Read new_tumbuka_bible 2 Karonga 23 Bible Online

2 Karonga 23 - new_tumbuka_bible bible

2 Karonga 23

¹Penepapo Karonga Yosiya wakachema ŵararaŵarara wose ŵa mu charu cha Yuda na ŵa mu Yerusalemu kuti ŵawungane pamoza.

²Ndipo karonga wakaruta ku Nyumba ya FUMU pamoza na ŵanthu wose ŵa charu cha Yuda na awo ŵakakharanga mu Yerusalemu, ŵasofi ndiposo na nchimi na ŵanthu wose ŵakavu na ŵasambazi wuwo. Penepapo karonga wakaŵazga mazgu ghose gha mu Buku la Phangano leneilo likasangika mu Nyumba ya FUMU uku ŵakupulika.

³Karonga wakimilira pafupi na mzati ndipo wakachita phangano panthazi pa FUMU kuti na mtima wakhe wose ndipo na umoyo wakhe wose ŵati ŵendenge mu nthowa za FUMU pakusunga mazgu ghakhe, marango ghakhe, vilayizgo vyakhe ndiposo na malangulo ghakhe na kufiska mazgu gha phangano agho ghali kulembeka mu buku ili. Penepapo ŵanthu wose ŵakazomera pakupangana kuti nawo ŵati ŵarondezgenge phangano lira.

⁴Penepapo karonga wakalangula Hilikiya musofi mukuru, ŵasofi awo ŵakamovwiranga, na ŵalinda ŵa pa chipata kuti ŵafumyemo kufuma mu Nyumba ya FUMU viteŵetero vyose vya chiuta Baala, vya chiuta ngoza Ashera ndiposo na vyose vyakusopera nyenyezi za mu mlengalenga. Vyose ivi ŵakavyochera kuwaro kwa msumba wa Yerusalemu ku thengere pafupi na dambo la Kidironi ndipo vyoto vyakhe wakaruta navyo ku Betele.

⁵Yosiya wakaŵarekeska ŵasofi ŵa vikozgo ŵeneawo ŵakaronga ŵa charu cha Yuda ŵakimika kocherapo vyakununkhira pa malo gha pachanya ghakusoperako mu misumba ya charu cha Yuda na ya kuzingirizga Yerusalemu. Wakaŵarekeskaso awo ŵakochanga vyakununkhira kwa chiuta Baala, ku dazi, ku mwezi, ku nyenyezi ndiposo na ku vinyakhe vya ku mlengalenga.

⁶Wakamufumiskamoso chikozgo cha chiutakazi Ashera mu Nyumba ya Chiuta ndipo wakaruta nacho kwa ku mronga wa Kidironi kuwaro kwa Yerusalemu. Wakachochera kwenekura ndipo wakachisira kuŵa fuvu na kutaya fuvu lira pa madindi gha ŵanthu bweka.

⁷Wakabwangandulira pasi nyumba za ŵanthu awo ŵakachitanga uzaghali mu zina la chisopo izo zikaŵa pafupi na Nyumba ya Chiuta, kweneuko ŵanakazi ŵakarukiranga salu za chisopo cha chiutakazi Ashera.

⁸Yosiya wakachema ŵasofi wose ŵa mu misumba ya mu charu cha Yuda kuti ŵize mu Yerusalemu. Iyo wakananga malo gha pachanya ghakusoperako uko ŵasofi ŵara ŵakocherangako vyakununkhira, kufuma ku Geba mpaka ku Beyeresheba. Wakabwangandulira pasi malo gha pachanya ghakusoperako pafupi na chipata cha Yoshuwa, nduna ya msumba, ku mazere kwa chipata cha msumba ura.

⁹Ŵasofi ŵa pa malo gha pachanya ghakusoperako kuti ŵakazomerezgeka chara kuteŵeta pa jochero la FUMU mu Yerusalemu, nangauli nawo ŵakaryanga chingwa chambula chirungo pamoza na ŵasofi ŵanyawo.

¹⁰Karonga Yosiya wakawuskapo malo ghanyakhe ghakusoperamo chiuta Tofeti, agho ghakaŵa mu Dambo la Hinomu mwakuti pakaŵavye na yumoza wakupereka mwana wakhe kuŵa sembe yakocha pa moto kwa chiuta ngoza Moleki.

¹¹Yosiya wakawuskakoso mahachi agho ŵakaronga ŵa charu cha Yuda ŵakaghapatuliskira kwa chiuta wa dazi, pa chipata cha Nyumba ya Chiuta. Mahachi ghakaŵa mu chipinda cha murongozgi Natanimeleki icho chikaŵa pa khonde la nyumba. Magareta gha chiuta wa dazi wakaghawocha na moto.

