Read new_tumbuka_bible 1 Midauko 13 Bible Online

1 Midauko 13 - new_tumbuka_bible bible

1 Midauko 13

¹Davide wakafumba mahara kwa ŵarongozgi ŵa ŵasilikari 1,000, kwa ŵarongozgi ŵa ŵasilikari 100 ndiposo kwa murongozgi waliyose.

²Sono Davide wakati ku ungano wose wa ŵaIsraele, “Usange chamuwirani chiweme, ndipo usange ndi khumbo la FUMU, Chiuta withu, tiyeni titumizge mazgu ku ŵabali ŵithu wose awo ŵakukhara mu charu chose cha Israele ndiposo ku ŵasofi na ku ŵaLevi mu misumba iyo yili na maluhari, mwakuti ŵazakawungane kwa ise kuno.

³Pamanyuma tiyeni tizeso nalo Bokosi la Phangano la Chiuta withu, pakuti mu mazuŵa gha Sauli tikalireka waka.”

⁴Ungano wose ukazomera kuchita chinthu ichi chifukwa ŵanthu wose ŵakawona kuti chinthu ichi nchiweme.

⁵Ntheura Davide wakawunganya ŵaIsraele wose kufuma ku mronga wa Shihoro ku Eguputo mpaka ku unjiliro wa Hamati, kuti ŵize nalo Bokosi la Phangano la Chiuta kufuma nalo ku Kiriyati Yeyarimu.

⁶Ndipo Davide na ŵaIsraele wose ŵakakwera kuruta ku msumba wa Baala, ndiko kuti Kiriyati Yeyarimu mu chigaŵa cha Yuda, kuya kayegha Bokosi la Phangano la Chiuta. Bokosi ili liri na zina la FUMU yeneiyo yikukhara pa ŵakerubi nga mpha chizumbe.

⁷Bokosi la Phangano la Chiuta lira ŵakaliyeghera pa gareta liphya kufuma ku mbumba ya Abinadabu. Uza na Ahiyo ndiwo ŵakendeskanga gareta.

⁸Davide na ŵaIsraele wose ŵakakondwera chomene pakuchindika Chiuta. Ŵakimbanga sumu na ŵabango, viding'indi, ŵakalimba, visulo vyakulira na zimbata.

⁹Sono para ŵakafika pa luwugha lwa Kidoni, Uza wakanyoroska woko lakhe kuti wakore Bokosi la Phangano la Chiuta pakuti nkhambako zikakhuŵara.

¹⁰Penepapo FUMU yikamukwiyira Uza. Ntheura yikamukoma chifukwa wakakora Bokosi lira. Iyo wakafwira penepapo panthazi pa Chiuta.

¹¹Davide wakakaripa chifukwa FUMU yikamukoma Uza. Malo ghara ghakuchemeka Perezi Uza mpaka sono.

¹²Davide wakachita wofi pa zuŵa lira ndipo wakati, “Kasi ndingiza nalo uli Bokosi la Phangano la Chiuta ku kwithu.”

¹³Mwa ntheura kuti wakaruta nalo Bokosi lira ku kwakhe ku msumba wa Davide chara, kweni wakapatuka nalo kulitorera ku mbumba ya Obedi Edomu muGiti.

¹⁴Ndipo Bokosi la Phangano la Chiuta likakhara na Obedi Edomu mu nyumba yakhe myezi yitatu. Ndipo FUMU yikatumbika mbumba ya Obedi Edomu na vyose ivyo wakaŵa navyo.