Read new_tumbuka_bible 1 Midauko 26 Bible Online

1 Midauko 26 - new_tumbuka_bible bible

1 Midauko 26

¹Umu ndimo ŵalinda ŵa pa miryango wakagaŵikira: Mu ŵaKora mukafuma Meshelemiya mwana wa Kore, muAsafu.

²Ndipo Meshelemiya wakaŵa na ŵana ŵanarume aŵa: Zakariya mwana wakhe wa uŵere, Yediyayele wa chiŵiri, Zebadiya wa chitatu, Yatiniyele wa chinayi,

³Elamu wa chinkhonde, Yehohanani wa chinkhonde na chimoza, Eliyehoyenayi wa chinkhonde na chiŵiri.

⁴Obedi Edomu wakaŵa na ŵana aŵa: Shemaya mwana wa uŵere, Yehozabadi wa chiŵiri, Yowa wa chitatu, Sakara wa chinayi, Netanele wa chinkhonde,

⁵Amiyele wa chinkhonde na chimoza, Isakara wa chinkhonde na chiŵiri, Peyuletayi wa chinkhonde na chitatu, pakuti Obedi Edomu Chiuta wakamutumbika.

⁶Ndiposo mu mwana wakhe Shemaya mukababika ŵana awo ŵakaŵa ŵarongozgi mu nyumba za ŵawiskewokuru pakuti ŵakaŵa ŵakumanya kuchita vinthu.

⁷Sono ŵana ŵa Shemaya ndi aŵa: Otini, Refayele, Obedi, na Elizabadi, mweneuyo ŵabali ŵakhe Elihu na Semakiya ŵakaŵa vinkhara pakuchita vinthu.

⁸Wose aŵa ŵakaŵa ŵa mphapu ya Obedi Edomu. Iwo na ŵana ŵawo pamoza na ŵabali ŵawo ŵakaŵa ŵanthu ŵamahara na ŵakumanya nchito yawo. Ŵa mphapu ya Obedi Edomu ŵakaŵa 62 wose pamoza.

⁹Meshelemiya wakaŵa na ŵana na ŵabali ŵakhe, pamoza 18 awo ŵakaŵa ŵanthu ŵakumanya nchito.

¹⁰Hosa muMerari wakaŵa na ŵana aŵa: Shimuri uyo wakaŵa murongozgi (nangauli wakaŵa mwana wa uŵere chara, wiske wakamwimika kuŵa murongozgi),

¹¹Hilikiya wa chiŵiri, Tebaliya wa chitatu, Zakariya wa chinayi. Wose ŵana ŵa Hosa pamoza na ŵabali ŵakhe, ŵakaŵa 13.

¹²Ŵalinda ŵa pa muryango awo wakagaŵika mu vigaŵa kwakuyana na ŵarongozgi ŵawo, ŵakaŵa na milimo yakuyana waka na ŵabali ŵawo mu uteŵeti wa mu Nyumba ya FUMU.

¹³Pakuŵasorera pa mlimo wa pa muryango ŵakachita mphenduzgo kwakuyana na nyumba za ŵawiskewokuru kwambula kuwona uchoko panyakhe ukuru kweni kwambula kutemwera.

¹⁴Pa muryango wa ku mafumiro gha dazi mphenduzgo yikawira Shelemiya. Mwana wakhe Zakariya uyo wakaŵa murongozgi wakuchenjera nayo mphenduzgo yikamukora kuŵa wa pa muryango wa dera la ku mpoto.

¹⁵Obedi Edomu yikamukora kuŵa wa pa muryango wa ku dera la ku mwera, ndipo yikakoraso ŵana ŵakhe kuŵa ŵalinda ŵa nyumba yakusungiramo vinthu.

¹⁶Mphenduzgo yikawira Shupimu na Hosa kuŵa ŵalinda ŵa pa chipata cha Shaleketi ku manjiliro gha dazi kwa chipata cha pa msewu uwo ukukwera. Ŵalinda ŵakasinthananga.

¹⁷Ku mafumiro gha dazi kukaŵa ŵalinda ŵankhonde na yumoza zuŵa na zuŵa, ku mpoto nako ŵanayi zuŵa na zuŵa, ku mwera ŵanayi zuŵa na zuŵa, pa nyumba yakusungiramo vinthu ŵaŵiri lwegha lumoza, ŵaŵiriso ku lunyakhe.