¹²Karonga Yosiya wakabwangandulira pasi majochero agho ŵakaronga ŵa charu cha Yuda ŵakazenga pachanya pa nyumba ya ufumu mu chipinda cha pachanya icho wakakharanga Karonga Ahazi. Majochero agho Manase wakazenga mu mabaraza gha Nyumba ya FUMU nagho wakaghabwangandulira pasi. Wakaghazgora fuvu leneilo wakaya kalithira mu dambo la Kidironi.

¹³Karonga Yosiya wakananga malo gha pachanya ghakusoperako agho ghakaŵa ku mafumiro gha dazi kwa Yerusalemu, ku mwera kwa phiri lakuchemeka kuti, “Pharaniko.” Malo agha Solomoni, karonga wa charu cha Israele wakazengera Ashitaroti, chiuta ngoza wa ukazuzi wa ŵaSidoni, na Kemoshi chiuta ngoza wa ukazuzi wa ŵaMowabu, ndiposo na Moleki chiuta ngoza wa ŵaAmoni.

¹⁴Yosiya wakateketa tuchokotuchoko mizati ya mawe na vithuzithuzi vya chiutakazi Ashera ndipo pa malo apo vikayimikika ndipo wakazuzgapo viwangwa vya ŵanthu ŵakufwa.

¹⁵Jochero la ku Betele nalo leneilo Yerobowamu mwana wa Nebati wakazenga pa malo gha pachanya ghakusoperako, Yosiya wakalibwanganduliraso pasi. Yerobowamu ndiyo wakapuruska ŵaIsraele kuti ŵanange. Yosiya wakocha jochero lira na malo gha pachanya ghakusoperako Ashera. Wakaswa mawe ghakhe tuchokotuchoko ndipo na kughasira nga ndi fuvu.

¹⁶Para Yosiya wakalaŵiska uku na uku, wakawona madindi gheneagho ghakaŵa musi mwa phiri. Ŵakatuma ŵanthu kuti ŵaghajime na kutoramo viwangwa vya ŵanthu ŵakufwa ndipo ŵakavyochera pa jochero leneilo mwakuti ŵalikazuzge. Ŵakachita icho kuti mazgu FUMU agho munthu wa Chiuta wakachima para Yerobowamu wakimilira pafupi na jochero pa nyengo ya chiphikiro. Yosiya wakalaŵiska ndipo wakawona dindi la munthu wa Chiuta uyo wakachima za vinthu vyeneivi.

¹⁷Penepapo Yosiya wakafumba wakati, “Kasi dindi ilo nkhuliwona apo nda njani?” Ndipo ŵanthu ŵa mu msumba ŵakamuzgora kuti, “Ili ndi dindi la munthu wa Chiuta mweneuyo wakafumira ku charu cha Yuda ndipo ndiyo wakachima na ivyo imwe mwachita pa jochero la ku Betele.”

¹⁸Penepapo Yosiya wakati, “Rekani paŵavye munthu watimbanizge viwangwa vyakhe.” Ndipo ŵakavireka viwangwa vyakhe pamoza na viwangwa vya nchimi iyo yikafumira ku Samariya.

¹⁹Karonga Yosiya wakawuskamo na kubwangandulira pasi malo gha pachanya ghakusoperako agho ghakaŵa mu misumba ya ku Samariya, gheneagho ŵakaronga ŵa charu cha Israele ŵakazenga ndipo mwa ntheura ŵakayavyira FUMU ku ukari. Wakachita navyo nga ndi umo wakachitira pa malo gha Betele.

²⁰Ŵasofi wose awo ŵakateŵeteranga pa malo gha pachanya ghakusoperako, Yosiya wakaŵakoma. Ndipo wakocha viwangwa vyawo pa majochero agho ŵakocherangapo sembe ku vikozgo. Penepapo Yosiya wakawerera ku Yerusalemu.

²¹Karonga Yosiya wakalangula ŵanthu wose kuti, “Muŵenge na chiphikiro cha Paska cha kuchindikira FUMU, Chiuta winu nga ndi umo kuli kulembekera mu buku ili la phangano.”

²²Pakuti pandaŵepo chiphikiro cha Paska chakuŵa nga ndi ichi kufumira nyengo za ŵeruzgi ŵeneawo ŵakawusanga charu cha Israele, panji mu nyengo ya kuwusa kwa ŵakaronga ŵaIsraele panji ŵa charu cha Yuda.

²³Sono mu chirimika cha 18 cha kuwusa kwa Karonga Yosiya, chiphikiro cha Paska lakuchindikira FUMU chikachitika ku Yerusalemu.

