Read new_tumbuka_bible 1 Midauko 11 Bible Online

1 Midauko 11 - new_tumbuka_bible bible

1 Midauko 11

¹Penepapo ŵaIsraele wose ŵakawungana pamoza kwa Davide ku Heburoni, ndipo ŵakati kwa iyo, “Ise na imwe tili ŵa ndopa zimoza.

²Mu nyengo za kumanyuma, nanga ndi para Sauli wakaŵa karonga, imwe ndimwe mukarongozga ŵaIsraele kuya karwa nkhondo na kuweraso nawo. FUMU, Chiuta winu wakati kwa imwe, ‘Iwe ndiwe uti uliskenge ŵanthu ŵane ŵaIsraele ndipo uti uŵenge karonga wa ŵanthu ŵane ŵaIsraele.’ ”

³Ntheura ŵarongozgi wose ŵa ŵaIsraele ŵakiza kwa karonga ku msumba wa Heburoni. Penepapo Karonga Davide wakachita nawo phangano panthazi pa FUMU. Pamanyuma ŵarongozgi ŵara ŵakamuphakazga mafuta kuŵa karonga wa Israele, kwakuyana na mazgu gha FUMU agho Samuele wakayowoya.

⁴Sono Davide pamoza na ŵasilikari wose ŵa ŵaIsraele ŵakaruta kuya karwa nkhondo ku msumba wa Yerusalemu, uwo ukachemekangaso kuti Yebusi uko kukakharanga ŵaYebusi ŵeneawo ŵakaŵa ŵenekaya mu charu chira.

⁵ŴaYebusi wakati kwa Davide, “Iwe kuti unjirengemo muno chara.” Ndipouli Davide wakapoka linga la Ziyoni ndipo wakalichema kuti, “Msumba wa Davide.”

⁶Davide wakati, “Munthu uyo wati wadange kukoma ŵaYebusi ndiyo wati waŵenge murongozgi murara wa ŵasilikari.” Penepapo Yowabu mwana wa Zeruya ndiyo wakadanga kuruta. Ntheura wakimikika kuŵa murongozgi murara.

⁷Davide wakakharanga mu linga lira. Ntheura wakalichema kuti, “Msumba wa Davide.”

⁸Iyo wakazenga msumba zingirizge kufuma ku Milo. Yowabu wakanozgaso vigaŵa vinyakhe vya msumba.

⁹Davide wakakulirakulira mu nkhongono chifukwa FUMU Mwenenkhongono zose wakaŵa nayo.

¹⁰Aŵa ndiwo ŵakaŵa ŵarongozgi mu vinkhara vya Davide, ŵeneawo ŵakamovwira chomene mu ufumu wakhe pamoza na ŵaIsraele wose kuti ŵamwimike kuŵa karonga, kwakuyana na mazgu gha FUMU pakuyowoya vya Israele.

¹¹Ndondomeko ya kuphara za vinkhara vya Davide, ndi iyi: Yashobeyamu, muHakimoni, ndiyo wakaŵa murongozgi pa ŵanyakhe ŵatatu. Iyo na mukondo wakhe wakakoma ŵanthu 300 pa nyengo yimoza pera.

¹²Uyo wakarondezgapo mukati mu vinkhara vitatu vira wakaŵa Eleyazara mwana wa Dodo muAhohi.

¹³Iyo wakaŵa pamoza na Davide ku Pasi Damimu, para ŵaFilisiti ŵakawungana pa malo ghara kuti ŵarwe nawo. Kwenekura kukaŵa kamunda ka nyauti ndipo ŵaIsraele ŵakachimbira ku ŵaFilisiti.

¹⁴Kweni Eleyazara na ŵanyakhe ŵakimilira nganganga mukati mu kamunda kara na kukathaska ndipo wakaŵakoma ŵaFilisiti. Mwa ntheura FUMU yikaŵathaska na kuvivya kukuru.

¹⁵Zuŵa limoza ŵatatu mwa ŵarongozgi 30 ŵara ŵakaruta kwa Davide pa jarawe ku mphanji ya Adulamu, para ŵa nkhondo ŵa ŵaFilisiti ŵakazenga misasa yawo mu chidika cha Refayimu.

¹⁶Pa nyengo iyo Davide wakaŵa mu linga ndipo mpingo wa ŵa nkhondo ya ŵaFilisiti ukaŵa mu Betelehemu.

¹⁷Na kunweka kukuru Davide wakati, “Mbaya mwe waŵengeko munthu mphanyi waruta kuya kanditorera maji ghakumwa pa chisimi cha ku Betelehemu icho chili pafupi na chipata.”

¹⁸Penepapo vinkhara vitatu vikaya kanjira mu msasa wa ŵaFilisiti. Vikateka maji pa chisimi cha mu msumba wa Betelehemu icho chikaŵa pafupi na chipata na kwiza nagho kwa Davide. Kweni Davide kuti wakakhumba chara kumwapo. Wakaghathira waka nga ndi sembe kwa FUMU.

