Read new_tumbuka_bible 2 Karonga 18 Bible Online

2 Karonga 18 - new_tumbuka_bible bible

2 Karonga 18

¹Hezekiya mwana wa Ahazi, wakamba kuwusa charu cha Yuda mu chirimika cha chitatu cha kuwusa kwa Hosheya, mwana wa Ela, karonga wa charu cha Israele.

²Hezekiya wakaŵa na virimika 25 para wakambanga kuwusa ndipo wakaŵa karonga mu msumba wa Yerusalemu pa virimika 29. Zina la nyina likaŵa Abi mwana wa Zakariya.

³Iyo wakachita ivyo vikaŵa viweme panthazi pa FUMU nga ndi ivyo wakachita wiskekuru Davide.

⁴Wakabwangandula malo gha pachanya ghakusoperako na kuwiskira pasi mizati ya mawe ndiposo na kuwiskira pasi makuni gha Ashera. Wakaswa njoka ya mkuŵa yira wakapanga Mozesi mu mazuŵa gha kale, pakuti mpaka pa nyengo iyo ŵaIsraele ŵakayisopanga pakupereka vyakununkhira kwa iyo. Njoka yira wakayithya Nehushitani.

⁵Hezekiya wakagomezga mwa FUMU, Chiuta wa Israele. Pakaŵavye karonga na yumoza wakuyana na iyo mu charu cha Yuda uyo wakaŵako pambere iyo panyakhe pamanyuma pa iyo uyo wakagomezga mwa FUMU nga ndi iyo.

⁶Hezekiya wakajipereka chomene kwa FUMU, ndipo kuti wakawukako kwa iyo chara. Marango ghose agho Fumu yikapereka kwa Mozesi wakasunga.

⁷FUMU yikaŵa na iyo. Kose uko wakenda vinthu vikamwenderanga makora. Wakamugarukira karonga wa charu cha Asiriya, kuti wakamuteŵetera chara.

⁸Wakathereska ŵaFilisiti na kupasura mizi yawo yose yichoko na yikuru wuwo. Msumba wa Gaza uwo ukaŵa na linga nawo ŵakawuthereska.

⁹Mu chirimika cha chinayi cha kuwusa kwa Hezekiya, cheneicho chikaŵa cha chinkhonde na chiŵiri cha kuwusa kwa Hosheya, mwana wa Ela, karonga wa ku Israele, Shalimanesere, karonga wa charu cha Asiriya wakiza na nkhondo mu msumba wa Samariya ndipo wakawuzingirizga.

¹⁰Ndipo pa umaliro wa virimika vitatu Shalimanesere wakawupoka msumba wa Samariya. Ntheura msumba wa Samariya ukapokeka mu chirimika cha chinkhonde na chimoza cha kuwusa kwa Hezekiya, karonga wa charu cha Yuda, cheneicho chikaŵa cha chinkhonde na chinayi cha kuwusa kwa Hosheya, karonga wa Israele.

¹¹Karonga wa ku Asiriya wakaŵatora ŵaIsraele ŵanyakhe na kuruta nawo ku Asiriya kuŵa ŵazga ndipo ŵakaŵaŵika mu msumba wa Hala. Ŵanyakhe mu mphepete mwa mronga wa Haboro, mu chigaŵa cha Gozani ndipo ŵanyakhe wakaŵaŵika ku misumba ya ku Mediya.

¹²Ichi chikachitika chifukwa ŵaIsraele ŵakapulikira mazgu gha FUMU, Chiuta wawo chara. Iwo ŵakaswa phangano la FUMU ilo Mozesi muteŵeti wa FUMU wakalangula. Kuti wakaghapulikira marango chara nanga nkhughasunga mu mitima yawo.

¹³Mu chirimika cha 14 cha kuwusa kwa Hezekiya, karonga wa charu cha Yuda, Senakeribu karonga wa charu cha Asiriya wakiza na kurwa nkhondo na misumba yose ya malinga ya charu cha Yuda na kuyipoka.

