Read new_tumbuka_bible 2 Karonga 2 Bible Online

2 Karonga 2 - new_tumbuka_bible bible

2 Karonga 2

¹Para nyengo yikaŵa pafupi kuti FUMU yimutorere Eliya kuchanya mu kavuruvuru, Eliya na Elisha ŵakendanga kufuma ku Giligala.

²Sono Eliya wakati kwa Elisha, “Iwe ukhare papano pakuti FUMU yandituma kuti ndirute ku Betele.” Kweni Elisha wakati, “Nkhurapira mwa FUMU, Chiuta wa moyo ndiposo na imwe wuwo, ine kuti ndimurekaninge chara. Ntheura ŵakaruta lumoza ku Betele.”

³Ndipo ka mpingo ka nchimi izo zikaŵa ku Betele kakiza kuti kakumane na Elisha ndipo kakamufumba kuti, “Kasi ukumanya kuti muhanya uno FUMU yiti yimutorenge sekuru wako kufuma kwa iwe?” Ndipo iyo wakati, “Inya nkhumanya, kweni imwe mukhare waka chete.”

⁴Penepapo Eliya wakati kwa Elisha, “Iwe ukhare papano, pakuti FUMU yandituma kuti ndirute ku Yeriko.” Kweni Elisha wakati, “Nkhurapira mwa FUMU, Chiuta wa moyo ndiposo na imwe wuwo, ine kuti ndimurekaninge chara!” Ntheura ŵakaruta lumoza ku Yeriko.

⁵Kampingo ka nchimi izo zikaŵa ku Yeriko kakiza kuti kakumane na Elisha ndipo kakamufumba kuti, “Kasi ukumanya kuti muhanya uno FUMU yiti yimutorenge sekuru wako kufuma kwa iwe?” Ndipo iyo wakazgora wakati, “Inya nkhumanya, kweni imwe mukhare waka chete.”

⁶Ndipo Eliya wakati kwa Elisha, “Iwe ukhare papano, pakuti FUMU yandituma kuti ndirute ku Yorodani.” Kweni Elisha wakati, “Nkhurapira mwa FUMU, Chiuta wa moyo ndiposo na imwe wuwo, ine kuti ndimurekaninge chara.” Ntheura wose ŵaŵiri ŵakarutilira ulendo wawo.

⁷Ŵanthu 50 ŵamoza ŵa nchimi ŵakiza ndipo ŵakimilira pataliko na iwo apo ŵaŵiri kaŵa ŵakimilira pafupi na mronga wa Yorodani.

⁸Eliya wakatora laya lakhe la kuwaro ndipo wakalipeteka na kutimba nalo maji. Maji ghakagaŵikana uku na uku ndipo ŵaŵiri wuwo ŵakambuka pomizo kuruta ku sirya linyakhe.

⁹Sono ŵakati ŵambuka Eliya wakati kwa Elisha, “Ndiphalire, kasi icho ukukhumba kuti ndikuchitire pambere ndindatoreke kufuma kwa iwe nchivichi?” Elisha wakazgora wakati, “Nkhumuŵeyani kuti ndihare kaŵiri chawanangwa cha mzimu winu.”

¹⁰Eliya wakati, “Icho waromba ndi chinthu chinonono, ndipouli para wandiwona nkhutoreka kufuma kwa iwe chiti chikuchitikirenge nga ndi umo warombera. Kweni usange ulije kundiwona, kuti chiti chikuchitikirenge chara.”

¹¹Ndipo apo ŵakaŵa ŵachali kwenda na kuyowoyeskana mwamabuchibuchi ŵakawona gareta na mahachi gha moto vyeneivyo vikaŵapatula ku yumoza na munyakhe. Penepapo Eliya wakatorekera kuchanya mu kavuruvuru.

