Read new_tumbuka_bible 2 Karonga 6 Bible Online

2 Karonga 6 - new_tumbuka_bible bible

2 Karonga 6

¹Zuŵa limoza mpingo wa nchimi uwo Elisha wakawurongozganga ukati kwa iyo, “Nga ndi umo mukuwonera malo agho tikukharamo pasi pa urongozgi winu ngachoko.

²Tatenge mutizomerezge kuti tirute ku mronga wa Yorodani mwakuti waliyose wa ise wakatemeko khuni limoza, kuti tizengere nyumba yakukharamo.” Ndipo Elisha wakati, “Rutaninge.”

³Ndipo yumoza wa nchimi wakati, “Kasi chingamukondweskani chara kuti murute pamoza na ŵateŵeti ŵinu.” Elisha wakati, “Nditi ndirute namwe.”

⁴Ntheura wakaruta nawo. Ŵakati ŵafika ku mronga wa Yorodani, ŵakamba kutema makuni.

⁵Ndipo apo yumoza wa nchimi wakatemanga khuni mbavi yikakhulika na kuwa mu maji. Penepapo wakalira wakati, “Mbaya mwe, sekuru wane! Yanguŵa yakubwereka.”

⁶Ndipo Elisha munthu wa Chiuta wakati, “Yawira mpha?” Sono wakati wamurongora apo yikawira, Elisha wakatema kakhuni na kuponya apo mbavi yikawira. Ntheura kakhuni kara kakayitumphuskira mbavi yira pachanya pa maji ndipo mbavi yikayenjama.

⁷Elisha wakati, “Yitore.” Penepapo nchimi yira iyo yikawiskira mbavi mu maji yikanyoroka woko lakhe na kuyitora.

⁸Zuŵa limoza apo karonga wa Siriya wakarwanga nkhondo na ŵaIsraele, wakadumbiskana na nduna zakhe ndipo wakati, “Ine nditi ndizenge misasa yane ya nkhondo pa malo ghakuti na ghakuti.”

⁹Kweni nchimi Elisha wakatuma mazgu kwa karonga wa Israele wakati, “Chenjerani, mungarutanga kufupi na malo ghara chara pakuti ŵaSiriya ŵaruta kwenekura kuya kamubisamirani.”

¹⁰Ntheura karonga wa Israele wakatuma mazgu ku ŵanthu ŵakhe, kuŵachenjezga za malo agho munthu wa Chiuta wakayowoya. Ntheura ndipo munthu wa Chiuta wakachenjezgeranga karonga mwakuti ŵakajiponoska nyengo zinandi.

¹¹Karonga wa Siriya wakasuzgika chomene mu mtima chifukwa cha chinthu ichi. Ntheura wakachema nduna zakhe ndipo wakazifumba wakati, “Mundiphalire, kasi ndi njani mukati mwa ise uyo wali pamoza na karonga wa Israele?”

¹²Ndipo yumoza wa nduna zakhe wakazgora wakati, “Palije na yumoza, mwe karonga sekuru wane, nchimi Elisha, ndiyo wakuphalira karonga wa Israele mazgu ghose agho mukuyowoya ku chipinda.”

¹³Penepapo karonga wakalangula wakati, “Rutani kuti mukamupenje uko wakukhara mwakuti nditume ŵanthu ŵakamukore.” Ndipo ŵanthu ŵakati ŵatumika ŵakiza kamuphalira kuti Elisha wakukhara ku Dotani.

¹⁴Penepapo karonga wakatumako mahachi na magareta pamoza na ŵasilikari ŵanandi. Iwo ŵakafika usiku na kuwuzinga msumba.

¹⁵Para muteŵeti wa munthu wa Chiuta wakawuka na kufumira kuwaro kwa nyumba ku mulenje chomene wakawona wumba ukuru wa ŵasilikari ŵaSiriya ŵali na mahachi na magareta ndipo wazingirizga msumba. Muteŵeti yura wakawerera kwa Elisha ndipo wakati, “Mbaya mwe! Sekuru wane, ka sono tichitengechi?”

¹⁶Elisha wakati, “Ungopanga chara pakuti awo ŵali pamoza na ise mbanandi chomene kuruska awo ŵali pamoza na iwo.”

¹⁷Penepapo Elisha wakaromba wakati, “Mwe FUMU nkhumurombani, kuti mujure maso gha muteŵeti uyu kuti wawone.” Sono FUMU yikajula maso gha muteŵeti yura ndipo wakawona kuti phiri likazura na mahachi pamoza na magareta gha moto ghanandi chomene ku phiri ndipo wazingirira malo ghose gha Elisha.

¹⁸Ndipo apo ŵaSiriya ŵakakhiranga kwiza kalimbana na Elisha kuti ŵamufinyikizge, Elisha wakarombanga kwa FUMU wakati, “Nkhumurombani imwe FUMU, ŵaburumutizgani maso ŵanthu aŵa.” Penepapo FUMU yikaburumutizga maso kwakuyana na lurombo lwa Elisha.