¹⁴Sono Hezekiya karonga wa ku Yuda wakatuma mazgu kwa karonga wa charu cha Asiriya uyo wakaŵa mu msumba wa Lakishi. Mazgu ghakaŵa ghakuti, “Ndananga. Mureke kwiza na nkhondo kwa ine. Chilichose icho mukukhumba kuti ndichite, nditi ndichitenge.” Karonga wa ku Asiriya wakamuphalira Hezekiya kuti wapereke kwa karonga wa ku Asiriya ndarama zakukwana 10,000 za siliva ndipo 1,000 za golide.

¹⁵Ntheura Hezekiya wakapereka kwa Senakeribu ndarama zose za siliva izo zikaŵa mu Nyumba ya FUMU ndiposo na izo zikaŵa mu vyakusungiramo chuma mu nyumba ya ufumu.

¹⁶Pa nyengo yira Hezekiya wakagagawura golide ilo wakamata ku vijaro vya Nyumba ya FUMU na mu mafuremu gha vijaro na kupereka kwa karonga wa ku Asiriya.

¹⁷Sono karonga wa charu cha Asiriya wakatuma murara wa ŵasilikari, nduna yakhe yikuru na murongozgi wa ŵasilikari pamoza na ŵasilikari ŵanandi kufuma ku msumba wa Lakishi kuruta ku Yerusalemu kwa Karonga Hezekiya. Ŵakati ŵafika ŵakimilira mu msewu uwo ukaŵa pafupi na chidambo icho mukendanga maji kufuma ku chiziŵa cha kunena kweneuko kukaŵa munda wa munthu wakuchapa vyakuvwara.

¹⁸Penepapo ŵanthu ŵara ŵakachemerezga kwa Karonga Hezekiya ndipo nduna zakhe zitatu zikafuma kuti zikumane nawo. Nduna izi zikaŵa Eliyakimu mwana wa Hilikiya, uyo wakaŵa murara wa nyumba ya ufumu, Shebina uyo wakaŵa mulembi ndiposo na Yowa mwana wa Asafu uyo wakaŵa msungiliri wa vya mudauko.

¹⁹Ndipo murongozgi wa ŵasilikari wakati kwa iwo, “Muphalirani Hezekiya kuti: “ ‘Karonga mukuru wa ku Asiriya wakuti: Kasi icho chikukupa chigomezgo nchivichi?

²⁰Iwe ukuyowoya kuti uli na fundo ziweme na nkhongono zakurwera nkhondo, kweni mazgu agha ngambula chandulo. Kasi chomene ukugomezga njani kuti mpaka undiwukire ine?

²¹Iwe ukugomezga charu cha Eguputo icho chili nga ndi ndodo ya thete lakuphyoka ilo lingamulasa na kumupweteka mu mawoko, munthu mweneuyo wakweghamirako. Ntheura ndimo wakuchitira Faro, karonga wa charu cha Eguputo kwa yose uyo wakumugomezga.’ ”

²²Kweni usange imwe mukuti kwa ine, “Ise tikugomezga mwa FUMU, Chiuta withu,” asi Chiuta winu ndi mweneuyo malo ghakhe gha pachanya ghakusoperako na majochero ghakhe, Hezekiya wali kubwangandulira pasi na kuŵaphalira ŵaYuda na ŵa mu msumba wa Yerusalemu kuti, “Imwe mukwenera kusopa FUMU panthazi pa jochero ili la mu Yerusalemu pera?”

²³“Iwe zanga uzomerezgane na sekuru wane, karonga wa charu cha Asiriya. Ine nditi ndikupenge mahachi 2,000 usange ungaŵa na ŵanthu awo ŵangamanya kugara.

²⁴Iwe ungamanya chara kuthereska nanga njumoza wa ŵachoko wa ŵateŵeti ŵa sekuru wane, apo ukugomezga kuti magareta na ŵanthu ŵakukwera pa mahachi ŵati ŵafumenge ku charu cha Eguputo.

²⁵Ndiposo kasi ukughanaghana kuti ine ndiza kwiza karwa nkhondo na charu ichi kwambula kuti FUMU yandituma? FUMU ndiyo yandituma kuti ndize kwiza karwa nkhondo na charu ichi na kuchiparanya.”

