Read new_tumbuka_bible 2 Karonga 24 Bible Online

2 Karonga 24 - new_tumbuka_bible bible

2 Karonga 24

¹Pa nyengo iyo Yehoyiyakimu wakawusiranga charu cha Yuda Nebukadinezara, karonga wa ku Babuloni wakiza na nkhondo mu charu cha Yuda na kumuthereska Yehoyiyakimu. Ntheura wakachichizgika kuŵateŵetera pasi Nebukadinezara kwa virimika vitatu. Kweni pamanyuma Yehoyiyakimu wakamugarukira Nebukadinezara.

²Sono FUMU yikatuma mipingo ya ŵasilikari kufuma ku charu cha Babuloni, ku Siriya, ku Mowabu na ku Amoni kuti ŵakarwe nkhondo na charu cha Yuda na kuchiparanya. FUMU yikachita ichi kuti yifiske mazgu agho yikayowoya mwa nchimi, ŵateŵeti ŵakhe.

³Nadi ivyo FUMU yikalangula kuti vichitikire charu cha Yuda, vikachitika mwakuti wa ŵawuskepo panthazi pakhe chifukwa cha uheni wa Manase na vinyakhe viheni ivyo wakachita.

⁴Manase wakathiska ndopa zambula mrandu pakuti wakakazuzga Yerusalemu na ndopa za ŵanthu ŵanandi ŵambula mrandu. Ntheura FUMU kuti yikakhumba kumugowokera chara.

⁵Milimo yinyakhe ya Yehoyiyakimu na ivyo wakachita, vili kulembeka mu Buku la Midauko la ŵakaronga ŵa charu cha Yuda.

⁶Ntheura Yehoyiyakimu wakafwa ndipo mwana wakhe Yehoyiyakini ndiyo wakamba kuwusa mu malo ghakhe.

⁷Karonga wa charu cha Eguputo kuti wakarwaso nkhondo chara, chifukwa karonga wa ku Babuloni wakathereska charu chose cha Eguputo kufuma ku mronga wa Eguputo kuya kafika ku mronga wa Yufurate.

⁸Yehoyiyakini wakaŵa na virimika 18 para wakambanga kuwusa ndipo wakaŵa karonga mu Yerusalemu pa myezi yitatu. Zina la ŵanyina likaŵa Nehushita, mwana wa Elinatani wa ku Yerusalemu.

⁹Yehoyiyakini wakachita ivyo vikaŵa viheni panthazi pa FUMU nga ndi umo wakachitira wiske.

¹⁰Pa nyengo ya muwuso wa Yehoyiyakini ndipo ŵasilikari ŵa Nebukadinezara, karonga wa ku Babuloni, wakizira na nkhondo mu msumba wa Yerusalemu na kuwuzingirizga.

¹¹Nebukadinezara, karonga wa ku Babuloni iyomwene wakiza mu msumba apo ŵasilikari ŵakaŵa wachali kuwuzingirizga msumba.

¹²Penepapo Yehoyiyakini karonga wa charu cha Yuda ŵakajipereka kwa Nebukadinezara, karonga wa ku Babuloni, iyomwene na ŵanyina, ŵateŵeti ŵakhe, nduna zakhe, ndiposo na ŵararaŵarara ŵakhe ŵa mu nyumba ya ufumu. Sono Nebukadinezara wakamutora Yehoyiyakini kuŵa muzga mu chirimika cha chinkhonde na chitatu cha muwuso wakhe.

¹³Nga ndi umo FUMU yikayowoyera, Nebukadinezara wakatora vyuma vya mu Nyumba ya Chiuta, na vyose ivyo vikaŵa mu nyumba ya ufumu na kuruta navyo ku Babuloni. Kweni wakaswa viteŵetero vyose vya golide ivyo Solomoni karonga wa charu cha Israele wakapangiramo mu Nyumba ya Chiuta.

¹⁴Ŵakaruta nawo ku uzga ŵanthu wose ŵa mu Yerusalemu, nduna zose, vinkhara vyose vya nkhondo, wose pamoza ŵakukwana 10,000. Ŵakatoraso na kuruta na nkhwantha zose zakuŵaja na ŵafuzi ŵa visulo. Awo ŵakakharako mu charu ŵakaŵa ŵakavu pera.

¹⁵Yehoyiyakini nayo wakamutora kuruta nayo ku Babuloni kuŵa wamikori. Wakatoraso ŵanyina ŵakhe, ŵawoli ŵakhe, nduna zakhe, na ŵarongozgi ŵa charu kufuma ku Yerusalemu.

¹⁶Karonga wa ku Babuloni wakayoreraso ku Babuloni kuŵa ŵamikori vinkhara vyose vya nkhondo vyakukwana 7,000 ndiposo na nkhwantha zakuŵaja na ŵafuzi ŵa visulo ŵakukwana 1,000. Ndipo wose ŵakaŵa ŵankhongono na ŵakumanya kurwa nkhondo.

¹⁷Nebukadinezara, karonga wa ku Babuloni wakimika Mataniya, uyo wakaŵa sibweni wa Yehoyakini, kuŵa karonga wa charu cha Yuda mu malo ghakhe. Ndipo Nebukadinezara wakasintha zina la Mataniya kuŵa Zedekiya.

¹⁸Zedekiya wakaŵa na virimika 21 para wakambanga kuwusa charu cha Yuda ndipo wakaŵa karonga mu Yerusalemu pa virimika 11. Zina la ŵanyina likaŵa Hamutali mwana wa Yeremiya wa ku Libina.

¹⁹Zedekiya wakachita ivyo vikaŵa viheni panthazi pa FUMU nga ndi umo wakachitira Yehoyiyakimu.

²⁰Ŵanthu ŵa mu Yerusalemu na ŵa charu cha Yuda ŵakayikwiyiska FUMU mwakuti FUMU yikaŵareka. Ichi ndicho chifukwa vinthu vyose viheni ivi vikachitikanga. Pamanyuma Zedekiya wakamugarukira karonga wa ku Babuloni.