Read new_tumbuka_bible 1 Midauko 29 Bible Online

1 Midauko 29 - new_tumbuka_bible bible

1 Midauko 29

¹Pamanyuma Karonga Davide wakayowoya ku wumba wose wa ŵanthu ŵakati, “Mwana wane Solomoni mweneuyo Chiuta yekha pera wamusankha, ndi mwanichi na wambula kumanya vinandi ndipo mlimo uwu ngukuru. Pakuti nyumba iyi kuti yiŵenge ya munthu chara kweni ya FUMU Chiuta.

²Ntheura ndapereka vyose ivyo vikukhumbikwa pa Nyumba ya Chiuta wane, umo ndamanyira, golide pa vinthu ivyo vikukhumba golide na siliva pa vinthu ivyo vikukhumba siliva ndiposo na mkuŵa pa vinthu ivyo vikukhumba mkuŵa, chisulo pa vinthu ivyo vikukhumba chisulo ndiposo na makuni pa vinthu ivyo vikukhumba makuni. Ndaperekaso mawe ghanandi gha onike ndiposo na mawe ghakutowa agho nga nchito ya kubatika, na mawe ghakung'anima, mawe ghakuzirwa na gha mitundu yakupambanapambana na masangalawe ghanandinandi.

³Kweniso, kusazgirapo pa vyose ivyo nkhapereka ku nyumba yakupatulika, ndili na vyuma vyane na vyane vya golide na siliva, ndipo pakuti nkhukondwera nayo Nyumba ya Chiuta wane, nkhuvipereka ku Nyumba ya Chiuta wane.

⁴Nkhupereka matani gha golide 100, golide lakhe lakufuma ku charu cha Ofiri, ndiposo matani 240 gha siliva lakwengeka makora. Vyose ivi vizamkuŵa vyakutozgera viliŵa vya nyumba,

⁵ndiposo na nchito zose zakuchitika na zinkhwantha pakupanga vinthu vya golide na golide ndipo vya siliva na siliva. Kasi sono ndi njani uyo muhanya uno wakukhumba kupereka mu wanangwa kanthu kwa FUMU?”

⁶Penepapo ŵakuruŵakuru ŵa nyumba za ŵawiskewokuru ŵakapereka vyawanangwa vyawo mu wanangwa nga ndi umo ŵakachitira awo ŵakawusanga mu mafuko gha Israele na ŵarongozgi ŵa ŵasilikari 1,000 na ŵa ŵasilikari 100, ndiposo na nduna izo zikawonanga mlimo wa karonga.

⁷Wose ŵakapereka kuti viwovwire pa mlimo wa Nyumba ya Chiuta mwa ntheura: Matani 170 gha golide, makilogiramu 84 gha ndarama za golide za mtundu unyakhe, matani 340 gha siliva, matani 620 gha mkuŵa, ndipo matani ghakujumpha 3,400 gha chisulo.

⁸Waliyose uyo wakaŵa na mawe ghakuzirwa wakaghapereka ku chakusungiramo vyuma cha Nyumba ya FUMU. Yehiyele, muGerishoni, ndiyo wakapwerereranga ivi.

⁹Ŵanthu ŵakasekerera chifukwa cha vyose ivi vikaperekeka kwa wanangwa, pakuti ŵakapereka kwa FUMU na mtima wose. Karonga Davide nayo wakasekerera chomene.

¹⁰Ntheura Davide wakachindika FUMU panthazi pa wumba wose. Iyo wakati, “Muchindikike kwa muyirayira imwe, Mwe FUMU, Chiuta wa Israele sekuru withu.

¹¹Mwe FUMU, ukuru ndiwo ngwinu na nkhongono na uchindami, na kuvivya ndiposo na ufumunkhuru. Pakuti vyose vya kuchanya na vya mu charu nvyinu. Mwe FUMU, winu ndi ufumu, ndiposo ndimwe mukuwusa vyose.

¹²Usambazi na nchindi vikufuma kwa imwe, ndipo mukuwusa pa vyose. Mu woko linu muli mazaza na nkhongono ndipo imwe mukupereka nkhongono na mankharo mu vyose.

¹³Ntheura sono, Chiuta withu, tikumuwongani na kurumba zina linu la uchindami.

¹⁴“Kweni kasi ine ndine njani, ŵanthu ŵane nkhachichi, kuti tipereke kwa wanangwa ntheura. Pakuti vyose vikufuma kwa imwe, tikumupani ivyo vyafumira mu woko linu?

