Read new_tumbuka_bible 1 Midauko 16 Bible Online

1 Midauko 16 - new_tumbuka_bible bible

1 Midauko 16

¹Ntheura ŵanthu ŵakanjira nalo Bokosi la Phangano la Chiuta na kulikhazika pa malo ghakhe mukati mu hema leneilo. Davide wakalijinthira Bokosi lira. Ndipo ŵakapereka sembe zakocha na sembe za wenenawene panthazi pa Chiuta.

²Para Davide wakamara kupereka sembe zakocha na sembe za wenenawene, wakatumbika ŵanthu mu zina la FUMU.

³Pamanyuma Davide wakaŵagaŵira ŵaIsraele wose, ŵanarume na ŵanakazi, waliyose chingwa chimoza, thuŵi ya nyama yakocha na kachingwa kapapati ka mpheska zakomira.

⁴Ndiposo Davide wakimika ŵaLevi ŵanyakhe kuŵa ŵateŵeti panthazi pa Bokosi la Phangano la FUMU, kuromba vitumbiko vyakhe, kwimba na kurumba FUMU, Chiuta wa Israele.

⁵Asafu ndiyo wakaŵa murongozgi wawo ndipo wakurondezgako wakaŵa Zakariya ndipo pakizanga Yeyiyele, Shemiramoti, Yeyiyele, Matitiya, Eliyabu, Benaya, Obedi Edomu, na Yehiyele, ŵeneawo ŵakalizganga viding'indi na ŵabango. Asafu ndiyo wakalizganga visulo vyakulira.

⁶Ŵasofi aŵa Benaya na Yahaziyele ndiwo ŵakaŵa ŵakulizga zimbata nyengo zose panthazi pa Bokosi la Phangano la Chiuta.

⁷Sono pa zuŵa lenelira ndipo Davide wakadanga kwimikira Asafu na ŵabali ŵakhe kuti ŵimbe sumu iyi yakuwongera FUMU.

⁸Wongani FUMU, chemani zina lakhe, pharazgani milimo yakhe mukati mu ŵanthu!

⁹Mwimbirani marumbo, pharani milimo yakhe yose yakuzizwiska.

¹⁰Thuwuskani mu zina lakhe lituŵa. Awo ŵakupenja FUMU ŵasekerere.

¹¹Penjani FUMU na nkhongono zakhe, penjani uŵapo wakhe nyengo zose!

¹²Kumbukani milimo yakuzizwiska iyo yili kuchita, minthondwe yakhe na maweruzgo agho yikayowoyanga,

¹³imwe ŵa mphapu ya Abrahamu, muteŵeti wakhe, imwe ŵana ŵa Yakhobe ŵakusoreka ŵakhe!

¹⁴Iyo ndiyo FUMU, Chiuta withu. Weruzgi wakhe uli mu charu chose cha pasi.

¹⁵Wakukumbuka phangano lakhe kwa muyirayira, na mazgu agho wakalangula miwiro na miwiro.

¹⁶Wakukumbuka phangano ilo wakachita na Abrahamu, chirapo icho wakachita kwa Yisake pa icho wakapangana.

¹⁷Phangano ili wakakhozgera kwa Yakhobe kuŵa dango, ndipo nga ndi phangano la muyirayira kwa Israele.

¹⁸Iyo wakati, “Nditi ndikupenge charu cha Kanani, kuti chiŵe phande la chiharo chako.”

¹⁹Para ŵakaŵa ŵachoko waka, na ŵambula kumanyikwa, ndiposo na ŵakupanjwamo waka nawo mu charu chira,

²⁰ŵanthu ŵakwendendeka waka kufuma ku fuko ili na kuya ku fuko linyakhe, kufuma ku ufumu uwu na kuya ku ufumu wa mtundu unyakhe,

²¹Chiuta kuti wakazomerezgapo chara kuti munthu munyakhe waŵanyekezge. Wakaŵachenya ŵakaronga chifukwa cha ŵanthu ŵakhe ŵara.

²²Iyo wakati, “Mureke kukhwaska ŵakuphakazgika ŵane, mureke kuzichitira uheni nchimi zane.”

²³Yimbirani FUMU, imwe mwa ŵanthu ŵa mu charu chose cha pasi! Pharazgani za chiponosko chakhe zuŵa na zuŵa.

