Read new_tumbuka_bible 2 Karonga 19 Bible Online

2 Karonga 19 - new_tumbuka_bible bible

2 Karonga 19

¹Para Karonga Hezekiya wakapulika makani wakaparura malaya vyakuvwara vyakhe ndipo wakavwara chigudulu na kuruta ku Nyumba ya FUMU.

²Ndipo wakatuma Eliyakimu, murara wa nyumba ya ufumu pamoza na Shebina mulembi, ndiposo na ŵasofi ŵarara kuti ŵarute kwa nchimi Yesaya mwana wa Amozi.

³Sono ŵakati ŵafika ŵakati kwa iyo, “Karonga Hezekiya wakuti zuŵa ili ndi zuŵa la visuzgo la kuchenyeka na la kulengeskeka. Tili nga ndi mwanakazi uyo wafika pa nyengo yakuti wababe mwana kweni nkhongono zakuti wababire walije.

⁴Ntheura tikumuŵeyani, mutirombere ise ŵachoko waka taŵene ise takharako ŵamoyo. Pakuti karonga wa charu cha Asiriya wakatuma murongozgi wakhe wa ŵasilikari kwiza katuka Chiuta wamoyo. FUMU, Chiuta winu wakwenera kuti wapulika mazgu gha murongozgi uyu. Rombani kuti FUMU yimulange chifukwa cha mazgu ghakhe ghakutuka.”

⁵Para nduna zira za Karonga Hezekiya zikafika kwa nchimi Yesaya na kumuphalira uthenga uwo wakatumika,

⁶Yesaya wakati, “Rutaninge mukamuphalire sekuru winu kuti, ‘FUMU yikuti ureke kuŵa na wofi chifukwa cha mazgu ghakutuka agho waghapulika, mazgu gheneagho ŵateŵeti ŵa karonga wa ku Asiriya wayowoya ghakutuka ine.

⁷Upulikiske ichi kuti ine nditi ndiŵike mzimu mwa iyo mwakuti para wamkupulika waka uthenga unyakhe, wizamkuwerera ku charu cha kwakhe, ndipo ine ndamkumukomera ku charu cha kwakhe.’ ”

⁸Murongozgi wa ŵasilikari ŵa charu cha Asiriya yura wakati wapulika kuti karonga wakhe wafumako ku msumba wa Lakishi wakurwa nkhondo na msumba wa Libina, wakawerako kura kuti wakaŵe na karonga wakhe.

⁹Pa nyengo yeneiyi Karonga Senakeribu wa charu cha Asiriya wakapulika kuti Tirihaka, mu Etiyopiya, karonga wa charu cha Eguputo wakwiza kuti wizakarwe nayo nkhondo, wakatumaso mathenga kwa Hezekiya na mazgu kuti,

¹⁰“Ukamuphalire Hezekiya, karonga wa charu cha Yuda kuti, ‘Ungazomerezganga kuti Chiuta uyo ukumugomezga wakupusike pakuyowoya kuti Yerusalemu kuti wati wapokekenge chara na karonga wa charu cha Asiriya.’

¹¹Nkhumanya uli kupulika ivyo ŵakaronga ŵa charu cha Asiriya ŵali kuchita na vyaru vyose pakuvimara petu. Kasi iwe ungathaskika uli?

¹²Ŵasekuru ŵane ŵakapankhura misumba ya Gozani, Harani, Rezefu ndiposo na ŵanthu ŵa charu cha Edeni awo ŵakakharanga mu msumba wa Telasara? Kasi ŵachiuta ŵa mafuko agha ŵakaŵathaska?

¹³Kasi ŵali nkhu ŵakaronga ŵa msumba wa Hamati, wa Aripadi, wa Sefarivayimu, wa Hena na wa Iva?”

¹⁴Karonga Hezekiya wakapokera karata iyo mathenga ghara ghakayegha ndipo wakati wayiŵazga, wakaruta ku Nyumba ya Chiuta, na kuyitandaula panthazi pa FUMU.

¹⁵Ndipo wakaromba panthazi pa FUMU wakati, “Mwe FUMU, Chiuta wa Israele, imwe muli pa chizumbe chinu kuchanya pakati pa ŵakerubi, imwe mwekha pera ndimwe Chiuta, mwaŵeneimwe mukuwusa maufumu ghose gha charu cha pasi, imwe ndimwe muli kulenga kuchanya na pasi.

¹⁶Tegherezgani, Mwe FUMU, ndipo mupulike. Jurani maso ghinu, Mwe FUMU, ndipo mulaŵiske. Pulikani mazgu agho Senakeribu watuma kunyoza imwe Chiuta wamoyo.

¹⁷Mbunenesko nadi, Mwe FUMU, kuti ŵakaronga ŵa charu cha Asiriya ŵamara ŵamitundu na kureka vyaru vyawo kuŵa mapopa.

¹⁸Ŵali kocha pa moto ŵachiuta ŵa vyaru ivi pakuti ŵakaŵa ŵachiuta nadi chara, ŵakaŵa ŵachiuta ŵakupangika na mawoko gha ŵanthu kufuma ku makuni na mawe. Nadi ŵakaŵamara petu.

¹⁹Ntheura sono, Mwe FUMU, tiponoskani ku woko la Senakeribu, mwakuti maufumu ghose gha pa charu ghamanye kuti imwe, Mwe FUMU, ndimwe pera Chiuta.”

