Read new_tumbuka_bible 2 Karonga 9 Bible Online

2 Karonga 9 - new_tumbuka_bible bible

2 Karonga 9

¹Nchimi Elisha wakachema yumoza wa nchimi za chiwukirano ndipo wakati kwa iyo, “Vwara malaya ghako na kujikaka lamba. Utore supa iyi ya mafuta urute ku Ramoti Gileyadi.

²Ndipo para wakafika, ukamupenje Yehu mwana wa Yehoshafati muzukuru wa Nimishi. Ndipo ukanjire na kuya kamutora mukati mu ŵana ŵanyakhe ndipo ukarute nayo ku chipinda cha mukati.

³Mwenemura ukatore supa ya mafuta na kupungulira pa mutu wakhe ndipo ukati, ‘FUMU yikuti nkhukuphakazga kuti uŵe karonga wa Israele. Penepapo ukafumenge mu chipinda chira na kuchimbira. Ungaya kachedwanga chara.’ ”

⁴Ntheura nchimi ya chiwukirano yira yikaruta ku Ramoti Gileyadi.

⁵Ndipo nchimi yira yikati yafika yikasanga ŵarongozgi ŵa nkhondo ŵakhara pamoza ŵali na ungano. Ndamupukwani imwe ŵarongozgi, ndili na uthenga winu. Yehu wakafumba wakati, “Kasi chomene wapukwa njani pakati pa ise?” Ndipo wakati, “Ndapukwa imwe murongozgi.”

⁶Penepapo Yehu wakawuka na kunjira mu nyumba. Ndipo nchimi yira yikapungulira mafuta pa mutu wakhe uku wakuti, “FUMU, Chiuta wa Israele wakuti, ‘Nkhukuphakazga iwe kuti uŵe karonga wa ŵanthu ŵane ŵaIsraele.

⁷Iwe ukwenera kumara mbumba yose ya sekuru wako Ahabu. Ine nkhukhumba kuti ndiwezgere nduzga pa Yezebele chifukwa cha chakukoma nchimi zane na ŵateŵeti wose ŵa FUMU.

⁸Mbumba yose ya Ahabu nkhukhumba kuti yimare petu. Mwana mwanarume yose wa Ahabu wakwenera kufwa muIsraele manyi ndi mwanangwa panji muzga.

⁹Ndipo nditi ndiyizgore mbumba ya Ahabu kuŵa nga ndi mbumba ya Yerobowamu mwana wa Nebati ndiposo kuŵa nga ndi mbumba ya Baasha mwana wa Ahiya.

¹⁰Ndipo kuŵe nga ndi Yezebele, ncheŵe ndizo zamkurya thupi lakhe pa munda wa Yezireyele ndipo kwamkuŵavye na yumoza uyo wamkumusunga mu dindi.’ ” Nchimi ya chiwukirano yira yikati yayowoya mazgu ghara, wakajulako chijaro wakafuma na kuchimbira.

¹¹Para Yehu wakafuma kuruta ku ŵateŵeti ŵa sekuru wakhe, yumoza wa iwo wakamufumba wakati, “Kasi vyose vili makora? Munthu wakufuntha yura wangupukwa vichi kwa imwe?” Yehu wakazgora wakati, “Namwe mukumanya waka munthu yura na ivyo wakuyowoya.”

¹²Iwo ŵakati, “Uwo kuti mbunenesko chara. Iwe tiphalira icho wayowoya kwa iwe.” Ndipo Yehu wakati, “Munthu uyu wanguti, ‘Fumu yikuti nkhukukuphakazga mafuta kuti uŵe karonga wa Israele.’ ”

¹³Ntheura wose kwambula kuchedwa ŵakavura malaya ghawo na kughatandika pasi pa makwerero gha nyumba kuti wendepo. Ndipo ŵakalizga zimbata na kuchemerezga kuti, “Yehu ndiyo karonga!”

