Read new_tumbuka_bible 1 Midauko 15 Bible Online

1 Midauko 15 - new_tumbuka_bible bible

1 Midauko 15

¹Davide wakajizengera zinyumba mu msumba wa Davide.[8] Iyo wakanozga malo pakuŵika Bokosi la Phangano la Chiuta ndipo wakajintha hema la kuŵikamo Bokosi lira.

²Sono Davide wakati, “ŴaLevi pera ndiwo ŵati ŵayeghe Bokosi la Phangano la Chiuta, munthu munyakhe chara, pakuti iwo ndiwo FUMU yikaŵasora kuti ŵayeghenge Bokosi lira ndiposo na kuyiteŵetera iyo kwa muyirayira.”

³Davide wakawunganya ŵaIsraele wose ku Yerusalemu, kuti ŵakatore Bokosi la FUMU lira na kuliŵika mu malo agho ŵakalinozgera.

⁴Ndipo Davide wakawunganya pamoza ŵa mphapu ya Aroni na ŵaLevi ŵanyakhe.

⁵Mu ŵana ŵa Kohati, Uriyele ndiyo wakaŵa murongozgi wawo. Iyo na ŵabali ŵakhe wose ŵakaŵapo 20.

⁶Mu ŵana ŵa Merari, Asaya ndiyo wakaŵa murongozgi wawo ndipo iyo na ŵabali ŵakhe, wose ŵakaŵapo 220.

⁷Mu ŵana ŵa Gerishomu, Yoyele ndiyo wakaŵa murongozgi wawo. Iyo na ŵabali ŵakhe wose ŵakaŵapo 130.

⁸Mu ŵana ŵa Elizafani Shemaya ndiyo wakaŵa murongozgi wawo. Iyo na ŵabali ŵakhe, wose ŵakaŵapo 200.

⁹Mu ŵana ŵa Heburoni, Eliyele ndiyo wakaŵa murongozgi wawo. Iyo na ŵabali ŵakhe wose ŵakaŵapo 80.

¹⁰Mu ŵana ŵa Uziyele, Aminadabu ndiyo wakaŵa murongozgi wawo. Iyo na ŵabali ŵakhe, wose ŵakaŵa 112.

¹¹Ndipo Davide wakachema ŵasofi aŵa Zadoki na Abiyatara ndiposo na ŵaLevi aŵa, Uriyele, Asaya, Yoyele, Shemaya, Eliyele na Aminadabu.

¹²Wakaŵaphalira wakati, “Imwe ndimwe ŵarara mu nyumba za ŵawiskemwekuru mu ŵaLevi. Jipatuliskani, imwe na ŵabali ŵinu kuti mukatore Bokosi la Phangano la FUMU, Chiuta wa Israele ndipo mwizakaliŵike mu malo agho ndalinozgera.

¹³Chifukwa mukareka kuyegha pakudanga para, ntheura ukari wa FUMU, Chiuta withu ukiza pa ise, pakuti tikareka kulipwererera nga ndi umo kukenerera.”

¹⁴Ntheura ŵasofi na ŵaLevi ŵakajipatuliska kuti ŵakatore Bokosi la Phangano la FUMU, Chiuta wa Israele.

¹⁵Ndipo ŵaLevi ŵakayegha Bokosi lira na michiko pa viŵegha vyawo, nga ndi umo Mozesi wakalangulira kwakuyana na mazgu gha FUMU.

¹⁶Pamanyuma pakhe Davide wakalangula ŵarongozgi ŵa ŵaLevi kwimika ŵabali ŵawo kuti ŵaŵe ŵakwimba sumu za chimwemwe pa kwimbira na viding'indi, ŵabango na visulo vyakulira.

¹⁷Ntheura ŵaLevi ŵakimika Hemani, mwana wa Yoyele. Mu ŵabali ŵakhe ŵakimika Asafu mwana wa Berekiya. Mu ŵaMerari, ŵabali ŵawo, ŵakimika Etani mwana wa Kushaya.

¹⁸Pamoza na iwo ŵabali ŵawo awo ŵakarondezgapo ŵakaŵa Zakariya, Beni, Yaaziyele, Shemiramoti, Yehiyele, Uni, Eliyabu, Benaya, Maaseya, Matitiya, Elifelehu na Mikineya, ndiposo na ŵalinda ŵa pa muryango, Obedi Edomu na Yeyiyele.

¹⁹Pa ŵanthu ŵakwimba ŵara, Hemani, Asafu na Etani ndiwo ŵakalizganga visulo vyakulira vya mkuŵa.

²⁰Zakariya, Aziyele, Shemiramoti, Yehiyele, Uni, Eliyabu, Maaseya, na Benaya ndiwo ŵakaŵa ŵakulizga viding'indi vyakwimba mazgu gha pachanya.

²¹Kweni Matitiya, Elifelehu, Mikineya, Obedi Edomu, Yeyiyele, na Azaziya ndiwo ŵakarongozganga kwimba na ŵabango kwakuyana na kimbiro ka mazgu gha pasi.

²²Kananiya murongozgi wa ŵaLevi mu kwimba ndiyo wakarongozganga kwimba, chifukwa wakaŵa nkhwantha.

²³Berekiya na Elikana ndiwo ŵakimikika kuŵa ŵalinda pa muryango wakuyira ku Bokosi la Phangano la FUMU.

²⁴Ndipo ŵasofi aŵa Shebaniya, Yoshafati, Netanele, Amasayi, Zakariya, Benaya na Eliyezere ŵakimikika kuti ŵalizgenge zimbata panthazi pa Bokosi la Phangano la Chiuta. Obedi Edomu na Yehiya nawoso ŵakaŵa ŵalinda ŵa pa muryango wa ku Bokosi la Phangano la Chiuta.

²⁵Ntheura Davide pamoza na ŵarara ŵa ŵaIsraele ndiposo na ŵarongozgi ŵa nkhondo ŵa pa vikwi, ŵakaruta na chimwemwe kuya katora Bokosi la Phangano la FUMU ku nyumba ya Obedi Edomu.

²⁶Pakuti Chiuta wakawovwira ŵaLevi awo ŵakayeghanga Bokosi la Phangano la FUMU, ŵanthu ŵara ŵakapereka sembe nkhambako zinkhonde na ziŵiri na mberere zanarume zinkhonde na ziŵiri.

²⁷Davide wakavwara munjilira uweme wa bafuta nga ndi umo ŵakavwalira ŵaLevi wose awo ŵakayeghanga Bokosi la Phangano la FUMU na ŵakwimba ndiposo Kananiya murongozgi wa ŵakwimba. Davide wakavwaraso pa chifuŵa malaya gha usofi gha efodi.

²⁸Ntheura ŵaIsraele wose ŵakiza nalo Bokosi la Phangano la FUMU pamoza na mphomo na kulira kwa lipenga, zimbata na visulo vyakulira, ndiposo na viding'indi na ŵabango.

²⁹Para Bokosi la Phangano la FUMU likati lafika mu msumba wa Davide, Mikala mwana mwanakazi wa Sauli wakalingizga pa dangazi na kuwona Karonga Davide wakuvina na kudukaduka. Penepapo mwanakazi yura wakamuyuyura mu mtima wakhe.