Read new_tumbuka_bible 2 Karonga 20 Bible Online

2 Karonga 20 - new_tumbuka_bible bible

2 Karonga 20

¹Nyengo yimoza Hezekiya wakarwara chomene ndipo wakaŵa pafupi na kufwa. Sono Nchimi Yesaya, mwana wa Amozi wakiza ndipo wakati kwa iyo, “FUMU yikuti kwa iwe, ‘Layira ku ŵa mbumba yako pakuti matenda agha uti ufwenge nagho, kuti uchirenge chara.’ ”

²Penepapo Hezekiya wakazgoka na kulaŵiska ku chiwumba ndipo wakaromba kwa FUMU wakati,

³“Nkhumuŵeyani, Mwe FUMU, kuti mukumbuke umo ine ndateŵeteranga mwakugomezgeka na mtima wakufikapo panthazi pinu. Ine nkhachita icho chikaŵa chiweme kwa imwe.” Ndipo Hezekiya wakalira chomene.

⁴Pambere Yesaya wakaŵa wandafumemo mu baraza la nyumba ya ufumu, FUMU yikayowoya na Yesaya yikati,

⁵“Werera kwa Hezekiya karonga wa ŵanthu ŵane, ndipo umuphalire kuti, ‘FUMU, Chiuta wa ŵawusokuru Davide wakuti: Ndapulika kuromba kwako ndiposo ndaghawona masozi ghako. Ntheura nditi ndikuchizge. Pa zuŵa la chitatu uti urutenge ku Nyumba ya Chiuta kuya karomba.

⁶Ndipo nditi ndikusazgireko virimika 15 ku umoyo wako. Nditi ndikuthaske iwe na msumba uwu kwa karonga wa Asiriya ndipo nditi ndiwuvikirire msumba uwu chifukwa cha ine ndekha na chifukwa cha muteŵeti wane Davide.’ ”

⁷Sono Yesaya wakati ku ŵateŵeti ŵa karonga, “Nozgani nthimphwa ya chipambi cha chikuyu ndipo rekani ŵanthu ŵaŵike pa phumba mwakuti karonga wachire.”

⁸Sono Hezekiya wakamufumba Yesaya wakati, “Kasi chimanyikwiro chakuti FUMU yamkundichizga ine na kuti pa zuŵa la chitatu ndamkuruta ku Nyumba ya FUMU nchivichi?”

⁹Yesaya wakazgora wakati, “Chimanyikwiro cha Fumu kuti yiti yikuchizge iwe nga ndi umo yapanganira ndi ichi. Kasi ukukhumba kuti muzgezge urute kunthazi mikwamba khumi panji uwerere nyuma kwakuyana mikwamba khumi.”

¹⁰Hezekiya wakazgora wakati, “Ndi chinthu chipusu kuti muzgezge urute panthazi mikwamba khumi kuruska kuti uwerere nyuma mikwamba khumi.”

¹¹Ntheura nchimi Yesaya wakaromba kwa FUMU yeneiyo yikawezgera muzgezge kunyuma kwakuyana na mikwamba khumi pa makwerero agho Karonga Ahazi wakazenga.

¹²Pa nyengo yeneyira Karonga Merodaki Baladani wa charu cha Babuloni uyo wakaŵa mwana wa Baladani wakati wapulika kuti Hezekiya wakaŵa murwari, wakatuma ŵanthu kuti ŵarute na karata na cha wanangwa kwa Hezekiya.

¹³Ntheura Hezekiya wakaŵapokerera ŵanthu ŵara ndipo wakaŵarongora vyose ivyo vikaŵa mu nyumba yakusungiramo usambazi wakhe nga ndi siliva, golide, vyakununkhira, mafuta ghakuzirwa, mahomwa ghakhe gha nkhondo na vyose ivyo vikasungikanga mu nyumba zakhe zakusungira katundu. Pa kaŵavye kanthu ka mu nyumba yakhe ya ufumu panji ku ufumu wakhe wose ako Hezekiya wakareka kuŵarongora.

¹⁴Penepapo nchimi Yesaya wakiza kwa Karonga Hezekiya ndipo wakamufumba wakati, “Kasi ŵanthu awo ŵangwiza ŵayowoya vichi ndipo kasi ŵafumira nkhu?” Hezekiya wakazgora wakati, “Ŵangwiza kufuma ku charu cha kutali chomene cha Babuloni.”

¹⁵Nchimi yira yikafumba yikati, “Kasi wanguwonamo vichi mu nyumba yinu ya ufumu?” Hezekiya wakazgora wakati, “Vyose ivyo vili mu nyumba ya ufumu ŵaviwona. Palije nanga nchimoza cha mu nyumba zane zakusungiramo vinthu cheneicho ndilije kuŵarongora.”

¹⁶Penepapo Yesaya wakati kwa Hezekiya, “Pulika icho FUMU yikuyowoya.

¹⁷Mazuŵa ghakwiza apo vyose, ivyo vili mu nyumba yinu na ivyo ŵawiskemwekuru ŵali kusunga mpaka muhanya uno, vyamkutorekera ku Babuloni. Pamkuŵavye na chimoza icho chamkukharako. Ntheura ndimo yikuyowoyera FUMU.

¹⁸Ndipo ŵana ŵanji awo mwababa mwekha wamkutorekera ku Babuloni kuŵa ŵazga, na kuŵazgora kuŵa nthunguli zakuteŵeta mu nyumba ya ufumu wa charu cha Babuloni.”

¹⁹Penepapo Hezekiya wakati kwa Yesaya, “Mazgu gha FUMU agho wayowoya ngaweme.” Iyo wakayowoya ntheura pakuti wakaghanaghananga kuti pati paŵenge mutende na chivikiriro pa umoyo wakhe wose.

²⁰Milimo yinyakhe yose ya Hezekiya, nkhongono zakhe, na umo wakajimira chiziŵa na mufwerenje wakunjizga maji mu msumba, vyose vili kulembeka mu Buku la Midauko la ŵakaronga ŵa charu cha Yuda.

²¹Hezekiya wakafwa ndipo wakasungika mu dindi pamoza na ŵawiskekuru ŵakhe. Ntheura mwana wakhe Manase ndiyo wakamba kuwusa mu malo ghakhe.