteŵeti winu ndiposo mwana winu. Zaninge mwizandithaske ku mawoko gha karonga wa charu cha Siriya na wa cha Israele ŵeneawo ŵandiwukira kuti ŵarwe nkhondo na ine.”

⁸Ahazi wakatora ndarama za siliva na za golide izo zikaŵa mu Nyumba ya FUMU na mu chakusungiramo vyuma mu nyumba ya ufumu ndipo wakazituma nga ndi vyawanangwa kwa karonga wa ku Asiriya.

⁹Ndipo karonga wa ku Asiriya wakamupulikira Karonga Ahazi ndipo wakaruta kuya karwa nkhondo na msumba wa Damaseko na kuwupoka. Wakakoma Karonga Rezini na kutora ŵanthu ŵanyakhe kuruta nawo ku msumba wa Kiri kuŵa ŵazga.

¹⁰Penepapo Karonga Ahazi wakaruta ku Damaseko kuti wakakumane na Tigilati Pilesere, karonga wa ku Asiriya. Kwenekura wakawona jochero, ndipo wakatuma kaŵiro ka jochero lira kwa musofi Uriya na kulirongora makora umo lingapangikira.

¹¹Ntheura musofi Uriya wakazenga jochero lakuyana waka ndiposo na umo Karonga Ahazi wakamurongorera umo likwenera kupangikira. Wakapanga jochero lira pambere Ahazi wandawereko kufuma ku Damaseko.

¹²Karonga Ahazi wakati wawerako kufuma ku msumba wa Damaseko, wakaliwona jochero lira ndipo wakiza kufupi na kuperekerapo sembe pa leneilo.

¹³Sembe iyo wakaperekerapo yikaŵa yakocha na ya ufu wa chakurya ndipo na ya chakumwa pakuthirapo vinyo ndipo yikamijirapo ndopa za sembe yakhe ya wenenawene pa jochero lira.

¹⁴Ahazi wakatora jochero la mkuŵa ilo likaŵa panthazi pa Nyumba ya FUMU ndipo wakaliŵika cha ku mpoto kunyuma kwa jochero lakhe lira. Ntheura jochero lakhe lira likaŵa panthazi pa Nyumba ya Chiuta.

¹⁵Sono Ahazi wakamulangula musofi Uriya wakati, “Pa jochero likuru ili ndipo uperekerengepo sembe zakocha mburuma ku mulenje ndipo ku na mise sembe ya ufu. Ndipo uperekerengeposo sembe yakocha mburuma na sembe ya ufu ya karonga, pamoza na sembe yakukoma, sembe ya ufu na sembe ya vyakumwa, ya ŵanthu wose mu charu. Ndipo umijirepo pa jochero ndopa za sembe zose zakocha mburuma na sembe zakukoma zose. Kweni jochero la mkuŵa liti liŵenge la kufumbira khumbo la Fumu.”

¹⁶Ndipo musofi Uriya wakachita vyose nga ndi umo Karonga Ahazi wakamulangulira.

¹⁷Ndipo Karonga Ahazi wakawuskapo vyakukolerera vyakuŵikapo mabeseni mu Nyumba ya Chiuta. Ndipo vyakwimapo vya mkuŵa ivyo vikawonekanga nga ndi ng'ombe vyakukhozga chiŵiya mkuŵa chakuŵikamo maji nacho wakachiwuskapo na kuchiŵika pa lufura lwa mawe.

¹⁸Ndipo pakukhumba kukondweska karonga wa ku Asiriya, Ahazi wakawuskamoso kanyumba kakupumuliramo karonga mu Nyumba ya FUMU ndipo kanthowa kakunjirirapo karonga mu Nyumba ya Chiuta nako wakajara.

¹⁹Milimo yinyakhe ya Ahazi na vyose ivyo wakachita vili kulembeka mu Buku la Midauko la ŵakaronga ŵa charu cha Yuda.

²⁰Ahazi wakafwa ndipo wakasungika mu msumba wa Davide pamoza na ŵawiskekuru ŵakhe. Ndipo mwana wakhe Hezekiya ndiyo wakamba kuwusa mu malo ghakhe.