Read new_tumbuka_bible 2 Karonga 17 Bible Online

2 Karonga 17 - new_tumbuka_bible bible

2 Karonga 17

¹Hosheya mwana wa Ela wakamba kuwusa Israele mu chirimika cha 12 cha kuwusa kwa Ahazi, karonga wa Yuda. Hosheya wakawusa virimika vinkhonde na vinayi mu msumba wa Samariya.

²Hosheya wakachita uheni panthazi pa FUMU uwo ŵakaronga ŵakudanga ŵa Israele kuti ŵakachita chara.

³Karonga Shalimanesere wa Asiriya wakiza na kurwa nkhondo na Israele ndipo Karonga Hosheya wakathera ndipo wakapereka msonkho kwa karonga wa ku Asiriya.

⁴Kweni karonga wa charu cha Asiriya, wakasanga kuti Hosheya ndi muryarya, pakuti Hosheya wakatuma nthumi kwa Karonga So, wa charu cha Eguputo kuti wakasangeko wovwiri. Hosheya wakarekaso kupereka msonkho wa chirimika na chirimika kwa karonga wa Asiriya. Ntheura karonga yura wakamukora Hosheya na kumujalira mu gadi.

⁵Kufuma apo Karonga Shalimanezera wa Asiriya wakiza na kurwa nkhondo na charu cha Israele chose, ndipo wakaya kafika ku msumba wa Samariya na kuwuzingirizga pa virimika vitatu.

⁶Mu chirimika cha chinkhonde na chinayi cha kuwusa kwa Hosheya, karonga wa Asiriya wakawupoka msumba wa Samariya. Wakayora ŵaIsraele na kuruta nawo ku Asiriya nga ndi ŵazga. Wakaya kaŵaŵika mu msumba wa Hala, ŵanyakhe pafupi na mronga wa Haboro mu chigaŵa cha Gozani, ndipo ŵanyakheso wakaya kaŵaŵika mu misumba ya mu charu cha Mediya.

⁷Vyose ivi vikachitika chifukwa ŵaIsraele ŵakanangira FUMU, Chiuta wawo mweneuyo wakaŵafumya mu charu cha Eguputo pasi pa mazaza gha Faro karonga wa Eguputo. ŴaIsraele ŵakasopangaso ŵachiuta ŵanyakhe mu malo mwakusopa FUMU Chiuta.

⁸Ŵakambaso kuchita maluso gha ŵamitundu, awo FUMU yikaŵachimbizgamo kuti ŵaIsraele ŵahare charu. Ŵakachitangaso maluso ghanyakhe ghaheni agho ŵakaronga ŵanyakhe ŵa charu cha Israele ŵakambiska.

⁹Mu ubende ŵaIsraele ŵakayichitiranga uheni FUMU, Chiuta wawo, vinthu ivyo vikaŵa vyambula kwenerera. Ŵakajizengera malo gha pachanya ghakusoperako ku mizi yawo yose, kufuma ku vigongwe mpaka ku misumba ya malinga.

¹⁰Wakimika mizati ya mawe na vikozgo vya chiuta ngoza Ashera mu mapiri ghose na musi mose mu makuni ghawo ghakubiriŵira.

¹¹Ku malo gha pachanya ghakusoperako gheneagha ndiko ŵakocheranga vyakununkhira nga ndi umo ŵakachitiranga ŵamitundu ŵeneawo FUMU yikaŵachimbizgamo panthazi pawo. Wakachita viheni ivyo vikakwiyiska FUMU.

¹²ŴaIsraele ŵakasopanga vikozgo ivyo FUMU yikaŵalangula kuti ŵareke kuchita.

¹³Ndipouli FUMU yikaŵachenjezga ŵaIsraele na ŵaYuda kwizira mu nchimi zose na ŵawoni wose kuti, “Weraniko ku machitiro ghinu ghaheni, sungilirani marango ghane na vilayizgo vyane kwakuyana na marango ghose agho nkhalangula ŵawiskewokuru kuti ŵaghapulikirenge ndipo nkhaghapereka kwa imwe kwizira mwa nchimi, ŵateŵeti ŵane.”

