Read new_tumbuka_bible 1 Midauko 23 Bible Online

1 Midauko 23 - new_tumbuka_bible bible

1 Midauko 23

¹Para Davide wakachekura, ndipo wakaŵa na virimika vinandi, wakimika Solomoni mwana wakhe kuŵa karonga wa charu cha Israele.

²Davide wakawunganya ŵarongozgi wose ŵa mu charu cha Israele, ŵasofi ndiposo na ŵaLevi.

³ŴaLevi wakapendeka kwamba ŵa virimika 30 na ŵakujumphirapo. Unandi wawo ukaŵa ŵanthu 38,000.

⁴Ndipo Davide wakati, “Ŵanthu 24,000 mwa aŵa ndiwo ŵaŵenge ŵakulaŵiska kendeskero ka mlimo wa Nyumba ya FUMU. Ŵanthu 6,000 ndiwo ŵaŵenge ŵarongozgi na ŵeruzgi.

⁵Ŵanthu 4,000 ŵaŵenge ŵalinda ŵa pa vipata, ndiposo ŵanthu 4,000 ndiwo ŵaŵenge wakurumba FUMU na vyakwimbira ivyo ndaŵanozgera.”

⁶Pamanyuma Davide wakaŵaŵika mu vigaŵa pakurondezga umo ŵana ŵa Levi aŵa ŵa ŵakaŵira: Gerishoni, Kohati, na Merari.

⁷Ŵana ŵa Gerishoni ŵakaŵa: Ladani, Shimeyi.

⁸Ŵana ŵa Ladani ndi aŵa: Yehiyele murongozgi wawo na Zetamu ndiposo na Yoyele, ŵatatu pamoza.

⁹Ŵana ŵa Shimeyi ndi aŵa: Shelomoti, Haziyele na Harani, ŵatatu pamoza. Aŵa ndiwo ŵakaŵa ŵarara pa mbumba ya Ladani.

¹⁰Ŵana ŵa Shimeyi ndi aŵa: Yahati, Zina, Yeushi, na Beriya. Ŵeneaŵa ŵanayi ndiwo ŵakaŵa ŵana ŵa Shimeyi.

¹¹Yahati ndiyo wakaŵa murongozgi wawo ndipo Ziza wakaŵa wa chiŵiri. Kweni Yeushi na Beriya kuti ŵakaŵa na ŵana ŵanandi chara. Ntheura para ŵakaŵapendanga ŵakaŵazgora kuŵa nga mba nyumba yimoza.

¹²Ŵana ŵa Kohati ndi aŵa: Amuramu, Izihara, Heburoni na Uziyele, ŵanayi pamoza.

¹³Ŵana ŵa Amuramu ndi aŵa: Aroni na Mozesi. Sono Aroni wakimikikira ku mlimo wakupatuliska vinthu vyakupatulika nkhanira, mwakuti iyo na ŵana ŵakhe wochenge vyakununkhira panthazi pa FUMU, kuyiteŵetera iyo na kuchitira chitumbiko mu zina lakhe kwa muyirayira.

¹⁴Kweni ŵana ŵa Mozesi, munthu wa Chiuta wakapendekera pamoza na ŵa fuko la Levi.

¹⁵Ŵana ŵa Mozesi ndi aŵa: Gerishomu na Eliyezere.

¹⁶Ŵana ŵa Gerishomu ndi aŵa: Shebuwele uyo wakaŵa murongozgi wawo.

¹⁷Eliyezere wakaŵa na mwana yumoza pera zina lakhe Rehabiya. Eliyezere kuti wakaŵa na ŵana ŵanyakhe chara, kweni Rehabiya mwana wakhe ndiyo wakaŵa na ŵana ŵanandi chomene.

¹⁸Ŵana ŵa Izihara ndi aŵa: Shelomoti, uyo wakaŵa murongozgi.

¹⁹Ŵana ŵa Heburoni ndi aŵa: Yeriya uyo wakaŵa murongozgi, Amariya wa chiŵiri, Yahaziyele wa chitatu na Yekameyamu wa chinayi.

²⁰Ŵana ŵa Uziyele ndi aŵa: Mika, uyo wakaŵa murongozgi na Ishiya uyo wakaŵa wa chiŵiri.

²¹Ŵana ŵa Merari ndi aŵa: Mali na Mushi. Ŵana ŵa Mali ndi aŵa. Eleyazara na Kishi.

²²Eleyazara wakafwa wambula ŵana ŵanarume, kweni wakaŵa na ŵana ŵanakazi pera. Ndipo ŵabali ŵakhe, ŵana ŵa Kishi ŵakaŵatora kuŵa ŵawoli ŵawo.

²³Ŵana ŵa Mushi ndi aŵa: Mali, Edere, na Yeremoti wakaŵa ŵatatu pamoza.

²⁴Ŵeneawo ndiwo ŵakaŵa ŵana ŵa Levi kwakuyana na nyumba za ŵawiskewokuru, ndiposo ŵarongozgi pa nyumba za ŵawiskewokuru, nga ndi umo wakapendekera munthu na munthu kwamba ŵa virimika 20 na ŵakujumphirapo. Iwo ndiwo ŵakachitanga mlimo wakuteŵetera mu Nyumba ya FUMU.

²⁵Pakuti Davide wakati, “FUMU, Chiuta wa Israele wapereka mutende ku ŵanthu ŵakhe ndipo wakukhara mu Yerusalemu kwa muyirayira.

²⁶Ntheura ŵaLevi kuti ŵati ŵayeghengeso Chihema chara nanga ndi viteŵetero vya mlimo uliwose.”

²⁷Pakuti kwakuyana na mazgu gha umaliro gha Davide, ŵaLevi ŵakapendeka kwamba ŵa virimika 20 na ŵakujumphirapo.

²⁸Kweni mlimo wawo uti uŵenge wakovwira ŵana ŵa Aroni pa uteŵeti wa mu Nyumba ya FUMU pakupwererera malo gha kuwunganiranamo, vipinda ndiposo na kutozga vinthu vyose ivyo nvyakupatulika, ndiposo na mlimo unyakhe wose wa mu Nyumba ya Chiuta.

²⁹Ŵanthu aŵa wovwirengeso pakupwererera chingwa cha uŵapo wa FUMU, ufu wa sembe na tuvingwa tupepefu twambula chirungo, sembe ya vinthu vyakukazinga pa jonjo, sembe ya vinthu ivyo ŵakusazgako mafuta, ndiposo na miyeso yose yakupimira unandi panji ukuru wa vinthu.

³⁰Ŵati ŵimbenge mulenje uliwose kuwonga na kurumba FUMU na kuchita ntheura pera nyengo ya mise.

³¹Ndiposo apo pose sembe zakocha zikuperekeka kwa FUMU mukati mu Sabata pa chiphikiro cha kuthwasa kwa mwezi na pa mazuŵa gha viphikiro, kwakuyana na unandi wa sembe izo zikukhumbikwa rutaruta panthazi pa FUMU.

³²Ntheura ŵati ŵaŵenge na mlimo wa kusungilira Chihema Chakukumaniranamo na Malo Ghakupatulika na kovwira ŵabali ŵawo ŵasofi ŵa mu mbumba ya Aroni pa mlimo wa chisopo mu Nyumba ya Chiuta.