Read new_tumbuka_bible 1 Midauko 21 Bible Online

1 Midauko 21 - new_tumbuka_bible bible

1 Midauko 21

¹Nyengo yimoza Satana wakawuka na kwimikana na ŵaIsraele ndipo wakakhuŵirizga Davide kuti wapende ŵaIsraele.

²Ntheura Davide wakamuphalira Yowabu na ŵarongozgi ŵa ŵasilikari wakati, “Rutani mukapende ŵaIsraele kufuma ku Beyeresheba kuya kafika ku Dani.” Mukawere kwiza kandiphalira kuti ndimanye unandi wawo.

³Kweni Yowabu wakamuphalira Karonga Davide wakati, “FUMU yandaniskireko ku ŵanthu ŵinu na 100 kwakuruska umo ŵaliri! Kweni sekuru wane karonga asi wose mbateŵeti ŵinu? Nchifukwa uli, imwe sekuru wane mukupenjerezga chinthu cha ntheura? Kasi nchifukwa uli mutorerenge kwananga pa ŵaIsraele?”

⁴Kweni Karonga wakachichizga languro lakhe pa Yowabu. Ntheura Yowabu wakawukapo na kuruta mu charu chose cha Israele, ndipo wakawereraso ku Yerusalemu.

⁵Yowabu wakamuphalira Davide unandi wa ŵanthu aŵa ŵakaya kapenda. Mwa Israele yose mukaŵa ŵanthu ŵakukorera lupanga 1,100,000. Mwa Yuda mukaŵa ŵa nkhondo 470,000.

⁶Kweni kuti wakapendera lumoza na ŵaLevi na ŵaBenjamini, chara pakuti Yowabu wakaseruskika nalo languro la karonga.

⁷Chiuta nayo kuti wakakondwa nacho chinthu ichi chara ndipo wakaŵakoma ŵaIsraele.

⁸Sono Davide wakayowoya kwa Chiuta wakati, “Ndananga chomene pakuti ndachita chinthu ichi. Kweni sono nkhumurombani kuti muwuskepo uheni pa nda muteŵeti winu pakuti ndachitira mwa kupusa chomene.”

⁹Ndipo FUMU yikayowoya kwa nchimi Gadi, muwoni wa Davide ndipo wakati,

¹⁰“Ruta ukamuphalire Davide kuti, ‘FUMU yikuti nkhukupa vinthu vitatu. Sono iwe usorepo mwa ivi chakuti ndikuchitire.’ ”

¹¹Ntheura Gadi wakiza kwa Davide na kumuphalira kuti, “FUMU yikuti, ‘Sorapo icho ukukhumba.

¹²Kasi paŵe virimika vitatu vya njara, panji paŵe myezi yitatu apo ŵarwani ŵinu ŵamkumupwetekani na kumukomani na lupanga? Panji paŵe mazuŵa ghatatu gha nthenda yakofya mu charu apo FUMU yamkumupwetekani na lupanga ndipo mungelo wa FUMU wizamkusakaza charu chose cha Israele.’ Sono ughanaghane, na kundipa zgoro ilo ndamkumuwezgera uyo wakandituma.”

¹³Ndipo Davide wakamuphalira Gadi wakati, “Ndili mu suzgo yikuru. Rekani ndijiŵike waka mu woko la FUMU, pakuti chiwuravi chakhe nchikuru chomene. Kweni ndireke kuŵa mu woko la munthu.”

¹⁴Ntheura FUMU yikatuma nthenda yakofya chomene pa charu cha Israele ndipo pakafwa ŵanthu 70,000.

¹⁵Chiuta wakatuma nadi mungelo wakhe ku Yerusalemu kuya kawusakaza. Kweni apo wakaŵa pafupi kuwusakaza FUMU yikawona ndipo yikagowoka mtima wakhe kuti yichite chiheni chira. Ntheura FUMU yikamuphalira mungelo wakhe yura mweneuyo wakaŵa na nchito yakusakaza msumba yikati, “Ndipera sono wezgako woko lako.” Mungelo wa FUMU wakimiliranga pafupi na luwugha lwa Orinani muYebusi.

