Read new_tumbuka_bible 2 Karonga 25 Bible Online

2 Karonga 25 - new_tumbuka_bible bible

2 Karonga 25

¹Sono mu chirimika cha chinkhonde na chinayi, cha kuwusa kwa Zedekiya, pa zuŵa la khumi wa mwezi, Karonga Nebukadinezara wa charu cha Babuloni wakiza na ŵasilikari ŵakhe wose kuti ŵarwe nkhondo na msumba wa Yerusalemu. Ŵakazenga msasa kuwaro kwa msumba na vibumira vyakukwerapo kuzingirizga msumba.

²Ndipo msumba ukazingirizgika ntheura mpaka chirimika cha 11 cha kuwusa kwa Zedekiya.

³Sono pa zuŵa la chinkhonde na chinayi, mwezi wa chinayi, njara yikafika pakuheni chomene mu msumba wa Yerusalemu mwakuti ŵanthu ŵakaŵavye chilichose kuti ŵarye.

⁴Ntheura wakadolora linga la msumba ndipo mpingo wose wa ŵasilikari pamoza na Karonga Zedekiya ŵakafuma na kuchimbira na usiku. Ŵakenda mu nthowa ya ku chipata icho chikaŵa pakati pa viliŵa viŵiri pafupi na munda wa karonga. Pa nyengo iyi ŵaBabuloni ŵakaŵa ŵachali kuwuzingirizga msumba. Ŵanthu ŵara ŵakachimbilira ku dera la Araba.

⁵Kweni ŵasilikari ŵaBabuloni ŵakamuchimbilira karonga ndipo ŵakamusanga mu dambo la msumba wa Yeriko. Ŵasilikari ŵakhe ŵakamureka yekha na kumbininikira uku na uku.

⁶Penepapo wakamukora Zedekiya ndipo wakiza nayo kwa karonga wa ku Babuloni ku msumba wa Ribula, kweneuko Nebukadinezara wakaphara chilango chakhe.

⁷Ŵakakoma ŵana ŵa Zedekiya uku iyo wiske wakuwona ndipo iyo wakamudolora maso na kumukaka na maunyoro gha mkuŵa ndipo ŵakaruta nayo ku Babuloni.

⁸Pa zuŵa la chinkhonde na chiŵiri la mwezi wa chinkhonde, mu chirimika cha chinkhonde na chinayi cha kuwusa kwa Karonga Nebukadinezara wa charu cha Babuloni, Nebuzaradani murara wa ŵavikiriri ŵa karonga ndiposo yumoza wa ŵarongozgi ŵakhe wakiza ku msumba wa Yerusalemu.

⁹Nebuzaradani wakocha na moto Nyumba ya FUMU, ndipo na nyumba ya ufumu pamoza na nyumba zose za mu Yerusalemu izo zikaŵa zikuruzikuru.

¹⁰Ŵasilikari wose ŵa nkhondo ya ku Babuloni pasi pa murara wa chivikiriro cha karonga ŵakawiskira pasi viliŵa vyose vya linga ivyo vikazingirizga Yerusalemu.

¹¹Ŵanthu wose awo ŵakakharako ŵa mu msumba pamoza na ŵanthu ŵanyakhe ndiposo na awo ŵakagwenthera kwa karonga wa charu cha Babuloni kuŵa ŵamikori, Nebuzaradani wakaŵatorera ku Babuloni.

¹²Kweni murara wa ŵavikiriri yura wakarekako ŵanthu awo ŵakaŵa ŵakavu chomene kuti ŵateŵeterenge mu minda ya mpheska na minda yinyakhe.

¹³Ŵasilikari ŵa charu cha Babuloni ŵakaswa mizati yose ya mkuŵa na vyakwimapo vyakhe vya mkuŵa mu Nyumba ya FUMU pamoza na chiŵiya cha mkuŵa chikuru chakuŵikamo maji ndipo ŵakaruta navyo ku Babuloni.

¹⁴Ndipo ŵakatoraso viŵiya, mafosholo ghakuyorera vyoto, vyakuzimyira nyali, ŵadira ŵakocherapo vyakununkhira na viteŵetero vyose vya mkuŵa ivyo ŵakateŵeteskeranga mu Nyumba ya FUMU.

¹⁵Murara wa chivikiriro yura wakatoraso vyakupalira moto na bakule wakumijira maji ndiposo na viteŵetero vya golide na siliva.

¹⁶Mkuŵa, uwo ukaŵa pa mizati yiŵiri pa chiŵiya cha maji na pa vyakwimapo vyakhe ivyo Solomoni wakapangira Nyumba ya FUMU, ukaŵa unandi chomene wambula mapimiko.

