Read new_tumbuka_bible 2 Karonga 3 Bible Online

2 Karonga 3 - new_tumbuka_bible bible

2 Karonga 3

¹Mu chirimika 18 cha kuwusa kwa Yehoshafati, karonga wa Yuda, Yehoramu mwana wa Ahabu ŵakaŵikika ufumu kuwusa Israele mu msumba wa Samariya, ndipo wakawusa virimika 12.

²Yoramu wakachita ivyo vikaŵa viheni panthazi pa FUMU, kweni viheni ivyo wakachita kuti vikayana nga ndi ivyo ŵakachita ŵawiske panji ŵanyina ŵa Yezebele chara. Iyo wakawiskira pasi chikozgo cha Baala icho ŵawiske wakapanga.

³Ndipouli wakaskepererana na uheni wa Yerobowamu mwana wa Nebati, uwo wakanangiska nawo ŵaIsraele ndipo wakakhumba kurekana nawo chara.

⁴Sono Mesha karonga wa Mowabu wakaŵetanga mberere, ndipo pa chirimika wakaperekeranga ŵana-mberere 100,000 pamoza na weya wa mberere zanarume 100,000 kwa karonga wa Israele kuŵa nga ndi msonkho.

⁵Kweni Ahabu wakati wafwa karonga wa Mowabu wakamugarukira karonga wa Israele.

⁶Ntheura pa nyengo yeneyira Karonga Yehoramu wakafuma mu Samariya ndipo wakawunganya ŵasilikari wose ŵa Israele.

⁷Wakatuma ŵanthu kuti warute kwa karonga wa Yuda na mazgu ghakuti, “Karonga wa Mowabu wandigarukira, kasi ungaruta nane chara kuti tikarwe nkhondo na Mowabu?” Yehoshafati wakati, “Nditi ndirutenge nawe. Ine na iwe tili munthu yumoza. Ŵanthu ŵane mbanthu ŵako ndipo mahachi ghane nayo ndi mahachi ghako.”

⁸Yehoshafati wakafumba wakati, “Kasi pakuruta kuya karwa nkhondo tenderenge nthowa nji?” Yehoramu wakazgora wakati, “Tendenge nthowa ya mapopa gha Edomu.”

⁹Ntheura karonga wa Israele, karonga wa Yuda na karonga wa Edomu ŵakaruta. Sono para ŵakati ŵenda nthowa ya kuzgombazgomba pa mazuŵa ghankhonde na ghaŵiri ŵasilikari ŵakaŵavye maji ghakuti ŵamwe pamoza na vinyama ivyo ŵakaŵa navyo.

¹⁰Penepapo karonga wa Israele wakati, “Mbaya mwe! Kasi FUMU yatichema ise ŵakaronga ŵatatu kuti yitipereke mu mawoko gha ŵanthu ŵa Mowabu?”

¹¹Ndipo Yehoshafati wakafumba wakati, “Kasi kuno yingaŵako chara nchimi ya FUMU yeneiyo tingafumbako kuti FUMU yikuti uli?” Murongozgi wa nkhondo yumoza wa karonga wa Israele wakazgora wakati, “Kuno tili na Elisha mwana wa Shafati uyo wakaŵa muteŵeti wa Eliya.”

¹²Penepapo Yehoshafati wakati, “Mazgu gha FUMU ghali mwa iyo.” Ntheura karonga wa Israele, wa Yuda na wa Edomu ŵakaruta kwa Elisha.

¹³Sono Elisha wakafumba Yoramu karonga wa Israele kuti, “Kasi nchifukwa uli mwiza kuno kwa ine? Imwe rutaninge ku nchimi za ŵawiskemwe na za ŵanyinamwe.” Kweni Yoramu wakati, “Chara! Ise ta ŵakaronga ŵatatu tachemeka na FUMU kuti yitipereke mu mawoko gha ŵanthu ŵa Mowabu.”

