Read new_tumbuka_bible 2 Karonga 7 Bible Online

2 Karonga 7 - new_tumbuka_bible bible

2 Karonga 7

¹Elisha wakazgora wakati, “Pulikani mazgu gha FUMU imwe karonga. FUMU yikuti, ‘Na machero pa nyengo yakuŵa nga ndi yeneyiyi, makilogiramu ghatatu gha ufu wakunyiririka ghamkugulika pa mtengo wa ndarama yimoza ya siliva ndipo makilogiramu ghankhonde na limoza gha nyauti ghamkugulika pa mtengo wa ndarama yimoza ya siliva ku chipata cha msumba wa Samariya.’ ”

²Ntheura murongozgi uyo karonga wakamugomezganga wakafumba Elisha munthu wa Chiuta wakati, “Nanga FUMU iyo yekha yingajula vidangazi vya vura, ichi chingachitika chara kuti mbewu yikule ndipo tikorore vuna yinandi.” Elisha wakamuzgora wakati, “Ichi uti uchiwonenge na maso ghako kweni iwe kuti wamkuryako vuna yakhe chara.”

³Pa nyengo yeneiyi pakaŵa ŵavyoni ŵanayi pa muryango wa chipata cha msumba ndipo ŵakati ku yumoza na munyakhe, “Kasi nchifukwa uli tikukhara waka pano kulindirira kufwa?

⁴Pakuti usange tingayowoya kuti tiyeni mu msumba, mu msumba muli njara ndipo tamkufwa nayo njara mwenemura. Usange tikuti tikhare mwenemuno tifwenge ndipera. Sono tiyeni ku misasa ya ŵaSiriya kuti tikajipereke. Usange ŵamkutireka tamkuŵa ŵamoyo, kweni usange ŵamkutikoma mbwenu ŵakatikomenge waka.”

⁵Sono ŵakawuka apo dazi likanjiranga waka, ndipo ŵakaruta ku misasa ya ŵaSiriya. Kweni apo wakafikanga mu mphepete mwa misasa ya ŵaSiriya, ŵakasanga kuti kulije munthu nanga njumoza mu misasa.

⁶Ichi chikaŵa ntheura chifukwa FUMU yikajula makutu gha ŵaSiriya kuti ŵapulike mphomo ya magareta na ya mahachi ndiposo na ya chiwuru chikuru cha ŵasilikari. Ntheura wakati ku yumoza na munyakhe, “Tegherezgani karonga wa Israele walemba ganyu ŵakaronga ŵa ŵaHiti na ŵaEguputo kuti ŵizakarwe nase nkhondo.”

⁷Ntheura ŵakawuka, ŵakachimbira nyengo iyo dazi likanjiranga waka ndipo ŵakasida mahema ghawo, mahachi ghawo ndiposo na mbunda zawo, ŵakawureka msasa nga ndi umo ukaŵira ndipo ŵakachimbira kuti ŵathaske maumoyo ghawo.

⁸Sono ŵavyoni ŵanayi ŵara ŵakati ŵafika mu mphepete mwa misasa, ŵakanjira mu hema limoza. Mwenemura ŵakarya na kumwa na kutoramo ndarama za siliva na za golide na vyakuvwara, ndipo ŵakaruta na kuya kavibisa. Ŵakaya kaweraso na kunjira mu hema linyakhe, ndipo ŵakatoramo na kuyegha vinthu vinyakhe ndipo ŵakaruta kuya kavibisa.

⁹Pamanyuma ŵavyoni ŵara ŵakayowoyeskanaso ŵakati, “Kuti tikuchita makora chara. Zuŵa ili ndi zuŵa la uthenga uweme usange tikukhara waka chete mpaka macherochero, tingamanya kuya kalangika. Ntheura sono tiyeni tikaphare chinthu ichi ku nyumba ya ufumu.”

