Read new_tumbuka_bible 2 Karonga 4 Bible Online

2 Karonga 4 - new_tumbuka_bible bible

2 Karonga 4

¹Zuŵa limoza chokoro cha yumoza wa nchimi chikaruta kwa Elisha ndipo chikalira chikati, “Mufumu wane uyo wakaŵa muteŵeti winu wali kufwa. Imwe mukumanya kuti wakaŵa munthu wakopa FUMU. Kweni munthu uyo mufumu wane wakatewurako vinthu vyakhe, wiza kuti watore ŵana ŵane ŵaŵiri kuti ŵakaŵe ŵazga ŵakhe.”

²Ndipo Elisha wakati kwa iyo, “Sono kasi ukuti ine ndikuchitirechi? Ndiphalira, kasi uli na vichi mu nyumba mwako?” Ndipo chokoro chikati, “Mteŵeti-kazi winu walije na kamoza mu nyumba, wali na supa ya mafuta pera.”

³Sono Elisha wakati, “Rutanga, ukabwereke ku ŵazengezgani ŵako wose supa zambula kanthu mukati. Ungabwerekanga zichoko waka chara.

⁴Penepapo ukanjire mu nyumba na kujijalira iwe pamoza na ŵana ŵako. Ukapunguliremo mafuta mu supa zose izo ndipo para yimoza yazura, ukayiŵikenge pa mphepete.”

⁵Ntheura chokoro chikawerera ku nyumba na kujijalira iyo pamoza na ŵana ŵakhe. Ŵana ŵakhe ŵakamusenderezgeranga supa zira iyo wakapungulirangamo mafuta.

⁶Para supa zira zikazura wakaphalira mwana wakhe yumoza wakati, “Undipe supa yinyakhe.” Ndipo mwana wakati supa zose zamara. Penepapo mafuta nagho ghakareka kufuma.

⁷Sono chokoro chikaruta kwa Elisha, munthu wa Chiuta, ndipo iyo wakati kwa mwanakazi, “Rutanga ukaguliske mafuta kuti uwezge ngongole zako, ndipo iwe na ŵana ŵako movwirike pa agho ghakharako.”

⁸Zuŵa limoza Elisha wakaruta ku Shunemu uko kukakharanga mwanakazi musambazi, uyo wakamukoserezga Elisha kuti warye chakurya. Ntheura nyengo yose iyo wakajumphirangapo kuruta ku Shekemu wakapatukirangapo kuti waryenge chakurya pa nyumba ya mwanakazi uyu.

⁹Sono mwanakazi yura wakati kwa mufumu wakhe, “Nkhupanikizga kuti munthu uyu wakwiza pano kaŵirikaŵiri ndi munthu wakupatulika wa Chiuta.

¹⁰Tiyeni tizenge kachipinda kachoko waka pachanya pa nyumba yithu iyi ndipo timuŵikiremo chitara, thebulu, mupando na nyali mwakuti nyengo yose iyo wizirenge kwa ise, wakharengemo.”

¹¹Zuŵa limoza Elisha wakizaso ku Shunemu ndipo wakaphalirika kuti wakakwere kachipinda kara na kugona mwenemumo.

¹²Elisha wakati kwa Gehazi muteŵeti wakhe, “Mucheme mwanakazi uyu muShunemu.” Gehazi wakamuchema mwanakazi yura ndipo wakiza na kwimilira panthazi pa Elisha.

¹³Ndipo Elisha wakati kwa Gehazi, “Yowoya ku mwanakazi uyu uti, wasuzgika chomene pakusunga na kutipwererera makora, kasi ukukhumba kuti ise tikuchitire vichi? Kasi ungaŵa na madandaulo kuti tikakuyowoyere kwa karonga panji kwa murongozgi wa nkhondo?” Mwanakazi yura wakazgora wakati, “Ine nkhukhara mu wanangwa mukati mwa ŵabali ŵane.”

¹⁴Elisha wakafumba Gehazi kuti, “Sono kasi tingamuchitira vichi mwanakazi uyu?” Gehazi wakazgora wakati, “Mwanakazi uyu walije na mwana ndipo mufumu wakhe nayo ndi muchekuru.”

