Read new_tumbuka_bible 2 Midauko 1 Bible Online

2 Midauko 1 - new_tumbuka_bible bible

2 Midauko 1

¹Solomoni mwana wa Davide wakakhozga ufumu wakhe ndipo FUMU, Chiuta wakhe wakaŵa nayo na kumupa nkhongono zinandi chomene.

²Solomoni wakayowoya ku ŵarongozgi ŵa ŵaIsraele wose, ŵarongozgi ŵa ŵasilikari ŵakurongozga ŵasilikari 1,000 na ŵasilikari 100, ŵeruzgi na ŵarongozgi ŵa charu chose cha Israele ŵeneawo ŵakaŵa ŵararaŵarara ŵa zimbumba.

³Penepapo Solomoni na wumba wose wa ŵanthu ŵara ŵakaruta ku malo gha pachanya ghakusoperako ku msumba wa Gibeyoni. Pakuti kwenekura ndiko kukaŵa Chihema Chakukumaniranamo icho Mozesi muteŵeti wa FUMU wakazenga mu mapopa.

⁴(Kweni Davide wakaŵa kuti wiza nalo kale Bokosi la Phangano la Chiuta, kufuma ku msumba wa Kiriyati Yeyarimu. Kwenekura ndiko iyo wakalinozgera malo, pakuti wakalijinthira Chihema ku msumba wa Yerusalemu.)

⁵Ndiposo kwenekura ndiko kukaŵa jochero la mkuŵa ilo Bezalele mwana wa Uri, muzukuru wa Huru wakazenga. Jochero ili likaŵa panthazi pa Chihema Chakupatulika cha FUMU ndipo Solomoni pamoza na wumba wose wa ŵanthu ŵakaruta kwenekura kuti ŵakasope FUMU.

⁶Karonga Solomoni wakakwerera kwenekura ku jochero la mkuŵa panthazi pa FUMU leneilo likaŵa mu Chihema Chakukumaniranamo kuti wakayisope FUMU ndipo wakakoma viŵeto 1,000 na kuvipereka kuŵa sembe zakocha pa jochero lira.

⁷Usiku wenewura, Chiuta wakamuwonekera Solomoni ndipo wakati kwa iyo, “Romba chilichose icho ukukhumba kuti ndikupe.”

⁸Solomoni wakazgora Chiuta wakati, “Mwe FUMU mukarongora chisungusungu chikuru kwa Davide ŵadada ndipo sono mwandiŵika ine kuŵa karonga mu malo ghawo.

⁹Sono imwe, Mwe FUMU Chiuta, ivyo mukapangana kwa Davide ŵadada muvifiske, pakuti mwandimika ine kuŵa karonga wakuwusa ŵanthu ŵanandi chomene ŵakuŵa nga ndi muchenga wa charu.

¹⁰Ntheura sono mundipe mahara na umanyi kuti ndirongozgere ŵanthu aŵa pakuti kasi wangaŵa njani uyo wangamanya kuwusa ŵanthu ŵanandinandi nga ndi aŵa?”

¹¹Chiuta wakazgora Solomoni wakati, “Pakuti waghanaghana cheneichi mu mtima wako ndipo ulije kuromba usambazi, panji vyuma, panji nchindi kufumira ku ŵanthu, panji umoyo wa ŵarwani ŵako, ndiposo pakuti ulije kujirombera umoyo utali, kweni waromba mahara na umanyi wakurongozgera ŵanthu ŵane awo ndakwimika kuŵa karonga wawo,

¹²ntheura mahara na umanyi viti vipikenge kwa iwe. Ndipo nditi ndikupeso usambazi, vyuma na nchindi vyeneivyo palije na yumoza wakaŵapo navyo pa ŵakaronga awo ŵakaŵako pambere iwe undaŵeko ndiposo kwamkuŵavye na yumoza wakuŵa navyo mwa awo ŵati ŵizenge pamanyuma pako.”

¹³Ntheura Solomoni wakawerera ku Yerusalemu kufuma ku malo gha pachanya ghakusoperako mu msumba wa Gibeyoni, uko kukaŵa Chihema Chakukumaniranamo. Ndipo wakarutilira kuwusa ŵaIsraele.

¹⁴Karonga Solomoni wakawunjika magareta na ŵasilikari ŵakukwera pa mahachi. Magareta ghakaŵa 1,400 ndipo mahachi ghakaŵa 12,000. Ŵasilikari ŵanji wakaŵaŵika mu misumba yinyakhe ndipo ŵanji wakaŵaŵika pamoza na iyo mu msumba wa Yerusalemu.

¹⁵Pa nyengo ya Karonga Solomoni siliva na golide vikaŵa vinandi mu msumba wa Yerusalemu ndipo vikazara nga ndi mawe ndiposo makuni gha milanje nagho ghakaŵa ghanandi waka nga ndi makuni gha vikuyu mu vidika.

¹⁶Mahachi gha Solomoni ghakachemeskekanga kufuma ku charu cha Eguputo na ku Kuwe,[1] ndipo ŵamalonda ŵa karonga ndiwo ŵakagulanga mahachi na magareta agha kufuma ku Kuwe.

¹⁷Magareta ghakachemeskekanga kufuma ku Eguputo pa ndarama za siliva 600 ndipo mahachi pa 150. Ndipo iwo ndiwo ŵakaguliskanga ku ŵakaronga ŵa ŵaHiti na ŵa ŵaSiriya.