¹⁹Ndipo Elisha wakati ku ŵasilikari ŵara, “Nthowa kuti ndi iyi chara ndipo msumba nawo kuti ndi uwu chara. Rondezgani ine ndipo nditi ndimurongozgani munthu uyo mukupenja.” Ndipo wakaŵatorera ku msumba wa Samariya.

²⁰Ŵakati wanjira mu msumba wa Samariya, Elisha wakaromba wakati, “Mwe FUMU, julani maso gha ŵanthu aŵa mwakuti wawone.” Penepapo FUMU yikajula maso ghawo ndipo ŵakati ŵalaŵiska ŵakasanga kuti ŵali ku Samariya.

²¹Para karonga wa Israele wakaŵawona wakati kwa Elisha, “Ŵadada kasi ndiŵakome? Kasi ndiŵakome?”

²²Elisha wakazgora wakati, “Ungaŵakomanga chara. Kasi ungakoma uli ŵanthu awo undaŵakore ndiwe pakurwa nawo nkhondo kuŵa ŵazga ŵako? Iwe uŵape waka chakurya kuti ŵarye na maji kuti ŵamwe, ndipo pamanyuma ŵarutenge kwa sekuru wawo.”

²³Ntheura wakaŵanozgera chiphikiro chikuru chomene. Sono ŵakati ŵarya na kumwa wakaŵawezga kuti ŵarutenge. Ndipo ŵakaruta kwa sekuru wawo. Ntheura ŵaSiriya kuti ŵakizaso chara mu Israele kwiza kaskogha.

²⁴Pakati pajumphapo nyengo, Beni Hadadi karonga wa Siriya wakawunganya ŵasilikari ŵakhe wose ndipo ŵakiza na kuzingirizga msumba wa Samariya.

²⁵Ndipo pa nyengo iyo ŵakawuzingirizgira msumba wa Samariya, mukaŵa njara yikuru mu msumba mwakuti mutu wa mbunda ukagulikanga na ndarama za siliva zakukwana 80 ndipo matongonyoli 200 gha nkhunda ghakagulikanga ndarama zinkhonde za siliva.

²⁶Zuŵa limoza karonga wa Israele, apo wakendanga pachanya pa chiliŵa cha msumba, mwanakazi yunji wakachemerezga kwa iyo wakati, “Ndovwirani, Mwe karonga sekuru wane!”

²⁷Karonga wakazgora wakati, “Usange FUMU yikumovwirani chara, kasi ine ndingamovwirani uli?” Ine nane ndilije tirigu panji vinyo kuti ndimupani.

²⁸Ndipo karonga wakafumba mwanakazi yura wakati, “Suzgo yako chomene ndi vichi?” Iyo wakati, “Mwanakazi uyu wakandiphalira kuti, ‘Tora mwana wako kuti tirye muhanya uno, ndipo na machero na machero tizamkurya mwana wane.’

²⁹Ntheura tikaphika mwana wane ndipo tikarya. Sono na machero ghakhe nkhamuphalira nkhati, ‘Pereka mwana wako kuti tirye’ kweni iyo wakamubisa!”

³⁰Para karonga wakapulika mazgu gha mwanakazi yura wakakerula vyakuvwara vyakhe. Ndipo pakuti wakendanga pachanya pa chiliŵa ŵanthu ŵakamuwona kuti wavwara chigudulu.

³¹Karonga wakarapa, wakati, “Chiuta wandichitire chilichose ndipo kwakuruska wandikome ine usange mutu wa Elisha mwana wa Shafati undadumulikeko muhanya uno.”

³²Pa nyengo iyi Elisha wakaŵa pa nyumba yakhe pamoza na ŵararaŵarara ŵa Israele ŵeneawo ŵakakumananga nayo. Sono karonga wa Israele wakatuma nthumi kuya katora Elisha. Kweni pambere nthumi yira yikaŵa yindafike, Elisha wakati ku ŵararaŵarara ŵara, “Tegherezgani, munthu wa kukoma ŵanthu yura watuma munthu kuti wize kadumule mutu wane. Sono wonani, para nthumi yira yafika, mujare chijaro ndipo muchikhozge chomene nganganga. Asi mukupulika mudidi wa malundi gha sekuru wakhe uyo wakwiza pamanyuma pakhe?”

³³Ndipo apo Elisha wakaŵa wachali kuyowoya nawo, nthumi yira yikafika. Kwambula kuchedwa karonga nayo wakafika ndipo wakati kwa Elisha, “Suzgo ili lafumira kwa FUMU. Kasi nchifukwa uli ndirutilire kugomezga FUMU kuti yindovwirenge?”