Read new_tumbuka_bible 1 Midauko 28 Bible Online

1 Midauko 28 - new_tumbuka_bible bible

1 Midauko 28

¹Davide wakawunganya mu Yerusalemu ŵarongozgi wose ŵa ŵaIsraele, ndiko kuti ŵakuruŵakuru ŵa mafuko, ŵarongozgi ŵa mipingo iyo yikateŵeteranga karonga, ŵarongozgi ŵa nkhondo pa ŵanthu 1,000, ŵasungiliri ŵa chuma chose cha karonga ndiposo na ŵasungiliri ŵa ŵana ŵakhe na vyakuŵeta vyakhe, pamoza na nthunguli za mu nyumba ya ufumu, ndiposo na ngwazi zakhe, na nkhwantha zose pakurwa nkhondo.

²Penepapo Karonga Davide wakimilira ndipo wakati, “Mundipulike, mwa ŵabali ŵane na mwa ŵanthu ŵane. Ine nkhakhumbanga kuzenga nyumba yakukharamo Bokosi la Phangano la FUMU, kuŵa nga nchitambaliro cha Chiuta withu. Ndipo nkhanozgera vyakuzengera.”

³Kweni Chiuta wakati kwa ine, “Ungandizengera nyumba chara pakuti ndiwe wa nkhondo ndiposo uli kuthiska ndopa.”

⁴Ndipouli FUMU, Chiuta wa Israele wakandisankha ine pakati pa wose ŵa mu nyumba ya ŵadada kuti ndiŵe karonga wa ŵaIsraele kwa muyirayira. Pakuti wakasankha Yuda kuŵa murongozgi ndiposo mu mbumba ya Yuda wakasankhamo nyumba ya ŵadada ndipo mukukondwa kwakhe wakandisankha ine mukati mu ŵana ŵanyane na kundimika kuŵa karonga pa charu chose cha Israele.

⁵Ndipo mu ŵana ŵane wose pakuti FUMU yandipa ŵana ŵanandi yasankhamo Solomoni mwana wane kukhara pa chizumbe cha ufumu wa FUMU uwo uli pa ŵaIsraele.

⁶Wakandiphalira wakati, “Solomoni mwana wako ndiyo wati wazengenge nyumba yane na malo gha kuwunganamo pakuti ndiyo ndamusankha kuŵa mwana wane ndipo ine nditi ndiŵenge wiske.

⁷Nditi ndikhozge ufumu wakhe kwa muyirayira, usange wakuŵikapo mtima pakusunga marango ghane na pakurondezga vilayizgo vyane, nga ndi umo kuliri muhanya uno.”

⁸Ntheura sono panthazi pa ŵaIsraele wose, na wumba wa FUMU apo Chiuta withu wakupulika sungani ndipo mufikepo na kumanyiska marango ghose gha FUMU, Chiuta winu mwakuti charu ichi chiweme chiŵenge chinu, ndipo muŵasidire ŵana ŵinu kuŵa chiharo chawo pamanyuma pinu kwa muyirayira.

⁹Ndipo iwe Solomoni mwana wane, ukwenera kumumanya Chiuta wa ndawuso na kumuteŵetera na mtima wose na khumbo lose, pakuti FUMU ndiyo yikusanda mitima yose ndiposo yikumanyiska vyose ivyo munthu wakughanaghana. Usange ukuyipenja yiti yovwire kuti uyisange. Kweni usange ukuyisida, iyo yiti yikutaye kwa muyirayira.

¹⁰Sono ughanaghane makora pakuti FUMU yasankha iwe kuti uyizengere nyumba yeneiyo yiŵenge malo ghakhe ghakupatulika. Uŵe na nkhongono, ndipo uyizenge.

¹¹Penepapo Davide wakamupa Solomoni mwana wakhe chithuzithuzi cha khonde la Nyumba ya Chiuta, vipinda zakhe, vipinda vya kusungiramo vyuma, vipinda vya pachanya, vipinda vya ku Malo Ghakupatulika Nkhanira uko kukaŵa chibenekerero chakuphepiskirapo zakwananga.

¹²Wakaperekaso chikozgo cha kuwonerapo cha vyose vikaŵa mu mtima wakhe na cha malo gha kuwunganamo gha mu Nyumba ya Chiuta na vipinda vyose vya kuzingirizga na vyakusungiramo vyuma vya Nyumba ya FUMU, ndiposo cha nyumba yakusungiramo vyawanangwa vya kupatuliskika.

¹³Wakaperekaso kanozgero ka ndondomeko ya ŵasofi na ŵaLevi, ndiposo na milimo yose ya chisopo cha mu Nyumba ya FUMU.

¹⁴Wakarongosora uzitu wa viteŵetero vyose vya golide na siliva pa chisopo chilichose.

¹⁵Uzitu wa vya kuŵikapo nyali za golide na nyali zakhe, uzitu wa golide wa chakuŵikapo nyali chilichose na nyali zakhe, uzitu wa siliva wa vyakuŵikapo nyali na nyali zakhe, kwakuyana na nchito ya chilichose cha kwimapo nyali,

¹⁶uzitu wa golide la thebulu lirilose la chingwa chakurongora uŵapo wa FUMU, siliva la matebulu gha siliva

¹⁷ndiposo na golide mwenecho wakupangira maforoko, mabeseni na nkhombo. Wakarongosora za uzitu wa ŵadira ŵa golide, awo mbakumijira na uzitu wa dira waliyose, uzitu wa ŵadira ŵa siliva na uzitu wa dira waliyose.

¹⁸Wakarongosora za uzitu wa golide lakwengeka makora la kunozgera jochero la sembe ya vyakununkhira. Wakapereka chakuwonerapo chakhe cha gareta la golide la ŵakerubi, ŵeneawo ŵakatandazga mapapindo ghawo na kubenekerera Bokosi la Phangano la FUMU.

¹⁹Davide wakati, “Vyose ivi ndarongosora kwakuyana na ivyo vikalembeka na urongozgi wa FUMU. Nchito yose yichitike kwakuyana na umo yanozgekera.”

²⁰Pamanyuma Davide wakamuphalira mwana wakhe Solomoni wakati, “Uŵe wankhongono na wakukhwima mtima ndipo uchite ntheura. Ungopanga chara ndipo ureke kuthika lusoko pakuti FUMU Chiuta, inya Chiuta wane, wali nawe. Kuti wakurekererenge chara nesi kukujowola waka, usuke umare mlimo wose uwo ukukhumbikwa pa nchito ya Nyumba ya Chiuta.

²¹Iyi ndiyo ndondomeko ya ŵasofi na ŵaLevi pa chisopo cha mu Nyumba ya Chiuta. Pamoza nawe paŵe munthu waliyose uyo ngwa mtima wakujipereka, mweneuyo ndi nkhwantha pa uteŵeti wa mtundu uliwose, ndiyo wati wakovwirenge. Ndiposo ŵarongozgi na ŵanthu wose ŵati ŵaŵe pasi pako nkhanirankhanira.”