¹⁵Elisha wakati kwa Gehazi, “Rutanga ukamucheme mwanakazi uyu.” Sono wakati wamuchema wakiza na kwimilira pa muryango.

¹⁶Elisha wakati ku mwanakazi yura, “Chirimika icho chikwiza nyengo yakuŵa nga ndi yeneiyi wamukorera mwana mwanarume.” Ndipo mwanakazi yura wakati, “Chara! Sekuru wane! Imwe ndimwe munthu wa Chiuta, mureke kupusika muteŵeti-kazi winu!”

¹⁷Kweni mwanakazi yura wakaŵa na nthumbo, ndipo wakababa mwana mwanarume pa nyengo yeneyira nga ndi umo wakayowoyera Elisha.

¹⁸Para mwana yura wakakura, zuŵa limoza wakaruta ku ŵawiske awo ŵakaŵa ku munda pamoza na awo ŵakavunanga.

¹⁹Mwa mabuchibuchi mwana yura wakalira ku ŵawiske wakati, “Mutu ukuŵinya. Mutu wane, mutu wane!” Ŵawiske ŵakati ku muteŵeti wawo, “Umutore ukamupereke kwa nyina.”

²⁰Muteŵeti yura wakati wamutora mwana na kuruta nayo kwa nyina, mwana yura wakakhara pa chipakato cha nyina mpaka nyengo ya 12 koloko, ndipo wakafwa.

²¹Nyina wakamutorera mwana yura ku chipinda cha munthu wa Chiuta na kumugoneka pa chitara chakhe. Pamanyuma wakajara chijaro na kufuma.

²²Penepapo wakachemerezga kwa mufumu wakhe wakati, “Munditumireko yumoza wa ŵateŵeti na mbunda yimoza mwakuti ndirute luŵiroluŵiro kwa munthu wa Chiuta, na kuya kawerakoso.”

²³Ndipo mufumu wakhe wakamufumba wakati, “Kasi nchifukwa uli ukukhumba kuruta muhanya uno? Ili kuti ndi zuŵa la chiphikiro cha kuthwasa kwa mwezi chara panji nesi kuti ndi Sabata chara.” Ndipo mwanakazi yura wakati, “Palije kanthu.”

²⁴Penepapo wakaŵika chiskaro pa mbunda yira ndipo wakati kwa muteŵeti wakhe, “Chimbizga chomene mbunda, ungagowozganga mu mendero chara pekhapekha ndikuphalire.”

²⁵Ndipo wakamba ulendo wakhe ndipo wakafika ku Phiri la Karimele uko Elisha munthu wa Chiuta wakaŵa. Munthu wa Chiuta wakati wamuwona mwanakazi kuti wakwiza pataliko, wakati kwa Gehazi muteŵeti wakhe, “Wona mwanakazi mu Shunemu uyo wakwiza uko.

²⁶Chimbira luŵiro ukakumane nayo ndipo ukafumbe ukati, ‘Kasi uli makora? Kasi mufumu wako wali makora? Kasi mwana wako wali makora?’ ” Mwanakazi yura wakazgora wakati, “Nkhuweme.”

²⁷Sono wakati wafika ku phiri kwa munthu wa Chiuta, wakajikama na kukora malundi gha Elisha. Gehazi wakiza kuti wamukanchizgire kutali. Kweni Elisha wakati, “Mureke! Kasi kuwona chara kuti wali mu vyakuŵinya vikuru chomene? FUMU yachibisa ichi kwa ine, ndipo yilije kundiphalira.”

²⁸Ndipo mwanakazi yura wakati, “Sekuru kasi ine nkhamufumbani mwana? Asi nkhayowoya kuti mureke kundiŵika mu chigomezgo?”

²⁹Sono Elisha wakati kwa Gehazi, “Vwara zikhore, utore ndodo yane na kukorera muwoko lako, ndipo ruta. Para ukumanenge na munthu, ureke kumutauzga, uyo wakukutauzga ureke kumuzgora. Ukagoneke ndodo iyi pa chisko cha mwana.”

³⁰Sono nyina wa mwana wakati, “Nkhurapira mwa FUMU iyo yili na umoyo ndiposo na imwe wuwo kuti ine nditi ndimurekani chara.” Ntheura Elisha wakawuka na kuruta nawo.

