Read new_tumbuka_bible 1 Midauko 4 Bible Online

1 Midauko 4 - new_tumbuka_bible bible

1 Midauko 4

¹Ŵana ŵa Yuda ndi aŵa: Perezi, Hezironi, Karimi, Huru na Shobala.

²Reyaya mwana wa Shobala ndiyo wakababa Yahati, Yahati wakababa Ahumayi na Lahadi. Aŵa ndiwo ŵakaŵa mbumba za ŵaZorati.

³Ŵana ŵa Etamu ŵakaŵa aŵa: Yezireyele, Ishima na Idibashi, na mudumbu wawo Hazeleleponi,

⁴ndiposo na Penuyele wiske wa Gedoro na Ezere wiske wa Husha. Aŵa ndiwo ŵakaŵa ŵana ŵa Huru mwana wa uŵere wa Efurati ndiposo wiske wa Betelehemu.

⁵Ashuru wiske wa Tekowa, wakaŵa na ŵanakazi ŵaŵiri, Hela na Naara.

⁶Naara wakamubabira Ahuzamu, Hefere, Temeni na Haahashitari. Aŵa ndiwo ŵakaŵa ŵana ŵa Naara.

⁷Ŵana ŵa Hela ŵakaŵa aŵa: Zereti, Izihara, Zohara, na Etinani,

⁸Kozi wakababa Anubu, Zobeba na mbumba za Aharihele mwana wa Harumu.

⁹Kukaŵa munthu munyakhe zina lakhe Yabezi mweneuyo ŵakamuchindika kuruska ŵana ŵanyakhe. Nyina wakamuthya zina lakuti Yabezi pakuti wakapulika vyakuŵinya pakumubaba.

¹⁰Yabezi wakaromba kwa Chiuta wa Israele wakati, “Mwe Chiuta wane, nkhuromba kuti munditumbike ndipo mukuzge charu chane. Muŵe nane ndipo mundisungilire ku uheni mwakuti ndireke kunjira mu visuzgo.” Ntheura Chiuta wakamupa icho wakaromba.

¹¹Kelubu mwana munyakhe na Shuha wakababa Mehiri, mweneuyo wakababa Eshitoni.

¹²Eshitoni wakababa Beti Rafa, Paseya na Tehina wiske wa Iri Nahashi. Aŵa ndiwo ŵakaŵa ŵaReka.

¹³Ŵana ŵa Kenazi ndi aŵa: Otiniyele na Seraya. Ŵana ŵa Otiniyele ndi aŵa: Hatati na Meyonotayi.

¹⁴Meyonotayi wakaŵa wiske wa Ofura. Seraya wakababa Yowabu wiske wa ŵaGeharashimu. Ŵakachemeka ntheura pakuti ŵanthu aŵa ŵakaŵa ŵasiri.

¹⁵Ŵana ŵatatu ŵa Kalebu mwana wa Yefune ndi aŵa: Iru, Ela na Naamu. Mwana wa Ela wakaŵa Kenazi.

¹⁶Ŵana ŵa Yehalelele ndi aŵa: Zifu, Zifa, Tiriya na Asarele.

¹⁷Ŵana ŵa Ezira ndi aŵa: Yetere, Meredi, Efere na Yaloni. Meredi wakatora Bitiya mwana mwanakazi wa Faro. Bitiya wakaŵa na nthumbo ndipo wakababa Miriyamu, Shamayi na Ishiba mweneuyo wakaŵa wiske wa Eshitemowa.

¹⁸Muwoli wakhe muYuda wakababa Yaredi, wiske wa Gedoro, na Hebere, wiske wa Soko, ndiposo na Yekutiyele, wiske wa Zanowa. Ŵeneaŵa ŵakaŵa ŵana ŵa Bitiya, mwana mwanakazi wa Faro uyo Meredi wakamutora.

¹⁹Ŵana ŵa muwoli wa Hodiya, mudumbu wakhe wa Nahamu, ndiwo wakababa Keyila wa fuko la Garimu ndiposo na Eshitemowa wa fuko la Maaka.

²⁰Ŵana ŵa Shimoni ndi aŵa: Amunoni, Rina, Beni Hanani na Tiloni. Ŵana ŵa Ishi ndi aŵa: Zoheti na Beni Zoheti.

²¹Ŵana ŵa Shela mwana wa Yuda ndi aŵa: Ere mweneuyo wakababa Leka, Laada mweneuyo ndi wiske wa Maresha, ndiposo na mbumba za awo ŵakarukanga salu za bafuta ku Beti Ashibeya,

²²ndiposo na Yokimu na ŵanthu ŵa ku Kozeba, Yowashi na Sarafu, mweneuyo wakawusanga ku Mowabu kweni wakawerera ku Betelehemu (Mudauko uwu ngwa kale.)