¹⁴Penepapo Yehu mwana wa Yehoshafati muzukuru wa Nimishi wakamuchitira chiŵembu Yoramu. Pa nyengo iyi Yoramu na ŵanthu wose ŵaIsraele ŵakavikiriranga Ramoti Gileyadi kufuma kwa Hazayele karonga wa charu cha Siriya.

¹⁵Kweni Karonga Yoramu wakaŵa wawerera ku msumba wa Yezireyele kweneuko wakarwaranga ku vilonda ivyo ŵaSiriya ŵakamupweteka pakurwa nkhondo na Hazayele karonga wa Siriya. Ntheura Yehu wakati, “Usange ichi ndicho mukukhumba paŵavye munthu na yumoza wafume mu msumba muno kuya kaphara uthenga uwu mu msumba wa Yezireyele.”

¹⁶Penepapo Yehu wakakwera gareta lakhe ndipo wakaruta ku msumba wa Yezireyele chifukwa Yoramu wakarwaliranga kwenekura ndipo Ahaziya, karonga wa Yuda wakaruta kwenekura kuti wakamuwone.

¹⁷Para mulinda uyo wakimiliranga pachanya pa chigongwe cha msumba wa Yezireyele wakawona chiwuru cha ŵasilikari ŵa Yehu kuti ŵakwiza, wakachemerezga wakati, “Nkhuwona chiwuru cha ŵasilikari!” Sono Yoramu wakati, “Tuma munthu pa hachi kuti warute wakakumane nawo ndipo wakafumbe kuti kasi wizira mutende?”

¹⁸Munthu uyo wakakwera pa hachi wakaruta kuya kakumana na Yehu ndipo wakati, “Karonga wandituma kuti ndifumbe kuti kasi mwizira mutende?” Ndipo Yehu wakazgora wakati, “Kasi iwe mutende uli nawo na nchito uli? Iwe zanga waka kunyuma kwane undirondezgenge.” Mulinda yura wakawona ndipo wakaphara kuti nthumi yira yafika, ya ŵasanga, kweni yikwizako chara.

¹⁹Penepapo Yoramu wakatuma munthu munyakhe wa chiŵiri kuti nayo warute pa hachi. Para munthu yura wakafika wakati, “Karonga wandituma kuti ndifumbe kuti kasi mwizira mutende?” Yehu wakazgora wakati, “Kasi iwe mutende uli nawo na nchito uli? Iwe zanga waka kunyuma kwane undirondezgenge. Iwe zanga.”

²⁰Mulinda yura wakawonanga ndipo wakapharaso kuti nthumi yira yafika kweni wakwizako chara. Kweni kachimbiliro ka murongozgi wa chiwuru ichi kakuŵa nga nkha Yehu mwana wa Nimishi pakuti wakwendeska hachi nga ngwa kufuntha.

²¹Penepapo Yoramu wakalangula wakati, “Kakani gareta lane.” Ndipo ŵakati ŵakaka gareta lakhe iyo Yoramu, karonga wa Israele na Ahaziya, karonga wa Yuda ŵakakwera pa magareta ghawo kuti ŵakakumane na Yehu. Wakakumana nawo Yehu pa munda uwo ukaŵa wa Naboti muYezireyele.

²²Para Yoramu wakamuwona Yehu wakafumba wakati, “Kasi mwizira mutende Yehu?” Yehu wakazgora wakati, “Kasi kungaŵa uli mutende, apo kusopa vikozgo ndiposo ufwiti, ivyo nyoko Yezebele wakambiska, vichali kurutilira?”

²³Ndipo Yoramu wakuzgoka uku wakuyowoya kwa Ahaziya wakuti, “Nchigaruka Ahaziya, tiye tichimbire.” Sono uku Yoramu wakurazgirako msana

²⁴Yehu wakakweŵa uta wakhe na nkhongono zose, ndipo wakamulasa Yoramu pakatikati pa viŵegha, mwakuti muvwi ukaya kalasa mtima wa Yoramu ndipo wakakoŵetekera mu gareta lakhe na kufwa.