¹⁴Ndipo Elisha wakati, “Nkhurapa nadi mwa FUMU Mwenenkhongono zose yeneiyo nkhuyiteŵetera, ndirekenge kuchindika kuŵapo kwa Yehoshafati, karonga wa Yuda, mphanyi na kulaŵiskapo chara panji kupwererako za iwe chara.

¹⁵Kweni sono munditorere munthu uyo wakumanya kwimba na chiding'indi.” Ndipo apo mwimbi yura wakimba, nkhongono ya FUMU yikiza pa Elisha. Ndipo wakati,

¹⁶“FUMU yikuti, ‘Jimani viziŵa mu dambo lomizo ili ndipo ine nditi ndizuzgenge na maji.

¹⁷Pakuti FUMU yikuti muti muwone mphepo panji vura chara, kweni dambo ili liti lizurenge na maji ghakumwa, ndipo muti mumwenge imwe, ng'ombe zinu na viŵeto vyinu vinyakhe.

¹⁸Ichi ndi chinthu chipusu chomene kwa FUMU kuti yimuchitirani. Yiti yiperekengeso ŵaMowabu mu mawoko ghinu.

¹⁹Muti muthereske misumba yose ya malinga na misumba yinyakhe yikuruyikuru. Muti muwiskirenge pasi makuni ghose ghaweme. Muti mujare visimi vyose vya maji ndipo muti munange minda yawo yose yavundira yiweme pakuponyamo mawe.’ ”

²⁰Sono na machero ghakhe pafupi na nyengo ya kuperekera sembe, ŵakawona maji ghakwenda kufumira ku dera la Edomu, mpaka charu chira chikazura na maji.

²¹Sono ŵanthu ŵa Mowabu ŵakapulika kuti ŵakaronga ŵatatu ŵiza kuti ŵarwe nawo nkhondo. Ntheura ŵakawungana wose ŵarara na ŵachoko wuwo awo ŵakamanya kurwa nkhondo na kuŵayimika mu zimphaka.

²²Ndipo ŵaMowabu ŵakati ŵawuka na macherochero, para dazi likaŵalanga pa maji, ŵakawonanga maji agho ghakaŵa ghaswesi nga ndi ndopa.

²³Ndipo ŵakati, “Izi ndi ndopa nadi!” Ŵakaronga aŵa ŵatimbananga ŵekha ndipo ŵakomana. Sono mwa ŵaMowabu tiyeni tikaskoghe ivyo ŵanguŵa navyo mu misasa yawo!

²⁴Kweni ŵaMowabu ŵakati ŵafika pa misasa ya ŵaIsraele, ŵaIsraele ŵakawuka na kurwa nawo nkhondo ŵaMowabu mpaka ŵakachimbira. ŴaIsraele ŵakaŵarondezga na kuŵakomera mu charu chawo wuwo.

²⁵Ŵakagumura misumba yawo, pa malo ghose ghaweme, waliyose wakaponyangapo mawe mpaka ghakazura na mawe. Ŵakajara visimi vyose vya maji, ndipo ŵakawiskira pasi makuni ghose ghaweme. Ŵakasuka ŵakasida mawe pera mu msumba wa Kiri Hareseti weneuwo ŵa fyata ŵakawuzingirizga na kuwuthereska.

²⁶Karonga wa Mowabu wakati wawona kuti nkhondo yamukhalira uheni, wakatora ŵasilikari ŵa malupanga 700 mwakuti iyo pamoza na iwo ŵaphapatizge pakuporota panthazi pa karonga wa Edomu, kweni ŵakatondeka ndipera.

²⁷Ntheura wakatora mwana wakhe murara mweneuyo wakeneranga kuhalira ufumu wakhe, na kumupereka kuŵa sembe yakocha, pachanya pa chiliŵa cha msumba. Pakuwona ichi ŵaIsraele ŵakopa chomene ndipo ŵakawukako kwa iyo na kuwerera ku charu cha kwawo.