²⁴Thuwuskani uchindami wakhe mukati mu ŵamitundu, ndipo pharani milimo yakhe ya kuzizwiska mukati mu ŵamitundu wose!

²⁵FUMU njikuru, ndipo yikwenera kurumbika nadi. Yikwenera kopeka kuruska ŵachiuta wose.

²⁶Pakuti ŵachiuta wose ŵa mitundu yinyakhe mbangoza waka. Kweni FUMU ndiyo yikalenga vya kuchanya.

²⁷Nchindi na ufumunkhuru vili panthazi pakhe. Nkhongono na chimwemwe vili mu malo agho yikukharamo.

²⁸Perekani kwa FUMU imwe mbumba za ŵamitundu wose, zomerani kuti uchindami na nkhongono, vyose nvyakhe.

²⁹Perekani kwa FUMU nchindi izo zikuyiyenera, Zaninge na vyakupereka, ndipo mwize panthazi pakhe! Sopaninge FUMU mu utozi wa utuŵa wakhe.

³⁰Tenthemani panthazi pakhe imwe mwa ŵanthu mose ŵa mu charu cha pasi. Nadi charu chose chili kukhozgeka, kuti chingasunkhunyiskika chara.

³¹Vya kuchanya vikondwe, ndipo vya pa charu cha pasi visekerere. Vipharazge mukati mu ŵamitundu kuti, “FUMU ndiyo yikuwusa!”

³²Nyanja yipome pamoza na vyose iyo vili mwenemumo. Minda yisekerere pamoza na vyose ivyo vili mwenemumo!

³³Penepapo makuni gha mu nkhorongo ghati ghimbenge na chimwemwe, panthazi pa FUMU, chifukwa yikwiza kuti yeruzge charu cha pasi.

³⁴Wongani FUMU, pakuti njiweme, pakuti chisungusungu chakhe chikukhalirira kwa muyirayira.

³⁵Muyowoyeso kuti, “Mutiponoske, Mwe Chiuta muthaski withu, ndipo mutiwunganiske na kutiponoska ku ŵamitundu, kuti timuwongani pakuzunura zina linu lituŵa, kuti tithumbwenge pakumurumbani.

³⁶Yirumbike FUMU, Chiuta wa Israele, nyengo zose na muyirayira swii!” Penepapo ŵanthu wose ŵakati, “Ameni!” Ndipo ŵakachindika FUMU.

³⁷Davide wakasida Asafu na ŵabali ŵakhe penepara panthazi pa Bokosi la Phangano la FUMU kuti iwo ndiwo ŵateŵeterenge panthazi pa Bokosi lira nyengo zose, nga ndi umo kukakhumbikwira zuŵa lirilose.

³⁸Wakasidaposo Obedi Edomu pamoza na ŵabali ŵakhe 68 kovwirana nawo. Pa nyengo iyi Obedi Edomu, mwana wa Yedutuni, na Hosa ndiwo ŵakaŵa ŵalinda ŵa pa muryango.

³⁹Davide wakasidaso Zadoki musofi, na ŵabali ŵakhe ŵeneawo ŵakaŵa ŵasofi, panthazi pa Chihema Chakupatulika cha FUMU mu malo gha pachanya ghakusoperako agho ghakaŵa ku Gibeyoni.

⁴⁰Wakaŵasida kura kuti nyengo zose ku mulenje na ku na mise ŵaperekenge sembe zakocha kwa FUMU pa jochero la sembe yakocha, kwakuyana na vyose ivyo vili kulembeka mu marango gha FUMU gheneagho yikalangula Israele.

⁴¹Ŵanthu awo ŵakaŵa nawo pamoza ndi aŵa: Hemani na Yedutuni na ŵanyakheso ŵeneawo wakasoreka na kuzunulika mazina kuti ŵawongenge FUMU chifukwa chisungusungu chakhe chikukhalirira kwa muyirayira.

⁴²Hemani na Yedutuni ndiwo ŵakalizganga zimbata na visulo vyakulira ndiposo na vyakwimbira. Vyakulizgira pakwimba sumu zakupatulika.

⁴³Pamanyuma ŵanthu wose ŵa kapatukana, uyu ku kwakhe uyu ku kwakhe, Davide nayo wakawera ku kwakhe kuti wakatumbike ŵa mu nyumba yakhe.