¹⁸Ku manjiliro gha dazi kwa kanyumba ka pawaro pakaŵa ŵalinda ŵanayi ku msewu ndiposo ŵaŵiri pa ka nyumba akokene ako kakachemeka, “Parabara”.

¹⁹Umu ndimo ŵalinda ŵa mu miryango ŵakagaŵikira mu ŵaKora na mu ŵaMerari.

²⁰Mu ŵaLevi Ahiya ndiyo wakaŵa na mlimo wakusungilira vyuma vya mu Nyumba ya Chiuta ndiposo na malo gha kusungiramo vyawanangwa vya kupatuliskika,

²¹ŵakaŵa ŵa mphapu ya Ladani awo ŵakaŵaso ŵa mphapu ya Gerishoni ŵeneawo ŵakaŵa ŵarongozgi mu mbumba za Ladani mu Gerishoni uyo waka wa mbumba ya Yehiyele.

²²Ŵana ŵa ŵaYehiyele, Zetamu na Yoyele, ŵakaŵa ŵakusungulira vyuma vya mu Nyumba ya FUMU.

²³Kufuma mu ŵaAmuramu, ŵaIzihara, ŵaHeburoni na ŵaUziyele,

²⁴Shebuwele mwana wa Gerishomu, muzukuru wa Mozesi ndiyo wakasoreka kuŵa mukuru wakusungilira vyuma.

²⁵Ŵazukuru ŵa Eliyezere mubali wa Gerishomu ŵakaŵa Rehabiya, uyo wakababa Yeshaya, uyo wakababa Yoramu, uyo wakababa Zikiri, uyo wakababa Shelomoti.

²⁶Shelomoti uyu pamoza na ŵana ŵamoza na iyo, ndiwo ŵakaŵa ŵakusungilira vyuma vyose ivyo vikaŵa Benaya vya kupatuliskika vyeneivyo Karonga Davide wakavipatuliska pamoza na ŵarongozgi ŵa nyumba za ŵawiskewokuru, ndiposo na ŵarongozgi ŵa pa ŵanthu 1,000 na ŵa pa ŵanthu 100, ndiposo na ŵarongozgi ŵa nkhondo.

²⁷Kufuma mu ivyo ŵakaskogha mu nkhondo, ŵakatorapo vinyakhe na kuvipatuliska kuŵa vya kunozgera Nyumba ya FUMU.

²⁸Ndiposo na vyose ivyo vikapatuliskika na Samuele muwoni, Sauli mwana wa Kishi, Abinara mwana wa Neri, na Yowabu mwana wa Zeruya vikaŵikika mu woko la Shelomoti na ŵabali ŵakhe.

²⁹Mu ŵaIzihara, Kananiya na ŵana ŵakhe ndiwo ŵakimikika kuŵa ŵakuchita milimo yakupatulika ya ŵaIsraele ya kuwaro kwa nyumba. Iwo ŵakaŵa ŵamazaza ŵa charu na ŵeruzgi.

³⁰Mu ŵaHeburoni, Hashabiya na ŵabali ŵakhe pamoza 1,700 ŵanthu ŵamahara ndiwo ŵakaŵa ŵarongozgi ŵa charu cha Israele, ku manjiliro gha dazi kwa mronga wa Yorodani. Iwo ŵakachitanga milimo yose wa FUMU, na kuteŵetera karonga.

³¹Mu ŵaHeburoni Yeriya ndiyo wakaŵa murongozgi wa nyumba zose za ŵawiskewo. Mu chirimika cha 40 cha kuwusa kwa Davide, ŵakapenjerera mu mbumba ya Heburoni, ndipo vigwe vya ŵasilikari vikasangika mu msumba wa Yazere, mu chigaŵa cha Gileyadi.

³²Karonga Davide wakimika Yeriya pamoza na ŵabali ŵakhe, ŵanthu 2,700 ŵamahara kuŵa ŵarongozgi mu nyumba za ŵawiskewokuru pa ŵa fuko la Rubeni, la Gadi na hafu wa fuko la Manase, na pa milimo yose wa Chiuta na pa vinthu vyose vya kukhwaska karonga.