¹⁴Kweni kuti ŵakapulikira chara, ŵakanonofya mitima yawo nga ndi umo wakachitira ŵawiskewokuru ŵeneawo kuti ŵakagomezga mwa FUMU, Chiuta wawo chara.

¹⁵Ŵakayuyura vilayizgo vya FUMU na phangano ilo yikachita na ŵawiskewokuru. Ŵakayuyuraso kuchenjezga kose uko yikaŵachenjezga. Ŵakasopanga ŵa chiuta ngoza ŵawakawaka. Ntheura iwo nawo ŵakazgoka vya wakawaka. Iwo ŵakachita viheni ivyo ŵamitundu awo ŵakakharanga nawo ŵakachitanga nangauli Fumu yikaŵalangula kuti ŵareke kuchita nga ndi umo ŵakachitiranga ŵamitundu. Kweni iwo ŵakachita ndipera vinthu ivyo Fumu yikaŵaphalira kuti ŵareke kuchita.

¹⁶Ŵakareka kusunga malangulo ghose gha FUMU, Chiuta wawo ndipo ŵakajipangira vikozgo viŵiri vya ŵana ŵa ng'ombe ivyo ŵakachita kusongonora. Ŵakapangaso chikozgo cha chiuta Ashera. Ŵakasopanga vya mlengalenga, ndiposo na Baala.

¹⁷Iwo ŵakochanga pa moto ŵana ŵawo ŵanarume na ŵanakazi kuŵa sembe ndipo ŵakaroskanga na kuwukwa, na kujipereka ku kuchita uheni panthazi pa FUMU, ndipo ŵakayikwiyiska chomene FUMU.

¹⁸Pa chifukwa ichi FUMU yikaŵakwiyira ŵaIsraele ndipo yikaŵawuskapo panthazi pakhe. Ŵa fuko la Yuda ndiwo ŵekha ŵakakharako.

¹⁹ŴaYuda, nawo kuti wakasunga malangulo gha FUMU, Chiuta wawo chara. Nawo ŵakachitanga maluso ghaheni agho ŵaIsraele ŵakachitanga.

²⁰Ntheura FUMU yikajowola mphapu yose ya ŵaIsraele. Yikaŵalanga pakuŵapereka mu mawoko gha ŵanthu ŵa msinjiro mpaka wose ŵakamara petu.

²¹FUMU yikati yaŵapatula ŵaIsraele kufuma ku mbumba ya Davide, wakimika Yerobowamu mwana wa Nebati kuŵa karonga wawo. Ndipo Yerobowamu wakaŵachichizga ŵaIsraele kuti ŵareke kusopa FUMU na kuŵapuruskira kuti ŵanangenge chomene.

²²ŴaIsraele ŵakarutilira kuchita uheni wakupambanapambana uwo Yerobowamu wakachitanga. Kuti ŵakakhumba kuwureka uheni ura chara,

²³mpaka FUMU yikaŵamara wose petu nga ndi umo yikayowoyera mu nchimi, ŵateŵeti ŵakhe. Mwa ntheura ŵaIsraele ŵakaŵa ŵamikori mu charu chawo na kuruta nawo ku Asiriya ndipo wali kwenekura mpaka muhanya wa lero.

²⁴Karonga wa charu cha Asiriya na ŵanthu kufuma ku misumba ya Babuloni na ku misumba yinyakhe nga ndi Kuta, Ava, Hamati, na Sefarivayimu ndipo wakaŵaŵika mu misumba ya Samariya kutora malo gha ŵaIsraele. Ntheura ŵanthu ŵara ŵakanjira mu misumba ya Samariya ndipo ŵakakhara mwenemumo.

²⁵Para ŵanthu ŵara ŵakamba kukhara mu misumba ya Samariya, kuti ŵakakhumba kusopa FUMU chara. Ntheura FUMU yikatuma nkharamu pakati pawo ndipo zikakoma ŵanji ŵa iwo

²⁶Penepapo ŵakamuphalira karonga wa Asiriya kuti, “Ŵanthu awo mukaŵatora mu charu chino kuya kaŵakhazika mu misumba ya Samariya kuti ŵakumanya chara khumbo la chiuta wa charu chira. Pa chifukwa ichi chiuta wa charu chira waŵatumira nkharamu izo zikuŵakoma chifukwa chakureka kumanya khumbo la chiuta wa charu chenechira.”