¹²Elisha wakachiwona ichi ndipo wakachemerezga chomene wakati, “Ŵadada, ŵadada imwe! Imwe mwanguŵa Magareta na mahachi gha Israele! Kasi mwaruta nadi!” Ndipo Elisha kuti wakamuwonaso Eliya chara. Penepapo Elisha wakakerula laya lakhe paŵiri kurongora chitima.

¹³Ndipo wakatora laya ilo likawa kufuma kwa Eliya, ndipo wakawerera na kwimilira mu mphepete mwa mronga wa Yorodani.

¹⁴Ndipo wakakorera laya la Eliya lira ilo likawa kufuma kwa iyo, wakatimba nalo maji ndipo wakati “Kasi sono FUMU, Chiuta wa Eliya wali nkhu?” Ndipo wakati watimba maji, maji ghara ghakagaŵikana paŵiri uku na uku. Penepapo Elisha wakambuka kuruta ku sirya linyakhe.

¹⁵Sono mpingo wa nchimi izo zikaŵa ku Yeriko, zeneizo zikalaŵiriranga pataliko, zikamuwonanga ndipo zikati, “Mzimu wa Eliya wanjira mwa Elisha.” Penepapo nchimi zira zikiza kuti zikumane nayo ndipo zikajikama na kumulambira.

¹⁶Ndipo wakati kwa iyo, “Wonani ŵalipo ŵanthu ŵankhongono pera mukati mu ŵateŵeti ŵinu 50, muŵazomerezge kuti ŵarute kuya kamupenja sekuru winu Eliya. Panyakhe Mzimu wa FUMU wamuyegha na kumureka pa phiri panji mu chidambo chinyakhe.” Elisha wakazgora wakati, “Chara, mureke kuŵatuma.”

¹⁷Kweni ŵakamukoserezga Elisha mpaka wakawa na soni kuŵakanira. Ndipo wakati kwa iwo, “Ŵatumani.” Penepapo wakaŵatuma ŵanthu ŵara 50 ŵeneawo wakamupenja Eliya mazuŵa ghatatu kweni kuti wakamusanga chara.

¹⁸Ndipo ŵakawerera kwiza kwa Elisha mweneuyo wakakharanga ku Yeriko, ndipo Elisha wakati kwa iwo, “Asi nkhamuphalirani kuti mureke kuruta?”

¹⁹Sono ŵanthu ŵanji ŵa mu msumba ŵakati kwa Elisha, “Sekuru withu, wonani msumba uwu uli kuzengekeka pa malo ghaweme chomene nga ndi umo mukuwonera, kweni maji ngaheni ndipo charu kuti ncha nyata chara.”

²⁰Elisha wakati kwa iwo, “Torani bakule muphya ndipo muŵikemo muchere mukati mwakhe na kwiza nayo kwa ine.”

²¹Ntheura Elisha wakaruta ku chisimi cha maji ndipo wakathiramo muchere ura na kuyowoya kuti, “FUMU yikuti, ‘Ndaghatozga maji agha. Ntheura kufuma sono kuŵengeso chinyakhe chakukoma panji nesi mbuto zinu kutondeka kupambika chara.’ ”

²²Ntheura maji ngakutozgeka mpaka muhanya uno, kwa kuyana na mazgu agho Elisha wakayowoya.

²³Elisha wakafumako ku Yeriko ndipo wakaruta ku Betele. Ndipo apo wakaŵa wachali kwenda mu nthowa ŵanyamata ŵanyakhe ŵakiza kufuma mu msumba ndipo ŵakamuseka wakati, “Tiye uko, iwe wa chipara! Tiye uko, iwe wa chipara!”

²⁴Elisha wakazgoka, ndipo wakati wawona, wakaŵatemba mu zina la FUMU. Penepapo nkharamira ziŵiri zanakazi zikafuma mu thengere na kutwazurapo ŵanyamata 42.

²⁵Kufuma ku Betele Elisha wakarutilira kuya ku Phiri la Karimele ndipo kufuma kwenekura wakaruta ku Samariya.