²⁴Karonga Yosiya wakawuskamo ŵawukwi wose na ŵamayere, vikozgo vya mu nyumba, ŵangoza na maukazuzi ghose agho ghakaŵa mu charu cha Yuda na mu Yerusalemu. Wakachita ichi kuti ŵafiske mazgu ghose agho ghali kulembeka mu Buku la Marango ilo ŵasofi Hilikiya wakalisanga mu Nyumba ya FUMU.

²⁵Mu mudauko wose wa ŵakaronga kukaŵavye karonga na yumoza wakuzgokera kwa FUMU na mtima wakhe wose, na umoyo wakhe wose, na nkhongono zakhe zose kwakuyana na Dango la Mozesi nga ndi umo wakachitira Karonga Yosiya.

²⁶Ndipouli FUMU kuti yikagowoka chara ku ukari wakhe wakofya uwo yikakwiyira charu cha Yuda chifukwa cha vyose ivyo Manase wakachita vyeneivyo vikasosomora ukati wa FUMU.

²⁷Ndipo FUMU yikati, “ŴaYuda nawo nditi ndiŵawuskepo pa maso pane, nga ndi umo ndaŵawuskirapo ŵaIsraele. Ndipo nditi ndiwutaye msumba wa Yerusalemu, weneuwo ndili kuwusankha, ndiposo na nyumba iyo nkhanena kuti, ‘Zina lane liti likharenge mwenemumo.’ ”

²⁸Milimo yinyakhe ya Yosiya na vyose ivyo wakachita vili kulembeka mu Buku la Midauko la ŵakaronga ŵa charu cha Yuda.

²⁹Pa nyengo iyo Yosiya wakawusiranga charu cha Yuda, Faro Neko wa charu cha Eguputo wakaruta ku mronga wa Yufurate kuti wakovwire karonga wa charu cha Asiriya. Karonga Yosiya wakaruta kuti wakarwe nayo nkhondo. Kweni Faro Neko wakamuwona ndipo wakamukomera pa msumba wa Megido.

³⁰Ntheura ŵateŵeti ŵakhe ŵakamuyegha wakufwa mu gareta kufuma ku Megido ndipo ŵakaruta nalo ku Yerusalemu uko wakasungika mu dindi lakhe na lakhe. Penepapo ŵaYuda ŵakatora Yehowahazi mwana wa Yosiya, ŵakamuphakazga mafuta ndipo ŵakamwimika kuti wambe kuwusa mu malo gha ŵawiske.

³¹Yehowahazi wakaŵa na virimika 23 para wakambanga kuwusa ndipo wakaŵa karonga mu Yerusalemu pa myezi yitatu pera. Zina la ŵanyina likaŵa Hamutali mwana wa Yeremiya mweneuyo wakafuma ku Libina.

³²Yehowahazi wakachita uheni panthazi pa FUMU, nga ndi umo ŵakachitira ŵawiskekuru ŵakhe ŵanyakhe.

³³Faro Neko wa charu cha Eguputo wakamukaka Yehowahazi ku Ribula mu charu cha Hamati, mwakuti wareke kuŵaso karonga mu msumba wa Yerusalemu. Ndipo wakalangula kuti ŵaYuda ŵaperekenge msonkho wa makilogiramu 3,400 gha siliva na wa golide wakukwana 34.

³⁴Faro Neko wakimika Eliyakimu mwana wa Yosiya, kuŵa karonga mu malo gha ŵawiske. Ndipo wakasintha zina la Eliyakimu kuŵa Yehoyiyakimu. Kweni Yehowahazi wakamutora na kuruta nayo ku Eguputo kwenekura ndiko wakafwira.

³⁵Karonga Yehoyiyakimu wakaperekanga ndarama za siliva na za golide kwa Faro, kweni wakazitoranga kufuma ku msonkho wa charu na ku ŵanthu kwakuyana na umo ŵakalangulira Faro. Ndarama izi zikaŵa izo ŵanthu ŵakasonkhanga ndipo ŵakaperekanga kwakuyana na umo munthu wasakatira kuti ziŵe za Faro Neko, wa charu cha Eguputo.

³⁶Yehoyiyakimu wakaŵa na virimika 25 para wakambanga kuwusa charu cha Yuda ndipo wakaŵa karonga mu Yerusalemu pa virimika 11. Zina la ŵanyina likaŵa ŵa Zebuda mwana wa Pedaya ŵa ku msumba wa Ruma.

³⁷Yehoyiyakimu wakachita viheni panthazi pa FUMU nga ndi umo ŵakachitira ŵawiskekuru ŵakhe.