Read new_tumbuka_bible 2 Karonga 5 Bible Online

2 Karonga 5 - new_tumbuka_bible bible

2 Karonga 5

¹Kukaŵa murongozgi murara yunji wa ŵasilikari wa charu cha Siriya uyo zina lakhe wakaŵa Naamani. Munthu uyo wakaŵa wa chikanga chomene ndipo kwizira mwa iyo FUMU yikapereka nkhongono kuti wathereskenge ŵarwani ŵa Siriya. Naamani wakaŵa wakutemweka chomene na wa lumbiri luweme kweni wakaŵa na vyoni.

²Sono zuŵa limoza ŵasilikari ŵa Siriya ŵakaya karwa nkhondo na Israele ndipo kwenekura wakakorako kasungwana na kwiza nako ndipo kakamba kuteŵetera muwoli wa Naamani.

³Kasungwana kara kakati kwa fumukazi yakhe, “Sekuru warutenge kwa nchimi iyo yili ku Samariya, mphanyi yili kuchizgika ku vyoni vyakhe.”

⁴Penepapo Naamani wakaruta kuya kamuphalira sekuru wakhe mazgu agho kakayowoya kasungwana ka ku Israele.

⁵Karonga wa Siriya wakati kwa Naamani, “Rutanga sono ndipo ine nditi ndikupenge karata kuti ukapereke kwa karonga wa Israele.” Ntheura Naamani wakaruta, wakayegha ndarama za siliva zakukwana 30,000, za golide zakukwana 6,000 ndiposo na vyakuvwara khumi vya pa dera.

⁶Karata iyo wakayegha kuruta nayo kwa karonga yikalembeka kuti, “Na karata yeneiyi nkhutuma muteŵeti wane Naamani kwa iwe mwakuti umuchizge ku vyoni vyakhe.”

⁷Para karonga wa Israele wakaŵazga karata yira wakaparura vyakuvwara vyakhe ndipo wakati, “Kasi ine ndine Chiuta? Kasi ine ndingakoma na kuwezgeraso umoyo? Kasi munthu uyu watumirachi kuti wize mwakuti wachizgike ku vyoni vyakhe? Munthu uyo wakukhumba waka kwambana na ine.”

⁸Para Elisha munthu wa Chiuta wakapulika kuti karonga wa Israele waparura vyakuvwara vyakhe, wakatuma uthenga kwa karonga wakati, “Kasi mwapalulirachi vyakuvwara vyinu? Munthu uyo mumutume kwa ine mwakuti wamanye kuti mu Israele muli nchimi.”

⁹Ntheura Naamani wakiza na mahachi ndiposo magareta ghakhe, wakimilira pa muryango wa nyumba ya Elisha.

¹⁰Sono Elisha wakatuma nthumi na mazgu ghakuti, “Urute ukageze mu mronga wa Yorodani kankhonde na kaŵiri ndipo thupi lako liwererengemo, ndipo uti utozgeke.”

¹¹Kweni Naamani wakakwiya na kuwukapo uku wakuti, “Ine ndaghanaghananga kuti wati wafumire kuno kuwaro kwa ine ndipo wimilire na kuchema zina la FUMU, Chiuta wakhe, ndiposo na kusunkhunyiskira woko lakhe pa nthenda na kuchizga vyoni vyane.

¹²Asi mronga wa Abana na wa Faripara mu Damaseko njiweme kuruska mironga yose ya mu Israele? Asi ine mphanyi ndangugeza mu yeneiyo na kutozgeka?” Ntheura mu ukari wakawuka na kuruta.

¹³Kweni ŵateŵeti ŵakhe ŵakasenderera pafupi nayo ndipo ŵakati, “Ŵadada, usange nchimi yimulangulaninge kuti muchite chinthu chikuru mphanji mwanguchita chara? Kasi pali unonono uli apo wamuphalirani kuti, ‘Rutani kuti mukageze na kutozgeka.’ ”

¹⁴Ntheura wakaruta ku mronga wa Yorodani na kubira kankhonde na kaŵiri kwa kuyana na mazgu gha Elisha munthu wa Chiuta, ndipo thupi lakhe likawererapo, likaŵa lakutowa nga ndi la kamwana kachoko. Penepapo iyo wakutozgeka.