²⁷Penepapo karonga wa ku Asiriya wakalangula kuti, “Mutumeko yumoza wa ŵasofi awo mukiza nawo kufuma ku Samariya ŵarute kwenekura mwakuti wakaŵasambizgenge icho Chiuta wa charu cha Israele wakukhumba.”

²⁸Ntheura yumoza wa ŵasofi awo ŵakatoreka kufuma ku Samariya kwiza ku Babuloni nga ŵazga, ŵakaruta na kuya kakhara ku Betele ndipo wakaŵasambizga umo ŵakenera kusopera FUMU.

²⁹Kweni fuko lirilose likapanga vikozgo vya ŵachiuta ŵawo na ŵawo ndipo likaviŵika mu ŵakavuŵa ŵa pa malo gha pachanya ghakusoperako agho ŵaSamariya ŵakazenga. Fuko lirilose likaŵa na malo gha vikozgo vyawo mu misumba umo ŵakakharanga.

³⁰ŴaBabuloni ŵakapanga chikozgo zina Sukoti-Benoti, ŵa mu msumba wa Kuti ŵakapanga chikozgo zina Nerigala ndipo ŵa ku Hamati ŵakapanga chikozgo zina Ashima.

³¹Ŵa ku msumba wa Ava ŵakapanga vikozgo vyakuthyika Nibihazi na Taritaki. Ŵa ku msumba wa Sefarivayimu ŵakochanga pa moto ŵana ŵawo kuŵa sembe kwa Adirameleki na Anameleki, ŵeneawo ŵakaŵa ŵachiuta ŵawo.

³²Ŵakasopangaso FUMU, kweni ŵakasora ŵanthu ŵakupambanapambana kuŵa ŵasofi ku malo gha pachanya ghakusoperako na kuŵaperekera sembe pa malo gheneghara.

³³Ntheura ŵakasopanga FUMU, kweniso ŵakateŵetera ŵachiuta ŵawo na ŵawo, kwakuyana na maluso gha fuko lawo uko ŵakafuma.

³⁴Kufikira mpaka sono ŵanthu ŵa ŵachali kurutilira mu maluso ghawo ghaheni gha kale. Kuti ŵakuyisopaso FUMU chara nanga nkhupulikira ku malangulo panji vilayizgo vya FUMU chara. Marango ndiposo mapangano agho FUMU yikapereka ku ŵazukuru ŵa Yakhobe mweneuyo wakamuthya Israele kuti ŵakaghasungilira chara.

³⁵Para FUMU yikachita phangano na ŵaIsraele, yikaŵalangula kuti, “Mureke kusopa ŵachiuta ŵanyakhe panji nesi kuŵajikamira. Mureke kuŵateŵetera panji kupereka sembe kwa iwo.

³⁶Mukwenera kusopa FUMU iyo yikamufumyani mu charu cha Eguputo na nkhongono zikuru na woko lakutambazuka. Iyo ndiyo mumulambirenge na kuperekako sembe kwa iyo.

³⁷Na mtima winu wose mukwenera kupulikira malangulo na vilayizgo vya Fumu. Marango na mapangano ghakhe agho yikalembera imwe mukwenera kughasungilira. Mureke kusopa ŵachiuta ŵanyakhe chara.

³⁸Mureke kuruwa phangano ilo nkhachita na imwe ndipo mureke kusopa ŵachiuta ŵanyakhe.

³⁹Imwe mukwenera kusopa FUMU, Chiuta winu. Iyo ndiyo wati wamuthaskani ku mawoko gha ŵarwani ŵinu wose.”

⁴⁰ŴaIsraele kuti ŵakapulikira chara, ŵakarutilira kuchita maluso ghawo ghaheni gha kale.

⁴¹Nangauli ŵanthu aŵa ŵakayisopanga FUMU, kweni ŵakateŵeterangaso vikozgo vyawo. Kufikira mpaka sono ŵana ŵawo na ŵazukuru ŵawo ŵachali kurutilira kuchitaso maluso agho ŵawiskewokuru ŵawo ŵakachitanga.