¹⁵Pakutiso ise tili ŵalendo panthazi pinu, ndiposo ŵanthu awo mbakupanjwamo nawo waka nga ndi umo ŵakaŵira ŵasekuru ŵithu. Mazuŵa ghithu pa charu ghali nga ndi muzgezge para ukujumpha ndipo ghakukhalirira chara.

¹⁶Mwe FUMU Chiuta withu, mphango zose izi, zeneizo tapereka kuti timuzengerani imwe nyumba chifukwa cha zina linu lituŵa, zafumira kwa imwe ndipo vyose nvyinu.

¹⁷Chiuta wane, nkhumanya kuti ndimwe mukusanda mitima ndipo mukukondwa na ŵanthu ŵakunyoroka mu mtima. Mu kunyoroka kwa mtima wane ndapereka vyose ivi, ndipo sono ndawona ŵanthu ŵinu awo ŵali pano, kupereka kwa imwe mu wanangwa na mu kukondwa kukuru.

¹⁸Mwe FUMU, Chiuta wa Abrahamu, na Yisake na Israele, ŵasekuru ŵithu, musungilire kwa muyirayira dango ili na maghanoghano agha mu mitima ya ŵanthu ŵinu, na kurongozgera mitima yawo kwa imwe.

¹⁹Mupereke kwa Solomoni mwana wane mtima wakufikapo, kuti wasungilire marango ghinu, vipanikizgo vyinu, ndiposo na vilayizgo vyinu. Wavirondenge vyose kuti wazenge nyumba yeneiyo ndayinozgera vyakuzengera.”

²⁰Penepapo Davide wakati ku ungano wose, “Chindikani FUMU, Chiuta winu.” Ŵanthu ŵakasindama na kusopa FUMU ndipo ŵakamulambira karonga.

²¹Na machero ghakhe ŵaIsraele ŵakapereka kwa FUMU sembe zakocha mburuma izi: nkhambako 1,000, mberere zanarume 1,000, ŵana-mberere 1,000, pamoza na sembe ya vyakumwa na sembe zakukoma zinandinandi kuŵaperekera ŵaIsraele wose.

²²Pa zuŵa lira wakarya na kumwa panthazi pa FUMU na kukondwa kukuru. Pamanyuma pakhe ŵakamwimika Solomoni mwana wa Davide kuŵa karonga kwa nyengo ya chiŵiri ndipo wakamuphakazga mafuta kuŵa nduna ya FUMU. Nayo Zadoki wakamuphakazga kuŵa musofi.

²³Ndipo Solomoni wakakhara pa chizumbe cha FUMU nga ndi karonga mu malo gha wiske Davide. Vinthu vikamwendera makora ndipo ŵaIsraele wose ŵakamupulikira.

²⁴Ŵarongozgi na vinkhara vya nkhondo, ndiposo na ŵana wose ŵa Karonga Davide, ŵakachita chirapo na kumulambira Karonga Solomoni.

²⁵FUMU yikamukwezga chomene Solomoni panthazi pa ŵaIsraele wose. Yikamupa ufumunkhuru weneuwo kuti wakaŵapo nawo na kale chara karonga yunji mu charu cha Israele.

²⁶Ntheura ndimo Davide mwana wa Yese wakawusira pa ŵaIsraele wose.

²⁷Wakawusa charu cha Israele virimika 40. Virimika vinkhonde na viŵiri wakawusira mu msumba wa Heburoni ndipo virimika 33 wakawusira mu msumba wa Yerusalemu.

²⁸Sono wakafwa muchekuru chomene. Wakaŵa wa virimika vinandi, wa usambazi unandi, ndiposo na wakuchindikika. Solomoni mwana wakhe ndiyo wakawusa mu malo ghakhe.

²⁹Sono milimo ya Karonga Davide, kufuma pa kwamba kwa kuwusa kwakhe mpaka ku umaliro wakuwusa kwakhe, yili kulembeka mu mabuku gha mudauko wa nchimi Samuele, wa nchimi Natani, ndiposo na muwoni Gadi.

³⁰Mwenemumo ndimo ŵali kuyowoya makani gha kuwusa kwakhe na mazaza ghakhe ghose, ndipo na vyose ivyo vikamuwonekera iyomwene ndiposo na ivyo vikawonekera fuko la Israele ndiposo na ivyo vikawonekera maufumu gha vyaru vinyakhe.