²⁶Penepapo Eliyakimu mwana wa Hilikiya, Shebina na Yowa ŵakamuphalira murongozgi wa ŵasilikari yura ŵakati, “Tikumuŵeyani ta ŵateŵeti ŵinu kuti muyowoyere mu chiAramayiki chifukwa tikuchipulika. Mureke kutiyowoyera mu chiHebere chara. Chifukwa ŵanthu wose awo ŵakhara pa chiliŵa ŵakupulikako.”

²⁷Kweni murongozgi wa ŵasilikari yura wakazgora wakati, “Kasi mukughanaghana kuti uthenga uwu, sekuru wane wandituma kuti ndizakayowoye kwa sekuru winu na imwe pera? Uthenga uwu ngwa ŵanthu wose nanga ndi awo ŵakhara pa viliŵa ŵeneawo pamoza na imwe, ŵanozgeka kurya mavi ghawo na kumwa matuzi ghawo?”

²⁸Penepapo murongozgi wa ŵasilikari yura wakimilira na kuchemerezga chomene mu chiyowoyero cha chiHebere wakati, “Pulikani mazgu gha karonga wa ŵakaronga wa ku Asiriya!

²⁹Karonga wakuti, ‘Mungazomerezganga kuti Hezekiya wamupusikani. Iyo kuti wangamuthaskani kwa ine chara.’

³⁰Mungazomerezganga kuti Hezekiya wamukhorweskani kuti mugomezge mwa FUMU para wakuti kwa imwe, ‘FUMU yitithaskenge nadi. Msumba uwu kuti upokekenge na karonga wa ku Asiriya chara.’ ”

³¹Mureke kupulikira Hezekiya chara, pakuti karonga wa ku Asiriya wakuti, “Imwe therani ndipo paŵe mutende pakati pa imwe na ine. Ntheura waliyose wa imwe wati waryenge vipambi vyakhe vyakufuma mu khuni lakhe la mpheska na chikuyu ndipo munthu yose wati wamwenge maji gha mu chisimi chakhe na chakhe,

³²mpaka apo ine ndizamkwizira kumutorerani ku charu chakuŵa nga chinu, charu cha vyakurya na vinyo, charu cha vingwa, na minda ya mpheska, charu cha makuni gha maolive na uchi, mwakuti mureke kuŵa na njara kweni umoyo. Mureke kumupulikira Hezekiya pakuti iyo wakumupuruskani pakuyowoya kuti, ‘FUMU yitithaskenge.’

³³Kasi ndi chiuta nju pa ŵachiuta ŵa mafuko uyo wali kuthaskapo charu chakhe kufuma ku woko la karonga wa ku Asiriya?

³⁴Kasi ŵali nkhu ŵachiuta ŵa msumba wa Hamati na Aripadi? Kasi ŵali nkhu ŵachiuta ŵa misumba ya Sefarivayimu, Hena na Iva? Kasi ŵachiuta ŵeneaŵa ŵakamanya kuthaska msumba wa Samariya ku woko lane?

³⁵Pa ŵachiuta wose aŵa, ndi ŵachiuta ŵa charu nchi uyo wakathaska charu chakhe ku woko lane. Kasi sono FUMU yingathaska uli Yerusalemu ku woko lane?”

³⁶Kweni ŵanthu ŵakakhara waka chete, kuti ŵakamuzgora chara pakuti Hezekiya wakalangula kuti, “Mureke kumuzgora.”

³⁷Penepapo Eliyakimu, mwana wa Hilikiya, uyo wakaŵa murara wa nyumba ya ufumu, Shebina uyo wakaŵa mulembi, na Yowa mwana wa Asafu, uyo wakaŵa msungiliri wa vya mudauko ŵakiza kwa Hezekiya uku ŵaparura malaya ghawo, ndipo ŵakamuphalira vyose ivyo murongozgi wa ŵasilikari ŵa charu cha Asiriya yura ŵakayowoya.