Read new_tumbuka_bible 1 Midauko 5 Bible Online

1 Midauko 5 - new_tumbuka_bible bible

1 Midauko 5

¹Aŵa ndiwo ŵa mphapu ya Rubeni mwana wa uŵere wa Israele. (Rubeni wakaŵa nadi mwana wa uŵere, kweni chifukwa wakagonana na yumoza wa ŵawoli ŵachoko ŵa ŵawiske, uŵere wakhe ukapika ku ŵana ŵa Yosefe mwana wa Israele. Ntheura walije kulembeka mu ndondomeko ya miwiro kwakuyana na uŵere.

²Nangauli ŵaYuda ŵakaŵa ŵankhongono kuruska ŵana ŵanyawo na kuti mwa iyo mukafumira karonga mukuru, kweni uŵere wakhe ukaŵa wa Yosefe.)

³Ntheura ŵana ŵa Rubeni wa uŵere wa Israele ndi aŵa: Hanoki, Palu, Hezironi na Karimi.

⁴Ŵana ŵa Yoyele ndi aŵa: Shemaya, ndipo Shemaya wakababa Gogi, Gogi wakababa Shimeyi, Shimeyi wakababa Mika,

⁵Mika wakababa Reyaya, Reyaya wakababa Baala,

⁶Baala wakababa Beyera, mweneuyo Tigilati Pilesere, karonga wa charu Asiriya wakamutorera ku umikori. Iyo ndiyo wakaŵa mukuru mu ŵaRubeni.

⁷Ŵabali ŵakhe ŵakapendeka mbumba na mbumba kwakuyana na miwiro yawo. Mukuru wakaŵa Yeyiyele, mbwenu Zakariya.

⁸Ndiposo na Bela mwana wa Azazi. Sono Azazi wakaŵa mwana wa Shema ndipo Shema wakaŵa mwana wa Yoyele. Iwo ŵakakharanga ku Aroyere na kubaralika kuya kafika ku Nebo na ku Baala Meyoni.

⁹Iwo ŵakakharaso ku dera la ku mafumiro gha dazi charu chawo chikaya kafika ku unjiliro wa chiparamba, dera lino la mronga wa Yufurate, chifukwa ng'ombe zawo zikandana chomene mu charu cha Gileyadi.

¹⁰Mu mazuŵa gha Sauli, ŵaRubeni ŵakarwa nkhondo na ŵaHagara awo ŵakaŵathereska. ŴaRubeni ŵakakhara mu mahema ghawo mu chigaŵa chose cha ku mafumiro gha dazi kwa Gileyadi.

¹¹Ŵana ŵa Gadi ŵakakhara kudunjikana nawo mu charu cha Bashani kuya kafika ku Saleka.

¹²Mukuru wawo wakaŵa Yoyele, wa chiŵiri wakaŵa Shafamu, Yanayi ndiposo na Shafati ku Bashani.

¹³Ŵabali ŵawo kwakuyana na nyumba za ŵawiskewo ŵakaŵa ŵankhonde na ŵaŵiri aŵa: Mikayele, Meshulamu, Sheba, Yorayi, Yakani, Ziya na Ebere.

¹⁴Aŵa ndiwo ŵakaŵa ŵana ŵa Abihayili mwana wa Huri, mwana wa Yarowa mwana wa Gileyadi, mwana wa Mikayele, mwana wa Yeshishayi, mwana wa Yado, mwana wa Buzi.

¹⁵Ahi wakaŵa mwana wa Abidiyele, Abidiyele wakaŵa mwana wa Guni, uyo wakaŵa murara mu nyumba za ŵawiskewo.

¹⁶ŴaGadi ŵakakharanga ku chigaŵa cha Gileyadi mu charu cha Bashani na mu mizi yakhe, ndiposo na mu charu chose cha maluhari gha mu Sharoni kuya kafika ku mphaka zakhe.

¹⁷(Wose aŵa ŵakalembeka kwakuyana na ndondomeko ya miwiro yawo mu mazuŵa gha Yotamu karonga wa charu cha Yuda, na mu mazuŵa gha Yerobowamu karonga wa charu cha Israele.)

¹⁸Ŵa fuko la Rubeni, ŵa fuko la Gadi na hafu wa fuko la Manase ŵakaŵa na vinkhara ivyo vikamanya kurwa nkhondo na nguru, na lupanga ndiposo na mauta. Wose pamoza ŵakaŵa 44,760 ŵakunozgekera kurwa nkhondo.

¹⁹Iwo ŵakarwa na ŵaHagara, ŵaYeturu, ŵaNafishi na ŵaNodabu.

²⁰Sono para Chiuta wakaŵawovwira pakurwa nkhondo na mafuko ghanyakhe ŵakathereskeka. Iwo ŵakarombanga kwa Chiuta apo ŵakarwanga, ndipo Chiuta wakapulika kuŵeya kwawo chifukwa ŵakamugomezga.

²¹Ŵakaŵapoka ŵangamila 50,000, mberere 250,000, mbunda 2,000. Ŵakakoraso ŵanthu ŵamoyo 100,000.

²²Ŵanthu ŵanandi ŵakakomeka chifukwa nkhondo yikaŵa ya Chiuta. Iwo ŵakakhara mu malo ghawo mpaka pa ŵakaŵathereska mpaka pa nyengo ya kutorekera ku umikori.

²³Ŵanthu hafu wa fuko la Manase ŵakakharanga mu charu chira cha ku mafumiro gha dazi. Iwo ŵakaŵa ŵanandi chomene kufuma ku chigaŵa cha Bashani na kuya kafika Baala Heremoni, Seniri na ku Phiri la Heremoni.

²⁴Ŵararaŵarara mu mbumba za ŵawiskewo ŵakaŵa aŵa: Efere, Ishi, Eliyele, Aziriyele, Yeremiya, Hodaviya ndiposo na Yadiyele. Iwo aŵa ŵakaŵa vinkhara mu nkhondo, na ŵakumanyikwa ndiposo ŵarongozgi mu nyumba za ŵawiskewo.

²⁵Kweni ŵanthu ŵara ŵakamwanangira Chiuta wa ŵawiskewokuru. Iwo ŵakachita uzaghali pakurondezga ŵachiuta ngoza ŵa ŵenecharu chira, ŵanthu ŵeneawo Chiuta wakaŵamara panthazi pawo.

²⁶Ntheura Chiuta wa Israele wakawuska mtima wa Pulu uyo zina linyakhe likaŵa Tigilati Pilesere, karonga wa charu cha Asiriya, ndipo wakaŵayora ŵa fuko la Rubeni, ŵa fuko la Gadi na hafu wa fuko la Manase na kuruta nawo ku Hala, ku Haboro, ku Hara na ku mronga wa Gozani kwenekuko ŵakukhara mpaka sono.