²⁰Ntheura Yesaya mwana wa Amozi wakatuma uthenga kwa Hezekiya uwo ukaŵa wakuti, “FUMU, Chiuta wa Israele wakuti, ‘Ndapulika lurombo lwako ulo wandiromba pa makani gha Senakeribu karonga wa ku Asiriya.’

²¹Sono mazgu agho FUMU yayowoya ghakususka Senakeribu ndi agha: Ŵanthu ŵa mu Ziyoni ŵakuyuyura iwe na kukuseka. Ŵanthu ŵa mu msumba wa Yerusalemu, ŵakupukunya mitu yawo panyuma zako.

²²Kasi ndi njani uyo ukumuhoyera na kumutuka? Kasi ndi njani uyo ukumupomera na kurongora chisko chakujikuzga? Ukuchitira Mutuŵa Yura wa Israele.

²³Watuma mathenga ghako kutuka FUMU chomene. Iwe ukuyowoya kuti magareta ghane ghali kufika pachanya pa mapiri ghatalighatali, na ku nkhorongo za mu mapiri gha Lebanoni. Makuni ghakhe gha milanje na gha mulombwa ghatalighatali ndili kughadumulira pasi. Nadi mukati chomene mwa nkhorongo izi ndili kufikako.

²⁴Ndili kujimamo visimi mu vyaru vya chilendo, na kumwamo maji ghakhe. Malundi ghane ghali kukanda na komizga tumironga tose twa charu cha Eguputo.”

²⁵“Kasi mundapulike? Ine nkhachinozgera ichi kale chomene, mu mazuŵa gha mwaka. Sono ndipo nkhuchifiska, kuti iwe uyizgore misumba ya malinga, kuŵa miwulu ya mahami.

²⁶Penepapo ŵanthu ŵa mwenemumo ŵakaŵavye nkhongono, ŵakathika lusoko na kukhozgeka soni. Ŵakaŵa nga ndi vyakumera vya mu minda, nga ndi utheka uŵisi, ndiposo nga ndi utheka uwo wamera pachanya pa nyumba weneuwo ukuŵawuka pambere undakule.”

²⁷“Kweni ine nkhumanya vyose vya iwe, nkhumanya para ukufumamo na para ukwiza. Ukari wako pa ine nawo nkhuwumanya.

²⁸Chifukwa chakuti wandikwiyira ine, ndipo kujikuzga kwako nako ndapulika, nditi ndinjizge mbeja yane mu mphuno yako, na kuŵika kachisulo mu mlomo wako. Nditi ndikuwezge pakukuyendeska mu nthowa iyo ukiziramo.”

²⁹Sono iwe Karonga Hezekiya, kuti umanye kuti ichi chamkuchitika chimanyikwiro chakhe ndi ichi. Chirimika chino muti muryenge vyamankhoro. Mu chirimika cha chiŵiri muti muryenge ivyo vikuphukira kufuma mu vyamankhoro. Kweni mu chirimika cha chitatu mukapande na kuvuna. Mukapande makuni gha mpheska na kurya vipambi vyakhe.

³⁰Ndipo ŵanthu ŵa fuko la Yuda, ŵeneawo ŵati ŵakharengeko ŵati ŵandanenge, ŵati ŵaŵenge nga ndi khuni ilo lajintha pasi misisi yakhe na kupasa vipambi muchanya.

³¹Kufuma ku msumba wa Yerusalemu ndimo muti muŵenge awo ŵakharako. Ndipo kufumira mu Phiri la Ziyoni ndimo muti mukharenge ŵanandi awo mba moyo. Phamphu la FUMU, Chiuta Mwenenkhongono zose ndilo liti lifiskenge ichi.

³²“FUMU yikuti pa vya karonga wa ku Asiriya: Iyo kuti wamkunjiramo mu misumba chara nanga nkhuponyamo muvwi! Ŵasilikari ŵakhe kuti ŵati ŵizenge panthazi pakhe na nguru pafupi nawo chara nesi kuzenga nthumbira zakuti ŵanjirengemo mu msumba chara. Ntheura ndimo yikuyowoyera FUMU.

³³Nthowa iyo wakiziramo ndiyo wati wawererengemoso ndipo kuti wati wanjirengemo mu msumba chara. Ntheura ndimo yikuyowoyera FUMU.

³⁴Nditi ndiwuvikirire na kuwuthaska msumba uwu chifukwa cha ine ndekha na chifukwa cha muteŵeti wane Davide.”

³⁵Mu usiku wenewura mungelo wa FUMU wakaruta ku msasa wa ŵasilikari ŵa ŵaAsiriya ndipo wakaya kakomapo ŵasilikari 185,000 ndipo apo ŵanthu ŵara ŵakawukanga na mulenje ŵakasanga vitanda pera.

³⁶Penepapo Senakeribu, karonga wa ku Asiriya wakawukako na kuruta ku kwakhe, ndipo wakaya kakhara mu msumba wa Nineve.

³⁷Sono zuŵa limoza apo wakasopanga chiuta ngoza wakhe Nisiroki mu nyumba yakusoperamo, ŵana ŵakhe ŵanarume Adirameleki na Sharezara wakamukoma na malupanga ghawo ndipo wakachimbilira ku charu cha Ararati. Mwana wakhe Esarihadoni ndiyo wakamba kuwusa mu malo ghakhe.