¹⁶Sono Davide wakati walaŵiska wakawona mungelo wa FUMU wimilira pakati pa charu na mtambo, uko wakorera lupanga lwakusorora ndipo walunyoroskera ku Yerusalemu. Penepapo Davide na ŵarara ŵa ŵaIsraele ŵakavwara vigudulu kurongora kurapa na kuwa kavunama.

¹⁷Davide wakati kwa Chiuta, “Asi ine ndine nkhalangula kuti ŵanthu ŵapendeke? Ine ndine ndili kwananga na kuchita uheni. Kweni ŵanthu aŵa ndi mberere. Kasi ŵachitachi? Nkhumuŵeyani, Mwe FUMU Chiuta wane, kuti mulange waka ine na ŵa mu mbumba ya ŵadada. Kweni chilengo ichi chireke kuŵa pa ŵanthu ŵinu.”

¹⁸Penepapo mungelo wa FUMU wakamuphalira Gadi kuya kamuyowoyera Davide kuti, “Ruta ukayizengere FUMU jochero pa luwugha lwa Orinani muYebusi.”

¹⁹Ntheura Davide wakakwera kwakuyana na mazgu agho FUMU yikayowoya kwa Gadi.

²⁰Sono Orinani wakabulanga tirigu ndipo wakati wazgokera kunyuma wakawona mungelo wa FUMU ndipo ŵana ŵakhe ŵanayi awo ŵakaŵa pamoza nayo wakabisama.

²¹Para Davide wakafika kwa Orinani ndipo Orinani wakati wamuwona Davide, iyo wakafuma pa luwugha, wakasindamira pasi panthazi pa Davide, kupereka nchindi.

²²Davide wakayowoya kwa Orinani wakati, “Undipe malo gha luwugha kuti ndiyizengerepo FUMU jochero. Undipimire mtengo wakhe wenecho mwakuti nthenda yakofya iyi yifumeko ku ŵanthu.”

²³Ndipo Orinani wakamuzgora Davide wakati, “Torani waka, ndipo imwe karonga sekuru wane muchite icho nchiweme kwa iyo. Wonani nkhupereka ng'ombe kuti ziŵe sembe yakocha ndiposo na magareta gha kubulira tirigu kuti ziŵe nkhuni. Nkhuperekaso tirigu kuti waŵe sembe ya ufu. Nadi, nkhumupani vyose ivi.”

²⁴Kweni Karonga Davide wakamuphalira Orinani wakati, “Chara, kweni nditi ndigule na ndarama pa mtengo wakhe wa msuma. Ndingatora chinthu chako chara kuti ndipereke kwa FUMU, nanga nkhupereka kuŵa sembe yakocha icho ndilije kugula.”

²⁵Ntheura Davide wakamupa Orinani uzitu wa ndarama za golide 600 pakugula malo ghara.

²⁶Ndipo penepara Davide wakayizengera FUMU jochero, na kupereka sembe yakocha na sembe ya wenenawene. Wakasopa ndipo FUMU yikamuzgora na moto uwo ukafuma kuchanya kwiza pa jochero la sembe yakocha.

²⁷Penepapo FUMU yikalangula mungelo wakhe yura ndipo iyo wakawezgeramo lupanga mu chibazi chakhe.

²⁸Pa nyengo yira para Davide wakawona kuti FUMU yamuzgora pa luwugha lwa Orinani, muYebusi, wakapereka sembe penepara.

²⁹Pakuti pa nyengo yira Chihema Chakupatulika cha FUMU icho Mozesi wakanozga mu mapopa na jochero la sembe yakocha, vikaŵa pa malo gha pachanya ghakusoperako mu msumba wa Gibeyoni.

³⁰Kweni Davide kuti wakamanya kuyako chara kuti wakafumbe kwa Chiuta, pakuti wakopanga lupanga lwa mungelo wa FUMU.