¹⁷Mizati yiŵiri yikaŵa ya kuyana waka ndipo umoza ukaŵa wa mamita ghankhonde pachanya ghatatu mu utali wakhe ndipo pachanya pakhe pakaŵa mutu wa mkuŵa. Utali wa mutu umoza ukaŵa mita yimoza na hafu. Ukaŵa vyakuruka nga ndi ukonde pamoza na vithuzithuzi vya magalagadeya. Vyose vikaŵa vya mkuŵa ndipo vikaŵikika kuzingirizga mitu pa mzati uliwose.

¹⁸Murara mukuru yura wa ŵavikiriri ŵa karonga wakamukora Seraya musofi mukuru na Zefaniya wa chiŵiri wakhe na ŵalinda ŵatatu ŵa pa miryango ya Nyumba ya Chiuta nga mbazga.

¹⁹Ndipo kufuma mu msumba ura wakakoramo murongozgi wa ŵasilikari ndiposo ŵanthu ŵanyakhe ŵankhonde awo ŵakaperekanga urongozgi kwa karonga. Ŵakakoraso mulembi wa murongozgi wa ŵasilikari yura mweneuyo wakaŵa na nchito yakuwunganya ŵasilikari ndiposo na ŵararaŵarara 60 awo ŵakaŵa mu msumba ura.

²⁰Ntheura Nebuzaradani, kapitawe yura wakaŵatorera kwa karonga wa ku Babuloni uyo wakaŵa ku msumba wa Ribula.

²¹Ndipo karonga wa ku Babuloni wakalangula kuti ŵakomekere kwenekura ku Ribula mu charu cha Hamati. Ntheura ndimo Yuda ŵakaŵa ŵamikori kufuma ku charu chawo.

²²Ŵanthu awo Nebukadinezara, karonga wa ku Babuloni wakaŵareka mu charu cha Yuda ŵakaŵa pasi pa Gedaliya mwana wa Ahikamu, muzukuru wa Shafani. Nebukadinezara wakimika Gedaliya kuŵa mukuru wa chigaŵa cha Yuda.

²³Para ŵarongozgi ŵa ŵasilikari pamoza na ŵasilikari ŵawo ŵakapulika kuti Karonga Nebukadinezara wa ku Babuloni wimika Gedaliya kuŵa mukuru wa chigaŵa, wakiza kwa iyo ku Mizipa. Ŵarongozgi ŵara ŵakaŵa Ishimaele mwana wa Netaniya, Yohanani mwana wa Kareya, Seraya mwana wa Tanihumeti wa ku Netofa ndiposo na Yaazaniya mwana wa ku Maaka.

²⁴Gedaliya wakarapa panthazi pa ŵarongozgi ŵa ŵasilikari ŵara pamoza na ŵasilikari ŵawo kuti, “Imwe mureke kopa ŵarongozgi ŵa ku Babuloni, kharani mu charu chino. Kweni mupulikirenge karonga wa ku Babuloni ndipo vyose viti vimwenderani makora.”

²⁵Kweni mu mwezi wa chinkhonde na chiŵiri Ishimaele, mwana wa Netaniya, muzukuru wa Elishama mweneuyo wakaŵa wa mbumba ya ufumu wakiza kwa Gedaliya pamoza na ŵanthu khumi. Wakamuwukira Gedaliya na wakamukoma. Wakakomaso ŵaYuda na ŵaBabuloni awo Gedaliya wakaŵa nawo pamoza ku Mizipa.

²⁶Penepapo ŵanthu wose, ŵachoko na ŵakuru pamoza na ŵarongozgi ŵa ŵasilikari ŵakachimbilira ku Eguputo chifukwa ŵakopanga ŵaBabuloni.

²⁷Yehoyiyakini, karonga wa charu cha Yuda wakaŵa wamikori pa virimika 37. Sono Karonga Chiheni Merodaki uyo wakamba kuwusa charu cha Babuloni wakamufumiska Yehoyiyakini mu gadi kuŵa mwanangwa pa zuŵa la 27 mwezi wa 12.

²⁸Ndipo Karonga Chiheni Merodaki wakayowoyanga viweme kwa Yehoyiyakini ndipo wakamwimika kuŵa pachanya pa ŵakaronga ŵanyakhe wose awo ŵakaŵa ŵazga mu charu cha Babuloni.

²⁹Ntheura Yehoyiyakini wakazomerezgeka kuvura vyakuvwara vya ukayidi ndipo wakaryanga ku nyumba ya ufumu pa umoyo wakhe wose.

³⁰Ndipo zuŵa na zuŵa karonga wa ku Babuloni yura wakamupanga Yehoyiyakini malipiro ghakhe nga ndi karonga pa umoyo wakhe wose.