Read new_tumbuka_bible 1 Midauko 22 Bible Online

1 Midauko 22 - new_tumbuka_bible bible

1 Midauko 22

¹Penepapo Davide wakati, “Pano ndipo pati paŵenge Nyumba ya FUMU, ndiposo penepapo ndipo pati paŵenge jochero la sembe yakocha ya Israele.”

²Davide wakalangula kuti ŵaŵawunganye pamoza ŵalendo ŵeneawo ŵakaŵa mu charu cha Israele. Ŵanji ŵakaŵimika kuŵa ŵaŵaji ŵa mawe mwakuti ŵanozgenge mawe ghakuti ŵazengere Nyumba ya Chiuta.

³Ndiposo Davide wakapereka visulo vinandi vya kupangira mizumali ya vijaro vya mu vipata na vya kubamphikira mathabwa ndiposo na mkuŵa unandi wambula mapimiko.

⁴Wakaperekaso mathabwa gha khuni la milanje ghanandi ghambula mapendeko pakuti ŵaSidoni na ŵaTure ŵakamuyeghera Davide makuni gha milanje ghanandi chomene.

⁵Pakuti Davide wakati, “Solomoni mwana wane ndi mwanichi. Iyo wandafikepo pakumanyiska tunthu ndipo nyumba iyo wakukhumba kuzengera FUMU yikwenera kuŵa yapachanya, ya lumbiri na yakuchindikika mu vyaru vyose. Ipo sono nditi ndinozgerenge ivyo vikukhumbikwa pa nyumba iyi.” Ntheura Davide wakawunjika vyakuzengera vinandi chomene.

⁶Penepapo wakachema mwana wakhe Solomoni ndipo wakamuwuzga kuti wazengere nyumba FUMU, Chiuta wa Israele.

⁷Davide wakamuphalira Solomoni wakati, “Wa mwana wane chikaŵa mu mtima wane kuzenga nyumba ya kuchindikiramo FUMU, Chiuta wane.

⁸Kweni mazgu gha FUMU ghakiza kwa ine kuti, ‘Wathiska ndopa zinandi, ndipo warwa nkhondo zikuruzikuru. Ungandizengeranga nyumba chara, pakuti wathiska ndopa zinandi pa charu panthazi pane.

⁹Kweni uzamkubaba mwana mwanarume. Iyo ndiyo wati waŵenge munthu wa chimango. Nditi ndimupumuzgenge ku ŵarwani ŵakhe wose zingirizge. Zina lakhe wizamkuchemeka Solomoni pakuti ndamkupereka mutende na kufwasa kwa Israele mu mazuŵa ghakhe.

¹⁰Iyo ndiyo wamkundizengera nyumba. Iyo wamkuŵa mwana wane ndipo ine ndamkuŵa wiske. Ndamkukhozga chizumbe chakhe cha ufumu mu charu cha Israele kwa muyirayira.’ ”

¹¹“Sono wa mwana wane, FUMU yiŵe nawe kuti ufiske kuyizengera nyumba FUMU, Chiuta wako, nga ndi umo wakayowoyera na vya iwe.

¹²Ndipouli FUMU ndiyo yikupe mahara na mtima wakumanyiska tunthu, mwakuti para yakwimika kuŵa pachanya pa ŵaIsraele, usungenge dango la FUMU, Chiuta wako.

¹³Usange ukupwererera kurondezga malayizgo na malangulo, vyeneivyo FUMU yikalayizga Mozesi kuŵaphalira ŵaIsraele, apo ndipo vinthu vikuŵirenge makora. Uŵe wankhongono na wakukhwima mtima. Ungopanga chara ndipo reka kuthika lusoko.

¹⁴Mu kutokatoka kukuru ndanozgera vya Nyumba ya FUMU matani 3,400 gha golide, matani 34,000 gha siliva ndiposo mkuŵa na chisulo vyambula mapimiko mu uzitu, pakuti nvinandi chomene. Ndanozgeraso mathabwa na mawe. Iwe ukwenera kusazgirapo waka vinyakhe.

¹⁵Iwe uli nawo ŵanthu ŵanandi ŵakuchita milimo nga ndi ŵakudumula mawe, nkhwantha pakuzengera mawe, ŵakupara mathabwa, ŵasiri pa milimo ya kupambanapambana ŵambula mapendeko, nkhwantha pakuchita nchito

¹⁶na golide, siliva, mkuŵa ndiposo na chisulo. Sono ukambengeko waka! FUMU yiŵe nawe!”

¹⁷Davide wakalangulaso ŵarongozgi wose ŵa ŵaIsraele kuti ŵamovwirenge mwana wakhe Solomoni wakati,

¹⁸“Asi FUMU, Chiuta winu wali namwe? Kasi walije kumupani mutende kosekose? Iyo wali kuŵapereka ŵenecharu mu woko lane, ndipo charu chathereska panthazi pa FUMU na panthazi pa ŵanthu ŵakhe.

¹⁹Sono ŵikanipo mitima yinu na maghanoghano ghinu kumupenja FUMU, Chiuta winu. Mwambengeko kuzenga Malo Ghakupatulika ya FUMU Chiuta mwakuti Bokosi la Phangano la FUMU, na viteŵetero vyakupatulika vya Chiuta, vitorekere mu nyumba iyo mwazengera FUMU.”