²³Ŵeneaŵa ndiwo ŵakaŵa ŵawuvi ŵa viŵiya ndiposo ŵakaŵa ŵenekaya ŵa ku Netayimu na Gedera. Ŵakakhara kwenekura pamoza na karonga na kuchita milimo yakhe.

²⁴Ŵana ŵa Simiyoni ndi aŵa: Nemuyele, Yamini, Yaribu, Zera, na Shawulu.

²⁵Shawulu wakababa Shalumu, Shalumu wakababa Mibisamu ndipo Mibisamu wakababa Mishima.

²⁶Ŵana ŵa Mishima ndi aŵa: Hamuwele mweneuyo wakababa Zakuru, ndipo nayo Zakuru wakababa Shimeyi.

²⁷Shimeyi wakaŵa na ŵana ŵanarume 16 na ŵana ŵanakazi ŵankhonde na yumoza. Kweni ŵana ŵanyakhe na Shimeyi kuti ŵakaŵa na ŵana ŵanandi chara nanga ndi mbumba yawo yose kuti yikandana nga ndi ŵaYuda chara.

²⁸Iwo ŵakakharanga ku Beyeresheba, Molada, Hazara Shuwala,

²⁹Biliha, Ezemu, Toladi,

³⁰Betuwele, Horima, Zikilagi,

³¹Beti Marikaboti, Hazara Susimu, Beti Biri, na Shaarayimu. Iyi yikaŵa misumba yawo kuya kafika pa nyengo iyo Davide wakamba kuwusa.

³²Ndipo vikaya vyawo vikaŵa ivi: Etamu, Ayini, Rimoni, Tokeni, na Ashani pamoza msumba yinkhonde,

³³kusazgirapo vikaya vinyakhe vyose vyeneivyo vikayizingirizga misumba iyi kuya kafika ku Baala. Ivi ndivyo vikaŵa vikaya vyawo, ndipo ŵakasungilira makora mudauko wa ndondomeko ya miwiro yawo.

³⁴Mazina ghawo ghakalembeka ntheura: Meshobabu, Yamuleki, Yosha mwana wa Amaziya,

³⁵Yoyele, Yehu mwana wa Yoshibiya mwana Seraya, Seraya mwana wa Asiyele,

³⁶Eliyoyenayi Yaakoba, Yeshohaya, Asaya, Adiyele, Yesimiyele, Benaya,

³⁷Ziza mwana wa Shifi, Shifi mwana wa Aloni, Aloni mwana wa Yedaya, Yedaya mwana wa Shimuri, Shimuri mwana Shemaya.

³⁸Ŵanthu aŵa mazina ghazunurika pachanya ndiwo ŵakaŵa ŵararaŵarara mu mbumba zawo. Ŵanthu mu nyumba za ŵawiskewokuru ŵakandana chomene.

³⁹Iwo ŵakenda kuya kafika pa unjiliro wa msumba wa Gedoro ku dera la ku mafumiro gha dazi kwa chidika, kupenja maluhari gha mberere na mbuzi zawo.

⁴⁰Kwenekuko ŵakasanga luhari luweme na lwa kubiriŵira. Charu nacho chikaŵa chisani, cha bata na cha mutende. Ŵanthu awo ŵakaŵa mwenemura kale ŵakaŵa ŵaHamu.

⁴¹Mu mazuŵa gha Hezekiya karonga wa charu cha Yuda, ŵanthu aŵa ŵalembeka mazina apa wakiza na kupankhura mahema ghawo na kuŵakoma ŵaMeyunimu awo ŵakakharanga mwenemura. Ŵakaŵamalirathu mwakuti ŵakupulikikwaso chara mpaka sono. Iwo ŵakakhazikika mu malo ghawo ghara pakuti mukaŵa maluhari ghakuryeskeramo mberere na mbuzi zawo.

⁴²ŴaSimiyoni ŵanyakhe 500 ŵakaruta ku Phiri la Edomu pasi pa urongozgi wa ŵana ŵa Ishi aŵa: Pelatiya, Neyariya, Refaya na Uziyele.

⁴³Iwo ŵakaŵakoma ŵanthu awo ŵakakharako mu ŵaAmaleki ŵeneawo ŵakaphokwa ndipo ŵakakhara kwenekura mpaka sono.