Read new_tumbuka_bible 1 Midauko 24 Bible Online

1 Midauko 24 - new_tumbuka_bible bible

1 Midauko 24

¹Umu ndimo ŵana ŵa Aroni ŵakagaŵikira. Sono ŵana ŵa Aroni ŵakaŵa aŵa: Nadabu, Abihu, Eleyazara na Itamara.

²Kweni Nadabu na Abihu ŵakafwa wiskewo wachali wamoyo ndipo ŵakaŵavye ŵana. Ntheura Eleyazara na Itamara ŵakimikika kuŵa ŵasofi.

³Davide wakaŵanozgera ndondomeko yiweme kwakuyana na milimo ya uteŵeti wawo pakovwirika na Zadoki mwana wa Eleyazara, na Ahimeleki mwana wa Itamara.

⁴Sono mu ŵana ŵa Eleyazara mukasangika ŵarongozgi ŵanandi kuruska mu ŵana ŵa Itamara. Ntheura mukati mu ŵana ŵa Eleyazara mukaŵa ŵarongozgi 16 awo ŵakaŵa ŵarara pa nyumba za ŵawiskewokuru ndipo mu ŵana ŵa Itamara ŵarongozgi ŵa pa nyumba zawo ŵakaŵa 8.

⁵Ŵakagaŵa pakuchita mphenduzgo. Wose ŵakaŵa ŵakuyana waka mu kuzirwa pakuti ŵarongozgi ŵa mu malo ghakupatulika, na ŵarongozgi ŵa mu Nyumba ya Chiuta ŵakafuma mu ŵana ŵa Eleyazara na mu ŵana ŵa Itamara.

⁶MuLevi zina lakhe Shemaya, uyo wakaŵa mulembi, mwana wa Netanele, ndiyo wakalemba mazina ghawo panthazi pa karonga, pa nduna, pa Zadoki musofi na panthazi pa Ahimeleki mwana wa Abiyatara, ndiposo na panthazi pa ŵarongozgi ŵa nyumba za ŵawiskewokuru za ŵasofi na za ŵaLevi. Mbumba yimoza yikasoreka kufuma mwa Eleyazara ndipo yinyakhe yikasoreka kufuma mwa Itamara.

⁷Sono mphenduzgo yakudanga yikawira pa Yehoyaribu, ya chiŵiri yikawira pa Yedaya,

⁸ya chitatu yikawira pa Harimu, ya chinayi yikawira pa Seyorimu,

⁹ya chinkhonde yikawira pa Malikiya, ya chinkhonde na chimoza yikawira pa Miyamini,

¹⁰ya chinkhonde na chiŵiri yikawira pa Hakozi, ya chinkhonde na chitatu yikawira pa Abiya,

¹¹ya chinkhonde na chinayi yikawira pa Yeshuwa, ya khumi yikawira pa Shekaniya,

¹²ya 11 yikawira pa Eliyashibu, ya 12 yikawira pa Yakimu,

¹³ya 13 yikawira pa Hupa, ya 14 yikawira pa Yeshebeyabu,

¹⁴ya 15 yikawira pa Biliga, ya 16 yikawira pa Imere,

¹⁵ya 17 yikawira pa Heziri, ya 18 yikawira pa Hapizezi,

¹⁶ya 19 yikawira pa Petahiya, ya 20 yikawira pa Yehezikele,

¹⁷ya 21 yikawira pa Yakini, ya 22 yikawira pa Gamulu,

¹⁸ya 23 yikawira pa Delayila, ya 24 yikawira pa Maziya.

¹⁹Ŵanthu aŵa ŵakamikika mu uteŵeti wawo pa mlimo wa mu Nyumba ya Chiuta kwakuyana na marango agho Aroni wiskewokuru wakaŵapa, nga ndi umo FUMU, Chiuta wa Israele wakamulangulira.

²⁰Pa ŵaLevi awo ŵakakharako ŵarongozgi ŵakaŵa ntheura: mu ŵana ŵa Amuramu mukafuma Shubayele, mu ŵana ŵa Shubayele mukafuma Yedeyiya.

²¹Mu ŵana ŵa Rehabiya mukafuma Ishiya murara.

²²Mu ŵana ŵa Izihara, mukafuma Shelomoti, mu ŵana ŵa Shelomoti mukafuma Yahati.

²³Ŵana ŵa Heburoni ndi aŵa: Yeriya murongozgi wawo, Amariya wa chiŵiri, Yahaziyele wa chitatu na Yekameyamu wa chinayi.

²⁴Ŵana ŵa Uziyele ndi aŵa: Mika ndipo mu ŵana ŵa Mika mukafuma Shamiri.

²⁵Mu mwana munyakhe na Mika mukafuma Ishiya ndipo mu ŵana ŵa Ishiya mukafuma Zakariya.

²⁶Ŵazukuru ŵa Merari ŵakaŵa Mali, Mushi, na ŵana ŵa Yaaziya mwana wakhe.

²⁷Ŵazukuru ŵa Merari mwana wakhe wa Yaaziya ŵakaŵa Shohamu, Zakuru na Ibiri.

²⁸Mali wakababa Eleyazara mweneuyo wakaŵavye ŵana,

²⁹na Kishi, mweneuyo mwana wakhe wakaŵa Yerameyele.

³⁰Ŵana ŵa Mushi ndi aŵa: Mali, Edere na Yerimoti. Ŵeneaŵa ndiwo ŵakaŵa ŵaLevi kwakuyana na nyumba za ŵawiskewokuru.

³¹Ndipo kwakuyana waka na ŵana ŵa Aroni, ŵana ŵanyawo, mukuru waliyose na munung'una wakhe, nawo ŵakaŵasankha pakuchita mphenduzgo panthazi pa Karonga Davide, na pa Zadoki na Ahimeleki ndiposo na panthazi pa ŵarongozgi ŵa mu nyumba za ŵawiskewokuru, mu ŵasofi na mu ŵaLevi.