²⁵Yehu wakati kwa Bidikara murongozgi wakhe wa magareta, “Tora thupi la Yoramu, ulitaye mu munda wa Naboti muYezireyele. Kumbuka umo iwe na ine tikakwereranga pamoza magareta kwenda kunyuma kwa wiske Ahabu. Kumbuka umo FUMU yikayowoyera mazgu kumususka kuti,

²⁶‘Chifukwa cha ndopa za Naboti na ŵana ŵakhe izo nkhaziwona mayiro, nkhurapa kuti nditi ndiwezgere nduzga pa munda weneuwu.’ Ntheura sono tora thupi lakhe ndipo uliponye pa munda weneuwu uwu kwakuyana na mazgu gha FUMU.”

²⁷Para Ahaziya, karonga wa Yuda wakawona icho chikachitika, wakachimbira kurazga ku nthowa yakuya ku msumba wa Beti Hagani. Kweni Yehu wakamuchimbilira ndipo wakachemerezga ku ŵanthu ŵakhe kuti, “Nayo mukomani.” Ntheura ŵakamulasa na kumupweteka apo wakakweranga chikwera cha Guru pafupi na Ibileyamu. Kweni wakafwira penepara chara wakachimbilira ku Megido uko wakaya kafwira.

²⁸Ŵateŵeti ŵakhe ŵakatora thupi lakhe mu gareta ndipo wakaruta nayo ku Yerusalemu, ndipo ŵakaya kamusunga mu dindi lakhe mu msumba wa Davide pamoza na ŵawiskekuru.

²⁹Ahaziya wakamba kuwusa mu charu cha Yuda mu chirimika cha 11 cha muwuso wa Yoramu mwana wa Ahabu.

³⁰Penepapo Yehu wakaruta ku Yezireyele, para Yezebele wakapulika icho chikachitika na kuti Yehu wafika wakaphakazga chisko chakhe na vinthu vinyakhe kuti wajibise ndipo wakalitozga sisi lakhe. Ntheura wakiza pa chidangazi na kulaŵiska kuwaro.

³¹Apo Yehu wakanjiliranga pa chipata, Yezebele wakafumba wakati, “Kasi wizira mutende, Zimuri iwe, chigeŵenga icho chikakoma sekuru wakhe?”

³²Ndipo Yehu wakinuskira maso ghakhe ku chidangazi ndipo wakafumba wakati, “Kasi ndinjani uyo wali pamoza nane? Kasi ndinjani?” Penepapo nthunguli ziŵiri panji zitatu zikalaŵiska kwa iyo.

³³Ndipo Yehu wakati kwa izo, “Muponyani pasi mwanakazi uyo.” Ntheura nthunguli zira zikamuponyera pasi, ndipo ndopa zakhe zinyakhe zikamijikira mu chimati na ku mahachi, ndiposo mahachi ghakakandangapo pa iyo.

³⁴Penepapo Yehu wakanjira mu nyumba ya ufumu ndipo wakaya karya na kumwa mwenemura. Pamanyuma wakayowoya wakati, “Rutani kamutorani mwanakazi wakutembeka yura ndipo mukamusunge, pakuti wakaŵa mwana wa karonga.”

³⁵Kweni nyengo iyo ŵakarutiranga kuti wakatore thupi lakhe kuya kalisunga, wakasangako kalikose chara kweni bwaza, malundi na vikufi vya mawoko ghakhe pera.

³⁶Para ŵanthu ŵara wakati ŵawerako na kumuphalira Yehu, iyo wakati, “Ichi ndicho FUMU yikayowoya kuti chiŵengeko apo wakayowoyera mu muteŵeti wakhe Eliya mwana wa Tishibe kuti, ‘Ncheŵe ndizo ziti ziryenge thupi la Yezebele mu munda wa msumba wa Yezireyele.

³⁷Ndipo chitanda cha Yezebele chamkuŵa nga ndi ulongwe mu munda wa Yezireyele mwakuti pamkuŵavye na yumoza uyo wamkuyowoya kuti uyu ndi Yezebele.’ ”