Read new_tumbuka_bible 2 Karonga 21 Bible Online

2 Karonga 21 - new_tumbuka_bible bible

2 Karonga 21

¹Manase wakaŵa na virimika 12 para wakambanga kuwusa charu cha Yuda ndipo wakaŵa karonga mu Yerusalemu pa virimika 55. Zina ka ŵanyina likaŵa Hefiziba.

²Manase wakachita viheni panthazi pa FUMU pakuchita vya ukazuzi ivyo ŵamitundu ŵakachitanga ŵeneawo FUMU yikaŵachimbizgamo kuti ŵaIsraele ndiwo ŵahare charu chira.

³Iyo wakazengaso malo gha pachanya ghakusoperako, gheneagho wiske Hezekiya wakabwangandula. Wakazenga majochero ghakuperekerapo sembe kwa chiuta Baala ndipo wakimika mizati yakusoperapo chiutakazi Ashera nga ndi umo wakachitira Ahabu, karonga wa Israele. Ndipo wakambaso kusopa nyenyezi na vyose vya mu mlengalenga na kuviteŵetera.

⁴Wakazenga majochero mukati mwa Nyumba ya Chiuta yeneiyo FUMU yikayowoya kuti, “Mu Yerusalemu ndimo ŵanthu ŵati ŵachindikirengemo zina lane.”

⁵Wakazengaso majochero gha kuperekerapo sembe ku nyenyezi za mu mlengalenga izo wakazisopanga mu mabaraza ghose ghaŵiri mu Nyumba ya Chiuta.

⁶Wakapereka mwana wakhe mwanarume kuŵa sembe yakocha pa moto. Wakazomerezga ŵamaula, fwiti, ŵawukwi na ŵamayere. Manase wakachita viheni vinandi panthazi pa FUMU vyeneivyo vikawuska ukari wa FUMU.

⁷Chikozgo chakuŵaja cha chiutakazi Ashera chira wakachitora na kuchiŵika mu Nyumba ya FUMU yeneiyo Chiuta wakayowoya kwa Davide na ku mwana wakhe Solomoni kuti, “Mu nyumba yeneiyi, mwenemumo mu Yerusalemu, ndimo ndili kusora mukati mu mafuko ghose gha mu Israele, kuti zina lane ndimo lichindikikirengemo kwa muyirayira.

⁸ŴaIsraele kuti ndizamkuŵafumyamoso chara mu charu icho nkhapereka ku ŵawiskewokuru usange wangaŵikapo mtima pakupulikira vyose ivyo ndili kuŵalangulira na marango ghose agho Mozesi muteŵeti wane wakaŵapa.”

⁹Kweni ŵaYuda kuti ŵakapulikira FUMU chara, chifukwa Manase wakaŵapuruska mwakuti wakachita viheni kuruska ŵamitundu awo FUMU yikaŵafumyamo kuti ŵaIsraele ndiwo ŵahare charu chira.

¹⁰FUMU yikayowoya kwizira mu nchimi, ŵateŵeti ŵakhe kuti,

¹¹“Manase, karonga wa Yuda wakachita vya ukazuzi vinandi ndipo wachita viheni kuruska ivyo ŵakachitanga ŵaAmori awo ŵakaŵako pambere iyo wandaŵeko. Iyo wapuruska ŵaYuda kuti ŵaŵe ŵakwananga pakusopa vikozgo.

¹²Ntheura FUMU, Chiuta wa Israele wakuti: Nditi ndize na chinthu chiheni pa Yerusalemu na pa ŵaYuda ndipo wose awo ŵamkuchipulika chizamkuŵazukumiska.

¹³Nditi ndimulange Yerusalemu nga ndi umo nkhalangira ŵanthu ŵa msumba wa Samariya na umo nkhalangira Ahabu karonga wa cha Israele na mbumba yakhe. Nditi ndingweruskenge Yerusalemu pakufumyamo ŵanthu ŵakhe nga ndi munthu umo wakuchitira para wakupuputa mbale iyo yili na maji na kuyigadabulira pasi pakuyiyanika.

¹⁴Awo ŵakharako ŵa mu chiharo chane, ndamkuŵataya na kuŵaŵika mu mawoko gha ŵarwani ŵawo. Ŵamkuzgoka kuŵa nga ndi kurya kwawo ndiposo na awo ŵangaskogheka,

¹⁵chifukwa ŵachita uheni panthazi pane ndipo ŵandiyavyira ku ukari, kufumira pa zuŵa ilo ŵawiskewokuru ŵakafumiranga ku Eguputo mpaka muhanya uno.”

¹⁶Manase wakakoma ŵanthu ŵanandi ŵambula mrandu mwakuti mu misewu ya mu Yerusalemu mukaŵa ndopa zekhazekha. Wakachitanga ichi pa dera pa mrandu wakurongozgera ŵaYuda ku kusopa chikozgo icho chikaŵa cha kuŵapuruskira ku kwanangira FUMU.

¹⁷Milimo yinyakhe ya Manase na vyose ivyo wakachita ndiposo na kwananga kwakhe, vili kulembeka mu Buku la Midauko la ŵakaronga ŵa charu cha Yuda.

¹⁸Manase wakafwa ndipo wakasungika mu munda wa Uza uwo ukaŵa ku nyumba ya ufumu. Sono Amoni mwana wakhe ndiyo wakamba kuwusa malo ghakhe.

¹⁹Amoni wakaŵa na virimika 22 para wakambanga kuwusa, ndipo wakaŵa karonga mu Yerusalemu pa virimika viŵiri pera. Zina la ŵanyina likaŵa Meshulemeti mwana wa Haruzi wa ku Yotiba.

²⁰Amoni wakachita uheni panthazi pa FUMU nga ndi umo wakachitira wiske Manase.

²¹Iyo wakachita vyose viheni ivyo wakachita wiske. Iyo wakasopanga vikozgo ivyo wiske wakasopanga, ndipo wakavijikamira.

²²Wakamureka FUMU, Chiuta wa ŵawiskekuru ndipo kuti wakasunga marango gha FUMU chara.

²³Nduna za Karonga Amoni zikamuchitira chiŵembu ndipo zikamukomera mu nyumba yakhe ya ufumu.

²⁴ŴaYuda ŵakakoma wose awo ŵakamuchitira chiŵembu Karonga Amoni, ndipo ŵakamuŵika Yosiya mwana wakhe kuŵa karonga mu malo ghakhe.

²⁵Milimo yinyakhe ya Amoni na ivyo wakachita, vili kulembeka mu Buku la Midauko la ŵakaronga ŵa charu cha Yuda.

²⁶Pamanyuma Amoni wakafwa ndipo wakasungika mu dindi mu munda wa Uza. Ndipo Yosiya mwana wakhe ndiyo wakamba kuwusa mu malo ghakhe.