¹⁹Iyo wakati, “Chiŵenge kutali nane panthazi pa Chiuta wane kuti ndichite ichi. Kasi ndimwenge ndopa za umoyo wa ŵanthu aŵa? Pakuti ŵanguŵika umoyo wawo mu urwani pakuya katora maji agha.” Ntheura kuti wakakhumba kumwa chara. Vinthu ivi ndivyo vikachita vinkhara vitatu vira.

²⁰Sono Abishayi mwana munyakhe na Yowabu ndiyo wakaŵa murongozgi wa ŵanthu ŵara 30. Wakarwa na mukondo wakhe na kukoma ŵanthu 300. Ntheura wakamanyikwa chomene pa dera pa vinkhara vitatu vira.

²¹Iyo ndiyo wakamanyikwa chomene kwa kuruska ŵanthu wose ŵara 30 ndipo ŵakazgoka kuŵa murongozgi wawo. Kweni iyo kuti wakafikapo pa vinkhara vitatu vira chara.

²²Benaya mwana wa Yehoyada wa ku msumba wa Kabizeyele wakaŵa munthu wa chikanga ndipo wakachita milomo yikuru. Uyu ndiyo wakakoma vinkhara viŵiri vya mu charu cha Mowabu, ndiposo wakakhilira mu chibuwu na kukoma nkharamu pa zuŵa ilo kukaŵa chiwuvi.

²³Ndiposo ndiyo wakakoma muEguputo, chimunthu chikuru na chitali cheneicho utali wakhe chikaŵa pafupi mamita ghaŵiri na hafu. MuEguputo yura wakakorera mukondo weneuwo ukaŵa nga ndi muchiko wa chakurukira salu. Kweni Benaya wakaruta kwa iyo na ndodo ndipo wakakwapura mukondo mu woko la muEguputo yura na kumukoma nawo mwenecho wa mukondo.

²⁴Vinthu ivi ndivyo wakachita Benaya mwana wa Yehoyada ndipo wakaŵa wakumanyikwa chomene pa dera pa vinkhara vitatu vira.

²⁵Wakaŵa wakumanyikwa mukati mu ŵanthu 30 ŵara kweni kuti wakafikapo pa vinkhara vitatu vira chara. Ndipo Davide wakamwimika kuŵa murongozgi wa ŵavikiriri ŵakhe.

²⁶Vinkhara ivyo vikaŵa mu viwuru vya ŵasilikari vikaŵa ivi: Asahele mwana munyakhe na Yowabu Elihanani mwana wa Dodo wa mu msumba wa Betelehemu

²⁷Shamoti wa ku Harodi, Helezi muPeloni,

²⁸Ira mwana wa Ikeshi, wa ku Tekowa Abiyezere wa ku Anatoti,

²⁹Sibekayi muHusha, Ilayi muAhohi,

³⁰Maharayi wa ku Netofa, Heledi mwana wa Baana wa ku Netofa,

³¹Itayi mwana wa Ribayi wa ku chigaŵa cha Gibeya icho ncha ŵaBenjamini, Benaya wa ku Piratoni,

³²Hurayi wa ku mironga ya ku Gaashi, Abiyele muAribati,

³³Azimaveti wa ku Baharumu Eliyaba wa ku Shaaliboni

³⁴Hashemu muGizoni, Yonatani mwana wa Shage muHarara,

³⁵Ahiyamu mwana wa Sakara muHarara, Elifala mwana wa Uru,

³⁶Hefere muMekerati, Ahiya muPeloni,

³⁷Heziro wa ku Karimele, Naarayi mwana wa Ezibayi,

³⁸Yoyele mwana munyakhe na Natani, Mibihara mwana wa Hagiri,

³⁹Zeleki muAmoni, Naharayi wa ku Beyeroti, mweneuyo wakayeghanga mahomwa gha Yowabu mwana wa Zeruya,

⁴⁰Ira muItiri, Garebu muItiri,

⁴¹Uriya muHiti, Zabadi mwana wa Ahilayi,

⁴²Adina mwana wa Shiza, muRubeni, murongozgi wa ŵaRubeni pamoza na ŵanthu 30,

⁴³Hanani mwana wa Maaka, na Yoshafati muMitini,

⁴⁴Uziya muAshiterati, Shama na Yeyiyele ŵana ŵa Hotamu, muAroyere,

⁴⁵Yediyayele mwana wa Shimuri, na Yoha mwana munyakhe, muTizi,

⁴⁶Eliyele muMahavi, na Yeribayi na Yoshaviya, ŵana ŵa Elinaamu, na Itima muMowabu,

⁴⁷Eliyele, Obedi na Yaasiyele muMezoba.