¹⁰Ntheura ŵakiza na kuchema awo ŵakalindanga pa chipata cha msumba na kuŵaphalira kuti, “Tanguruta ku misasa ya ŵaSiriya, ndipo tangusangako munthu chara panji nesi kupulikako mudidi wa munthu chara kweni tangusanga mahachi na mbunda za kukakika pera ndiposo na mahema.”

¹¹Penepapo ŵalinda ŵa pa chipata ŵakachemerezga ndipo uthenga ukaŵafika awo ŵakakharanga ku nyumba ya ufumu.

¹²Karonga wakawuka mu usiku wenewura ndipo wakati ku nduna zakhe, “Rekani ndimuphalirani icho ŵaSiriya ŵanozgera kutichitira ise. Iwo ŵakumanya kuti ise tili na njara, ntheura ndicho chifukwa ŵawukiramo mu misasa kuya kabisama mu thondo apo ŵakughanaghana kuti ise titi tifumire kuwaro kwa msumba, watikore ŵamoyo ndipo iwo wanjirenge mu msumba.”

¹³Yumoza wa nduna zakhe wakati, “ŴaIsraele awo ŵali muno mu msumba mbakufwa kale nga ndi ŵanyawo awo ŵati ŵarute pa mahachi ghawo agho ghakharako kuya kawona na kusanga icho chachitika.”

¹⁴Ntheura ŵakasankha ŵanthu ndipo karonga wakaŵatuma mu magareta ghaŵiri na mazgu gha kuti ŵarute ndipo ŵakasange icho chachitika ku ŵasilikari ŵaSiriya.

¹⁵Ŵanthu ŵara ŵakarondezga mpaka ŵakaya kafika ku mronga wa Yorodani. Ndipo mu nthowa yose mukaŵa vyakuvwara na vya mahomwa ivyo ŵaSiriya ŵakatayanga apo ŵakachimbiranga. Penepapo nthumi zira zikawerako ndipo zikiza kamuphalira karonga.

¹⁶Ntheura ŵanthu ŵa mu Samariya ŵakafumira kuwaro ndipo ŵakaya kaskogha vyose ivyo vikaŵa mu misasa ya ŵaSiriya. Ntheura makilogiramu ghatatu gha ufu wakunyiririka ghakagulikanga na ndarama yimoza ya siliva ndipo makilogiramu ghankhonde na limoza gha nyauti ghakagulikanga ndarama yimoza ya siliva. Ichi chikachitika nga ndi umo FUMU yikayowoyera.

¹⁷Sono para ivi vikachitikanga, karonga wakaŵika pa chipata cha msumba nduna yakhe iyo wakayigomezganga kuti ndiyo yirondenge pa chipata. Ŵanthu ŵakayikandira pasi pa chipata, yikafwa nga ndi umo Elisha munthu wa Chiuta wakayowoyera para karonga wakaruta ku nyumba yakhe.

¹⁸Ichi chikachitika nga ndi umo Elisha munthu wa Chiuta wakayowoyera kwa karonga kuti, “Na machero, na nyengo yakuŵa nga ndi yeneiyi, makilogiramu ghatatu gha ufu na makilogiramu ghankhonde na limoza gha nyauti ghamkugulika na ndarama yimoza ya siliva pa chipata cha msumba wa Samariya.”

¹⁹Pa chinthu cheneichi nduna ya karonga wa Israele yikachisuska pakuyowoya kwa munthu wa Chiuta kuti, “Tegherezgani nanga FUMU iyo yekha yingajula vidangazi vya vura kufuma kuchanya, ichi kuti chingachitika chara.” Ndipo munthu wa Chiuta wakazgora kuti, “Ichi uti uchiwonenge na maso ghako kweni iwe kuti uryengeko vuna yakhe chara.”

²⁰Ndipo ichi ndicho chikachitika nadi kwa iyo. Ŵanthu ŵakamukandira pasi apo wakaŵa pa chipata ndipo wakafwira penepapo.