Read new_tumbuka_bible 2 Karonga 22 Bible Online

2 Karonga 22 - new_tumbuka_bible bible

2 Karonga 22

¹Yosiya wakaŵa na virimika vinkhonde na vitatu para wakambanga kuwusa charu cha Yuda ndipo wakaŵa karonga mu Yerusalemu virimika 31. Zina la ŵanyina likaŵa Yedida mwana wa Adaya wa ku Bozikati.

²Yosiya wakachita ivyo vikaŵa viweme panthazi pa FUMU nga ndi ivyo wakachita Davide wiskekuru wakhe kwambula kuzgokera uku na uku.

³Apo Karonga Yosiya wakaŵa na virimika 18 vyakuwusa kwakhe, wakatuma mulembi wakhe Shafani uyo wakaŵa mwana wa Azaliya muzukuru wa Meshulamu kuti warute ku Nyumba ya FUMU na languro lakuti,

⁴“Ruta kwa Hilikiya, musofi mukuru ndipo ukamuphalire kuti wapende ndarama izo ŵalinda awo ŵakaŵa pa muryango wa Nyumba ya FUMU ŵakawunjika kufuma ku ŵanthu.

⁵Ndarama izo wazipereke ku ŵanthu awo mbalaŵiliri pa mlimo wa kunozga Nyumba ya Chiuta. Iwo nawo ŵazipereke ku ŵanchito awo ŵakunozgaso Nyumba ya Chiuta umo yili kunangika.

⁶Ŵanchito aŵa mbakupara mathabwa, ŵakuzenga ndiposo na nkhwantha pakuzengera mawe. Ndipo na ndarama zinyakhe ŵagulire mathabwa na mawe ghakuŵaja kuti ŵanozgere Nyumba ya Chiuta.

⁷Kweni ŵalaŵiliri ŵa awo ŵakunozga Nyumba ya Chiuta ŵangafumbikanga chara kuti ŵandure umo ndarama zakunozgera Nyumba ya FUMU zikenderanga pakuti ŵakaŵa ŵakugomezga chomene.”

⁸Musofi Mukuru Hilikiya wamuphalira mulembi Shafani, wakati, “Ndalisanga Buku la Marango mu Nyumba ya FUMU.” Iyo wakalipereka kwa Shafani, mweneuyo wakaliŵazga.

⁹Mulembi Shafani yura wakiza kwa karonga ndipo wakati kwa iyo, “Ŵateŵeti ŵinu ŵatora ndarama izo zikasangika mu Nyumba ya FUMU, ndipo ŵazipereka mu mawoko gha awo ŵakulaŵirira mlimo wa Nyumba ya FUMU.”

¹⁰Penepapo mulembi Shafani wakamuphalira karonga wakati, “Musofi Hilikiya wali kundipa buku.” Ndipo Shafani wakaŵazga buku lira uku karonga wakupulika.

¹¹Para karonga wakapulika mazgu gha mu Buku la Marango, wakaparura vyakuvwara vyakhe kurongora chitima.

¹²Penepapo karonga wakalangula musofi Hilikiya, Ahikamu mwana wa Shafani, Akibori mwana Mikaya, mulembi Shafani na Asaya muteŵeti wa karonga, kuti,

¹³“Rutani mukafumbe kwa FUMU mu malo mwa ine na ŵanthu wose awo ŵakharako ŵa mu charu cha Israele na cha Yuda pa vya mazgu gha Buku la Marango ilo lasangika. Pakuti ukari wa FUMU uwo waŵa pa ise, ngukuru chifukwa ŵasekuru ŵithu ŵakasungilira chara mazgu gha mu buku ili. Iwo kuti ŵakachita kwakuyana na vyose ivyo vili kulembeka mu buku ili vyakukhwaskana na ise chara.”

¹⁴Ntheura musofi Hilikiya, Ahikamu, Akibori, mulembi Shafani, na Asaya ŵakaruta kuti ŵakayowoye na Hulida nchimi yanakazi yeneiyo yikakharanga mu Yerusalemu ku chigaŵa cha chiŵiri cha msumba. Mufumu wakhe Shalumu mwana wa Tikiva, muzukuru wa Harihasi ndiyo wakaŵa msungi wa vyakuvwara vya mu Nyumba ya Chiuta.

¹⁵Nchimi yanakazi yira yikaŵazgora ŵanthu ŵara yikati, “FUMU, Chiuta wa Israele wakuti: Munthu uyo wamutumani kwa ine mukamuphalire kuti,

¹⁶‘FUMU yikuti ine nditi ndilange Yerusalemu pamoza na ŵanthu ŵakhe wose kwakuyana na mazgu agho ghalembeka mu buku ilo karonga wa charu cha Yuda waŵazga.’

¹⁷ŴaYuda ŵali kundijowola ine ndipo ŵakocheranga vyakununkhira ku ŵachiuta ŵanyakhe. Pa chifukwa ichi ŵandikwiyiska chomene pa vyose ivyo ŵakuchita. Ntheura ukari wane uti ugolerenge pa ŵanthu aŵa ndipo kuti uti utunengepo chara.

¹⁸Kweni karonga wa ku Yuda mweneuyo wangumutumani kwiza kafumba kwa FUMU mukamuphalire kuti, ‘Kwakuyana na mazgu agho muli kughapulika gha mu Buku la Marango, FUMU, Chiuta wa Israele wakuti:

¹⁹Chifukwa chakuti warapa ndipo wajiyuyura panthazi pa Chiuta, wati wapulike mazgu ghakususka Yerusalemu pamoza na ŵanthu ŵakhe kuti ŵati ŵatembekenge ndipo charu chawo chikharenge mapopa, ndiposo chifukwa chakuti waparura vyakuvwara vyako na kulira panthazi pa ine, Ine nane ndapulika. Ntheura ndimo yikayowoyera FUMU.

²⁰Ntheura chinthu chiheni icho ndatenge ndize nacho pa charu ichi na ŵanthu ŵakhe, kuti uchiwonenge chara mpaka iwe uzakafwe ndipo wizamkusungika mu dindi pamoza na ŵawusokuru ŵako.’ ” Penepapo ŵanthu ŵara ŵakayegha uthenga ura kuya kawupereka kwa Karonga Yosiya.