¹⁵Penepapo Naamani pamoza na wose awo wakaŵa nawo ŵakawerera kwiza kwa munthu wa Chiuta. Ŵakimilira panthazi pa Elisha ndipo wakati, “Sono ndamanya kuti kulije Chiuta munyakhe mu charu chose cha pasi kweni mu Israele pera. Ntheura sono nda muteŵeti winu nkhupereka chawanangwa ichi.”

¹⁶Kweni Elisha wakazgora wakati, “Nkhurapira mwa FUMU yamoyo yeneiyo ine nkhuyiteŵetera kuti ine nditi ndipokerengepo chawanangwa chilichose chara.” Naamani wakamukoserezga ndipera kuti mpaka wapokere.

¹⁷Penepapo Naamani wakati, “Usange mwakana kupokera chawanangwa chane, mundizomerezge nda muteŵeti winu kuti ŵandipe dongo lakukwana kuyegha mbunda ziŵiri. Pakuti kwamba sono, ine kuti ndiperekenge sembe yakocha mburuma panji sembe yakukoma kwa chiuta munyakhe waliyose chara, kweni kwa FUMU pera.

¹⁸Kweni nkhuromba kuti FUMU yindigowokerenge ine nda muteŵeti winu para sekuru wane wakunjira mu nyumba ya kusoperamo Rimoni, chiuta ngoza wa Siriya ine nane ndamkunjira nayo. Pa cheneichi ndicho ine nkhuromba kuti yindigowokerenge.”

¹⁹Elisha wakati kwa Naamani, “Rutanga makora.” Penepapo Naamani wakaruta. Naamani wakati wendapo mtunda uchoko waka,

²⁰Gehazi muteŵeti wa Elisha, munthu wa Chiuta wakati kwa iyomwene, “Sekuru wane wamureka Naamani muSiriya uyu kupokapo ivyo wangwiza navyo. Nkhurapira mwa FUMU yamoyo. Ine nditi ndimuchimbilire kuti nkhapokeko kanthu kufuma kwa iyo.”

²¹Ntheura Gehazi wakamurondezga Naamani. Sono Naamani wakati wamuwona Gehazi wakumuchimbilira, wakakhira kufuma pa gareta kuti wakumane nayo ndipo wakati, “Kasi kuli makora?”

²²Gehazi wakati, “Vyose vili makora.” Sekuru wane wandituma kuti, “Kumuphalirani imwe kuti ŵanyamata ŵaŵiri ŵa mpingo wa nchimi ŵiza kufuma ku charu cha mapiri gha Efurayimu. Sono ŵakuromba kuti muŵapeko ndarama za siliva wakukwana 3,000 ndiposo na vyakuvwara viŵiri vya nyengo ya pa dera.”

²³Ndipo Naamani wakati, “Pokererani na kufwasa ndarama za siliva zakukwana 6,000.” Ndipo Naamani wakamukoserezga Gehazi kuti watore ndarama zira ndipo wakaziŵika mu mathumba ghaŵiri ndiposo wakamupaso vyakuvwara viŵiri vya pa nyengo ya pa dera. Ndipo wakaŵayegheska ŵateŵeti ŵakhe ŵaŵiri ŵeneawo ŵakadangira panthazi Gehazi mweneuyo wakizanga mumanyuma.

²⁴Sono Gehazi wakati wafika ku phiri uko Elisha wakatora katundu yose kufuma kwa ŵateŵeti wa Naamani na kuŵika mu nyumba ndipo wakaŵawezga ŵateŵeti ŵara kuti ŵarutenge.

²⁵Pamanyuma wakaruta kwa sekuru wakhe Elisha ndipo wakati wanjira, wakiza kimilira panthazi pakhe, sono Elisha wakafumba wakati, “Gehazi, kasi wanguyankhu?” Iyo wakazgora wakati, “Muteŵeti winu warutapo kulikose chara.”

²⁶Sono Elisha wakatiso, “Kasi ukughanaghana kuti ndanguwona chara mu mzimu apo munthu yura wakhiranga pa gareta lakhe kuti wakumane nawe? Kasi iyi yingaŵa nyengo ya kupokerera ndarama na vyakuvwara, minda ya maolive na ya mpheska, mberere na ng'ombe, ŵateŵeti ŵanarume panji ŵateŵeti ŵanakazi?

²⁷Ntheura vyoni vya Naamani viti videmerere kwa iwe na ku ŵa mphapu yako kwa muyirayira.” Penepapo Gehazi wakafumapo panthazi pa Elisha uku wakoreka na vyoni ndipo wakaŵa waka tuu nga ndi thonje.