³¹Gehazi wakadangira kuruta ku nyumba ya mwanakazi ndipo wakaya kaŵika ndodo pa chisko cha mwana kweni kukaŵavye mazgu panji chimanyikwiro chakuti ngwamoyo. Penepapo Gehazi wakawerera kuya kakumana na Elisha ndipo wakamuphalira wakati, “Mwana wandawuke chara.”

³²Elisha wakati wafika ku nyumba ya mwanakazi yura, wakanjira na kuruta ku chipinda chakhe ndipo wakawona mwana wafwa wali chigonere pa chitara.

³³Penepapo wakajarako chijaro kuti ŵaŵe ŵaŵiri iyo na mwana ndipo wakaromba kwa FUMU.

³⁴Ndipo wakakwera pa chitara na kugona pachanya pa mwana. Wakaŵika mlomo wakhe pa mlomo wa mwana, maso ghakhe pa maso gha mwana, mawoko ghakhe pa mawoko gha mwana. Ndipo para wakathambalalira pa mwana, thupi la mwana likathukira.

³⁵Elisha wakakhira kufuma pa chitara ndipo wakamba kwenda mu chipinda uku na uko. Pamanyuma wakakweraso pa chitara na kuthambaralira pa mwana yura, mwana wakayethyemula kankhonde na kaŵiri, na kulaŵiska.

³⁶Sono Elisha wakachema Gehazi na kumuphalira kuti, “Mucheme mwanakazi muShunemu uyo.” Ntheura Gehazi wakamuchema mwanakazi yura, ndipo para wakati wiza kwa Elisha wakati, “Tora mwana wako.”

³⁷Mwanakazi yura wakiza na kuwa pa malundi gha Elisha, uku wakusindamira pasi chisko chakhe, ndipo wakatora mwana wakhe, na kuruta.

³⁸Pamanyuma Elisha wakawerera ku Giligala ndipo kwenekura kukaŵa njara mu charu. Para Elisha wakasambizganga mpingo wa nchimi, wakaphalira muteŵeti wakhe kuti wakharikepo nkhali yikuru pa moto mwakuti waphike chakurya kuti mpingo wa nchimi urye.

³⁹Yumoza wa nchimi zira wakaruta kuwaro ku thengere kuya kayaŵa mphangwe. Kwenekura wakasangako nyungu za mu thondo wakayaŵapo majungu ghakhe wakazuzga chivunga cha salu yakhe. Wakiza nagho ndipo kwambula kughamanya, wakaghachekera mu nkhali na kughaphika.

⁴⁰Wakaghaphura kuti nchimi zira zirye, kweni apo ŵakambanga kurya, nchimi zikachemerezga zikati, “Iwe munthu wa Chiuta, chakurya ichi chikuŵaŵa, chitikomenge.” Ntheura ŵakareka kurya.

⁴¹Elisha wakati, “Ndipaniko ufu.” Ndipo ŵakati ŵamupa ufu wakathira mu nkhali mura ndipo wakati, “Sono perekani chakurya kuti nchimi zirye.” Ndipo chakurya chira chikaŵa chiweme waka, ukari ukamara.

⁴²Zuŵa limoza munthu munyakhe wakafuma ku Baala Shalisha na kwiza kwa Elisha munthu wa Chiuta. Munthu uyo wakamuyeghera Elisha vingwa 20 vyakuphikika kufuma ku vipambi vyakudanga vya nyauti. Wakizaso na mbuto ya mu visasuni viphya mu thumba lakhe. Elisha wakati, “Perekani ku ŵanthu kuti ŵarye.”

⁴³Kweni muteŵeti wakhe wakati, “Kasi ndingazigaŵira uli nchimi 100 kuti zirye?” Wakazgora wakati, “Zipe nchimi zirye chifukwa FUMU yikuti ŵati ŵarye ndipo chakurya chinyakhe chiti chikharepo.”

⁴⁴Sono muteŵeti wakazikhalikira nchimi zira chakurya chira. Ntheura zikarya ndipo vinyakhe vikakharapo kwakuyana na mazgu gha FUMU.