Read new_tumbuka_bible 1 Midauko 17 Bible Online

1 Midauko 17 - new_tumbuka_bible bible

1 Midauko 17

¹Zuŵa limoza, para Davide wakamba kukhazikika mu nyumba yakhe, wakayowoya kwa nchimi Natani wakati, “Ine nkhukhara mu nyumba yakuzengeka na makuni gha milanje, kweni Bokosi la Phangano la FUMU likukhara mu hema.”

²Ntheura Natani wakamuphalira Davide wakati, “Chitani chose icho mukughanaghana pakuti Chiuta wali namwe.”

³Kweni usiku wenewura FUMU yikamuphalira Natani kuti,

⁴“Ruta, ukamuphalire muteŵeti wane Davide kuti, ‘FUMU yikuti: Undizengerenge ndiwe chara nyumba yakuti ndikharengemo.

⁵Ine ndilije kukharamo mu nyumba kufuma pa zuŵa lira nkhafumyira ŵaIsraele mpaka muhanya uno. Nkhaŵa wakwendendeka waka uku na uku ndipo umo nkhakharanga mukaŵanga mu hema.

⁶Mu malo ghose mwenemumo ndili kwendamo na ŵaIsraele wose, kasi nkhayowoyapo lizgu na yunji wa ŵeruzgi ŵa ŵaIsraele, awo nkhaŵalayizga kuliska ŵanthu kuti, kasi nchifukwa uli undandizengere nyumba ya milanje?’ ”

⁷Ntheura sono ukayowoye kwa muteŵeti wane Davide kuti, “FUMU Mwenenkhongono zose yikuti, ‘Nkhakutora iwe kufuma ku maluhari uko ukaliskanga mberere na mbuzi kuti uŵe karonga pa ŵanthu ŵane ŵaIsraele.

⁸Ndaŵa nawe kosekose uko wendanga, ndipo ndaŵamara petu ŵarwani wako wose panthazi pako. Ndipo nditi ndikuzge zina lako kuti liwe la lumbiri nga ndi umo liriri zina la ŵanthu ŵakumanyikwa awo ŵali mu charu.

⁹ŴaIsraele ŵanthu ŵane nditi ndiŵasorere malo na kuŵakhazika mwenemumo, kuti ŵakhare mu malo ghawo na ghawo kwambula kusuzgikaso. Ŵanthu ŵa nkhaza kuti ŵizamkuŵasuzgaso chara, nga ndi umo ŵakaŵachitira pakudanga para,

¹⁰kufumira pa nyengo yira nkhimikira ŵeruzgi ŵa ŵanthu ŵane ŵaIsraele. Ndamkuthereska ŵarwani ŵako wose. Na kwenenako nkhukuphalira kuti FUMU ndiyo yiti yikuzengere nyumba.

¹¹Para nyengo yako yakwana kuti uronde ŵasekuru ŵako ku dindi, ine ndamkuwuska yumoza wa mphapu yako pamanyuma pako, yumoza wa ŵana ŵako, ndipo wizamkukhozga chizumbe cha ufumu wako.

¹²Iyo ndiyo wizamkundizengera nyumba, ndipo ndizamkukhozga ufumu wakhe kwa muyirayira.

¹³Ndamkuŵa wiske, ndipo iyo wamkuŵa mwana wane. Kuti ndamkuwuskapo chisungusungu chane pa iyo chara, nga ndi umo nkhachitira na uyo wakakudangirira.

¹⁴Kweni chikhazi chakhe chamkuŵa mu nyumba yane na mu ufumu wane kwa muyirayira, ndipo chizumbe cha ufumu wakhe chimkwimikika kwa muyirayira.’ ”

¹⁵Natani wakamuphalira Davide kwakuyana na mazgu ghose agha, ndiposo kwakuyana na mboniwoni yose iyi.

¹⁶Karonga Davide wakanjira mu Chihema Chakupatulika ndipo wakakhara pasi ndipo wakaromba wakati, “Mwe FUMU Chiuta, kasi ndine njani, ndiposo nyumba yane nkhachichi kuti mwizakandifiska mpaka pano?

¹⁷Ndipouli imwe, Mwe Chiuta, aka kakaŵa kanthu kachoko mu maso ghinu. Mwapharaso na vya nyumba ya nda muteŵeti winu mu nyengo iyo yikwiza, ndiposo mwandirongora miwiro ya kunthazi, Mwe FUMU Chiuta!

¹⁸Nchinthu uli chinyakheso icho ine Davide ndingayowoya kwa imwe pakundichindika ntheura nda muteŵeti winu? Pakuti imwe mukundimanya makora nda muteŵeti winu.

¹⁹Mwe FUMU chifukwa cha nda muteŵeti winu, ndiposo kwakuyana na mtima winu, mwachita chinthu chikuru ichi, pakundivumbulira ukuru wose uwo uli kunthazi.

²⁰Mwe FUMU kulije na yumoza wakuŵa nga ndimwe, ndiposo kulije Chiuta, munyakhe pa dera pa imwe, kwakuyana na vyose ivyo tili kupulika na makutu ghithu.

²¹Kasi ndi fuko uli linyakhe pa charu leneilo likukozgana na ŵanthu ŵinu ŵaIsraele, ŵeneawo Chiuta wakaŵawombola kuti ŵaŵe ŵanthu ŵakhe. Mukajitorera lumbiri pakuŵachitira vinthu vikuru na vyakofya, para mukachimbizga mafuko panthazi pa ŵanthu ŵinu ŵeneawo mukaŵawombola mu Eguputo.

²²Imwe mukaŵazgora ŵanthu winu, ŵaIsraele, kuti ŵaŵenge ŵinu kwa muyirayira. Ndiposo imwe, Mwe FUMU, mukazgoka kuŵa Chiuta wawo.

²³“Sono, Mwe FUMU, khozgani kwa muyirayira mazgu gheneagho mwayowoya kuphara vya nda muteŵeti winu, na vya nyumba yane, ndipo muchite nga ndi umo mwayowoyera.

²⁴Apo ndipo zina linu lizamkukhozgeka na kukuzgika kwa muyirayira. Ŵanthu ŵamkuyowoya kuti, ‘FUMU Mwenenkhongono zose, Chiuta wa Israele, ndiyo Chiuta wawo.’ Ndipo mbumba ya ine Davide nda muteŵeti winu yakukhozgeka panthazi pinu.

²⁵Pakuti imwe, Chiuta wane, mwandivumbulira nda muteŵeti winu kuti imwe ndimwe mwamkundizengera nyumba. Ntheura ine nda muteŵeti winu ndaŵa na chikanga kuromba panthazi pinu.

²⁶Ndipo sono, Mwe FUMU, ndimwe Chiuta, mwapangana kupereka chinthu chiweme ichi, kwa nda muteŵeti winu.

²⁷Ntheura sono chimukondweskani kupereka chitumbiko ku mbumba ya nda muteŵeti winu, kuti yikhalirirenge panthazi pinu muyirayira. Pakuti icho mwachitumbika, Mwe FUMU, nchakutumbikika kwa muyirayira.”